ရခိုင်ပြည်နယ်၊ ကျောက်ဖြူနဲ့ ဘူးသီးတောင်မှာ စစ်တပ်က ဖမ်းဆီးထားတဲ့ ကျေးရွာအုပ်ချုပ်ရေးမှူး၊ ဌာနဆိုင်ရာ ခရိုင်ဦးစီးမှူးတယောက်အပါအဝင် ၆ ယောက်ကို မတရားအသင်းဆက်သွယ်မှုနဲ့ အမှုဖွင့်လိုက်တယ်လို့ သိရပါတယ်။

ကျောက်ဖြူမြို့မရဲစခန်းတာဝန်ရှိသူတယောက်က “ခရိုင်ငါးလုပ်ငန်းဦးစီးပါ ၄ ယောက်ကို မနေ့က နေ့လယ်လောက်က ရဲစခန်းကိုလာပို့တယ်။ ပြီးရင် သူတို့ကို ၁၇(၁)ပေါ့။ မတရားအသင်းအက်ဥပဒေပုဒ်မ-၁၇(၁)နဲ့ အမှုဖွင့်ထားတယ်လို့ သိရတယ်။ ၄ ယောက်စလုံးကို ဖွင့်တာပါ” လို့ ပြောပါတယ်။ 

ခရိုင်မှူး ဦးကျော်ဆင့်၊ ဆက်သွယ်ရေးဝန်ထမ်း ကိုမြကျော်ထွန်းနဲ့ ကမ်းဝေးငါးဖမ်းစက်လှေတာဝန်ခံ ၂ ယောက်ဖြစ်တဲ့ ကိုထွန်းနိုင်နဲ့ ကိုသန်းမောင်တို့ကို စက်တင်ဘာ ၂၈ ရက်က စစ်ကောင်စီတပ်ဖွဲ့ဝင်တွေက အရပ်ဝတ်နဲ့လာရောက်ပြီး အေအေကို ထောက်ပံ့နေတယ်လို့ စွပ်စွဲဖမ်းဆီးခဲ့တာပါ။ 

ကျောက်ဖြူမြို့မှာ စက်တင်ဘာ ၇ ရက်နေ့ကစပြီး အေအေနဲ့ဆက်စပ်တယ်ဆိုတဲ့ သံသယနဲ့ လူ ၂၀ လောက်ကို စစ်ကောင်စီတပ်ဖွဲ့ဝင်တွေက ဖမ်းဆီးထားပြီး အဲဒီထဲက ၃ ယောက်ကိုတော့ အသက်မပြည့်လို့ ပြန်လွှတ်ပေးလိုက်ပေမယ့် ကျန်သူတွေကိုတော့ နိုင်ငံတော်အကြည်ငြိုပျက်စေမှု ပုဒ်မ-၅၀၅(က)၊ မတရားအသင်းအက်ဥပဒေပုဒ်မ-၁၇(၁)တို့နဲ့ အမှုဖွင့်ထားတာပါ။ 

ပြီးခဲ့တဲ့ စက်တင်ဘာ ၃ ရက်နေ့က ဖမ်းဆီးခံလိုက်ရတဲ့ ဘူးသီးတောင်မြို့နယ်က ကျေးရွာအုပ်ချုပ်ရေးမှူး ၂ ယောက်ကိုလည်း စစ်ကောင်စီက မတရားအသင်းဆက်သွယ်ပုဒ်မ ၁၇(၁) နဲ့ အမှုဖွင့်ထား​ပြီး ဘူးသီးတောင်မြို့နယ်တရားရုံးမှာ စက်တင်ဘာ ၃၀ ကနေ အောက်တိုဘာ ၁၄ ရက်နေ့အထိချုပ်ရမန်ရယူထားတယ်လို့ သိရပါတယ်။

ဖမ်းဆီးအမှုဖွင့်ခံထားရသူတွေကတော့ တပ်မင်းချောင်ကျေးရွာ အုပ်ချုပ်ရေးမှူး ဦးကျော်လှနဲ့ မီးကျောင်းစျေး ကျေးရွာအုပ်ချုပ်ရးမှူး အာမိန်းဟူးဆောင်တို့ ဖြစ်ကြပြီး စက်တင်ဘာလ ၃ ရက်နေ့က ဘူးသီးတောင်ဗျူဟာမှာ ကျေးရွာ ၁၂ ရွာက အုပ်ချုပ်ရေးမှူးတွေကို အစည်းအဝေးခေါ်ယူပြီး သူတို့ ၂ ယောက်ကို ပြန်မလွှတ်ဘဲ ဖမ်းဆီးလိုက်တာဖြစ်ပါတယ်။

