ရခိုင်ပြည်နယ်ဝန်ကြီးချုပ် ဦးညီပုနဲ့ စည်ပင်ဝန်ကြီး ဦးမင်းအောင်တို့ နှစ်ဦးတို့အပေါ်ချမှတ်ထားတဲ့  ၅၀၅ ပုဒ်မအတွက် ကျခံရမယ့်ပြစ်ဒဏ်ကို စစ်ကောင်စီက လျှော့ခဲ့တယ်လို့ နီးစပ်သူတွေက ပြောပါတယ်။

“အားလုံးကို ဖြေလျှော့လိုက်တာတော့ မဟုတ်ဘူးဗျ။ သူတို့ နှစ်ဦးကို ပုဒ်မ ၅၀၅ နဲ့ ချမှတ်ထားတဲ့ ပြစ်ဒဏ်ကို ဖြေလျှော့လိုက်တာပါ။”

ဇန်နဝါရီ ၄ ရက် စိန်ရတုလွတ်လပ်ရေးနေ့ အထိမ်းအမှတ်အဖြစ် စစ်ကောင်စီက အကျဉ်းသား ၇,၀၁၂ ဦး လွတ်ငြိမ်းခွင့်ပေးခဲ့ရာမှာ ရခိုင်ဝန်ကြီးချုပ် ဦးညီပုနဲ့ ဝန်ကြီး ဦးမင်းအောင်တို့ကို အခုလို ပြစ်ဒဏ် လျှော့ပေါ့ခဲ့တာပါ။

ရခိုင်ပြည်နယ်ဝန်ကြီးချုပ် ဦးညီပုကို စစ်ကောင်စီက ရွေးကောက်ပွဲ ဥပဒေ ပုဒ်မ ၁၃၀(က) နဲ့ ထောင်ဒဏ် ၂ နှစ်၊ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ ထောင်ဒဏ် ၉ နှစ်၊ ရာဇသတ်ကြီးပုဒ်မ ၅၀၅(ခ) နဲ့ အလုပ်ကြမ်းနဲ့ ထောင်ဒဏ် ၂ နှစ်၊ စုစုပေါင်း ၁၃ နှစ် အမိန့်ချခဲ့တာပါ။

စည်ပင်ဝန်ကြီး ဦးမင်းအောင်ကိုလည်း အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ ထောင်ဒဏ် ၇ နှစ်၊ ရာဇသတ်ကြီးပုဒ်မ ၅၀၅(ခ) နဲ့ ထောင်ဒဏ် ၂ နှစ်၊ စုစုပေါင်း ၉ နှစ် ချမှတ်ခံထားရတာ ဖြစ်ပါတယ်။

ရခိုင်ပြည်နယ်ဝန်ကြီးချုပ် ဦးညီပုဟာ ဘယ်ဘက်မျက်လုံးမှာ တိမ်စွဲနေတဲ့အတွက် ခွဲစိတ်ကုသနိုင်ဖို့ စစ်ကောင်စီကို တင်ပြထားပေမဲ့ ခွင့်ပြုချက် မကျနိုင်သေးဘူးလို့ နီးစပ်သူတွေက ပြောပါတယ်။

“မျက်လုံးတိမ်စွဲနေတာ အချိန်မီခွဲစိတ်မှ အဆင်ပြေမှာလေ။ မဟုတ်ရင် မျက်လုံးကွယ်သွားမှာပေါ့။ ခွင့်ပြုချက်တင်ထားတာ ၃ လကျော်ပြီလေ၊ ခွင့်မပြုသေးဘူး။ လူမှာ မျက်လုံးက အဓိကလေ။ အမြန်ခွင့်ပြုသင့်တာပေါ့။”

