တနင်္သာရီတိုင်း၊ ပုလောမြို့နယ်၊ တိုကျေးရွာက စိတ်ကျန်းမာရေးမကောင်းတဲ့ အမျိုးသားတယောက်ကို စစ်ကောင်စီတပ်ဖွဲ့ဝင်တွေက နိုဝင်ဘာ ၈ ရက်မှာ သတ်ဖြတ်ပြီး မီးရှို့ခဲ့တယ်လို့ ဒေသခံတွေက ပြောပါတယ်။
မြိတ်ဘက်ကနေ ပုလောဘက်ကို မောင်းနှင်လာတဲ့ စစ်ကောင်စီယာဉ်တန်းကို နိုဝင်ဘာ ၈ ရက် မနက် ၁၁ နာရီကျော်လောက်က ပုလောမြို့နယ် စက်တော်ရာကျေးရွာအနီး မိုင်းဆွဲတိုက်ခိုက်ခံရပြီးနောက် ယာဥ်တန်းပါ စစ်ကောင်စီတပ်ဖွဲ့ဝင်တွေက ထားဝယ်-မြိတ် ကားလမ်းမကြီးပေါ်မှာရှိတဲ့ ကျေးရွာ ၄ ရွာက နေအိမ် ၁၀ လုံးကို မီးရှို့ခဲ့သလို တိုကျေးရွာက အသက် ၃၅ အရွယ် အမျိုးသားကိုလည်း သေနတ်နဲ့ပစ်သတ်ခဲ့ပြီး အလောင်းကို မီးရှို့ဖျက်ဆီးခဲ့ကြတာလို့ ဆိုပါတယ်။
ပုလောမြို့နယ်ထဲက နေရာတချို့မှာ အောက်တိုဘာလ နောက်ဆုံးပတ်ကစပြီး ဒီနေ့အချိန်ထိ နေ့တိုင်းနီးပါး တိုက်ပွဲတွေ ဖြစ်ပွားနေတဲ့အတွက် ဒေသတွင်း ပြည်သူ့ကာကွယ်ရေးတပ်ဖွဲ့တွေက ခရီးသွားတွေအနေနဲ့ ထားဝယ်-မြိတ် ကားလမ်းမကြီးကို နိုဝင်ဘာ ၈ ရက်ကစပြီး ဖြတ်သန်းသွားလာတာတွေ မလုပ်ဖို့ အသိပေး ထုတ်ပြန်ထားပါတယ်။
စစ်ကိုင်းတိုင်း၊ မုံရွာမြို့နယ်၊ တောပုကျေးရွာက လယ်သမား တယောက်ကို အောက်တိုဘာ ၃၀ ရက် ညနေ ၃ နာရီခွဲလောက်က ပျူစောထီးအဖွဲ့က သေနတ်နဲ့ ပစ်သတ်သွားတယ်လို့ ရွာခံ တဦးက ပြောပါတယ်။
တောပုကျေးရွာအနောက်ပိုင်းနေ ကိုဘိုရှိုင်း (ခ) ကိုကျော်ဇင်ထွန်းကို လယ်ကွင်းအတွင်း ထွန်စက် မောင်းနေတုန်း ပစ်သတ်လိုက်တာလို့ သိရပါတယ်။
ဒေသခံတဦးက “တောပုရွာမြောက်ပိုင်းက ပျူ သုံးယောက်က ကိုဘိုရှိုင်း လယ်ထဲ ထွန်စက်မောင်းနေတုန်း လာပစ်သတ်သွားတာ။ ဘာကြောင့်လဲတော့ မသိဘူး။ ကိုဘိုရှိုင်းက ရွှေဘိုဇာတိ၊ တောပုကျေးရွာသူနဲ့ အိမ်ထောင်ကျပြီး တောပုမှာပဲနေတာပါ”လို့ ပြောပါတယ်။
သေဆုံးသူဟာ သေနတ်နဲ့ ဦးခေါင်းကို တေ့ပစ်ခံရတာဖြစ်ပြီး ဦးခေါင်း ဘယ်ဘက်ကနေ ညာဘက်အထိ ကျည်ဖောက်ဒဏ်ရာနဲ့ နေရာမှာတင် သေဆုံးခဲ့တယ်လို့ သိရပါတယ်။
မုံရွာမြို့နယ်ရှိ ပြည်သူ့စစ်အမည်ခံပျူစောထီးအဖွဲ့တွေကို စစ်ကောင်စီတပ်ဖွဲ့က အခြေခံ စစ်သင်တန်းပေးပြီး လက်နက်တပ်ဆင်ပေးထားကာ မြို့နယ်အတွင်း ကင်းပုန်းလုပ်တာနဲ့ စစ်ကြောင်းသွားရာနေရာမှာ ဒေသခံလမ်းပြတွေအဖြစ် ပူးတွဲလိုက်ပါလေ့ရှိပါတယ်။