မိသားစုနဲ့ နီးစပ်သူတယောက်က "သူတို့ကို အမှုဖွင့်ထားတယ်။ တရားရုံးမှာချုပ်ရမန်ယူထားတယ်လို့ နယ်ခြားစောင့်က အကြောင်းကြားလာပါတယ်။ ဗျူဟာက အစည်းအဝေးခေါ်တဲ့နေ့ကတည်းက ဖမ်းဆီးထားတာပါ။ အစည်းအဝေးက ကျေးရွာ ၁၂ ရွာက အုပ်ချုပ်ရေးမှူးတွေကိုခေါ်တာ။ သူတို့ ၂ ယောက်ကို ဖမ်းထားလိုက်တာ" လို့ပြောပါတယ်။

သူတို့ကို စက်တင်ဘာ ၂၉ ရက်နေ့က စစ်ဗျူဟာကနေ နယ်ခြားစောင့်တပ်ဖွဲခွဲ နခခ (၃)ဆီကို လွှဲပြောင်းပေးခဲ့ပြီး  ရက္ခိုင့်တပ်တော် အေအေနဲ့ ဆက်သွယ်တယ်ဆိုပြီး မတရားအသင်းဆက်သွယ်မှု ဥပဒေပုဒ်မနဲ့ နခခ(၃)က တရားလိုလုပ် အမှုဖွင့်ထားတာ ဖြစ်ပါတယ်။

မြန်မာနိုင်ငံ စက်မှုလက်မှုနှင့်ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) ရဲ့ အထွေထွေအတွင်းရေးမှူးချုပ် ကိုသက်နှင်းအောင်ကို ဩဂုတ် ၈ ရက်နေ့မှာ စစ်ကောင်စီက မတရားအသင်းဆက်သွယ်မှုပုဒ်မ ၁၇ (၁) နဲ့ အမှုဖွင့်ပြီး စတင်ရုံးထုတ်စစ်ဆေးနေတယ်လို့ သိရပါတယ်။

ကိုသက်နှင်းအောင်ဟာ ပြီးခဲ့တဲ့နှစ်ဇွန်လမှာ စစ်ကောင်စီရဲ့ ဖမ်းဆီးတာခံရပြီး ဖမ်းဆီးချိန်ကစလို့ အဆက်သွယ်ပြတ်တောက်နေရာက အခုမှ အဆက်သွယ်ပြန်ရတာလို့ MICS-TUsF လက်ထောက်အတွင်းရေးမှူး ကိုနေလင်းအောင်က ပြောပါတယ်။

“အခု သူ့ကို တနင်္လာနေ့တိုင်း ရုံးထုတ်နေပြီလို့ သိရတယ်။ မိသားစုနဲ့တွေ့ခွင့်ရ၊ မရတော့ မသိသေးဘူး။ ကျန်းမာရေးလည်း ကောင်းတယ်လို့ သိရတယ်။”

ကိုသက်နှင်းအောင်ကို မူလက အင်းစိန်ထောင်မှာ ဖမ်းဆီးထားတာဖြစ်ပြီး အခု သထုံမြို့၊ စျေးမသွယ်အကျဥ်းထောင်ကို ရွှေ့ပြောင်းထားတယ်လို့ သိရပါတယ်။

စစ်ကောင်စီဟာ အာဏာသိမ်းပြီးလပိုင်းအကြာမှာ MICS-TUsF ရုံးကို ဝင်ရောက်စီးနင်းခဲ့တာကြောင့် ကိုသက်နှင်းအောင်ဟာ ထွက်ပြေးတိမ်းရှောင်နေခဲ့တာလို့ ဆိုပါတယ်။

အဲဒီလို တိမ်းရှောင်နေရင်း နယ်စပ်တနေရာမှာ ဖမ်းမိတာဖြစ်ပြီး ဘာပြစ်မှုမှ ကျူးလွန်ထားတာ မရှိဘူးလို့ ကိုနေလင်းအောင်က ပြောပါတယ်။

“ပုဒ်မလျှောက်တပ်တာလို့ပဲ ယူဆတယ်။ ကိုသက်နှင်းအောင်က အလုပ်သမားအရေးပဲ လုပ်တာ။ လုပ်တာလည်း တရားဝင်အဖွဲ့အစည်းအနေနဲ့ လုပ်တာ။ အခု ဖမ်းဆီးပုဒ်မတပ်ထားတာ ယုတ္တိမရှိဘူး။ တခြားဘာပုဒ်မတွေ တပ်ထားသေးလဲဆိုတာတော့ မသိရသေးဘူး။”

လက်ရှိမှာ MICS-TUsF က ခေါင်းဆောင်တွေအပါအဝင် အခြားအလုပ်သမားအဖွဲ့ချုပ်က တာဝန်ရှိသူတွေ၊ အလုပ်သမားအရေး လှုပ်ရှားသူတွေကို စစ်ကောင်စီက ဝရမ်းထုတ်ထားတာကြောင့် တိမ်းရှောင်နေကြရတယ်လို့ သိရပါတယ်။