မြန်မာနိုင်ငံကူးလက်မှတ် ပတ်စ်ပို့ လုပ်ဖို့ Online Booking QR စနစ်နဲ့ လျှောက်ထားကြရာမှာ လက်ရှိမှာ ပြည်ပကို ထွက်ခွာမယ့်သူတွေများပြားလွန်းတာကြောင့်  Booking ရက်ချိန်းက ၂၀၂၃ ခုနှစ် ဩဂုတ်လအထိ ပြည့်နေပြီဖြစ်ပြီး  အမြန်လုပ်ပေးမယ်ဆိုကာ ငွေကြေးလိမ်လည်မှုတွေ ရှိနေတယ်လို့ ကိုယ်တိုင်ကြုံတွေ့ခဲ့ရသူတွေက ပြောပါတယ်။

ကိုယ်တိုင်ကြုံခဲ့ရသူတစ်ဦးက ‘အခု ပတ်စ်ပို့ရုံးထဲမှာ ဘဏ်စနစ်မရှိတော့ဘူး၊ အခုက QR ရက်ချိန်းကို အမြန်လုပ်ပေးမယ်ပြောပြီး ဝန်ဆောင်ခ ၂ သိန်းအထိ ပိုက်ဆံယူပြီး QR စာရွက်တွေမှာ အချိန်အတုတွေ စာအတုတွေပြင်ပြီး ရုံးထဲက လူပါလို့ ပြောတယ်၊ ရုံးနားရောက်လို့ ဖုန်းဆက်လိုက်ရင် ရုံးထဲကလူမို့လို့ အထဲကို လာခဲ့လိုပြောတာ၊ ဂိတ်မှာ QR အတုကြီးဖြစ် နေလို့ ဝင်လို့မရတာတွေ၊ ဖုန်းစက်ပိတ်တာ၊ Block တာတွေလုပ်နေကြတာ”လို့ ပြောပါတယ်။

ဒါ့အပြင် Green Channel အနေနဲ့ လုပ်တဲ့အခါမှာလည်း နေပြည်တော် ရုံးအမှတ် (၁၀) ကို စာတင်ရမှာဖြစ်ပြီး ပြန်ကျမယ့်ရက်ကို အတိအကျမပြောနိုင်တဲ့ အခြေအနေတွေမှာ အမြန်စနစ်နဲ့ လုပ်ဆောင်ပေးမယ်ဆိုတဲ့ ငွေကြေးလိမ်လည်မှုတွေရှိနေပါတယ်။

တစ်ဖက်မှာလည်း QR ဘွတ်ကင် မလျှောက်တတ်တဲ့သူတွေအတွက် QR လျှောက်ပေးတဲ့ဝန်ဆောင်မှုတွေရှိနေပြီး QR ယူပေးဖို့ အလုပ်အပ်တဲ့သူတွေဘက်ကလည်း ပတ်စ်ပို့  ပွဲစားတွေအပေါ် လိမ်လည်မှုတွေလည်း ရှိနေတယ်လို့ သိရပါတယ်။

QR ယူပေးတဲ့အကျိုးဆောင်လုပ်ပေးနေတဲ့သူတစ်ဦးက  “သင်တန်းကျောင်းတစ်ခုက ကျနော်ဆီမှာ ပထမဆုံးအနေနဲ့ ပတ်စ်ပို့လုပ်ဖို့ တစ်ယောက်စအပ်တယ်၊ အဲဒီတုန်းက သူနဲ့ လူချင်းတွေ့လုပ်တာ၊ ပိုက်ဆံလည်း ကြိုပေးတော့ အဆင်ပြေတယ်။ နောက်တခေါက်ကတော့ ၁၅ ယောက် ထပ်အပ် တယ်၊ အဲ့ဒီ ၁၅ ယောက်မှာ ၈ ယောက်ကို ကျနော်က QR တင်ပေးတာ၊ QR လည်း ရသွားရော ပိုက်ဆံမရှင်းတာမျိုး လုပ်သွားတယ်” လို့  ပြောပါတယ်။

အန်အယ်လ်ဒီ အစိုးရလက်ထက်မှာ ပတ်စ်ပို့စာအုပ်ပြုလုပ်ခ ငွေကျပ် ၄၀,၀၀၀ ဝန်းကျင်သာရှိပေမဲ့ စစ်တပ်အာဏာသိမ်းပြီးနောက် QR စနစ်တွေနဲ့ စောင့်ဆိုင်းရတဲ့ အခြေအနေတွေကြောင့် ပတ်စ်ပို့အမြန်ပြုလုပ်ခ ငွေကျပ် ၃ သိန်းကနေ ၅ သိန်း၊ ၁၀ သိန်းအထိ ပေါက်ဈေးရှိနေတာ ဖြစ်ပါတယ်။

စစ်ကောင်စီလက်အောက်ခံ မြန်မာနိုင်ငံကူးလက်မှတ်ထုတ်ပေးရေးအဖွဲ့အနေနဲ့ ရန်ကုန်က မြန်မာနိုင်ငံကူး လက်မှတ်ထုတ်ပေးရေးရုံးမှာ အသစ်ထုတ်ပြန်ထားတဲ့ QR စနစ်နဲ့ တရက်ကို နိုင်ငံကူးလက်မှတ် လျှောက်ထားသူ အယောက် ၂၅၀၀ ကို နေ့တိုင်း ဆောင်ရွက်ပေးနေရတယ်လို့ ထုတ်ပြန်ထားပါတယ်။

