မကွေးတိုင်း ဂန့်ဂေါမြို့ နှမ်းခါးရွာက ဒေသခံအမျိုးသမီးငယ်တစ်ယောက်ကို စစ်ကောင်စီတပ်တွေက မေ ၉ ရက်နေ့ မနက်ပိုင်းမှာ ဖမ်းဆီးသွားတယ်လို့ ဒေသခံတွေက ပြောပါတယ်။

ဂန့်ဂေါမြို့ အမှတ် (၁) ရပ်ကွက် လမ်းဆုံဂိတ်မှာ မေ ၉ ရက်နေ့မနက်ပိုင်းက စစ်ကောင်စီ တပ်သားတွေနဲ့ ပူးပေါင်အဖွဲတွေက နှမ်းခါးရွာနဲ့ ဂန့်ဂေါမြို့ကို ပြေးဆွဲနေတဲ့ ခရီးသည်တင်ကားကို ရပ်တန့်ကာ လက်ကိုင်ဖုန်းတွေကို စစ်ဆေးပြီးနောက် နှမ်းခါးကျေးရွာက မနန္ဒာလှိုင်ကို ဖမ်းဆီးသွားကြတယ်လို့ ခရီးသည်တဦးက ဒီဗွီဘီကို ပြောပါတယ်။

“အဲဒီဂိတ်မှာက စစ်ကောင်စီတပ်သားတွေနဲ့ ရဲတွေ အများကြီးပဲဗျ။ လာသမျှကားတွေကို တားပြီးတော့ စစ်ကြတာ။ ကားပေါ်မှာပါလာတဲ့ လက်ဆွဲခြင်းတွေ၊ ခရီးဆောင်အိတ်တွေနဲ့ အထုပ်အပိုးတွေ အားလုံးကို မွှေနှောက်ရှာဖွေကြတာ။ ခရီးသည်တွေကိုလည်း အောက်ဆင်းခိုင်းပြီး လက်ကိုင်ဖုန်းက ဖေ့စ်ဘွတ်ခ်အကောင့်တွေကို ဖွင့်ခိုင်းပြီး စစ်ဆေးရာမှာ မနန္ဒာလှိုင်ရဲ့ အကောင့်ထဲမှာ နိုင်ငံရေး ပို့(စ်)တွေ တွေ့လို့ဆိုပြီး ဖမ်းဆီးသွားကြတာ။” 

စစ်ကောင်စီတပ်တွေဟာ ဂန့်ဂေါမြို့အတွင်း ခရီးသွားပြည်သူတွေရဲ့ လက်ကိုင်ဖုန်းတွေကို စစ်ဆေးပြီး အပြစ်မဲ့ပြည်သူတွေကို မကြာခဏ ဖမ်းဆီးခံနေတယ်လို့ ဆိုပါတယ်။

“ပြည်သူလူထုမှာ ဘာအခွင့်ရေး ဘာလွတ်လပ်ခွင့်မှ မရှိတော့ဘူး။ ခုပုံစံနဲ့ဆိုရင် တနေရာနဲ့ တနေရာ ခရီးသွားဖို့ကို သိပ်မလွယ်တော့ဘူး။ မိဘပြည်သူတွေအနေနဲ့လည်း ခရီးထွက်မယ်ဆိုတာနဲ့ ကိုယ့်ရဲ့ လက်ကိုင်ဖုန်းထဲက ဖေ့စ်ဘွတ်ခ်အကောင့်တွေ အပါအဝင် ဆော့ဝဲတွေကို ရှင်းလင်းပြီးမှ ခရီးသွားတာတွေပြုလုပ်ဖို့ အထူးအသိပေးချင်တယ်။” 

စစ်ကောင်စီရဲ့ ဝါဒဖြန့်မီဒီယာတခုမှာတော့ နှမ်းခါးရွာက နန္ဒာလှိုင်ရဲ့ လက်ကိုင်ဖုန်းကို လုံခြုံရေးတပ်ဖွဲ့တွေ စစ်ဆေးရာမှာ "စုဂရေစီ စုဂရေစီ " ဖေ့စ်ဘွတ်ခ် အကောင့်နဲ့ နိုင်ငံရေး ပို့(စ်)တင်တာတွေ၊ မျှဝေတာတွေ၊ PDF အကြမ်းဖက်အဖွဲ့နဲ့ ပတ်သက်ဆက်နွှယ်တဲ့ ပို့(စ်) တင်တာတွေတွေ့လို အကြမ်းဖက်ထောက်ခံအားပေးပြုလုပ်တဲ့ နန္ဒာလှိုင်ကို ဖမ်းဆီးခဲ့တာလို့ ဖော်ပြထားပါတယ်။

