စစ်ကိုင်းတိုင်း၊ ပုလဲမြို့နယ်မှာ မေလ ၁၀ ရက် ညပိုင်းက ကန်ဒေါင့်နယ်မြေရဲစခန်း စီးနင်းတိုက်ခိုက်ခံရပြီး စစ်ကောင်စီဘက်က ၁၀ ယောက်လောက် သေဆုံးကာ အများအပြား ဒဏ်ရာရရှိခဲ့ပြီး PDF ရဲဘော် ၆ ယောက် ဒဏ်ရာရရှိခဲ့တယ်လို့ ချောက်မြို့နယ် ပြောက်ကျားတပ်ဖွဲ့-CGF ကနေ သိရပါတယ်။

CGF တာဝန်ခံ ဗိုလ်ဘကွန်းက “ပုလဲမြို့နယ် ကန်ဒေါင့်ရဲစခန်းကို မနေ့ မေလ ၁၀ ရက် ည ၈ နာရီ ၄၅ မိနစ်လောက်မှာ ကျနော်တို့ CGF၊ ချောက်မြို့နယ်ပကဖ အပါအဝင် ဒေသကာကွယ်ရေးတပ်ရင်းတပ်ဖွဲ့ အင်အားများများနဲ့ စီးနင်းတိုက်ခိုက်ခဲ့တာ” လို့ ပြောပါတယ်။

နှစ်ဖက် အပြန်အလှန် ထိတွေ့တိုက်ပွဲဖြစ်ပွားကာ ည ၁၂ နာရီနီးပါးလောက်အထိ ပစ်ခတ်တိုက်ခိုက်ခဲ့ပြီး စစ်ကောင်စီဘက်က ၁၀ ယောက်သေဆုံးကာ အများအပြား ဒဏ်ရာရရှိခဲ့တယ်လို့ ဆိုပါတယ်။

“တိုက်တုန်းကတော့ ကျနော်တို့ မဟာမိတ်တွေ အင်အားများများနဲ့ တပ်ရင်းတွေ‌ေရာ၊ Local PDF တွေရော၊ ပကဖတွေရော ပေါင်းပြီး စခန်းသိမ်းဖို့ တိုက်ခိုက်ခဲ့ပေမဲ့ ကျနော်တို့ မသိမ်းနိုင်ခဲ့ဘူး။ ဘာလို့မသိမ်းနိုင်တာလဲဆိုတော့ ဝင်လမ်းကလည်း ကျဥ်းတယ်ဗျ။ ကန်ဒေါင့်ရဲစခန်းနားမှာ တိုက်ကြီးတွေရှိတယ်။ ဒီကောင်တွေက အဲဒီတိုက်ကြီး ၂ လုံးပေါ်ကနေ နေရာကို ကြိုယူထားပြီး အဲဒီအပေါ်ကနေ လက်နက်ကြီးတွေနဲ့ ပြန်လည်ပစ်ခတ်ကြတာ” လို့ ဗိုလ်ဘကွန်းက ပြောပါတယ်။

စခန်းသိမ်းခါနီးစဲစဲမှာ မသိမ်းနိုင်ခဲ့ဘဲ ပြန်လည်ဆုတ်ခွာလာချိန် ကာကွယ်ရေးရဲဘော်တွေနားကို လက်နက်ကြီးကျည်တလုံး ကျရောက်ပေါက်ကွဲပြီး CGF ရဲဘော် ကျောက်ဆူးရဲ့ ဘယ်ဘက်ခြေထောက်မှာ ၄၀ မမ ကျည်ထိမှန်ဒဏ်ရာ ရရှိကာ မဟာမိတ်ရဲဘော် ၅ ယောက် ဒဏ်ရာရရှိပြီး ၁ ယောက်ကတော့ စိုးရိမ်ရတဲ့ အခြေအနေ ရှိတယ်လို့ ပြောပါတယ်။

အဲဒီကန်ဒေါင့်နယ်မြေရဲစခန်းကို အရင်ကလည်း ညီနောင်မဟာမိတ်တွေနဲ့ပူးပေါင်းပြီး ၂ ရက်ဆက်တိုက် ၂ ခါ သွားရောက်တိုက်ခိုက်ခဲ့ဖူးသေးတယ်လို့ ဆိုပါတယ်။

ပုလဲမြို့နယ်မှာပဲ စစ်ကောင်စီတပ်စွဲထားတဲ့ ခြေကုပ်စခန်းတခုကို Chindwin Toe Na Yar PDF နဲ့ ပြည်သူ့ကာကွယ်ရေး ပူးပေါင်းတပ်တွေက လက်နက်ကြီး လက်နက်ငယ်တွေနဲ့ ဝင်ရောက်တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်တွေဆီက သိရပါတယ်။

