မကွေးတိုင်း ရေစကြိုမြို့နယ် ပခန်းငယ်ရဲစခန်းက ရဲတပ်သားတယောက်ဟာ ဇွန် ၂၂ ရက်နေ့မှာ MVRF ကနေတဆင့် CDM ပြုလုပ်ပြီး ပြည်သူ့ရင်ခွင် ခိုလှုံလာတယ်လို့ မြိုင်မြို့နယ် ကျေးရွာများတော်လှန်ရေးတပ်ဦး MVRF က ဇွန် ၂၅ ရက်နေ့မှာထုတ်ပြန်ပါတယ်။
ရေစကြိုမြို့နယ် ပခန်းငယ်ရဲစခန်းက လ/၂၈၀၂၉၂ ရဲတပ်သား အောင်သူကျော်ဟာ စစ်အာဏာရှင်လက်အောက်မှာ ဆက်လက်တာဝန်ထမ်းဆောင်လိုစိတ် မရှိတာကြောင့် ဇွန် ၂၂ ရက်နေ့မှာ MVRF ကနေတဆင့် CDM ပြုလုပ်ပြီး ပြည်သူ့ရင်ခွင် ခိုလှုံလာတယ်လို့ MVRF ခေါင်းဆောင် ဦးအောင်ဇေယျက ပြောပါတယ်။
“သူကတော့ အမှန်တရားဘက်ကို ရပ်တည်လာတာဖြစ်ပြီး တပ်တွင်းမှာ ဖြစ်ပျက်နေတာလည်း အနိဌာရုံဆန်တယ်။ ပြည်သူကို အကြမ်းဖက်နေတဲ့ စစ်အုပ်စုနဲ့ မပေါင်းချင်လို့ CDM ဝင်လာတယ်လို့ ယူဆရပြီး သူ့ပြောပြချက်အရဆိုရင် တပ်တွင်းထဲမှာလည်း တပ်ပျက်နေပြီး သေဖို့ရာခိုင်နှုန်းများနေပြီလို့ ပြောပါတယ်။”
အဲဒီတပ်သားဟာ လက်နက်က ယူဖို့ အခက်ခဲရှိတဲ့အတွက် လက်နက်မပါဘဲ ကိုယ်လွတ်ရုန်းခဲ့ရတယ်လို့ သိရတယ်။
MVRF ကနေတဆင့် ပြည်သူ့ရင်ခွင် ခိုဝင်လာသူ ၄ ယောက်ရှိပြီး လွတ်မြောက်နယ်မြေကို ပို့ဆောင်ပေးထားသူတွေရှိသလို MVRF မှာ ဆက်လက်တာဝန်ထမ်းဆောင်နေသူတွေလည်း ရှိတယ်လို့ ဆိုပါတယ်။
“အခုလို ပြည်သူဘက်ကို ရပ်တည်ခိုလှုံလာတဲ့ တပ်ဖွဲ့ဝင်တွေအားလုံးကို ကျနော်တို့ ပြည်သူ့ကာကွယ်ရေးတပ်တွေက ကောင်းကောင်းမွန်မွန် ကြိုဆိုလက်ခံပေးပြီး နောက်ထပ် ရုံးမထွက်နိုင်သေးတဲ့ ပြည်သူ့ဝန်ထမ်းတွေအနေနဲ့လလည်း အမြန်ဆုံး ပြည်သူ့ရင်ခွင်ကို ခိုလှုံပေးကြဖို့ တိုက်တွန်းလိုတယ်” လို့ ဦးအောင်ဇေယျက ပြောပါတယ်။
စစ်အာဏာသိမ်းပြီးနောက် စစ်ကောင်စီတပ်ကို အာဏာဖီဆန်ပြီး ပြည်သူ့ရင်ခွင် ခိုလှုံလာတဲ့ စစ်သားနဲ့ ရဲတပ်ဖွဲ့ဝင် အရေအတွက် သောင်းနဲ့ချီရှိနေပြီဖြစ်ပါတယ်။
