နိုင်ကွက်ကိုင်လျက်၊ 

အပိုင်နှက်

ချုပ်ကွက်မိသတည်း။      ။

မြန်မာက တရုတ်ကို ချုပ်ကွက်နဲ့နိုင်

အောင်လအန်ဆန်းက တရုတ်ဖိုက်တာကို အနိုင်ရခဲ့တယ်။ အမေရိကန်နိုင်ငံမှာ ကျင်းပတဲ့ One Championship မစ်ဒယ်လ်ဝိတ်တန်း သိုင်းပေါင်းစုံ MMA ယှဥ်ပြိုင်ထိုးသတ်ပွဲမှာ တရုတ်နိုင်ငံက ဖန်ရောင်းကို မြန်မာ့စပါးအုံး အောင်လအန်ဆန်းက ဒုတိယအချီ ၄၇ စက္ကန့်အတွင်းမှာပဲ အနိုင်ရခဲ့ပါတယ်။ ဖန်ရောင်းက အောင်လကို လှဲချပြီး အနိုင်ယူဖို့ ကြိုးပမ်းပေမဲ့ အောင်လက ဖန်ရောင်းရဲ့လည်ပင်းကို အမြန်ချုပ်နိုင်ခဲ့တဲ့အတွက် အဲဒီ “ချုပ်ကွက်” အောက်မှာ ဖန်ရောင်းက အရှုံးပေးခဲ့ရပါတယ်။ ပွဲအပြီးမှာ အောင်လက သူ မြန်မာပြည်က ဖြစ်ကြောင်းနဲ့ မြန်မာပြည်အတွက် ဆုတောင်းပေးကြဖို့ ပြောသွားခဲ့ပါတယ်။

ဒါက ဘီဘီစီမြန်မာပိုင်း သတင်းပါ။ မြန်မာကစားသမားက တရုတ်ကစားသမားကို ချုပ်ကွက်နဲ့ နိုင်လိုက်တာ။

တရုတ်က မြန်မာကို ချုပ်ကွက်နဲ့နိုင်

တရုတ်နိုင်ငံက မြန်မာကို နိုင်နေတာ ၁၉၈၈ ကတည်းကပါ။ ၈၈၈၈ အရေးတော်ပုံကြီးအပြီး ကမ္ဘာ့အသိုင်းအဝိုင်းက ဆန်ရှင်တွေလုပ်တော့ နဝတ နအဖ စစ်အစိုးရဟာ တရားအားထုတ် တရုတ်အားထားခဲ့ကြရပေတာပါ့။ ၃၅ နှစ်ကြာပါပြီ။ စီးပွားရေးအရ၊ သံတမန်ရေးအရ (ဗီတိုသုံးကန့်ကွက်ပေးတာမျိုး) တရုတ်ဟာ မြန်မာစစ်အုပ်စုကို ကူပေးတယ်။ ဒီတော့ စစ်အာဏာရှင်တွေဟာလည်း တရုတ်ခိုင်းသမျှ ခေါင်းညိတ်ကြရတော့တယ်။ တရုတ်စီမံကိန်းတွေ၊ တရုတ်ပရောဂျက်၊ တရုတ်ကုမ္ပဏီတွေ၊ တရုတ်လုပ်ငန်းတွေ မြန်မာပြည်မှာ လက်ညှိုးထိုးမလွဲပေါ့။ မြန်မာပြည်က အကျိုးအမြတ်နည်းနည်းပဲရ၊ တရုတ်က အများကြီးရ ရင်နာစရာပါ့။ တရုတ်က မြန်မာကို ချုပ်ကွက်ရှိတာကိုး။