ယင်းမာပင်ခရိုင်၊ ပုလဲမြို့ပေါ်က စစ်ကောင်စီအင်အား ၁၀၀ လောက်နဲ့ အခြေချ တပ်စွဲထားတဲ့ ခြေကုပ်စခန်းတခုကို မေ ၁၀ ရက် ညက စစ်ကောင်စီစခန်းရဲ့ မြောက်ဘက် မီတာ ၂၀၀ ခန့်ကနေ လက်နက်ကြီးတွေနဲ့ ကနဦး ပစ်ခတ်ခဲ့ပြီး လက်နက်ငယ်တွေနဲ့ ထပ်မံပစ်ခတ်ခဲ့တဲ့အတွက် စစ်ကောင်စီတပ်ဖွဲ့ဝင်တွေ အသေအပျောက် များနိုင်တယ်လို့ Chindwin Toe Na Yar PDF တပ်ဖွဲ့ ပြန်ကြားရေးတာဝန်ခံက ဆိုပါတယ်။

“ကျနော်တို့ ည ၇ နာရီ ၄၅ လောက်ကစပြီး သွားတိုက်တာပါ။ အဓိကက‌တော့ ကန့်ထောက်ပြည်သူ့ကာကွယ်ရေးစခန်းကို တိုက်ဖို့ ပုလဲမြို့ပေါ်က စစ်ကူမလာနိုင်အောင် ကျနော်တို့က ဦးအောင်တိုက်တာပါ။ ကန့်ထောက်စခန်းကိုလည်း ဒီကောင်တွေ မသိမ်းလိုက်နိုင်ပါဘူး။ အတွင်းသတင်းအရတော့ ဒီကောင်တွေဆီက ၉ ယောက်လောက် သေတယ်ကြားပါတယ်။ ကျနော်တို့အနေနဲ့ လက်နက်ခဲယမ်းဝယ်ယူဖို့ တပ်ရန်ပုံငွေလည်း လိုအပ်နေလို့ ထောက်ပံ့ပေးစေလိုပါတယ်ဗျ။”

လက်နက်ကြီးပစ်ခတ်မှုအပြီးမှာ နှစ်ဖက် အပြန်အလှန် တိုက်ပွ​ဲဖြစ်ပွားခဲ့ကာ စစ်ကောင်စီဘက်က ၉ ယောက်ခန့် သေဆုံးနိုင်တယ်လို့ ပြောဆိုထားပြီး ပြည်သူ့ကာကွယ်ရေးတပ်တွေ ပြန်ဆုတ်လာချိန်မှာတော့ လက်နက်ငယ်တွေနဲ့ ကျေးရွာတွေဘက်ကို ရမ်းသန်းပစ်ခတ်တာမျိုးတွေ ပြုလုပ်ခဲ့တယ်လို့ ဆိုပါတယ်။

အဆိုပါပစ်ခတ်မှုတွေကို Chindwin Toe Na Yar PDF၊ ကျောင်းသားသမဂ္ဂများအဖွဲ့၊ Real Hero၊ ပုလဲဂျော်ကာ၊ မုဆိုးလေး၊ သခင်ဒေါင်းညို တပ်ဖွဲ့တွေနဲ့ တခြား ညီနောင်မဟာမိတ် တပ်ဖွဲ့တွေက ပူးပေါင်းဆောင်ရွက်ခဲ့တာဖြစ်ပြီး ပြည်သူ့ကာကွယ်ရေးတပ်ဖွဲ့တွေဘက်က အထိအခိုက် အကျအဆုံးမရှိ ပြန်လည်ဆုတ်ခွာလာနိုင်ခဲ့ပါတယ်။

ပြီးခဲ့တဲ့ မေ ၂ ရက်ကလည်း Chindwin Toe Na Yar တပ်ဖွဲ့နဲ့ ပူးပေါင်းတပ်တွေက ပုလဲမြို့၊ ဇီးဖြူကုန်း ပျူကျေးရွာကို သွားရောက်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင်တွေ ထိခိုက်ကျဆုံးတာတွေ ရှိခဲ့ပါသေးတယ်။

စစ်ကိုင်းတိုင်း၊ ခင်ဦးမြို့နယ်၊ မူးတိမ်ချောင်းတံတားမှာ တပ်စွဲထားတဲ့ စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးတပ်တို့ မေ ၁၀ ရက် နေ့လယ် ၁ နာရီလောက်က တိုက်ပွဲဖြစ်ပွားခဲ့ပြီး စစ်ကောင်စီဘက်က ၂ ဦးသေဆုံးကာ သေနတ်တချို့ သိမ်းဆည်းရရှိခဲ့တယ်လို့ ခင်ဦး ပြည်သူ့ကာကွယ်ရေးအဖွဲ့တွေဆီက သိရပါတယ်။

