ကရင်ပြည်နယ်၊ မြဝတီမြို့က နိုင်ငံကူးလက်မှတ် ထုတ်ပေးရေးရုံးမှာ ပတ်စ်ပို့လုပ်လိုသူတွေအနေနဲ့ ပြင်ပပွဲစားတွေကိုသာမက ပတ်စ်ပို့ရုံးဝန်ထမ်းတွေကိုပါ အခကြေးငွေပေးပြီး လုပ်နေရတာ ရှိတယ်လို့ ကိုယ်တိုင်ပြုလုပ်ခဲ့သူတွေက ပြောပါတယ်။
ပြီးခဲ့တဲ့ မတ်လ ဒုတိယပတ်အတွင်း မြဝတီမြို့မှာ ပတ်စ်ပို့ပြုလုပ်ခဲ့သူတယောက်က ပတ်စ်ပို့ရုံးဝန်ထမ်း အမျိုးသမီးတယောက်ဆီမှာ ငွေကျပ် ၅ သိန်းခွဲ လာဘ်ငွေပေးပြီး ပတ်စ်ပို့စာအုပ် ပြုလုပ်ခဲ့ရတယ်လို့ ဒီဗွီဘီကို ပြောပါတယ်။
“မြဝတီမှာ တယောက်ကို ၅ သိန်းခွဲ၊ လုပ်တဲ့လူချင်း မတူဘူး။ ပွဲစားဆိုရင် စောင့်ရမယ်၊ တန်းစီရမယ်။ ရုံးထဲက ဆရာမနဲ့လုပ်တာဆို စောင့်စရာမလိုဘူး။ သူ့လမ်းကြောနဲ့သူ သွားတာ။ အခုက မြဝတီမှာ လုပ်ဆို QR မလိုဘူး။ မြဝတီမှာ သူ့အဆက်အစပ်မရှိဘဲ ရုံးထဲ ဝင်လို့မရဘူး။ သူ့လူနဲ့သူသွင်းမှ ဝင်လို့ရမှာ။ ဝင်ချင်းတိုင်းဝင်၊ ထွက်ချင်တိုင်းထွက်လို့ မရဘူး။ ဘာမျဉ်းစောင်းမဆိုရတယ်။ နယ်မြေမသတ်မှတ်ထားဘူး။ နယ်ကျော် အကုန်လက်ခံတယ်။”
မြဝတီမြို့ နိုင်ငံကူးလက်မှတ်ထုတ်ပေးရေးရုံးမှာ တရက်ကို လူ ၃၀၀ နီးပါး ပတ်စ်ပို့ ပြုလုပ်ပေးနေတယ်လို့ သိရပါတယ်။
ပြီးခဲ့တဲ့ရက်ပိုင်းက မြဝတီမှာ ပြည်သူ့ကာကွယ်ရေးတပ်နဲ့ စစ်ကောင်စီတပ်ဖွဲ့တွေအကြား တိုက်ပွဲတွေကြောင့် လမ်းတွေပိတ်ခဲ့ပြီး လက်ရှိမှာတော့ လမ်းကြောင်းတွေ ပြန်ဖွင့်နေပြီလို့ ဒေသခံတွေဆီက သိရပါတယ်။
မြဝတီ ပတ်စ်ပို့ရုံးမှာ ပြင်ပပွဲစားတွေနဲ့ ပတ်စ်ပို့လုပ်မယ်ဆိုရင် စျေးနှုန်း အနိမ့်ဆုံး ကျပ် ၂ သိန်းကစလို့ ၇ သိန်း၊ ၈ သိန်းအထိ ပေါက်စျေးရှိနေပြီး ရုံးတွင်းပွဲစားတွေနဲ့လုပ်မယ်ရင် ၅ သိန်းခွဲဝန်းကျင်ရှိတယ်လို့ ကိုယ်တိုင်လုပ်ခဲ့သူတွေက ပြောပါတယ်။
ပေါင်မြို့နယ်မှ ပတ်စ်ပို့ပြုလုပ်သူတဦးက “ညီမလုပ်တာ အပြီးအစီး ၄ သိန်းလောက် ကုန်သွားတယ်။ ကိုယ်တိုင် ပွဲစားပါပါတယ်။ ၁၂ လပိုင်းတည်းက စလစ်ရထားပြီးသား လူတွေကို အခုထိ ပတ်စ်ပို့မထုတ်ပေးသေးဘူး။ အသစ်တော့ ထုတ်ပေးနေတယ်ပြောတယ်။ ဘားအံနဲ့ မော်လမြိုင်မှာလုပ်ရင် ပိုမြန်တယ် ပြောတယ်။ ရန်ကုန်မှာတော့ မလွယ်ဘူး” လို့ ဒီဗွီဘီကို ပြောပါတယ်။
