ပဲခူးတိုင်းအနောက်ပိုင်း၊ ပြည်မြို့၊ ခုတင် ၅၀၀ ဆေးရုံမှာ ကိုဗစ်-၁၉ ရောဂါနဲ့ အမျိုးသားတဦး မတ်လ ၇ ရက် ညနေပိုင်းမှာ သေဆုံးခဲ့တယ်လို့ မြို့ခံပရဟိတအသင်းနဲ့ မိသားစုဝင်တွေထံက သိရပါတယ်။

သေဆုံးသူမှာ လည်ချောင်းကင်ဆာရောဂါ ခံစားနေရသူဖြစ်ပြီး ဆေးရုံမှာ ဆေးကုသဖို့ ရက်ပြည့်လို့ လာရောက်စဉ် ဆေးစစ်ချက်အရ ကိုဗစ်ပိုးတွေ့ရှိခဲ့တာလို့ ဆိုပါတယ်။

မိသားစုဝင်တဦးက “ဆေးခန်းပြဖို့ ရက်ချိန်းပြည့်လို့ ဆေးရုံကြီးသွားတာ ကင်ဆာအထူးကု ဆရာဝန်ကြီးက ဆေးစစ်ချက်အကုန်ယူရမယ်ဆိုပြီး စစ်ဆေးချက်ယူမှ ကိုဗစ်ပိုးပါ တွေ့ခဲ့တာပါ” လို့ ပြောပါတယ်။

သေဆုံးခဲ့သူမှာ ကိုမင်းအောင် အသက် (၃၆ နှစ်) ဖြစ်ပြီး ဆေးစစ်ပြီးနောက် ကိုဗစ်ရောဂါပိုး အထူးစောင့်ကြည့်ကြပ်မတ်ဆောင် အရောက်မှာပဲ သေဆုံးခဲ့တာလို့ သိရပါတယ်။

သင်္ကြန်ပွဲတော်ကာလနောက်ပိုင်း ပြည်တွင်းမှာ အိုမီခရွန် မျိုးရိုးဗီဇပြောင်း (Arcturus) ရောဂါပိုး ပြန့်ပွားခဲ့ပြီး မတ်လ ၅ ရက်အထိ ကျန်းမာရေးဝန်ကြီးဌာန စစ်ဆေးချက်အရ ရောဂါပိုး ကူးစက်ခံရသူ ၁,၀၀၀ ကျော်ရှိပြီလို့ သတင်းထုတ်ပြန်ထားပါတယ်။

ပြည်မြို့မှာ ကိုဗစ်-၁၉ ရောဂါပိုး ကူးစက်ခံရသူ မြန်အောင်မြို့က အဘွားတဦး မတ်လ ၂ ရက်နေ့က သေဆုံးခဲ့ပြီး အခု နောက်ထပ်တဦး ထပ်မံသေဆုံးခဲ့တာပါ။

သေဆုံးရုပ်အလောင်းကို ပြည်မြို့ ခေတ္တရာလူငယ် နာရေးကူညီမှုအသင်းက အေးငြိမ်းရာသုသာန်မှာ နေ့ချင်းပြီး မီးသင်္ဂြိုဟ်ပေးခဲ့ပါတယ်။

ချယ်ဆီးလ် အသင်းပိုင်ရှင် ရိုမန် အေဗရာမိုဗစ်က အသင်းကို လန်ဒန်မှာ ထူထောင်ထားတဲ့ ပရဟိတ အသင်းဆီ အပြီးအပိုင် လွှဲပြောင်းပေးလိုက်တော့မယ်လို့ ဖေဖော်ဝါရီ ၂၆ ရက်မှာ ပြောပါတယ်။

ရုရှားသူဌေးကြီး ဖြစ်တဲ့ အေဗရာမိုဗစ်ဟာ လန်ဒန်က ချယ်ဆီးကလပ်ကို ၂၀၀၃ ခုနှစ်ကတည်းက ဝယ်ယူခဲ့တာဖြစ်ပါတယ်။ 

ဒီနှစ်တွေအတွင်းမှာ အသင်းပိုင်ရှင်တစ်ယောက်အနေနဲ့ ချယ်ဆီးအသင်းကို အောင်မြင်တဲ့ အသင်းဖြစ်အောင်၊ အနာဂတ်ရှိတဲ့အသင်းဖြစ်အောင်၊ ဘောလုံးလောကမှာ အကျိုးပြုတဲ့ အသင်းဖြစ်အောင် ကြိုးစားခဲ့ပြီး အခုအချိန်မှာတော့ အသင်းရဲ့အကျိုးအတွက် လွှဲပြောင်းလိုက်ရတာလို့ အေဗရာမိုဗစ်က ပြောပါတယ်။

“ကလပ်ရဲ့ အကျိုးကို ငဲ့ကွက်ပြီး ဒီဆုံးဖြတ်ချက်ကို နှလုံးသားနဲ့ ဆုံးဖြတ်လိုက်ရတာပါ” လို့ ဆိုပါတယ်။ 

ဘာကြောင့် အခုလို လွှဲပြောင်းရသလဲဆိုတာနဲ့ ပတ်သက်လို့ အေဗရာဟင်မိုဗစ်ရော ချယ်ဆီးအသင်းကပါ ထုတ်မပြောသေးပါဘူး။ 

ဒါပေမယ့် ရုရှားက ယူကရိန်းကို ကျူးကျော်တာနဲ့ပတ်သက်လို့ ရုရှားလူမျိုးတဦးချင်းနဲ့ အဖွဲ့အစည်းတွေအပေါ် ဒဏ်ခတ်ပိတ်ဆို့မှုတွေကို ဗြိတိန်အစိုးရက ချမှတ်နေချိန် ဖြစ်ပါတယ်။ အခုအချိန်ထိတော့ အေဗရာမိုဗစ်ကတော့ ဒဏ်ခတ်ပိတ်ဆို့မှု စာရင်းထဲမှာ မပါဝင်သေးပါဘူး။ 

ဒီလိုအသင်းအတွင်း ကြီးမားတဲ့ အပြောင်းအလဲဖြစ်ပေါ်နေချိန်မှာပဲ ချယ်ဆီးအသင်းဟာ ဒီနေ့ညမှာ League Cup နောက်ဆုံးပွဲကို ကစားရမှာဖြစ်လို့ ကစားသမားတွေအပေါ် ဖိအားရှိနေတယ်လို့ အသင်းမန်နေဂျာ သောမတ်တူချယ်က ပြောပါတယ်။