စစ်ကောင်စီတပ်ဟာ တပ်စွဲထားရာ နေရာကနေ  ခင်ဦး-ရေဦး ကားလမ်းပေါ် ရောက်ရှိလာစဉ် တိုက်ပွဲဖြစ်ပွားခဲ့တာလို့ ခင်ဦးဒေသခံ ပြည်သူ့ကာကွယ်ရေးအဖွဲ့ဝင်တဦးက ပြောပါတယ်။

“သူတို့ဘက်က ကျနော်တို့ပိုင်တဲ့ နယ်မြေဘက်ကို ကင်းပုန်းတိုးဝပ်တဲ့ သဘော ထင်တယ်ဗျ။ အဲဒါကို ကိုယ့်ဘက်က အရင်ကင်းပုန်းထားတာဆိုတော့ လက်ဦးမှုရယူပြီး ပစ်ခတ်နိုင်ခဲ့တာပါဗျ။ စစ်သား ၂ ယောက်ကတော့ နေရာတင် သေဆုံးသွားတယ်။ လက်နက်တွေလည်း ကျနော်တို့ဘက်က ရလိုက်တယ်။ အမျိုးအစားတွေကတော့ MA 1 ၁ လက်၊ AK 47 ၁ လက်၊ 5.56 ကျည် ၁၅ တောင့်၊ ကျည်ဘောက် ၃ ဘောက် ရခဲ့တယ်။ ပစ္စည်းတွေကိုတော့ မြို့နယ်ပကဖအဖွဲ့က သိမ်းဆည်းသွားတယ်။”

ဒီနောက် မူးတိမ်ချောင်းတံတားက စစ်ကောင်စီတပ်သားတွေဟာ ဂွေးကုန်းရွာဘက်ကို အင်အားအလုံးအရင်းနဲ့ အလောင်းရှာဖွေတာတွေ ပြုလုပ်ခဲ့တယ်လို့ ဆိုပါတယ်။

ပစ်ခတ်မှုကို ခင်ဦးမြို့နယ် ပြည်သူ့ကာကွယ်ရေးအဖွဲ့နဲ့ နယ်မြေခံ ကာကွယ်ရေးအဖွဲ့ (LDF) တွေ ပူးပေါင်းတိုက်ခိုက်ခဲ့တာလို့ ပြည်သူကာကွယ်ရေးအဖွဲ့တွေဆီက သိရပါတယ်။

ခင်ဦးမြို့နယ်မှာ ပြီးခဲ့တဲ့ မတ် ၃ ရက်ကလည်း စစ်ကောင်စီလက်အောက်ခံ ရဲတပ်ဖွဲ့ နယ်ထိန်းခေါင်းဆောင် ၁ ယောက်ကို ပစ်သတ်ခဲ့ပြီး G3 သေနတ် သိမ်းဆည်းရမိခဲ့တယ်လို့ ဆိုပါတယ်။

အဲဒီတိုက်ခိုက်မှုတွေအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

စစ်ကိုင်းတိုင်း၊ ပုလဲမြို့နယ်က စစ်ကောင်စီတပ်နဲ့ ပျူစောထီးအဖွဲ့တွေ တပ်စွဲထားတဲ့ ဇီးဖြူကုန်း ပျူစောထီးကျေးရွာကို မေ ၂ ရက် မနက်အစောပိုင်း ၅ နာရီခွဲမှာ ဝင်ရောက်ပစ်ခတ်ခဲ့တယ်လို့ ဒေသခံ PDF အဖွဲ့တွေထံကနေ သိရပါတယ်။

အခုတိုက်ပွဲကို ပြည်သူ့ကာကွယ်ရေးအဖွဲ့ ၂၅ ဖွဲ့နဲ့ မဟာမိတ်ပူးပေါင်းကာ တိုက်ခိုက်ခဲ့တာလို့လည်း ဒေသခံ ပြည်သူ့ကာကွယ်ရေးခေါင်းဆောင်တွေက ပြောပါတယ်။

ပုလဲသခင်ဒေါင်း‌ညိုအဖွဲ့ တာဝန်ရှိသူက “တိုက်ပွဲကတော့ အောင်မြင်တယ်လို့ ပြောလို့ရမယ်ဗျ။ ဘာလို့လဲဆိုတော့ ကျနော်တို့အဖွဲ့တွေ ပျူရွာထဲအထိ ဝင်ရောက်ရှင်းလင်းနိုင်ခဲ့တာဗျ။ အခုလို ညတိုက်ပွဲလုပ်ရတာကလည်း လေယာဉ်ကြောက်လို့ပေါ့။ သူတို့ဘက်က အကျအဆုံးကတော့ အတိအကျ မသိရဘူး။ ကိုယ့်ဘက်က တယောက်ထိတာတော့ ရှိတယ်” လို့ ပြောပါတယ်။