စစ်အာဏာရှင်ချုပ်ကွက် နိုင်ငံရေးပျက်

မြန်မာ့နိုင်ငံရေးခေါင်းဆောင်တွေ၊ ပါတီဦးဆောင်သူတွေ၊ တိုင်းရင်းသားခေါင်းဆောင်တွေ၊ ဘာသာရေးခေါင်းဆောင်တွေ၊ တက်ကြွလှုပ်ရှားသူတွေထဲက တချို့တချို့သောသူတွေဟာ နှစ်ပေါင်းများစွာ သူတို့မွေးလာတဲ့ကြက် တရက်တည်းမှာ ရိုက်သတ် ချက်စားလိုက်ကြတယ်။ ဒီလို ရိုက်သတ်ချက်စားထားတာ ဘယ့်ကလောက် ကြာခဲ့ကြပြီလည်းတော့ မသိပါ။ နွေဦးတော်လှန်ရေးမှာ ဖားလား ငါးလား ကွဲကွဲပြားပြား သိလာရတာပါ။ ဘုံရန်သူ စစ်တပ်ကို တပ်ပေါင်းစုနဲ့ ညီညီညာညာ ဝိုင်းတိုက်ကြပါမယ်လို့ ကတိတွေ အကြိမ်ကြိမ် ရှိခဲ့ကြပြီးသားလေ။ သို့သော် ဒီနွေဦး ပွဲမှာတော့ တိုင်းရင်းသားပေါင်းစုံ၊ လူမျိုးစုံ၊ အယူဝါဒစုံ၊ ကိုးကွယ်ရာမတူ ဘာသာဝင်အသီးသီးက နည်းလမ်းမျိုးစုံနဲ့ တိုက်ပွဲဝင်နေချိန်မှာ သူတို့တတွေ မပါလာကြတော့ဘူး။ တချို့က တသီးပုဂ္ဂလပုံစံနဲ့၊ တချို့က အဖွဲ့လိုက်၊ တချို့က ခွဲထွက်ပြီး စစ်ဘောကို မသိမသာတမျိုး သိသိသာသာတမျိုးနဲ့တောင် မ နေကြပြီ။ ဒါတွေ ဖြစ်ရတာကလည်း ချုပ်ကွက်ပါပဲ။ စစ်အာဏာရှင်ချုပ်ကွက်၊ စစ်ကောင်စီချုပ်ကွက်။

စီးပွားရေးချုပ်ကွက် လောဘတက် အပျက်အပျက် နှာခေါင်းသွေးထွက်

တချိန်က လူမျိုးစုအရေး၊ ဒီမိုကရေစီအရေး၊ ကျောင်းသားအရေး၊ ဝါဒအရေး၊ ဘာသာရေး ရဲရဲတောက် သူရဲကောင်း ခေါင်းဆောင်များဟာ အခုတော့ စစ်တပ်ကပေးတဲ့ စီးပွားရေးလုပ်ခွင့်၊ လမ်းပရောဂျက်ပါမစ်၊ တံတားပရောဂျက်ပါမစ်၊ ကားပါမစ်၊ တိုက်ခန်း၊ အိမ်ရာ၊ မြေကွက်၊ ငွေကြေးအထောက်အပံ့၊ လုပ်ပိုင်ခွင့်၊ ရပိုင်ခွင့်တွေကြား နွံနစ်သလို နစ်နေကြတာ သိသူတွေ သိကြပါရဲ့။ မသိသူများ လေ့လာထားကြပါ။ စစ်အာဏာရှင်ရဲ့ စီးပွားရေးချုပ်ကွက် သူတို့အကုန်ပျက်။ ဒါကြောင့် ကွယ်လွန်သူ KNU ဥက္ကဋ္ဌ ဗိုလ်ချုပ်ကြီးမြက ပြောခဲ့တာပေါ့။ “ရန်သူနဲ့ စေ့စပ်ဆွေးနွေးထားတဲ့သူတွေဟာ ဝှေးသင်းထားတဲ့ နွားသိုးတွေလိုပဲ။ မျိုးလည်းမပွားတော့ဘူး၊ ဝှေ့လည်း မဝှေ့တော့ဘူး၊ ရုန်းလည်း မရုန်းတော့ဘူး။ ဝတော့ ဝလာတယ်။” ဆိုတာလေ။ စစ်အုပ်စုရဲ့ စီးပွားရေးချုပ်ကွက်။ နွားသိုးဝှေးသင်း ချုပ်ကွက်။

