ထိုင်းတောင်ပိုင်း ဖူးကက်ခရိုင်ထဲမှာ ပင်လယ်ထဲ ၁ လနီးပါး ပျောက်ဆုံးနေတဲ့ ငါးဖမ်းလှေ ၁ စီးပေါ်က မြန်မာနဲ့ ထိုင်း ရေလုပ်သား ၄ ဦးကို ကယ်တင်နိုင်ခဲ့တယ်လို့ ဖူးကက်ဒေသတွင်း သတင်းမှာ ဖော်ပြပါတယ်။ 

ဆွဲ့စကွန်းဖစ်ချ် အမည်ရှိ အရပ်သားငါးဖမ်းလှေ ၁ စီးဟာ ပြီးခဲ့တဲ့ ဇန်နဝါရီ ၁၉ ရက်က ပင်လယ်ထဲ ငါးဖမ်းထွက်သွားခဲ့ပြီးတဲ့နောက် ကျန်ရစ်သူမိသားစုနဲ့ အဆက်အသွယ်ပြတ်သွားလို့ ရေကြောင်း ကယ်ဆယ်ရေးအဖွဲ့တွေကို အကူအညီတောင်းထားတာပါ။ 

သက်ဆိုင်ရာတာဝန်ရှိသူနဲ့ ကယ်ဆယ်ရေးအဖွဲ့က သူတို့လှေကို နေ့စဉ်ရက်ဆက်ရှာဖွေနေရာမှာ ပြီးခဲ့တဲ့ ဖေဖော်ဝါရီ ၁၃ ရက် မနက်ပိုင်းက အမှတ် ၃ တော်ဝင်ရေတပ်မတော်ရဲ့ DO-228 ဒရုန်းကနေ အဆိုပါငါးဖမ်းလှေကို ဖူးကက်ကျွန်းရဲ့ အနောက်တောင်ဘက် ရေမိုင် ၄၀ ကျော် အကွာမှာ တွေ့ရှိခဲ့တာ ဖြစ်ပါတယ်။ 

အဲဒီနောက် တော်ဝင်ရေတပ်က ဆရာဝန်နဲ့ အထူးတပ်ဖွဲ့ဝင်တွေဟာ ဟယ်လီကော်ပတာနဲ့ သွားရောက်ပြီး ကနဦးကျန်းမာရေးစောင့်ရှောက်မှုပေးခဲ့ပါတယ်။ 

အဆိုပါငါးဖမ်းလှေပေါ်မှာ ထိုင်းလှေသူကြီး ၁ ဦး၊ ရေလုပ်သား ၁ ဦး နဲ့ မြန်မာရေလုပ်သား ၂ ဦး စုစုပေါင်း ၄ ဦး ပါရှိပြီး ပင်လယ်ထဲမှာ စက်ချို့ယွင်းသွားလို့ ခုတ်မောင်းလို့မရတော့ဘဲ ရက်အတန်ကြာ မျောနေတာလို့ ဆိုပါတယ်။ 

အဲဒီနောက် ကယ်ဆယ်ရေးအဖွဲ့က စဘိဘုတ်လှေနဲ့ သူတို့ကို အရင်ကမ်းပေါ်ခေါ်တင်လာပြီး ဆေးရုံကို ပို့ပေးခဲ့ပါတယ်။ နောက်ပိုင်းမှာ စက်ချို့ယွင်းတဲ့လှေကိုလည်း ပြန်ဆွဲလာခဲ့ပါတယ်။ 

ပျောက်ဆုံးရေလုပ်သား ၄ ဦး ကမ်းပေါ်ရောက်ချိန် သူတို့ဇနီးသားသမီးနဲ့ ဆွေမျိုးတွေက ဝမ်းသာအားရ လာရောက်ကြိုဆိုကြပြီး ၄ ဦးလုံး ပင်ပန်းနွမ်းနယ်တာကလွဲလို့ အသက်အန္တရာယ် မစိုးရိမ်ရတော့ဘူးလို့ သတင်းမှာ ဖော်ပြသွားပါတယ်။

ရခိုင်ပြည်နယ်၊ စစ်တွေခရိုင် ပေါက်တောမြို့နယ် သဲခုံပင်လယ်ပြင်မှာ သစ်မှောင်ခို မော်တောဘုတ် ၂ စီးကို စစ်ကောင်စီလက်အောက်ခံ ရေတပ်က မတ် ၂၄ ရက် ည ၆ နာရီကျော်လောက် ပစ်ခတ်ဖမ်းဆီးခဲ့တယ်လို့ သိရပါတယ်။