စစ်ကောင်စီဘက်က ပုလဲမြို့နယ်မှာ အင်မထီးရွာ၊ ဇီးဖြူးကုန်းရွာ စတဲ့ကျေးရွာသားတွေကို စစ်သင်တန်းပေးပြီး လက်နက်တွေပါ ချထားပေးတဲ့ ကျေးရွာတွေဖြစ်သလို အဆိုပါ ရွာသားအများစုကလည်း ရိက္ခာပြတ်တောက်လာပြီဆို အနီးအနားက ကျေးရွာတွေကို ဝင်ရောက်ပြီး လက်နက်ပြ လုယူတာတွေ လုပ်ဆောင်တယ်လို့ ဒေသခံတွေက ပြောပါတယ်။

စစ်ကိုင်းတိုင်း၊ ဘုတလင်မြို့နယ်အတွင်းက သားရိုးကုန်းရွာမြောက်ဘက် စွမ်းရည်ထက် ကိုယ်ပိုင်စာသင်ကျောင်းအနီးမှာ မေ ၂ ရက် မနက် ၉ နာရီကျော်လောက်က စစ်ကောင်စီတပ်နဲ့ ပြည်သူ့ကာကွယ်ရေး ပူးပေါင်းတပ်ဖွဲ့ တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

အဆိုပါ စစ်ကောင်စီတပ်ဟာ မေ ၁ ရက်က နမခကနေ ဘုတလင်မြို့နယ်အတွင်း စစ်ကြောင်းထိုးလာတဲ့ စစ်တပ်ဖြစ်တယ်လို့ ဒေသခံတွေက ပြောပါတယ်။

ဇီးတောရွာဒေသခံတဦးက “မနေ့က နမခကနေ ထွက်လာတယ်။ ညနေပိုင်းရောက်တော့ ကျနော်တို့ ဘုတလင်မြို့နယ်က ဇီးတောရွာမှာ ညအိပ်တပ်စွဲတယ်။ သူတို့လာပြီ ဆိုကတည်းကတော့ ဒေသခံတွေ စစ်ကြောင်းရှောင်ရတာပေါ့။ အခုတော့ ကျနော်တို့ရွာကနေ ထွက်သွားပြီး ခဏနေတော့ ပြည်သူ့ကာကွယ်ရေးအဖွဲ့နဲ့ တိုက်ပွဲဖြစ်နေတယ်” လို့ ပြောပါတယ်။

စစ်ကောင်စီတပ်နဲ့ ပြည်သူ့ကာကွယ်ရေးတပ်တို့ တိုက်ပွဲဖြစ်ပွားချိန်ဟာ မနက် ၉ နာရီကနေ စတင်ဖြစ်ပွားပြီး ၁၀ နာရီ ၂၀ မှာ တိုက်ပွဲပြီးဆုံးခဲ့တယ်လို့ ဒေသခံ ကာကွယ်ရေးခေါင်းဆောင်တွေဆီကနေ သိရပါတယ်။

“တိုက်ပွဲဖြစ်တာ ဟုတ်တယ်ဗျ။ သူတို့က ဇီးတောရွာကနေ အင်အား ၄၈ ယောက်နဲ့ မုံရွာ-ဘုတလင်သွား လမ်းအတိုင်း တက်လာတာကို ကျနော်တို့‌က ကျီးပင်ချောင်ရွာအကွေ့ကနေ မိုင်းစဆွဲတယ်။ အဲအကြိမ်မှာလည်း ဒီကောင်တွေထိတယ်။ အဲကနေ ထပ်တက်လာတော့ သားရိုးကုန်းရွာဦးထိပ် မြောက်ဘက်အနီး စွမ်းရည်ထက် ကိုယ်ပိုင်အထက်တန်းကျောင်း ကြားမှာ ထိပ်တိုက်ဖြစ်တယ်။ (--)တွေဘက်က ၂ ယောက်ကျတယ်၊ ၅ ယောက် ဒဏ်ရာရသွားတယ်။ တိုက်ပွဲပြီးတော့ ဘုတလင်ဆေးရုံထဲ ဝင်သွားကြတယ်။ ကိုယ့်ဘက်ကတော့ ရဲဘော်တဦး ပေါင်ရှပ်ထိဒဏ်ရာ ရခဲ့တာ ရှိခဲ့တယ်” လို့ ဘုတလင်မြို့နယ် ပြည်သူ့ကာကွယ်ရေး အဖွဲ့ဝင်တဦးက ပြောပါတယ်။

အခုတိုက်ပွဲကို ဒေသတွင်း စစ်အာဏာရှင်တော်လှန်ရေး မဟာမိတ်တပ်ပေါင်းစုံ စုပေါင်းတိုက်ခိုက်ခဲ့ကြတာလို့လည်း ကာကွယ်ရေးခေါင်းဆောင်တွေဆီကနေ သိရပါတယ်။