ရန်ကုန်မြို့က ပတ်စ်ပို့ရုံးမှာတော့ အွန်လိုင်းစနစ်နဲ့ ရက်ချိန်းရယူမှု ပြုလုပ်နိုင်ပြီး လက်ရှိမှာတော့ ၈ လပိုင်းအထိ ဘိုကင်ရက်ချိန်းတွေ အပြည့်ဖြစ်နေပြီလို့ သိရပါတယ်။
ရန်ကုန် ပတ်စ်ပို့ရုံးအတွင်းမှာလည်း မိဘနာမည်တွေမှာ ဦး၊ ဒေါ် ရေးထည့်မိတာ၊ PV PJ အတန်းမှားစီတာဆိုရင် တဦး ငွေကျပ် ၅,၀၀၀ ရုံးဝန်ထမ်းတွေကို ပေးနေရတယ်လို့ ပတ်စ်ပို့ ပြုလုပ်ခဲ့သူတွေက ပြောပါတယ်။
အရင် အရပ်သားအစိုးရလက်ထက်မှာ ပတ်စ်ပို့စာအုပ်ပြုလုပ်ခ ငွေကျပ် ၄၀,၀၀၀ ဝန်းကျင်သာ ရှိခဲ့ပေမဲ့ စစ်တပ်အာဏာသိမ်းပြီးနောက်မှာတော့ ပြောင်းလဲလိုက်တဲ့ QR စနစ်၊ စောင့်ဆိုင်းရတဲ့ အခြေအနေတွေ၊ ပြည်ပထွက်လိုသူ များပြားတာနဲ့ ရုံးဝန်ထမ်းတွေရဲ့ အကျင့်ပြ ခြစားမှုတွေကြောင့် ပတ်စ်ပို့မှောင်ခိုစျေးကွက်ဟာ ငွေကျပ် ၂ သိန်းကနေ ၁၀ သိန်းအထိ အမြင့်ဆုံး ရှိနေပါတယ်။
ရန်ကုန်မြို့ရှိ နိုင်ငံကူးလက်မှတ် ပတ်စ်ပို့ ထုတ်ပေးရေးရုံးမှာ အွန်လိုင်းကနေ ရက်ချိန်းရယူပြီး စလစ်နဲ့ ကိုယ်တိုင် ပတ်စ်ပို့စာအုပ် လာရောက်ထုတ်သူတွေ များပြားတာကြောင့် အချိန် တော်တော်ကြာ တန်းစီစောင့်ယူရတဲ့ အခြေအနေတွေ ကြုံနေရတယ်လို့ ပတ်စ်ပို့ ပြုလုပ်သူတွေဆီက သိရပါတယ်။
စစ်ကောင်စီက အသစ်ပြုပြင်လိုက်လိုက်တဲ့ အွန်လိုင်းကနေ ရက်ချိန်းရယူတဲ့ စနစ်သစ်မှာ လုပ်ဆောင်ရတာ လွယ်ကူ သက်သာသွားတာရှိသလို နည်းပညာ အခက်အခဲကြောင့် ဝဘ်ဆိုက် ဝင်မရတဲ့ အခက်အခဲတွေလည်း ပြည်သူတွေ ကြုံနေရပါတယ်။
ဒါ့အပြင် ပတ်စ်ပို့ရုံးပြင်ပမှာ ပွဲစားနဲ့ ပြုလုပ်သူတွေလည်းရှိပြီး ငွေကျပ် ၉ သိန်းအထိ ပေါက်ဈေးရှိတယ်လို့ ကိုယ်တိုင် ပတ်စ်ပို့ သွားလုပ်သူတွေဆီက သိရပါတယ်။
