ကော်သူးလေအုပ်ချုပ်နယ်မြေ၊ ခလယ်လွီထူခရိုင်တခုလုံးမှာ စစ်အာဏာသိမ်းပြီးချိန်ကတည်းက စစ်ဘေးကြောင့် အနည်းဆုံး စာသင်ကျောင်းပေါင်း ၁၀၀ ကျော် ပိတ်ခဲ့ရပြီး ကျောင်းသားကျောင်းသူအယောက် ၃၀,၀၀၀ ထက်မနည်း ပညာသင်ကြားခွင့် အခွင့်အရေးတွေ ဆုံးရှုံးခဲ့ရတယ်လို့ ကရင်အမျိုးသားအစည်းအရုံး(ကေအန်ယူ)က ထုတ်ပြန်ပါတယ်။

ဖေဖော်ဝါရီ ၁၃ ရက် မြန်မာနိုင်ငံ ကလေးသူငယ်များနေ့ကို ခလယ်လွီထူခရိုင် တပ်မဟာ (၃) မှာ ကျင်းပခဲ့ပြီး စစ်ဘေးရှောင် ကလေးသူငယ်တွေက လက်ရှိကြုံ တွေ့နေရတဲ့ အခြေအနေတွေအပေါ် ဆန္ဒထုတ်ဖော်ပြသခဲ့ကြတာဖြစ်ပါတယ်။

ဆန္ဒထုတ်ဖော်ခဲ့ကြတာတွေထဲမှာတော့ စစ်ဘေးရှောင် ကလေးသူငယ်တွေအနေနဲ့ တောထဲမှာ မအိပ်လိုတာ၊ ပြည်တွင်းစစ်ကို အလိုမရှိတာ၊ မြန်မာစစ်တပ်ကို ကြောက်ရွံ့တာ၊ ကြောက်ရွံ့စွာ နေထိုင်ရတာ၊ အိမ်ကို မီးရှို့ဖျက်ဆီးခံရတာ၊ ကျောင်းမတက်ရတာ၊ အိမ်ပြန်ချင်တာ၊ လေယာဉ် လာမပစ်စေချင်တာ၊ မိမိတို့ကို မြန်မာစစ်တပ်နဲ့ မခြိမ်းခြောက်စေချင်တာ၊ မြန်မာစစ်တပ်ကို မမြင်ချင်တာ၊ ကလေးသူငယ်အခွင့်အရေးကို အပြည့်အဝ ရယူလိုတာ၊ ကျောင်းတက်ချင်တာ တောထဲတွင် ပုန်းပြီးအိပ်နေရတာ၊ ငြိမ်းချမ်းလွတ်လပ်စွာ နေထိုင်ချင်တာတွေ၊ လက်နက်ကြီးအသံတွေ မကြားချင်တာတွေ စတဲ့ အချက်တွေ ပါဝင်နေတာ ဖြစ်ပါတယ်။

ခုလို မြန်မာနိုင်ငံ ကလေးသူငယ်များနေ့ကို စစ်ဘေးရှောင်နေရာမှာ ကျင်းပရတာက ကလေးသူငယ်တွေရဲ့ အခွင့်အရေးကိုချိုးဖောက်ခံရတာတွေ၊ ကလေးသူငယ်တွေ စစ်ဘေးဒဏ် ခံစားနေရတာတွေကို ကမ္ဘာကသိရှိစေဖို့ သူတို့ရဲ့ အသံတွေ အိပ်မက်တွေကို ထုတ်ဖော်ပြသဖို့ဖြစ်တယ်လို့ ကေအန်ယူက ဆိုပါတယ်။ 

မြန်မာနိုင်ငံမှာ အကြမ်းဖက်စစ်အုပ်စုက မတရား အာဏာသိမ်းယူထားခဲ့တဲ့ ကာလဟာ ၂ နှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး ကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာ ဖြစ်ပါတယ်။

ဒါ့အပြင် အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး တိုင်းဒေသကြီးနဲ့ ပြည်နယ်တွေအနှံ့အပြားမှာပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

