ရှမ်းပြည်နယ်တောင်ပိုင်း၊ တောင်ကြီးမြို့နဲ့ ဟိုပုံးမြို့ကြားရှိ ပအိုဝ်း ကိုယ်ပိုင်အုပ်ချုပ်ခွင့်ရဒေသ ပလီကင်းကျေးရွာမှာ မေ ၂၅ ရက် မနက်ပိုင်းက ကျေးရွာအုပ်ချုပ်ရေးမှူးတွေကတဆင့် PNO အဖွဲ့က ပြည်သူ့စစ်ထဲဝင် စစ်မှုထမ်းဖို့ ကျေးရွာတရွာကို ၃ ယောက်နှုန်းနဲ့ လိုက်လံခေါ်ယူနေတယ်လို့ ဒေသခံတွေက ပြောပါတယ်။
PNO ပြည်သူ့စစ်တပ်ထဲကို အသက် ၁၈ နှစ်မှ ၃၅ နှစ်အတွင်းရှိ အရွယ်ကောင်း ပအိုဝ်းတိုင်းရင်းသား အမျိုးသားတွေကို စစ်သားအဖြစ် စစ်ကောင်စီခန့်ထားတဲ့ ကျေးရွာအုပ်ချုပ်ရေးမှူးတွေက စာရင်းကောက်ပြီး တရွာကို ၃ ယောက်နှုန်း ပေးရမယ်လို့ ဆိုပါတယ်။
ဒါ့အပြင် ပအိုဝ်းတိုင်းရင်းသားတွေအပေါ် လုံခြုံရေးစရိတ် တအိမ် ကျပ် ၃ သောင်း ကောက်ခံမှုတွေ ရှိနေတယ်လို့ ဒေသခံ ပအိုဝ်းတိုင်းရင်းသူတဦးက ပြောပါတယ်။
"ပြည်သူတွေ ဆန့်ကျင်နေလည်း မရပါဘူး။ ကျမအမျိုးသားလည်း စာရင်းထဲပါတယ်။ အခုမှ ကျမတို့ အိမ်ထောင်ကျခါစပဲ ရှိသေးတယ်။ အမျိုးသားက စစ်ထဲမသွားမနေရဆိုတော့ ညားခါစ ကျမက ဘာလုပ်ရမှန်း ဘာပြောရမှန်း မသိတော့ပါဘူး။ တခြားလူတွေလည်း အဲဒီအမိန့်ကို လက်မခံနိုင်လို့ ကန့်ကွက်ကြပေမဲ့ မရကြပါဘူးရှင့်။ ကျမတို့က စစ်အာဏာရှင်ကို အစကတည်းက လုံးဝကို ဆန့်ကျင်တယ်။ အခုဟာက PNO လုပ်ရပ်ကြောင့် ပြည်သူတွေ ငတ်လာတာပဲလားလို့ ပြောချင်ပါတယ်။ PNO နဲ့အတူ စစ်အာဏာရှင်ကို ထောက်ခံတဲ့ တခြားပအိုဝ်းတချို့ ရှိပါတယ်။ PNO ကို ထိရင် နာကြသူတွေပေါ့။ ဒါဆို သူတို့တွေကို ခေါ်လေ။ ကျမတို့ကတော့ စစ်အာဏာရှင်ကို လုံးဝဆန့်ကျင်သူတွေပဲ။"
အသက် ၁၈ နှစ်ကနေ ၃၅ နှစ်ရှိသူ အမျိုးသားတိုင်း မဖြစ်မနေ PNO ပြည်သူ့စစ်အဖွဲ့ထဲ ဝင်ရောက်ရမှာဖြစ်ပြီး ၃၅ နှစ် အထက်ပိုင်းတွေကိုတော့ ရွာလုံခြုံရေး ကင်းစောင့်ဖို့အတွက် ခေါ်ယူနေတာပါ။
အဲဒီလို ခေါ်ယူမှုအပေါ် ငြင်းဆန်သူတွေအနေနဲ့ ကျပ် ၄၅,၀၀၀ ပေးဆောင်ရမယ်ဆိုတဲ့ တောင်းဆိုမှုတွေလည်း ရှိနေတယ်လို့ ဒေသခံတဦးက ပြောပါတယ်။