ကိုယ်တွေ့ချုပ်ကွက် ရင်ဖွင့်ချက်များ

မန္တလေး မစိုးရိမ်တိုက်သစ် အဓိပတိ မဟာနာယကချုပ် ဆရာတော်ကြီး ဦးရာဇဓမ္မာဘိဝံသ ပျံလွန်တော်မမူခင်က ဖူးတွေ့ဖူးတယ်။ အဲ့သည်တုန်းက ခင်ညွန့်ခေတ်ပေါ့။ ဆရာတော်ကြီးဟာ ၁၉၉၁ ခုနှစ် စစ်တပ် သံဃာသတ်မှုကြောင့် ပတ္တနိကုဇ္ဇန သပိတ်ကံဆောင်လို့ ထောင်ကျခဲ့ရတုန်းက အတွေ့အကြုံတွေ ပြန်ပြောပြတယ်။ ဆရာတော်ကြီးဟာ ထောင်ထဲမှာလည်း ဝိနည်းနဲ့အညီပဲ နေတာကို သိက္ခာဖျက်ဆီးချင်တော့ သူ့ကိုချုပ်ထားတဲ့ အခန်းထဲကို မိန်းမလျာ ထောင်သားတယောက် လာထည့်ပေးဖို့ ကြိုးစားတယ်တဲ့။ တကယ်ဆို ထောင်စည်းကမ်းအရ အဲ့သည်လိုအခန်းမှာ ၃ ယောက် ထားရင်ထားတယ်။ မဟုတ်ရင် ၁ ယောက်တည်းပဲ ထားတယ်တဲ့။ ၂ ယောက်မထားဘူး၊ လိင်တူကိစ္စတွေ ဖြစ်ကြမှာစိုးတာတဲ့။ အဲ့သည်လို မိန်းမလျာ လာထည့်တော့ အဝင်မခံဘဲ ကန်ကျောက်ထုတ်ပစ်မှ ကိစ္စအေးသွားသတဲ့။ နိုင်ငံရေးသမားတွေကို အညွန့်ချိုးဖို့ ကြိုးစားတဲ့လုပ်ရပ်ဆိုပြီး ဆရာတော်ကြီးက မိန့်ဖူးတယ်။ “နိုင်ငံရေးသမားတွေကို အောက်လမ်းနည်းသုံး ချုပ်ကွက်ပေါ့ကွ။” ဆိုပြီး ဆရာတော်ကြီးက မိန့်ခဲ့ဖူးတာပါ။

အောက်လမ်းချုပ်ကွက်

နောက်တယောက်ကတော့ ရန်ကြီးအောင်စိန်ဝင်းလို့ ထင်ရှားတဲ့ ကျွန်းပြန်ကြီးတဦး၊ သူက တကသ ဒုဥက္ကဋ္ဌလည်း လုပ်ခဲ့ဖူးတဲ့ ကျောင်းသားခေါင်းဆောင်။ သံမဏိလိုမာသူ နိုင်ငံရေးသမားကြီး၊ သူက  လူပျိုကြီး။ သူ့ကို အင်းစိန်ထောင်မှာ တယောက်တည်း အခန်းထဲမှာ ထားတုန်းကလည်း သူ့အခန်းထဲကို မိန်းမလျာ လာထည့်ဖူးတယ်။ သူက အဝင်လာမခံဘဲ မောင်းထုတ်ပစ်မှ ထောင်ဝန်ထမ်းတွေက မိန်းမလျာကို မသွင်းတော့တာ။ သမိုင်းရှိတဲ့ နိုင်ငံရေးသမားကြီးတွေကို မိန်းမလျာချုပ်ကွက်နဲ့ သမိုင်းကွေးအောင် လုပ်မည့်အကြံ။