“ဒီနေ့ လူတော်တော်များတယ်။ ပတ်စ်ပို့ ထုတ်တဲ့သူ ၁၂၀၀ ကျော်လောက် ရှိတယ်။ ပုံမှန် စောစော လိုချင်တယ်ဆို စာအုပ်ထုတ်ချင်ရင် မနက် ၆ နာရီလောက် သွားတန်းစီသင့်တယ်။ ၉ နာရီထိုး ရုံးဖွင့်တယ်။ ပြင်တာဆင်တာနဲ့ ၉ ခွဲလောက် စာအုပ် စထုတ်ပေးတယ်။ ဒီရက်တွေဆို တော်တော်များတယ်။ အွန်လိုင်း ဘွတ်ကင်ယူတဲ့သူနဲ့ အောက်ဆိုဒ် သွင်းတဲ့သူနဲ့ဆို တော်တော် များတယ်။ အပြင်ပွဲစားတွေ ရှိတယ်။ ပွဲစားတွေ ဘယ်နှရက် ဘယ်နှရက် ဝင်ရမယ်။ ၉ သိန်းဆိုပြီး ပွဲစားတွေနဲ့ကျ ညှိယူကြတာပေါ့။ ပွဲစားတွေကျ တန်းစီစရာ မလိုဘူး။ တန်းပြီး ဝင်လို့ရတယ်”လို့ ပတ်စ်ပို့ပြုလုပ်သူတစ်ဦးက ပြောပါတယ်။
မြန်မာနိုင်ငံကူးလက်မှတ် ထုတ်ပေးရေးရုံး ဝဘ်ဆိုက်မှာတော့ ၂၄ နာရီ အချိန်မရွေး အွန်လိုင်း ရက်ချိန်း ရယူမှု လျှောက်ထားနိုင်ပြီး ရက်ချိန်း တရက်ကို လူဦးရေ ၂၅၀၀ ဝန်းကျင်စာ ထုတ်ပေးကာ ဧပြီလ ၆ ရက်နေ့အထိ ရက်ချိန်းတွေ ထုတ်ပေးတာ တွေ့ရပါတယ်။
“အထဲရောက်ရင် သိပ်လုပ်စရာ မလိုဘူး။ အထဲမှာ ၁၅ မိနစ် မိုင်ကုန်ပဲ။ ၁၄၊ ၁၅ ယောက် တသုတ် ထည့်ပေးတယ်။ ရုံးမဖွင့်မချင်းတော့ တန်းစီရတယ်။ သင်္ဘောသားတွေတော့ တိုးစရာ မလိုဘူး။ စလစ်ပြား ယူပြီး သွားထုတ်ရုံပဲ။ တန်းစီစောင့်တဲ့နေရာမှာ အခက်အခဲကတော့ နေပူတာနဲ့ ရေဆာတာပေါ့”လို့ ပတ်စ်ပို့ ပြုလုပ်သူတစ်ဦးက ပြောပါတယ်။
တနိုင်ငံလုံးက ပတ်စ်ပို့ရုံးတွေကို စစ်ကောင်စီ System update ပြုလုပ်တာကြောင့် ဇန်နဝါရီ ၂ ရက်နေ့မှာ ရက်အကန့်အသတ်မရှိ ပိတ်ခဲ့ပြီး ဖေဖော်ဝါရီ ၂၄ ရက်မှာ ပြန်ဖွင့်ပေးခဲ့တာပါ။ လက်ရှိမှာတော့ ရန်ကုန်မြို့ ပတ်စ်ပို့ရုံး တခုတည်းသာ အွန်လိုင်းစနစ်သစ်နဲ့ ရက်ချိန်းရယူမှု ပြုလုပ်နိုင်ပြီး ကျန်တိုင်းဒေသကြီး၊ မြို့နယ်တွေမှာတော့ ပုံမှန်အတိုင်း လုပ်ဆောင်ရမှာပါ။
မန္တလေးမြို့ နိုင်ငံကူးလက်မှတ် ထုတ်ပေးရေးရုံးမှာတော့ ပတ်စ်ပို့ရုံး ပိတ်ထားတဲ့ကာလအတွင်း တိုကင်နံပါတ် ရထားပြီးသူတွေကို အချိန် ၁၀ လခွာပြီး ရက်ချိန်းပေးထားတာကြောင့် ပတ်စ်ပို့ လုပ်မယ့်သူတွေ နှစ်နဲ့ချီ အချိန်ကြာကြာစောင့်ဆိုင်းရမယ့် အခြေအနေတွေ ကြုံတွေ့ရပါတယ်။
