မြန်မာနိုင်ငံမှာ အာဏာသိမ်း ၂ နှစ်ကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ အယောက် ၃,၄၄၀ နဲ့ ဖမ်းဆီးထိန်းသိမ်းခံရသူပေါင်း ၂၁,၅၅၁ ယောက်ထိ ရှိလာခဲ့ပြီဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ထားပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၃ ခုနှစ်၊ ဧပြီ ၂၆ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။

နွေဦးတော်လှန်ရေးကာလအတွင်း ဒီနေ့အထိ ၁၇,၆၄၅ ယောက် လက်ရှိ ချုပ်နှောင်ခံထားရဆဲ ဖြစ်ပြီး အဲဒီထဲက ၅,၆၇၇ ယောက်ကတော့ ထောင်ဒဏ် ချမှတ်ခံထားရပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေအတွက်ကတော့ ၁၁၀ ယောက် ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက် အပါအဝင် ၁၂၁ ယောက်ကတော့ မျက်ကွယ်ပြစ်ဒဏ် ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၅၂ ယောက် ရှိလာခဲ့ပြီ ဖြစ်ပါတယ်။

လတ်တလောအချိန်ထိ ဖမ်းဆီးခံရပြီး ပြန်လည်လွတ်မြောက်လာသူ ဦးရေကတော့ ၃,၉၀၆ ယောက် ရှိခဲ့တယ်လို့ ဆိုပါတယ်။

ပြီးခဲ့တဲ့ ဧပြီ ၂၄ ရက် မနက်ပိုင်းက မကွေးတိုင်း၊ ပေါက်မြို့နယ်၊ ဇီးတောကျေးရွာအနီးမှာ ဒေသကာကွယ်ရေးတပ်ဖွဲ့နဲ့ ပင်တောင်ကျေးရွာက အကြမ်းဖက်စစ်အုပ်စု လက်အောက်ခံ ပျူစောထီးတို့ တိုက်ပွဲဖြစ်ပွားခဲ့တယ်လို့ သိရပါတယ်။ အဲဒီနောက် နေ့လယ် ၂ နာရီလောက်မှာတော့ အကြမ်းဖက်စစ်အုပ်စု လက်အောက်ခံ ပျူစောထီးအဖွဲ့ဝင်တွေက ဇီးတောကျေးရွာထဲကို ဝင်ရောက်စီးနင်းကာ စိတ်ကျန်းမာရေးမကောင်းသူ ကိုကျော်လွင်ကို မီးရှို့သတ်ဖြတ်ခဲ့ပြီး နေအိမ် ၁၅၀ လောက်ကို မီးရှို့ဖျက်ဆီးခဲ့တယ်လို့ အေအေပီပီက ပြောပါတယ်။

ဒါ့အပြင် ဧပြီ ၂၂ ရက် မနက်ပိုင်းကလည်း စစ်ကိုင်းတိုင်း၊ ရွှေဘိုမြို့နယ် စည်ပင်သာယာရေး ရုံးမှာ တပ်စွဲထားတဲ့ အကြမ်းဖက်စစ်အုပ်စု ဗုံးပစ်တိုက်ခိုက်ခံရပြီးနောက် အမျိုးသမီး ၃ ယောက်နဲ့ အသက်မပြည့်သေးတဲ့ ယောကျ်ားလေးတွေ အပါအဝင် ဒေသခံ ၁၆ ယောက်ကို ပြည်သူ့ကာကွယ်ရေးတပ်ဖွဲ့ဝင်တွေနဲ့ အားပေးထောက်ခံသူတွေလို့ စွပ်စွဲပြီးတော့ အကြမ်းဖက် စစ်အုပ်စုတပ်က ရိုက်နှက်ဖမ်းဆီးခဲ့တယ်လို့ ဆိုပါတယ်။ အေအေပီပီအနေနဲ့ ဖမ်းဆီးခံရသူတွေ ဘယ်သူဘယ်ဝါဖြစ်သလဲ ဆိုတာကို အတည်ပြုဖို့ ကြိုးစားနေဆဲဖြစ်တယ်လို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့၊ မာရမ်းကျေးရွာအနီး ရာဘာခြံထဲမှာ ဒေသခံပြည်သူ ၁ ဦးကို ဧပြီ ၂၃ ရက် မနက် ၉ နာရီလောက်မှာ စစ်ကောင်စီတပ်က ပစ်သတ်သွားတယ်လို့ ကော့သောင်း ‌ပြည်သူ့ကာကွယ်ရေးတပ်ဖွဲ့ တာဝန်ရှိသူဆီက သိရပါတယ်။

