ဗြိတိန်ဘဏ္ဍာရေးဝန်ကြီးဟောင်း ရပ်ရှီဆူနတ်ခ်ဟာ အောက်တိုဘာ ၂၄ ရက်မှာ အာဏာရကွန်ဆာဗေးတစ်ပါတီရဲ့ ခေါင်းဆောင်သစ်အဖြစ် အတည်ပြုရွေးချယ်ခံရပြီးတဲ့နောက် ဗြိတိန်နိုင်ငံရဲ့ ပထမဆုံးသော အာရှနွယ်ဖွား ၀န်ကြီးချုပ် ဖြစ်လာဖို့ရှိနေပါတယ်။
ဗြိတိန်ကွန်ဆာဗေးတစ်ပါတီ ခေါင်းဆောင် ဝန်ကြီးချုပ်လောင်းအဖြစ် ဆူနတ်ခ်ရဲ့ အဓိက ပြိုင်ဘက် ပန်နီ မားဒေါင့်က ဆူနတ်ခ်ကို အပြည့်အဝ ထောက်ခံတယ်လို့ ပြောအပြီး အောက်တိုဘာ ၂၄ ရက်မှာ ပြိုင်ပွဲကနေ နုတ်ထွက်သွားတဲ့အတွက် ဆူနတ်ခ်က ပါတီခေါင်းဆောင်ဖြစ်လာတာပါ။
သူ့ရဲ့ ပါတီနဲ့ ယူကေနိုင်ငံ ညီညွတ်ရေးအတွက် အစွမ်းကုန် ဦးစားပေးလုပ်ဆောင်သွားမှာဖြစ်ပြီး အရေးကြီးတဲ့ စီးပွားရေးဆိုင်ရာ စိန်ခေါ်မှုတွေကို ရင်ဆိုင်သွားမယ်လို့ ပါတီခေါင်းဆောင်ဖြစ်လာပြီးနောက် ပြောကြားတဲ့ ပထမဆုံးမိန့်ခွန်းမှာ ဆူနတ်ခ်က ပြောပါတယ်။
စက်တင်ဘာလက ဝန်ကြီးချုပ်ရာထူးအတွက်ယှဉ်ပြိုင်မှုမှာ ရာထူးကနုတ်ထွက်သွားတဲ့ လစ်ဇ် ထရပ်စ်ကို ရှုံးနိမ့်ပြီးတဲ့နောက် အသက် ၄၂ နှစ်အရွယ်ရှိ ဟိန္ဒူဘာသာဝင် ဆူနတ်ခ်ဟာ ဒီပါဝလီပွဲတော်နေ့မှာ ခေါင်းဆောင်သစ်အဖြစ် အတည်ပြုခံခဲ့ရတာပါ။
ဆူနတ်ခ် အခုလို ဗြိတိသျှနိုင်ငံရေးရဲ့ အထွတ်အထိပ်ထိ တက်လာတာနဲ့ ပတ်သက်ပြီး ဗြိတိန်ပြည်သူတွေကြားမှာ ခံစားချက်တွေ ရောထွေးနေကြပါတယ်။
တချို့လူတွေက ဝက်စ်မင်စတာမှာ အချမ်းသာဆုံး နိုင်ငံရေးသမားတစ်ဦးဖြစ်တဲ့ ဘဏ္ဍာရေးဝန်ကြီး ဟောင်း ဆူနတ်ခ်ရဲ့ အမွေအနှစ်တွေ အကြောင်းကို ဂုဏ်ယူပြောဆိုကြပြီး တချို့က သူရဲ့မူဝါဒနဲ့ ထိရောက်မှုက လူမျိုးစုထက် အများကြီး ပိုအရေးကြီးတယ်လို့ ပြောဆိုကြပါတယ်။
ဆူနတ်ခ် ဝန်ကြီးချုပ်ဖြစ်လာဖို့ဆိုတာ လွန်ခဲ့တဲ့ ၁၀ နှစ် ဒါမှမဟုတ် အနှစ် ၂၀ လောက်က ဖြစ်နိုင်ခြေ နည်းတယ်လို့ ထင်ရတယ်လို့ ဗြိတိန်အနာဂတ် တတ်သိပညာရှင် အဖွဲ့က ဒါရိုက်တာ ဆန်ဒါ ကတ်ဝါလာက ရိုက်တာ သတင်းဌာနကို ပြောပါတယ်။
ဒီသတင်းဟာ ဗြိတိန်ရဲ့လူထုဘဝနဲ့ အသက်မွေးဝမ်းကြောင်းဆိုင်ရာ ကျယ်ပြန့်တဲ့ အပြောင်းအလဲတွေကို ကိုယ်စားပြုတယ်လို့လဲ ကတ်ဝါလာက ပြောပါတယ်။
ဗြိတိန်ကွန်ဆာဗေးတစ်ပါတီ ခေါင်းဆောင် ဝန်ကြီးချုပ်လောင်းအဖြစ် ယှဉ်ပြိုင်သူ ပန်နီ မားဒေါင့်ကလည်း ဆူနတ်ခ်ကို အပြည့်အဝ ထောက်ခံတယ်လို့ ပြောအပြီး အောက်တိုဘာ ၂၄ ရက်မှာ ပြိုင်ပွဲကနေ နုတ်ထွက်ခဲ့ပါတယ်။
သူ့ရဲ့ ခေါင်းဆောင်မှုဆိုင်ရာ မဲဆွယ်စည်းရုံးနိုင်စွမ်းကို ဂုဏ်ယူပေမယ့် ပါတီစည်းလုံးညီညွတ်မှုကို တွစ်တာကွန်ရက်မှာ ပို့စ်တင်ရင်း မားဒေါင့်က တောင်းဆိုခဲ့ပါတယ်။
ဆူနတ်ခ်ဟာ အာဏာရ ကွန်ဆာဗေးတစ်ပါတီကို ဦးဆောင်ဖို့ တခြားကိုယ်စားလှယ်လောင်းတွေ အပြိုင်အဆိုင် နုတ်ထွက်ပြီးတဲ့နောက်မှာ ဗြိတိန်ဝန်ကြီးချုပ် ဖြစ်လာဖို့ရှိနေပြီး နိုင်ငံလက်ရှိကြုံနေရတဲ့ စီးပွားရေးအကျပ်အတည်းကို ဖြတ်ကျော်ဖို့ ကြိုးပမ်းအားထုတ်ရမှာ ဖြစ်ပါတယ်။
ဆူနတ်ခ်ဟာ ချားလ်ဘုရင်ရဲ့ တရားဝင်ခန့်အပ်လွှာရပြီးရင် အင်္ဂါနေ့မှာ ဝန်ကြီးချုပ်တာဝန်စယူမှာဖြစ်ပြီး ပထမဆုံး အိန္ဒိယနွယ်ဖွား ဝန်ကြီးချုပ်နဲ့ နှစ်ပေါင်း ၂၀၀ ကျော်အတွင်း အသက်အငယ်ဆုံး ဝန်ကြီးချုပ် ဖြစ်လာတော့မှာပါ။