လက်ရှိမှာတော့ ပြည်သူလူထုကို အကြမ်းဖက်သတ်ဖြတ်နေတဲ့ စစ်ကောင်စီရဲ့ လုပ်ရပ်တွေကို မလိုလား မနှစ်မြို့ကြတဲ့ အရာရှိ၊ စစ်သည်တွေ၊ ရဲတပ်သားတွေဟာ သူတို့ရဲ့ ဂုဏ်သိက္ခာ၊ မျိုးဆက်တွေရဲ့ ဂုဏ်သိက္ခာကို ပြန်လည်ရယူဖို့ စစ်အာဏာရှင်ရဲ့ လက်ကိုင်တုတ်အဖြစ်က ရုန်းထွက်ပြီး ပြည်သူ့ဘက် ကူးပြောင်းရပ်တည်လာတာ တဖြည်းဖြည်း များပြားလာနေတာပါ။
တပ်မတော်ကို အလွဲသုံးစားပြုလုပ်နေတဲ့ လက်တဆုပ်စာ စစ်ဗိုလ်ချုပ်တစုရဲ့ လက်ကိုင်တုတ် ခါးပိုက်ဆောင်တပ်အဖြစ်မှ ရုန်းထွက်ပြီး ပြည်သူ့ရင်ခွင် အမြန်ဆုံးခိုဝင်ကြဖို့ တပ်မတော်သားတွေ၊ ရဲတပ်သားတွေကို အမျိုး သားညီညွတ်ရေးအစိုးရ (NUG) က တိုက်တွန်းနှိုးဆော်ထားပါတယ်။
ဒါ့အပြင် အင်အားကြီး တိုင်းရင်းသား လက်နက်ကိုင်အဖွဲ့တွေဖြစ်ကြတဲ့ ကချင်လွတ်မြောက်ရေး တပ်မတော် (ကေအိုင်အေ)နဲ့ ကရင်အမျိုးသားအစည်းအရုံး (ကေအန်ယူ) တို့လို အဖွဲ့အစည်းတွေကလည်း စစ်အာဏာရှင် ဆန့်ကျင်ကာ ပူးပေါင်းလိုတဲ့ ရှေ့တန်းရောက် မြန်မာ့တပ်မတော်သားတွေ၊ ရဲတပ်သားတွေကို လက်ကမ်းကြိုဆိုနေကြပါတယ်။
မကွေးတိုင်း ရေစကြိုမြို့နယ် ပခန်းငယ်ရဲစခန်းကို ဧပြီ ၂၈ ရက်နေ့မှာ ဒေသကာကွယ်ရေးတပ်ဖွဲ့တွေက ဝင်ရောက်စီးနင်းပြီး စခန်းသိမ်းတိုက်ပွဲ ပြုလုပ်ခဲ့တယ်လို့ ရေစကြိုမြို့နယ်အခြေစိုက် သိန်းငှက်ပြောက်ကျားတပ်ဖွဲ့က ဧပြီ ၂၉ ရက်နေ့ ရက်စွဲ နဲ့ ထုတ်ပြန်ထားပါတယ်။
ရေစကြိုမြို့နယ် ပခန်းငယ်ရဲစခန်းကို ဧပြီ ၂၈ ရက်နေ့ မနက် ၁၁ နာရီကျော်ကနေ ၁၂ နာရီလောက်အထိ ဒေသကာကွယ်ရေး ညီနောင်မဟာမိတ်တပ်တွေပူးပေါင်ပြီး ဝင်ရောက်စီနင်း တိုက်ခိုက်ခဲ့တယ်လို့ သိန်ငှက်ပြောက်ကျားတပ်ဖွဲ့ရဲ့ ပြန်ကြားရေးတာဝန်ခံက ဒီဗွီဘီကို ပြောပါတယ်။