မြှုပ်ထားတဲ့ စစ်ထောက်လှမ်းရေးချုပ်ကွက်

အခုအခါ ဥက္ကဋ္ဌ ဖြစ်နေတဲ့ တိုင်းရင်းသားလက်နက်ကိုင် တော်လှန်ရေးအဖွဲ့ ခေါင်းဆောင်က  ပြောတယ်။ သူတို့အဖွဲ့ ငြိမ်းချမ်းရေးဆွေးနွေးဖို့ သွားတော့ တည်းခိုဆောင်မှာ နေရာချထားတာက ခင်ညွန့်ထောက်လှမ်းရေးကတဲ့။ ခေါင်းဆောင် ၅ ယောက် သွားတာကို သီးသန့် ၅ ခန်းမှာထားတယ်တဲ့၊ တခန်းနဲ့တခန်းက ဝေးတယ်တဲ့။ ညဆို အခန်းထဲကို စစ်ထောက်လှမ်းရေးတွေကလာပြီး အရက်ယူမလား၊ ဘာစားချင်သလဲ။ စော်လေးတွေ လိုချင်သလား လာ လာ မေးသတဲ့။ ဘာမှမလိုဘူး ပြောတာတောင်မှ ကောင်မလေးတွေ ခေါ်လာပြီး အခန်းထဲ အတင်းထည့်တာတဲ့။ ထွက်ပြေးရတာပေါ့တဲ့။ ငြိမ်းချမ်းရေးဆွေးနွေးပွဲ သွားတဲ့ ကိုယ့်ခေါင်းဆောင် ငါးယောက်ကို ပြန်စုပြီး ၃ ရက်လုံးလုံး တခန်းထဲမှာပဲ စုအိပ်ခဲ့ရတာတဲ့။ ဒါမှမဟုတ်ရင် ကောင်မလေးတွေ အခန်းထဲ တိတ်တိတ်ကလေး လာထားပြီး ဓာတ်ပုံ ဗီဒီယို မှတ်တမ်းတွေ ယူသွားမှာ ကြောက်ရသတဲ့။ သူ့အတွေ့အကြုံ ကြားခဲ့ရတာပါ။ တိတ်တိတ်ကလေး သူကလေးတွေကို အခန်းထဲလာထည့်ပြီး အချုပ်ခံခဲ့ရသူခေါင်းဆောင် ဘယ်နှစ်ယောက်များ ရှိခဲ့မည်လဲ။ ကောင်မလေးချုပ်ကွက်က အောင်လ ချုပ်ကွက်လိုမျိုးလားပေါ့။ ကောင်မလေးချုပ်ကွက် သုံးသလို ကောင်လေးချုပ်ကွက်လည်း ရှိနိုင်သတဲ့။

ချုပ်ကွက်မျိုးစုံ သုံးထားပုံမှာ အာဏာသိမ်းနိုင်ခဲ့ခြင်းလား

ခေါင်းဆောင်ဆိုသူများအား ထိုထိုချုပ်ကွက်များနဲ့ စစ်ထောက်လှမ်းရေးမှတ်တမ်းများနဲ့ စီးပွားရေး လူမှုရေး ငွေပေး လူပေး အထက်လမ်း အောက်လမ်း ချုပ်ကွက်မျိုးစုံနဲ့ ချုပ်ထားပြီးမှ အပီချုပ်နိုင်ပြီဆိုမှ စစ်အာဏာသိမ်းရဲခဲ့ပုံ ရပါတယ်။ ဒါကြောင့်လည်း စစ်ခေါင်းဆောင်များ မလုပ်ရဲတာ မရှိဘူးလို့ ပြောထွက်ခဲ့တာပါ့။ ချုပ်ကွက်တွေကောင်းပါရဲ့။ ဒါပေမဲ့။