ရခိုင်ပြည်နယ်ဝန်ကြီးချုပ် ဦးညီပု အပါအဝင် အစိုးရအဖွဲ့ဝင် ဝန်ကြီးတွေဖြစ်ကြတဲ့ ဦကျော်အေးသိန်း၊ ဦးကျော်လွင်၊ ဦးအောင်ကျော်ဇံ နဲ့ ဦးမင်းအောင်တို့ဟာ လက်ရှိ စစ်တွေ အကျဉ်းထောင်မှာ ထောင်ဒဏ်တွေကျခံနေကြပြီး မိသားစုဝင်တွေနဲ့ လုံးဝတွေ့ခွင့်မရသေးဘူးလို့ နီးစပ်သူတွေဆီက သိရပါတယ်။

ဧရာဝတီတိုင်းအတွင်း မြို့နယ်တွေမှာ လူထုခေါင်းဆောင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ဓာတ်ပုံဖုန်းထဲတွေ့ရှိမှုနဲ့ ပြည်သူ ၃၀ ကျော်ကို စစ်ကောင်စီက ဖမ်းဆီးရိုက်နှက်ပြီး  ရာဇသတ်ကြီး  ပုဒ်မ ၅၀၅ နဲ့ အမှုဖွင့်ထားတယ်လို့ ရဲတပ်ဖွဲ့ကနေ သိရပါတယ်။ 

လူထုခေါင်းဆောင် ဒေါ်အောင်ဆန်းစုကြည်ရဲ့ မွေးနေ့ ဇွန်လ ၁၉ ရက်က စတင်ကာ ဖုန်းတွေကို လမ်းဆုံ လမ်းဂွတွေမှာ စစ်ဆေးတာဖြစ်ပြီး သီတင်း တပတ်အတွင်းမှာ ပြည်သူ ၃၀ ကျော်ကို စစ်ကောင်စီက ဖမ်းဆီးတရားစွဲဆို ခဲ့တာလို့ ရဲတပ်ဖွဲ့ဝင်တဦးက ပြောပါတယ်။ 

“မွေးနေ့က စစစ်တာ အရင်ကလည်း စစ်တာတော့ ရှိတယ်။ မစစ်တာကြာပြီ ပြန်ပြီး ဖုန်းတွေစစ်တာက အဲ့နေ့မှအဲ့မှာ ဒေါ်အောင်ဆန်းစုကြည်ပုံတွေ့တယ်ဆိုတာနဲ့ ရိုက်နှက်ဖမ်းတာ၊ စစ်တပ်ကိုခေါ်ပြီး ရိုက်နှက်တာတွေ လုပ်သေးတယ်။ ပြီးမှ စခန်းလာပို့တာ”လို့ လုံခြုံရေးအရ အမည်မဖော်လိုတဲ့ ရဲတပ်ဖွဲ့ဝင် တဦးက ပြောပါတယ်။

ဖမ်းဆီးတာခံရတဲ့ပြည်သူတွေထဲမှာ ပုသိမ်၊ ပန်းတနော်၊ အိမ်မဲ၊ မြောင်းမြ၊ ညောင်းတုန်၊ မအူပင်မြို့နယ်တွေအပြင် ကျိုက်လတ်မြို့နယ်က အများဆုံးဖမ်းဆီးခံခဲ့ရတယ်လို့ ဆိုပါတယ်။ 

လူထုခေါင်းဆောင် ဒေါ်အောင်ဆန်းစုကြည်ဓာတ်ပုံတွေလို့ ဖမ်းဆီးခံရတဲ့ ပြည်သူဟာ ၁၀၀ ကျော်ထိရှိနိုင်ပြီး တချို့ကိုတော့ ပိုက်ဆံတောင်းကာ ပိုက်ဆံရရင်ပြန်လွှတ်ပေးတာကြောင့် ပိုက်ဆံမပေးနိုင်တဲ့ ၃၀ ကျော်ကိုသာ တရားစွဲဖို့ ရဲကိုလွှဲခဲ့တာဖြစ်တယ်လို့ သိရပါတယ်။