သဲခုံပင်လယ်ပြင်မှာ အမြဲငါးဖမ်းနေတဲ့ သဲခုံကျေးရွာသားတဦးက “မနေ့က ည ၆ နာရီ ၄၀ မိနစ်ကျော်လောက်မှာ ပင်လယ်ပြင်ကို ကျနော်တို့ ငါးဖမ်းထွက်ဖို့ လုပ်နေချိန်မှာ ပင်လယ်ပြင်က သေနတ်ပစ်ခတ်သံတွေ ဆူညံစွာ ထွက်ပေါ်လာတယ်။ မိနစ် ၂၀ လောက်အထိ ပစ်သံတွေ ကြားရတယ်။ အဲ့ဒါကြောင့် ငါးဖမ်းမထွက်ဖြစ်လိုက်ကြဘူး။ စုံစမ်းကြည့်တော့ သစ်မှောင်ခိုမော်တော်ဘုတ် ၂ စီးကို နေဗီက ပစ်ခတ်ဖမ်းဆီးတာလို့ သိရတယ်” လို့ ပြောပါတယ်။

အဆိုပါ သစ်မောင်ခိုမော်တော်ဘုတ် ၂ စီးကို စစ်ကောင်စီရေတပ်က မတ် ၂၅ ရက် မနက်မှာ စစ်တွေမြို့ကို ဆွဲယူသွားတယ်လို့ ဒေသခံတွေက ပြောပါတယ်။

“ဒီနေ့မနက်မှာ သစ်မှောင်ခိုဘုတ် ၂ စီးကို နေဗီက စစ်တွေကို ဆွဲယူသွားတာ တွေ့လိုက်တယ်။ ဘုတ်သမားတွေတော့ ထွက်ပြေးလွတ်မြောက်သွားတယ်လို့ ပြောကြတယ်” လို့ ဒေသခံတဦးက ပြောပါတယ်။

ဖမ်းဆီးခံရတဲ့ သစ်မှောင်ခိုမော်တော်ဘုတ်ဟာ ဘင်္ဂလားဒေ့ရှ်နိုင်ငံကို ခိုးထွက်တဲ့ မော်တော်ဘုတ်လား သစ်တန်ချိန် ဘယ်လောက်တင်ဆောင်ထားလဲဆိုတာတော့ ဒေသခံတွေ မသိရှိဘူးလို့ ဆိုပါတယ်။

သဲခုံကျေးရွာဟာ ပေါက်တောမြို့ကနေ မိုင် ၂၀ လောက် ဝေးကွာပြီး ငါးဖမ်းလုပ်ငန်းနဲ့ အသက်မွေးဝမ်းကျောင်း ပြုနေကြတဲ့ ကျေးရွာငယ်တခုဖြစ်ကာ အိမ်ခြေ ၄၀၀ လောက် ရှိတယ်လို့ သိရပါတယ်။

သဲခုံကျေးရွာ ပင်လယ်ပြင်ဟာ ရခိုင်ပြည်နယ် နေရာစုံကနေ ဘင်္ဂလားဒေ့ရှ်နိုင်ငံကို ဖြတ်သွားရတဲ့ ပင်လယ်တခုဖြစ်ကြောင်းလည်း ဒေသခံတွေက ပြောပါတယ်။

ပြီးခဲ့တဲ့ မတ် ၂၁ ရက်ကလည်း တောင်ကုတ်မြို့နယ်၊ ဆားပြင်ချောင်းအတွင်းမှ ကလိန်တောင်မြစ်အတွင်း သစ်ဘေတုံး ဆိုက်စုံ ၁၅ တန် တင်ဆောင်လာတဲ့ သစ်မှောင်ခိုလှေ ၁ စီးနဲ့အတူ အမျိုးသား ၆ ဦး ဖမ်းဆီးမိခဲ့သလို မတ် ၂၂ ရက် မနက် ၃ နာရီလောက်ကလည်း မောင်တောမြို့နတ် မြစ်ဝတုံး ချောင်းဝအနီးမှာ သစ်ခွဲသားဆိုက်စုံ ၁၃ တန်ခန့် တင်ဆောင်ထားတဲ့ သစ်မှောင်ခိုလှေတစီး ဖမ်းမိပြီး လှေသမား ၇ ဦး ရေထဲခုန်ချ ထွက်ပြေးသွားတယ်လို့ သိရပါတယ်။