“အခုထိတော့ မဝင်ရင် ဘာလုပ်မယ်ဆိုပြီး ခြိမ်းခြောက်တာတော့ မရှိသေးဘူး။ စစ်ထဲဝင်ဖို့ တရွာ ၃ ယောက်ကို မဲနှိုက်ရွေးချယ်ထားပြီးပြီ။ မဲနှိုက်တဲ့ အစည်းအဝေးကို မလာနိုင်သူတွေလည်း စာရင်းထဲပါတယ်။ နေ့စေ့လစေ့ ကိုယ်ဝန်နဲ့ အမျိုးသမီးတွေကလည်း သူတို့ယောကျ်ားတွေ စစ်မှုထမ်းစာရင်းထဲပါတော့ ငိုယိုတောင်းပန်ကြပေမဲ့လည်း မရဘူး။ ရွာသူကြီးက အတင်းသွားခိုင်းတယ်။ PNO ထောက်ခံသူတွေကတော့ လိုက်ကြမယ်ဆိုတော့ ပြောစရာစကားတောင် မဲ့သွားပါတယ်။”
ဒါ့အပြင် ရေတံခွန်ရွာ၊ သံပုရာပင်၊ ပေါမူ၊ ဇလဲ၊ ဖာမွန် စတဲ့ကျေးရွာတွေမှာလည်း တရွာကို အမျိုးသား ၃ ဦးစီ မဝင်မနေရ PNO ပြည်သူ့စစ်အဖွဲ့ထဲဝင်ပြီး စစ်မှုထမ်းဖို့ PNO အဖွဲ့က ပြီးခဲ့တဲ့ရက်ပိုင်းမှာ လိုက်လံခေါ်ယူနေတယ်လို့ သိရပါတယ်။
ရှမ်းပြည်နယ်တောင်ပိုင်း ကလောမြို့နယ်မှာ စစ်ကောင်စီတပ်နဲ့ ပအိုဝ်းပြည်သူ့စစ် (PNO) တို့ ပူးပေါင်းပြီး အောင်ပန်းအထူးကာကွယ်ရေးတပ်(ADSF)တပ်ကို လာရောက်တိုက်ခိုက်စဉ် တိုက်ပွဲဖြစ်ပြီး စစ်တပ်ဘက်က ၂ ဦးသေဆုံး ၃ ဦး ဒဏ်ရာရရှိသွားပါတယ်။
စက်တင်ဘာလ ၁၈ ရက်မနက်က ပင်းတယ-အောင်ပန်းသွား ကားလမ်းဘေး နောင်ရဲရွာနဲ့ ဥမင်ရွာ အနီး စခန်းချထားတဲ့ အောင်ပန်းအထူးကာကွယ်ရေးတပ်ကို ဝင်တိုက်ခဲ့တာဖြစ်ပြီး နောင်ရဲရွာ ဥမင်ရွာသား ၃ ဦးကို ရိုက်နှက်ဖမ်းဆီးသွားတယ်လို့လည်း ဒေသခံတစ်ဦးက ပြောပါတယ်။
"ADSF အောင်ပန်းအထူးကာကွယ်ရေးတပ်က သူတို့လာမယ်ဆိုတာသိလို့ စောင့်တိုက်တာ စစ်တပ်နဲ့ PNOက လက်နက်ကြီးတွေ သုံးလာတော့ နောက်ဆုတ်ပေးလိုက်တယ်။ ကျဆုံးမှုတော့ မရှိဘူး။ တပ်စခန်းကိုတော့ ဆုတ်ခွာပေးလိုက်ရတယ်"လို့ ပြောပါတယ်။
အောင်ပန်းအထူးကာကွယ်ရေးတပ်ကို စက်တင်ဘာလ ၆ ရက်နေ့မှာ စတင်ဖွဲ့စည်းခဲ့ပြီး စစ်အာဏာရှင်ကို လက်နက်ကိုင်တော်လှန်ဖို့ NUG အစိုးရနဲ့ပူးပေါင်းဆောင်ရွက်နေတယ်လို့ သိရပါတယ်။