မကွေးတိုင်းဒေသကြီးအတွင်းက မြို့ဝင် မြို့ထွက်ဂိတ်တွေမှာ စစ်ကောင်စီတပ်သားတွေနဲ့ ရဲတွေပူးပေါင်းပြီး ပိတ်ဆို့စစ်ဆေးတာတွေ ဆက်တိုက်ပြုလုပ်နေသလို မေ ၁ ရက်နေ့ကနေ ၁၀ ရက်နေအထိ ပြည်သူ အယောက် ၂၀ ထက်မနည်း လက်ကိုင်ဖုန်းစစ်ဆေးပြီး ဖမ်းဆီးခံထားရတယ်လို့ သိရပါတယ်။

စစ်ကောင်စီရဲ့ လေကြောင်းကနေ တိုက်ခိုက်ခံခဲ့ရတဲ့ မကွေးတိုင်း၊ ဂန့်ဂေါမြို့နယ် နှမ်းခါးရွာအတွက် အရေးပေါ်သုံးနိုင်ဖို့ ဒီပဲယင်းမြို့နယ် ပြည်သူ့ကာကွယ်ရေးတပ်က သူတို့ရဲ့ အသုံးစရိတ်ကို ချွေတာပြီး ကျပ် ၁၀ သိန်း မျှဝေလှူဒါန်း သွားမယ်လို့ ပြောပါတယ်။

ဒီပဲယင်း ပြည်သူ့ကာကွယ်ရေးတပ်ဖွဲ့အနေနဲ့ လိုအပ်ချက်တွေ အများကြီးရှိနေပေမဲ့ တပ်ဖွဲ့တွင်းအသုံးစရိတ်ကို  ခြိုးခြံချွေတာပြီး အဲဒီဒေသမှာ အရေးပေါ်သုံးနိုင်ဖို့ ရန်ပုံငွေ ကျပ် ၁၀ သိန်းကို အဖွဲ့အစည်းတခုကတဆင့် လွှဲပြောင်းမျှဝေသွားမယ်လို့ ထုတ်ပြန်ထားပါတယ်။

“အကြမ်းဖက်စစ်တပ်ရဲ့ လူမဆန်တဲ့ လုပ်ရပ်တွေကြောင့် ရဲဘော်ရဲဘက်တွေနဲ့ အပြစ်မဲ့ ပြည်သူတွေ ထိခိုက်ကျဆုံးခဲ့ရတဲ့ ခံစားချက်ကို ကိုယ်တွေ ကြုံခံစားခဲ့ရတာကြောင့် ကိုယ်ချင်းစာနားလည်တယ်” လို့ ဒီပဲယင်း PDF က ဆိုပါတယ်။

ပြည်တွင်းပြည်ပ တော်လှန်ရေးရန်ပုံငွေ အဖွဲ့အစည်းတွေနဲ့ ပြည်သူတွေအနေနဲ့လည်း နှမ်းခါးဒေသအတွက် တတ်နိုင်သလောက်ပါဝင်ပံ့ပိုးပေးကြဖို့လည်း သူတို့က မေတ္တာရပ်ခံထားပါတယ်။

ဒါ့အပြင် ဒီပဲယင်း ပြည်သူ့ကာကွယ်ရေးတပ်အနေနဲ့ ပြည်သူတွေဆီကို ဖုန်းနဲ့ တိုက်ရိုက် ဆက်သွယ်တာမျိုး အချက်အလက်တွေမေးတာမျိုးကို မလုပ်ဘူးလို့လည်း အသိပေး ထုတ်ပြန်ထားပါတယ်။

လိုအပ်တယ်ဆိုရင် စိတ်ချရတဲ့ မြေပြင်မဟာမိတ်အဖွဲ့တွေဆီကတဆင့် ဒါမှမဟုတ် အဖွဲ့ရဲ့ ဖေ့ဘွတ်ခ် မက်ဆင်ဂျာကတဆင့်ပဲ ဆက်သွယ်တယ်လို့ ဆိုပါတယ်။

ဒီဇင်ဘာ ၁၇ ရက်နေ့က နှမ်းခါးရွာမှာ ပြည်သူ့ကာကွယ်ရေးတပ်တွေ အစည်းအဝေးလုပ်နေတုန်း စစ်ကောင်စီက ရဟတ်ယာဉ်နဲ့ လာရောက်တိုက်ခိုက်လို့ ပြည်သူ့ကာကွယ်ရေးတပ်သားတချို့ ကျဆုံးခဲ့ပြီး ဒီဇင်ဘာ ၁၉ ရက်ကလည်း ရွာထဲမှာ စစ်ကောင်စီကစခန်းချ မီးရှို့ ဖမ်းဆီးသတ်ဖြတ်တာတွေကြောင့် အနည်းဆုံး ပြည်သူ ၁၇ ယောက်လောက် သေဆုံးခဲ့ပါတယ်။