မကွေးတိုင်း ပခုက္ကူမြို့မရဲစခန်းက ရဲ ငါးယောက်ပါလာတဲ့ အိမ်စီးကားကို ဒီဇင်ဘာ ၁၆ ရက် မနက် ၁၀ နာရီလောက်က မိုင်းဆွဲတိုက်ခိုက်ခဲ့တယ်လို့ နဂါးညီနောင်ပြောက်ကျားတပ်ဖွဲ့က ပြောပါတယ်။

အရာရှိ နှစ်ယောက်နဲ့ ရဲတပ်သား သုံးယောက် ပါလာတဲ့ အိမ်စီးကားကို ညောင်မြို့လမ်းမနဲ့ ပခုက္ကူလမ်းမပေါ်မှာ မိုင်းဆွဲတိုက်ခိုက်ခဲ့တာလို့ ဆိုပါတယ်။ 

နဂါးညီနောင်ပြောက်ကျားတပ်ဖွဲ့ တာဝန်ရှိသူက  "ဖောက်ခွဲလိုက်တဲ့ တွဲမိုင်း နှစ်လုံးက ပြင်းထန်ပါတယ်။ ကားကတော့နေရာမှာ တင်ပျက်စီးသွားခြင်း မရှိဘဲ ရှေ့ဆက်မောင်းသွားတာ ကြောင့် ထိခိုက်မှုအခြေနေကို မသိရသေးဘူး" လို့ ပြောပါတယ်။

နဂါးညီနောင်ပြောက်ကျားတပ်ဖွဲ့မှာ လူအင်အားရှိပေမယ့် မောင်းပြန်သေနတ် မရှိတဲ့အပြင် လက်လုပ်သေနတ်တွေသာ ရှိတာကြောင့် တိုက်ပွဲဖော်ဆောင်ရာမှာ မိုင်းကိုသာ အသုံးပြု နေရတယ်လို့ ပြောပါတယ်။

အဖွဲ့အတွက် လက်နက်အင်အား မလုံလောက်တာကြောင့် မောင်းပြန်သေနတ်ဝယ်ဖို့ "သွေးကြွေး ပြန်ယူ သိန်း ၅၀၀ လှူ" ဆိုတဲ့ ကမ်ပိန်းကို ဒီဇင်ဘာ ၁၆ ရက်က စတင်လုပ်ဆောင်သွားမယ်လို့ သိရပါတယ်။

မကွေးတိုင်း၊ ပခုက္ကူမြို့နယ်မှာ အပြစ်မဲ့ပြည်သူ ၂ ယောက်ကို PDF နဲ့ ဆက်စပ်တယ်၊ ထောက်ပံ့တယ် စွပ်စွဲပြီး စစ်ကောင်စီတပ်ဖွဲ့တွေက မေ ၂၃ ရက်မှာ မတရားဖမ်းဆီးသွားကြတယ်လို့ ဒေသခံတွေက ပြောပါတယ်။

ပခုက္ကူမြို့ အမှတ် ၂ ရပ်ကွက်၊ စာရေးတန်းလမ်းက ကိုဇော်ဇော်လွင် (ခေါ်) လုံးစိကို စစ်ကောင်စီတပ်သားတွေနဲ့ အပေါင်းပါတွေက မေ ၂၃ ရက် မွန်းလွဲ ၂ နာရီလောက်မှာ PDF ကို ငွေကြေးထောက်ပံ့တယ် စွပ်စွဲပြီး ရိုက်နှက်ဖမ်းဆီးသွားကြတယ်လို့ ပခုက္ကူမြို့ခံတယောက်က ဒီဗွီဘီကို ပြောပါတယ်။

ဒါ့အပြင် မြောက်လူးကန်ကျေးရွာက ကိုပိုင်ဝေလင်း (ခေါ်) ငပိုင်ကိုလည်း စစ်ကောင်စီက မေ ၂၃ ရက် ညနေ ၄ နာရီလောက်မှာ PDF နဲ့ ဆက်နွယ်တယ် စွပ်စွဲပြီး ဖမ်းဆီးသွားကြတယ်လို့ ဆိုပါတယ်။

သူတို့ ၂ ယောက်ကို ပခုက္ကူမြို့မရဲစခန်း စစ်ကြောရေးကို ပို့လိုက်တယ်လို့ သိရပြီး နည်းအမျိုးမျိုးနဲ့ ညှဉ်းပန်းနှိပ်စက်နေတယ်လို့ အမည်မဖော်လိုတဲ့ ရဲတယောက်ဆီ သိရတယ်လို့ ပြောပါတယ်။

"အခုဟာက စစ်(…) တွေ ဂိတ်မှာစစ်ဆေးလို့ အဖမ်းခံရတာတွေကို မကတော့ဘူး၊ နေအိမ်တွေအထိပါ လိုက်လံဖမ်းဆီးနေကြတာ။ ပခုက္ကူခရိုင်အတွင်းက ပြည်သူတွေအနေနဲ့ ဖေ့စ်ဘွတ်ခ် လူမှုကွန်ရက်အကောင့်တွေကို D ထားပြီး အကောင့်အတုတွေကို အသုံးပြုရင် ကောင်းမယ်လို့ အကြံပြုချင်တယ်။"

မေလ ၂၁ ရက်နေ့ကလည်း ပခုက္ကူမြို့၊ အမှတ် ၃ ရပ် ကွက်၊ (ဂ) ကွင်း၊ ၇ လမ်းက မအေးအေးမာကို PDF ထောက်ခံအားပေးပြီး ဖေ့စ်ဘွတ်ခ် လူမှုကွန်ရက်စာမျက်နှာပေါ်မှာ မမှန်သတင်းဖြန့်ဝေတယ်လို့ စွပ်စွဲပြီး ဖမ်းဆီးသွားသလို အမှတ် ၁၁ ရပ်ကွက် ၇ လမ်းက ဦးအောင်ကျော် (ခ) ဦးကျော်သက်နဲ့ အမှတ် ၁၀ ရပ်ကွက် ရန်အောင်လမ်းက ဒေါ်တိုးကြည်တို့ကိုလည်း စစ်အာဏာရှင် ဆန့်ကျင်ရေး ဆန္ဒပြပွဲ ဦးဆောင်တယ်ဆိုပြီး စွပ်စွဲဖမ်းဆီးသွားကြတာလို့ ဆိုပါတယ်။

ပခုက္ကူခရိုင်အတွင်းမှာ အခုနှစ် ဖေဖော်ဝါရီလကနေ ဒီနေ့အချိန်အထိ စစ်ကောင်စီတပ်ဖွဲ့တွေရဲ့ မတရားစွပ်စွဲ ဖမ်းဆီးခံထားရသူ ၂၀၀ ကျော်လောက်ရှိနေပြီး အခု မေလအတွင်းမှာ အယောက် ၇၀ လောက် မတရားဖမ်းဆီးခံထားရတယ်လို့ သိရပါတယ်။