ပစ်သတ်ခံရသူ အမျိုးသားမှာ အသက် ၄ဝ ကျော်အရွယ် မောင်လတ် ဆိုသူဖြစ်ပြီး ကျေးရွာနဲ့ တမိုင်ကျော်ဝေးတဲ့ ရာဘာခြံထဲမှာ အလုပ်လုပ်ကိုင်နေသူဖြစ်ကာ ရာဘာခြံထဲရှိနေတဲ့အချိန် စစ်ကြောင်းထိုးလာတဲ့ စစ်ကောင်စီတပ်သားတွေက အကြောင်းမဲ့ လာရောက်ပစ်သတ်သွားတာလို့ သိရပါတယ်။

ကော့သောင်း ပြည်သူ့ကာကွယ်ရေးတပ်ဖွဲ့မှ တာဝန်ရှိသူတဦးက “သူက ရာဘာခြံ အလုပ်သမားတဦးပါ။ ဘာအပြစ်မှလည်း မရှိဘူး။ စစ်တပ်က အကြောင်းမဲ့ ပစ်သတ်သွားတာပါ။ သူက ဒီရွာသားတယောက်ပါပဲ။ အင်အား ၃ဝ လောက် စစ်ကြောင်းထိုးလာတဲ့အချိန် ပစ်သတ်သွားတယ်” လို့ ပြောပါတယ်။

ပြီးခဲ့တဲ့ရက်ပိုင်းကလည်း ခမောက်ကြီးမြို့ ရှမ်းကိုးရွာက ဒေသခံ ၇ ဦးကို စစ်ကောင်စီတပ်သားတွေက အကြောင်းမဲ့ လာရောက်ဖမ်းဆီးသွားတယ်လို့လည်း သိရပါတယ်။

ခမောက်ကြီးမြို့ ရှမ်းကိုးရွာမှာ စစ်ရေးတင်းမာမှုတွေ ရှိနေပြီး စစ်ကောင်စီတပ်က မကြာခန စစ်ကြောင်းထိုး ဝင်ရောက်တိုက်ခိုက်တာကြောင့် ဒေသခံအများအပြား ထွက်ပြေးတိမ်းရှောင်နေရတယ်လို့ သိရပါတယ်။

အလားတူ တနင်္သာရီတိုင်း၊ မြိတ်ခရိုင်၊ ပုလောမြို့နယ်၊ ပလဂိတ်မှာ စစ်ကောင်စီတပ်သားတွေက အရပ်သား ၂ ဦးကို ဧပြီ ၂၂ ရက် မနက် ၁၀ နာရီမှာ ဖမ်းဆီးပြီး သတ်ဖြတ်ခဲ့တယ်လို့ ဒေသခံတွေထံက သိရပါတယ်။

သတ်ဖြတ်ခံရသူ ဦးကျော်ထွန်းနဲ့ သားဖြစ်သူတို့မှာ ကြဲရွာသားတွေဖြစ်ကြပြီး ဦးကျော်ထွန်းရဲ့ ဇနီး ဒေါ်ရီရှင် ရှိရာ ထိုင်းနိုင်ငံကို သွားမယ့်လမ်းမှာ ဖမ်းဆီးသတ်ဖြတ်ခံရတာလို့ ဒေသခံတွေက ပြောပါတယ်။

ဒေသခံ ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက “ပလဂိတ်မှာ အရပ်သား ၂ ဦး ဖမ်းဆီးခံရတာတော့ ဟုတ်တယ်။ အလောင်းတွေ ပြန်ရတာတော့ မရှိသေးဘူး။ သေဆုံးမှုအတွက် ကျနော်တို့ဘက်က အတည်မပြုရသေးဘူး” လို့ ဒီဗွီဘီကို ပြောပါတယ်။

“ပလဂိတ်မှာ စစ်တပ်က အရပ်သား ၂ ဦးကို ကားပေါ်ကနေဆွဲချပြီး ဖမ်းပြီး ပစ်သတ်လိုက်တယ်။ သတ်ခံရတဲ့သူတွေက အရင် ကြဲရွာအုပ်ချုပ်ရေးမှူးဟောင်း ဦးမျိုးလွင်နဲ့ ဆွေမျိုးတော်စပ်သူတွေဖြစ်တယ်” လို့ ဒေသခံတဦးက ပြောပါတယ်။

ကြဲရွာအုပ်ချုပ်ရေးမှူးဟောင်း ဦးမျိုးလွင်ကို စစ်ကောင်စီတပ်သားတွေက ကျွန်းစုမြို့နယ်၊ စခန်းသစ်ကျေးရွာမှာ ပြီးခဲ့တဲ့ ဖေဖော်ဝါရီ ၂၁ ရက် နေ့လယ်ပိုင်းလောက်က ဖမ်းဆီးခေါ်ဆောင်သွားပြီး သတ်ဖြတ်ခံရတယ်လို့လည်း ဒေသခံတွေထံက သိရပါတယ်။