စစ်အာဏာအတွက် နိဂုံးချုပ်ကွက်

တရုတ်ကစားသမား ဖန်ရောင်းက အောင်လအန်ဆန်းကို ပြေးပြီး ချုပ်တာပါပဲ။ အောင်လ ပက်လက်လန်သွားခဲ့တယ်။ ဒါပေမဲ့ အောင်လက ပက်လက်အနေအထားကပဲ တရုတ်ရဲ့ လည်ပင်းကို ပြန်ချုပ်မိသွားတော့ တရုတ်က ကြမ်းပြင်ကို လက်နဲ့ပုတ်ပြီး အရှုံးပေးသွားရတယ်နော်။ အခုလည်း စစ်အာဏာရှင်တွေက ချုပ်ကွက်မျိုးစုံနဲ့ ချုပ်နေတာပါပဲ။ ဒါပေမဲ့ နွေဦးတော်လှန်ရေး တိုက်ပွဲဝင်သူတွေမှာလည်း စစ်အာဏာရှင်တွေကို ပြန်ချုပ်မယ့် ချုပ်ကွက်နည်းသစ်တွေ မရှိဘူးလို့ ဘယ်သူပြောနိုင်မလဲ။ မရိုးသားသော ယုတ်မာသော ရက်စက်သော ကောက်ကျစ်သော မုသာဝါဒအားကြီးသော သော သော သော စစ်အာဏာရှင်တွေမှာတောင် သူတို့ဉာဏ်မီသလောက် (ဆရာကြီးသခင်ကိုယ်တော်မှိုင်း စကားနဲ့ ပြောရရင်) သင်းတို့ဉာဏ် တထွာတမိုက်နဲ့ ချုပ်ကွက်တွေ ထုတ်နိုင်သေးရင်။ နွေဦးတိုက်ပွဲ ဝင်နေကြကုန်သော စွန့်စားသော ရဲဝံ့သော စွန့်လွှတ်သော ပညာဉာဏ်ကြီးမားသော ခေတ်မီသော သော သော သော မြန်မာနိုင်ငံ တိုင်းရင်းသားပေါင်းစုံ မျိုးဆက်သစ် လူငယ်ထု၊ လူမျိုးပေါင်းစုံ ပြည်သူလူထုကြီး တရပ်လုံးကရော စစ်အာဏာရှင်ကို အနိုင်ယူမယ့် တန်ပြန်ချုပ်ကွက်တွေ ဘာကြောင့် မရှိနိုင်ရမည်လဲ။ သမ္မတကြီး ဦးဝင်းမြင့် DVB debate မှာ ပြောခဲ့သလို “ဠင်းတလောက်ကတော့ ငှက်တိုင်းလှပါတယ်။” နိုင်ငံတော်၏ အတိုင်ပင်ခံပုဂ္ဂိုလ် လူထုခေါင်းဆောင် ဒေါ်အောင်ဆန်းစုကြည် ပြောခဲ့သလို “ဘာရမလဲ သာဝရယ်။” ဆိုတဲ့ စစ်အာဏာရှင်ကို နိုင်မည့် ချုပ်ကွက်တွေ မရှိဘူးလို့ မပြောနိုင်ပါဘူးနော်။     ။

မောင်တူး

တခါက ရွာတရွာမှာ သူခိုးတယောက်ရှိတယ်။ သူက သူခိုးအလုပ်လုပ်ပြီး အင်မတန်ကြောက်တတ်တဲ့ သူခိုးဖြစ်တယ်။ ဘယ်လောက်ထိ ကြောက်သလဲဆိုရင် လူငယ်လူရွယ်တွေ အများဆုံးရှိတဲ့ရွာနဲ့ လက်သံပြောင်တဲ့ရွာဆို သူ မခိုးရဲဘူး။ မိသွားရင် ဝိုင်းဆွမ်းကြီးလောင်းမှာ သူသိနေတယ်။ ဒါကြောင့် သက်ကြီးရွယ်အိုနဲ့ မိန်းမသားတွေသာရှိတဲ့ နေအိမ်တွေ၊ ရွာတွေ၊ ရပ်ကွက်တွေကိုသာ လှည့်ခိုးတဲ့ အင်မတန် သရဲဘောကြောင်ပြီး ကြောက်တတ်တဲ့ အရူးပါးသူခိုးတယောက် ဖြစ်တယ်။