၂၀၂၂-၂၃ အခုပညာသင်နှစ်မှာ ကျောင်းသားကျောင်းသူ ၇ သန်းကျော် ကျောင်းတက်ပေမဲ့ ပုံမှန်စာသင်နှစ်ထက်စာရင် ကျောင်းသားကျောင်းသူ ၃ သန်းလောက်ကတော့ ပညာသင်ခွင့် ဆုံးရှုံးခဲ့ရတယ်လို့ စစ်ကောင်စီ ပညာရေးဌာနက သိရပါတယ်။

အာဏာသိမ်းပြီးနောက်ပိုင်း ၂၀၂၁ ခုနှစ် ဇွန်လမှာ အခြေခံပညာကျောင်းတွေကို ပြန်ဖွင့်လှစ်ခဲ့ရာ နိုင်ငံရေးအခြေအနေနဲ့ ကိုဗစ်-၁၉ ရောဂါအခြေအနေတွေကြောင့် ကျောင်းတက်နှုန်းဟာ ၃ သန်းကျော်လောက်ပဲ ရှိခဲ့ပေမဲ့ ၂၀၂၂ ဇွန်လမှာတော့ ကျောင်းအပ်နှုန်းတွေနဲ့ ကျောင်းတက်နှုန်းတွေ ပြန်လည်မြင့်မားလာတယ်လို့ စစ်ကောင်စီ ပညာရေးဌာနမှ အရာရှိတဦးက ပြောပါတယ်။

ဒါ့အပြင် လာမယ့်နှစ်မှာလည်း ကျောင်းတက်နှုန်းတွေက ပုံမှန်စာသင်နှစ်တွေအတိုင်း ကျောင်းတက်နှုန်း မြင့်မားလာနိုင်ပြီး စာသင်နှစ်အလိုက် ဖွင့်လှစ်လေ့ရှိတဲ့ ကျောင်းပြင်ပ ပညာရေး၊ စာတတ်မြောက်ရေး စီမံကိန်းတွေလည်း စီမံချက်နဲ့ လုပ်ဆောင်လို့ရမယ့် အခြေအနေ ရှိတယ်လို့ ဆိုပါတယ်။

အခုပညာသင်နှစ်အတွက် ကျောင်းအပ်နှံရေး သီတင်းပတ်ကို မေလ ၂၆ ရက်ကနေ ၃၀ ရက်နေ့အထိ ပြုလုပ်ခဲ့ပြီး တိုင်းဒေသကြီးနဲ့ ပြည်နယ်အသီးသီးရှိ အခြေခံပညာကျောင်း၊ ကိုယ်ပိုင်ကျောင်းတွေနဲ့ ဘုန်းတော်ကြီးသင် ပညာရေးကျောင်းတွေမှာ ကျောင်းအပ်နှံခဲ့တဲ့ ကျောင်းသား၊ ကျောင်းသူ ၅ သန်းကျော်ခဲ့ပြီး ပညာသင်နှစ်ဝက်ရောက်ရှိချိန်မှာ ၇ သန်းကျော်အထိ ရှိလာတယ်လို့ ပညာရေးဝန်ကြီးဌာနဲ့ရဲ့ စာရင်းတွေအရ သိရပါတယ်။

တနိုင်ငံလုံး အတိုင်းအတာနဲ့ ကျောင်းအပ်နှုန်းတွေ မြင့်မားလာပေမဲ့ စစ်ပွဲတွေဖြစ်ပေါ်နေတဲ့ စစ်ကိုင်း၊ ကယားပြည်နယ်၊ ကရင်ပြည်နယ်တွေက ကျောင်းအပ်နှုန်းတွေကတော့ လျော့ကျနေဆဲဖြစ်တယ်လို့ စစ်ကောင်စီ ပညာရေးဌာန အရာရှိက ဆိုပါတယ်၊။

မြန်မာနိုင်ငံတဝန်းမှာ စစ်ကျွန်ပညာရေးကို သပိတ်မှောက်တဲ့နေနဲ့ သန်းနဲ့ချီတဲ့ ကျောင်းသူကျောင်း သားတွေက စစ်ကောင်စီဖွင့်တဲ့ ကျောင်းတွေမှာ ဆက်မတက်ကြတာရှိသလို ကျောင်းဆရာ ဆရာမတွေကလည်း အာဏာဖီဆန် CDM လှုပ်ရှားမှုမှာပါဝင်နေကြပါတယ်။