နိုင်ငံကူးလက်မှတ်လျှောက်ထားလိုသူတွေအနေနဲ့ ရန်ကုန်မြို့မှာရှိတဲ့ မြန်မာနိုင်ငံကူးလက် မှတ်ထုတ်ပေးရေးရုံးမှာ မတ် ၁၄ ရက်ကစလို့ Online Booking စနစ်နဲ့ ရက်ချိန်းယူတဲ့စနစ်ကို စတင်ပြောင်းလဲ ကျင့်သုံးနေတာလည်းဖြစ်ပါတယ်။

နေပြည်တော်၊ ပျဥ်းမနားမြို့နယ်၊ ပေါင်းလောင်း (၂) ရပ်ကွက်မှာ ပတ်စ်ပို့ပြုလုပ်ခ အခကြေးငွေ ယူပြီး နိုင်ငံကူးလက်မှတ် လျှောက်ထားမှုကို ဆောင်ရွက်ပေးနေတဲ့ ပတ်စ်ပို့ အကျိုးဆောင် အမျိုးသမီးတဦးကို မတ် ၉ ရက်ညမှာ စစ်ကောင်စီတပ်ဖွဲ့ဝင်တွေက ဖမ်းဆီးခဲ့တယ်လို့ စစ်ကောင်စီပိုင် မီဒီယာတွေမှာ ထုတ်ပြန်ထားပါတယ်။

မတ် ၇ ရက်က “နေပြည်တော်အသိုင်း အဝိုင်း” Facebook Group မှာ Win Min Thant အမည်ရ Facebook Account ပိုင်ရှင်က “နေပြည်တော် ၈ မြို့နယ် အိမ်ထောင်စုနဲ့ ပတ်စ်ပို့ အမျိုးမျိုးကို အခကြေးငွေ ယူကာ လုပ်ဆောင်ပေးနေကြောင်း ဆက်သွယ်ရန် ဖုန်းနံပါတ်တွေနဲ့ ရေးသား တင်ထားတာကြောင့် စစ်ကောင်စီ တပ်ဖွဲ့ဝင်တွေက သွားရောက် စုံစမ်းခဲ့ကြပါတယ်။

လုံခြုံရေးတပ်ဖွဲ့ဝင်တွေဟာ လူမှုကွန်ရက်မှာ ရေးသားတင်ထားတဲ့ ဖုန်းနံပါတ်ကို ဆက်သွယ် မေးမြန်းခဲ့ရာ ပတ်စ်ပို့ အကျိုးဆောင် အမျိုးသမီးက မြန်မာနိုင်ငံကူးလက်မှတ်အသစ် (သို့မဟုတ်) ပတ်စ်ပို့ စာအုပ် သက်တမ်းတိုး လျှောက်ထားရင် စျေးနှုန်း ငွေကျပ် ၂၄၀၀၀ ပေးချရမယ်လို့ ဖြေကြားခဲ့ပြီး သူနေထိုင်ရာ နေအိမ်မှာ အချိန် ည ၉ နာရီ ၁၅ မိနစ်လောက်မှာ ဖမ်းဆီးခံခဲ့ရတာပါ။

စစ်ကောင်စီက တနိုင်ငံလုံးက ပတ်စ်ပို့ရုံးတွေကို System Update လုပ်တာကြောင့် ဇန်နဝါရီ ၂ ရက်မှာ ပိတ်ခဲ့ပြီး ဖေဖော်ဝါရီ ၂၄ ရက်မှာ အွန်လိုင်းဘွတ်ကင် စနစ်သစ်ကို ပြန်ဖွင့်ပေးခဲ့ပါတယ်။

အွန်လိုင်း ဘွတ်ကင်စနစ်သစ်မှာ အချိန်ကုန်သက်သာအောင်နဲ့ ကြားပွဲစားတွေကတဆင့် ငွေကြေးပေး လုပ်ဆောင်နေမှုတွေ မရှိအောင် စစ်ကောင်စီက စီစဉ်ထားပေမယ့် နည်းပညာ အခက်အခဲနဲ့ ပြင်ပမှာ ပွဲစားနဲ့ လုပ်ဆောင်မှုတွေ ရှိနေဆဲပါ။

ပြင်ပမှာ ပတ်စ်ပို့လုပ်ခ စျေးနှုန်းတွေဟာ ငွေကျပ် ၃ သိန်းကနေ ၄ သိန်းကျပ်၊ အွန်လိုင်းဘွတ်ကင် ရက်ချိန်းရယူမှုအတွက် ဝန်ဆောင်ခ ၁ သိန်းခွဲကျပ် အစားစား ရှိပါတယ်။ နေပြည်တော် ၈ မြို့နယ် အတွင်းမှာ နေထိုင်သူတွေအတွက် ပတ်စ်ပို့ ပြုလုပ်ခ ငွေကျပ် ၃ သိန်း ရှိတယ်လို့ အကျိုးဆောင်တွေဆီက သိရပါတယ်။

ဇွဲသစ်