လမိုက်ညတညမှာ သူသေချာအကွက်ချ စီစဉ်ထားတဲ့ ရွာထဲကအိမ်တအိမ်ကို ဝင်ခိုးတယ်။ ဖြစ်ချင်တော့ မြို့မှာကျောင်းတက်နေတဲ့ ကျောင်းသားလူငယ် ရောက်နေတာ သူသတိမထားမိလိုက်ဘူး။ သတ္တိကလည်းကောင်း ကျောင်းသားလူငယ်ဆိုတော့ သန်သန်မာမာ သွက်သွက်လက်နဲ့ နိုးကြားတက်ကြွနေတဲ့ လူငယ်ဖြစ်တော့ ချိုးချိုးချွတ်ချွတ်အသံကြားတာနဲ့ အိပ်ရာထဲကနေ နားစွင့်နေတာပေါ့။ သူခိုးကလည်း အကွက်ချ စီစဉ်ထားတာပဲဆိုပြီး ရဲရဲတင်းတင်းဝင်လာပြီး ခိုးမယ်အလုပ် ကျောင်းသားလူငယ်ကလည်း သူခိုးပဲဆိုပြီး သူခိုးကို အလစ်အငိုက်ဝင်ပြီး လုံးထွေးဖမ်းလိုက်တာ သူခိုးက ကြောက်အားလန့်အား သွေးရူးသွေးတန်းနဲ့ “လူ လူ” ဆိုပြီး ထအော်လိုက်တာ၊ အဲ့ဒီအချိန် လူငယ်ကျောင်းသားက ခိုးထုပ်ခိုးထည်နဲ့ သူခိုးကို လက်ပူးလက်ကြပ် သက်‌သေအထောက်ထားနဲ့ ဖမ်းမိထားပြီ။ မနက်မိုးလင်းတာနဲ့ သက်ဆိုင်ရာက အပြစ်ပေးနိုင်အောင် စီစဉ်နေပြီဖြစ်တယ်။ သူခိုးကတော့ တွေ့သမျှလူတွေကို လက်ညှိုးထိုးပြီး လူ လူ အော်နေတုန်း။

NUG, CRPH, ERO, PDF တွေကို အခုထိ အကြမ်းဖက်တွေလို့ မင်းအောင်လှိုင်က သွေးရူးသွေးတန်း ကြောက်အားလန့်အားနဲ့ အော်နေတုန်း ဘယ်သူက အကြမ်းဖက်သလဲဆိုတာ နိုင်ငံတကာကလည်း သိနေပြီ။ အကြမ်းဖက်အဖွဲ့ဟာ မင်းအောင်လှိုင်ရဲ့နောက်လိုက် စစ်အုပ်စုဆိုတာ ကလေးကအစ လူကြီးအဆုံး အကုန်သိနေကြပြီ။ ဒါကို ဆင်သေကို ဆိတ်သား‌ေရနဲ့ ဖုံးချင်နေတဲ့ မင်းအောင်လှိုင်က တော်လှန်ရေးနေ့မှာ ကိုယ့်အထုပ်ကို ကိုယ်ဖြည်ပြလိုက်ခြင်း ဖြစ်တယ်။

ဒီနွေဦးတော်လှန်ရေးက နိုင်ကိုနိုင်တယ်၊ မတရား အာဏာသိမ်းစစ်အုပ်စုက ဖက်ဆစ်ထက် ဆိုးသွမ်းတဲ့ အကြမ်းဖက်လုပ်ရပ်တွေနဲ့ လူသတ်မီးရှို့ မုဒိမ်းကျင့် စစ်တပ်ဆိုတာ ပြည်သူတွေ မျက်ဝါးထင်ထင် မြင်တွေ့ခဲ့ကြပြီးဖြစ်တယ်။ ဒီအကြမ်းဖက်စစ်အုပ်စုရဲ့ မြန်မာနိုင်ငံသူ နိုင်ငံသားတွေအပေါ်မှာ မတရားသဖြင့် လုပ်ခဲ့တာတွေ နှစ်ပေါင်းကြာလည်း မေ့ပျောက်ကြတော့မှာ မဟုတ်တဲ့အတွက် မြန်မာ့သမိုင်းရဲ့ အဆိုးဝါးဆုံး နေ့ရက်တွေအဖြစ်နဲ့ တည်ရှိသွားတော့မှာဖြစ်တယ်။ သူတို့ရဲ့ သားစဉ်မြေးဆက်ဟာလည်း လူပုံအလယ်မှာ ခေါင်းမဖော်ဝံ့အောင် တိုင်းသူပြည်သားတွေအ‌ပေါ် ယုတ်မာရိုင်းစိုင်းသူတွေအဖြစ် ခေါ်တွင် သမုတ်ကြလိမ့်မယ်။ အဲ့ဒါ စစ်အုပ်စု အာဏာရူးတွေကို ပြည်သူတွေက နိုင်တာပဲဖြစ်တယ်။

