တရုတ်နဲ့ ပစိဖိတ်ကျွန်းနိုင်ငံတွေကြား ပူးပေါင်းဆောင်ရွက်မှု အားကောင်းလာတယ်လို့ ပါပူဝါနယူးဂီနီကို ရောက်ရှိနေတဲ့ တရုတ်နိုင်ငံတော်ကောင်စီဝင်နဲ့ နိုင်ငံခြားရေးဝန်ကြီး ဝမ်ယိက ပြောကြားလိုက်ပါတယ်။
ပါပူဝါနယူးဂီနီရဲ့ နိုင်ငံခြားရေးနဲ့ အပြည်ပြည်ဆိုင်ရာ ကုန်သွယ်မှုဝန်ကြီးနဲ့ ဇွန် ၃ ရက်နေ့ ပူးတွဲ သတင်းစာရှင်းလင်းပွဲမှာ တရုတ်နိုင်ငံခြားရေးဝန်ကြီး ဝမ်ယိက ပစိဖိတ်ကျွန်းနိုင်ငံတွေဟာ တရုတ်နိုင်ငံနဲ့ ဆက်ဆံရေး ဖွံ့ဖြိုးတိုးတက်ဖို့ စိတ်အားထက်သန်တယ်ဆိုတာကို ခံစားရတယ်လို့ ပြောပါတယ်။
သူ့ရဲ့ခရီးစဉ်အတွင်း တရုတ်နဲ့ ပစိဖိတ်ကျွန်းနိုင်ငံတွေဟာ ခေတ်သစ်ပိုးလမ်းနှစ်သွယ်စီမံကိန်း၊ ရာသီဥတုပြောင်းလဲမှု၊ ကိုဗစ်-၁၉ ကူးစက်ရောဂါကို တိုက်ဖျက်ရေး၊ သဘာဝဘေးအန္တရာယ် ကာကွယ်ရေးနဲ့ လျော့ပါးသက်သာစေရေး၊ ကျန်းမာရေး၊ စိုက်ပျိုးရေး၊ ကုန်သွယ်မှုနဲ့ ခရီးသွားလာရေးဆိုင်ရာ နှစ်နိုင်ငံ ပူးပေါင်း ဆောင်ရွက်ရေး သဘောတူ လက်မှတ်ရေးထိုးခဲ့ကြပါတယ်။
ဝမ်ယိဟာ သူ့ရဲ့တောင်ပစိဖိတ်ကျွန်းနိုင်ငံတွေဆီသွားရောက်တဲ့ ခရီးစဉ်ထဲက ၇ နိုင်ငံမြောက်အဖြစ် ပါပူဝါ နယူးဂီနီကို ရောက်ရှိနေတာဖြစ်ပါတယ်။
အဲဒီကနေ အရှေ့တီမောနိုင်ငံကို ဆက်သွားမှာဖြစ်ပြီး ဒီမတိုင်ခင်က ဝမ်ဟာ ဆော်လမွန်ကျွန်းတွေ၊ ကီရီဘာတီ၊ ဆာမိုအာ၊ ဖီဂျီ၊ တွန်ဂါနဲ့ ဗနွာတူ တို့ကို ရောက်ရှိခဲ့ပြီးဖြစ်ပါတယ်။
ပစိဖိတ်ကျွန်းနိုင်ငံငယ်လေးတွန်ဂါရဲ့ ကမ်းလွန်ဒေသမှာ ဇန်နဝါရီ ၁၅ ရက် ရေအောက်မီးတောင် ပေါက်ကွဲမှုကြောင့် ကြီးမားတဲ့လှိုင်းလုံးတွေ ဖြစ်ခဲ့ပြီး ဂျပန်၊ ဩစတြေးလျနဲ့ တောင်ပစိဖိတ်ကျွန်းနိုင်ငံ အများအပြားမှာ ဆူနာမီ သတိပေးချက်တွေ ထုတ်ပြန်ထားပါတယ်။
တွန်ဂါဟန်ဂါရေအောက်မီးတောင်ဟာ တွန်ဂါမြို့တော် နူကူအလိုဖာရဲ့မြောက်ဘက် ၆၅ ကီလိုမီတာမှာရှိပြီး ဂရင်းနစ်စံတော်ချိန် ၀၄၁၀ နာရီမှာ ပေါက်ကွဲခဲ့တာပါ။
မီးတောင်ပေါက်ကွဲမှုဖြစ်ပြီးနောက် ၁ ဒသမ ၂ မီတာမြင့်တဲ့ ဆူနာမီလှိုင်းလုံးတွေ ဖြစ်ခဲ့တယ်လို့ သြစတြေးလျ မိုးလေဝသဌာနက ကြေညာပါတယ်။
အမေရိကန် ဟာဝါရီပြည်နယ် ဟိုနိုလူလူမြို့ရှိ ဆူနာမီသတိပေးစင်တာကလည်း ဝါရှင်တန်ကမ်းခြေ၊ ဆန်ဖရန်စစ္စကို၊ အလက်စကာပြည်နယ်၊ ဟာဝါရီပြည်နယ်တွေနဲ့ ကနေဒါ-ပစိဖိတ်ကမ်းခြေတွေကိုလည်း ဆူနာမီလှိုင်း ရိုက်ခတ်လာနိုင်တယ်လို့ သတိပေး ထားပါတယ်။
ဆူနာမီစောင့်ကြည့်စင်တာတွေက တွန်ဂါနဲ့ အမေရိကန်ဆာမိုရာကျွန်းနေရာတွေကို အဓိကထားပြီး ဆူနာမီလှိုင်းတွေကို စောင့်ကြည့်နေကြပါတယ်။
