မန္တလေးတိုင်း၊ စဉ့်ကိုင်မြို့နယ် မန္တလေး-ကျောက်ဆည်လမ်း စဉ့်ကိုင် ပေါ်တော်မူဘုရားအနီးမှာ အောက်တိုဘာလ ၃ ရက် နေ့လယ် ၂ နာရီ မိနစ် ၅၀ လောက်ပက ဘဏ်ကို မီတာခသွားသွင်းတဲ့ လျှပ်စစ်မန်နေဂျာ လိုက်ပါလာတဲ့ကား ပစ်ခတ်တိုက်ခတ်ခံခဲ့ရပါတယ်။
ပလိပ် လျှပ်စစ်ရုံးကနေ ဘဏ်ကို မီတာခသွားသွင်းတဲ့ ကားပေါ်မှာ လျှပ်စစ်မန်နေဂျာ၊ ပလိပ်စခန်းမှူးနဲ့ စစ်ကောင်စီတပ်သား ၃ ယောက် လိုက်ပါလာခဲ့ကြပြီး မဟာမိတ်တွေဖြစ်တဲ့ MN PDF မြို့ပြပြောက်ကျားအထူးတပ်ဖွဲ့၊ Truth Keeping Force - Amarapura၊ ဇာမဏီ ပြောက်ကျားတပ်ဖွဲ့တို့က တိုက်ခိုက်ခဲ့တာလို့ သိရပါတယ်။
ပြည်သူလူထုအား မီတာမဆောင်ပါက မီတာဘောက်တွေ ဖြုတ်မယ်လို့ ခြိမ်းခြောက်ပြီး အတင်းအကျပ် ကောက်ခံထားသော ပြည်သူချွေးနှဲစာဖြစ်တာကြောင့် စစ်ကောင်စီ အသုံးစရိတ် မဖြစ်စေရေး တိုက်ခိုက်ခဲ့တာလို့ MN PDF မြို့ပြပြောက်ကျားအထူးတပ်ဖွဲ့က ဆိုပါတယ်။
ပစ်ခတ်မှုမှာ ၃ မိနစ်လောက်ရှိကာ အပြန်အလှန် ပစ်ခတ်ခဲ့ကြပြီး ရှေ့ခေါင်းခန်းမှလိုက်ပါလာတဲ့ ပလိပ်စခန်းမှူး သေဆုံးကာ ကားပေါ်ပါ တခြားလူတွေလည်း ထိခိုက်မှုရှိနိုင်တယ်လို့ သိရပါတယ်။
အခြေအနေအရ အမြန်ပြန်ဆုတ်ခဲ့ရတဲ့အတွက် မီတာခငွေတွေနဲ့ လက်နက်အား မသိမ်းဆည်းနိုင်ခဲ့ဘဲ ပြည်သူ့ကာကွယ်ရေးအဖွဲ့ဝင်အားလုံး အန္တရာယ်ကင်းလုံခြုံရာကို ရောက်ရှိသွားပြီလို့ MN PDF မြို့ပြပြောက်ကျားအထူးတပ်ဖွဲ့ က ထုတ်ပြန်ထားပါတယ်။
ပစ်ခတ်တိုက်ခိုက်မှုကြောင့် ပလိပ်မြို့မှာ စစ်ကောင်စီတပ်သား အင်အားအလုံးအရင်းနဲ့ စစ်ဆေးနေပြီး အပြစ်မဲ့ပြည်သူတချို့ ဖမ်းဆီးခံခဲ့ရတယ်လို့ သိရပါတယ်။
မန္တလေးတိုင်း၊ စဉ့်ကိုင်မြို့နယ်၊ ပလိပ်မြို့မှာ အောက်တိုဘာ ၂၈ ရက်မနက်က အုပ်ချုပ်ရေးမှူး တယောက် သေနတ်နဲ့ပစ်သတ်ခံရလို့ စစ်ကောင်စီတပ်တွေ အလောင်းကိုစစ်ဆေးနေချိန် ဗုံးပေါက်ကွဲမှုဖြစ်ပွားပြီး ရဲတပ်သား ၁ ဦးသေဆုံးပြီး တချို့ဒဏ်ရာရသွားပါတယ်။
စစ်ကောင်စီတပ်ဖွဲ့ဝင်တွေက အုပ်ချုပ်ရေးမှူး ဦးအောင်မြင့်ရဲ့ အလောင်းကို စစ်ဆေးနေချိန် နေအိမ်အတွင်း ပေါက်ကွဲမှုဖြစ်ခဲ့တဲ့အတွက် စစ်ကောင်စီတပ်ဖွဲ့ဝင်တစ်ဦးသေဆုံးပြီး အုပ်ချုပ်ရေးမှူးရဲ့ တူဖြစ်သူ ထိခိုက်ဒဏ်ရာရခဲ့တာလို့ ဒေသခံတွေကပြောပါတယ်။
ပစ်သတ်ခံရတဲ့ အုပ်ချုပ်ရေးမှူးနဲ့ နီးစပ်သူဒေသခံတစ်ဦးက "အုပ်ချုပ်ရေးမှူး ပစ်သတ်ခံရပြီး မနက် ၈နာရီ လောက်မှာ အလောင်းကိုစစ်ဆေးနေတုန်း ဗုံးထပ်ပေါက်တာ။ စစ်ကောင်စီ အဖွဲ့ထဲက တစ်ဦးသေတယ်။ သူ့တူတစ်ဦးဒဏ်ရာ ရတယ် "လို့ ပြောပါတယ်။
အုပ်ချုပ်ရေးမှူး ဦးအောင်မြင့်ဟာ အန်အယ်လ်ဒီအစိုးရလက်ထက်ကတည်းက မဲနဲ့ အနိုင်ရတဲ့ အုပ်ချုပ်ရေးမှူးဖြစ်ပြီး စစ်ကောင်စီလက်ထက်မှာလည်း ဆက်လက်လုပ်ကိုင်နေတဲ့အတွက် ထောက်ခံစာပြုလုပ်မယ့်ပုံစံနဲ့ အိမ်အတွင်းမှာ လာရောက်ပစ်ခတ်သွားတာပါ။
LPDF စဉ့်ကိုင်အဖွဲ့နဲ့ အမည်မဖော်လိုတဲ့ မြို့ပြပြောက်ကျားတပ်ဖွဲ့တို့ ပူးပေါင်းပြီး အုပ်ချုပ်ရေးမှူး ဦးအောင်မြင့်ရဲ့ နေအိမ်ကို ဝင်ရောက် ပစ်ခတ်ပြီးနောက် မိုင်းတလုံးထောင်ထားခဲ့တာ ဖြစ်ပြီး မိုင်းပေါက်ကွဲမှုကြောင့် ရဲတပ်သား ၁ ဦးသေဆုံးကာ ၇ ဦး ဒဏ်ရာရသွားတယ်လို့ စဉ့်ကိုင်မြို့နယ် ပြည်သူ့ကာကွယ်ရေးတပ်ဖွဲ့ LPDF က ထုတ်ပြန်ထားပါတယ်။