၂၀၂၁ ခုနှစ် စစ်တပ်က မတရားအာဏာသိမ်းတဲ့အကြောင်း နောင်လာနောက်သားတွေကို ပြန်ပြောတိုင်း စစ်တပ်ရဲ့ အကြမ်းဖက်လုပ်ရပ်တွေကို ထည့်သွင်း ပြောဆိုနေကြမှာ ဖြစ်တယ်။

ဂဠုန်စော နှစ်တွေကြာလည်း သူ့ရဲ့နာမည်ဆိုး၊ လုပ်ရပ်ဆိုးက ယနေ့အထိ တည်ရှိနေတယ်။ သူ့ရဲ့ သားစဉ်မြေးဆက် လူပုံအလယ်မှာ အရှက်ရနေဆဲဖြစ်တယ်။ အာဏာရှင်နေဝင်း ယနေ့အထိ သူ့ရဲ့သားသမီးမြေးမြစ်တွေကို ခွင့်မလွှတ်နိုင်ကြသေးဘူး။ သန်းရွှေ၊ ခင်ညွန့်၊ သိန်းစိန် ပြည်သူလူထုကြား ရဲရဲတင်းတင်း သွားလာနေထိုင်ဝံ့သလား။ အခု မင်းအောင်လှိုင် သူ့ရဲ့လုပ်ရပ်က နာဇီဖက်ဆစ်ထက် ဆိုးဝါးပြီး ကိုယ့်တိုင်းသူပြည်သားတွေရဲ့ ဘဝတွေကို ရက်ရက်စက်စက် နင်းခြေဖျက်ဆီးခဲ့တာ ဘယ်လိုမှ မေ့ပျောက်လို့ရတော့မှာ မဟုတ်တော့ဘူး။ အချိန်တွေကြာလို့ သူမရှိတော့ရင်တောင် သူ့ဇနီး၊ သူ့သားသမီး၊ ‌သူ့မြေးမြစ်တွေအထိပါ အရိပ်မည်းကြီးတခုလို လိုက်ပါနေဦးမှာဖြစ်တယ်။

သူခိုးက သွေးရူးသွေးတန်းနဲ့ လူ လူ ဟစ်နေတာကိုက ပြည်သူတွေနိုင်နေပြီ။ သူကြောက်လို့အော်နေတာ ဒီနွေဦးတော်လှန်ရေးက စတိုက်ကတည်းက ပြည်သူလူထုရဲ့ အားနဲ့တိုက်ခဲ့တာ၊ ဒီနေ့အထိလည်း ပြည်သူသာအဓိကဆိုတဲ့အားနဲ့ တိုက်နေဆဲဖြစ်တယ်။

စစ်မိစ္ဆာတွေရှိနေသမျှ တိုက်ပွဲဝင်နေကြဦးမှာဖြစ်တယ်။ ဘယ်လိုအစိုးရဖြစ်နေပါစေ ပြည်သူ့အားမကိုးစားသ၍၊ ပြည်သူ့နှလုံး မသိမ်းကြုံးသေးသ၍ ဧကန်မုချ ဓားသွားလည်းကြွေ လှံသွားလည်း ခွေသွားစေမှာ ဖြစ်ပါတယ်။

ပေကြီး