“အဲဒီရဲစခန်မှာ စစ်ကောင်စီတပ်သား၊ ရဲနဲ့ ပျူစောထီးအင်အား ၄၀ လောက်စခန်းချထားတယ်ဗျ။ ဘန်ကာနဲ့ ဆပ်သွယ်ရေးတူးမြောင်းတွေ အခိုင်မာပြုလုပ်ထားတယ်၊ စနိုက်ပါပစ်စင်နဲ့ ရဲစခန်းအခြေမှာ မြေမြှုပ်မိုင်းတွေလည်း မြှုပ်ထားကြတယ်။ ကျနော်တို့ မဟာမိတ်တပ်ဖွဲ့တွေဘက်က RPG ၂ လုံး၊ ၄၀ မမ ၇ လုံး စက်လက်တွေ၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့ပေမယ့် စစ်ကောင်စီဘက်က ကား ၃ စီးနဲ့ တပ်ကူတွေရောက်လာလို့ စခန်းကို သိမ်းပိုက်ရခါနီးမှာ ပြန်လည်ဆုတ်ခွာပေးခဲ့ရတယ်။”
အဲဒီတိုက်ပွဲအတွင်း ရဲစခန်းမှာတပ်စွဲထားတဲ့ စစ်ကောင်စီတပ်သား၊ ရဲနဲ့ ပျူစောထီး ၁၄ ယောက်သေဆုံးကာ ၃ ယောက်ဒဏ်ရာရရှိခဲ့ပြီး ညီနောင်မဟာမိတ်တပ်ဖွဲ့တွေဘက်က အထိခိုက် အကျဆုံးမရှိ ဆုတ်ခွာနိုင်ခဲ့ကြတယ်လို့ ပြန်ကြားရေးတာဝန်ခံက ဆိုပါတယ်။
အဲဒီတိုက်ပွဲကို သိန်ငှက်ပြောက်ကျားတပ်ဖွဲ့၊ Poenix အထူးပြောက်ကျားတပ်၊ မြင်းခြံခရိုင် တပ်ရင်း ၃၊ MSPDF၊11 Brothers Revolution Force၊27 Revolution Force၊မြောင်မြို့နယ် ကျေးရွာတပ်ပေါင်းစု၊ သွေးသောက်တော်လှန်ရေးတပ်ဖွဲ့ နဲ့ ဒေါင်းညီနောင်တပ်ဖွဲ့တို့က ပူးပေါင်းထိုးစစ်ဆင်ခဲ့တာလို့ ပြောပါတယ်။
အဲဒီရဲစခန်းကို ပြီးခဲ့တဲ့နှစ် နိုဝင်ဘာ ၁၃ ရက်နေ့မှာလည်း ညီနောင်မဟာမိတ်တပ်ဖွဲ့တွေ ပူးပေါင်းသိမ်းပိုက်ပြီး မီးရှို့ဖျက်ဆီးခဲ့သလို လက်နက်ခဲယမ်းတွေပါ သိမ်းဆည်းနိုင်ခဲ့တယ်လို့ သိရပါတယ်။
စစ်ကောင်စီရဲ့ ရဲစခန်းတွေ မကြာခဏတိုက်ခိုက် သိမ်းပိုက်ခံနေရတာဖြစ်လို့ ရဲစခန်းလိုင်းခန်တွေမှာ ဇနီးနဲ့ မိသားစုဝင်တွေ နေထိုင်ခြင်းမပြုကြဖို့ မြန်မာနိုင်ငံရဲတပ်ဖွဲ့ ဌာနချုပ်က ညွှန်ကြားထားတယ်လို့ တပ်တွင်း သတင်းရင်းမြစ်တွေဆီကနေ သိရပါတယ်။
အဲဒီတိုက်ပွဲမှာ စစ်ကောင်စီဘက်က ထိခိုက်သေဆုံးတဲ့ အခြေနေကို သတင်းထုတ်ပြန်တာ မတွေ့ရသေးသလို သူတို့ရဲ့ ဝါဒဖြန့်တယ်လီဂရမ်ချန်နယ်တစ်ခုမှာတော့ ပခန်းငယ်ရဲစခန်းကို PDF အကြမ်းဖက်သောင်းကျန်းသူအဖွဲ့က အင်အားအများအပြားနဲ့ လာရောက်တိုက်ခိုက်ပြီး ရဲတပ်ဖွဲ့ဝင်တွေ ပြန်လည်ခုခံလို့ အများအပြားဒဏ်ရာရရှိကာ ဆုတ်ခွာထွက်ပြေးသွားတယ်လို့ ဖော်ပြထားပါတယ်။
