ဧရာဝတီတိုင်း၊ ပုသိမ်မြို့၊ အမှတ် ၁ ရပ်ကွက်မှာ မေလ ၄ ရက် ညပိုင်းက နေအိမ်ခြံရှင်းရင်း လက်လုပ်မိုင်း ၃၈ လုံး တွေ့ရှိခဲ့တာကြောင့် စစ်ကောင်စီတပ်သားတွေကို ခေါ်ယူပြီး ခြံပိုင်ရှင်က အပ်နှံခဲ့တယ်လို့ သိရပါတယ်။
ထန်ကုန်းလေး ၂ လမ်းမှာရှိတဲ့ နေအိမ်ခြံထဲ မြက်ရှင်းနေချိန်မှာ အဝါရောင် ပီနံအိတ်နဲ့ ထည့်ထားတဲ့ လက်လုပ်မိုင်း ၃၈ လုံး တွေ့ရှိခဲ့တာကြောင့် ရာအိမ်မှူးကို ဆက်သွယ်ပြီး စစ်ကောင်စီတပ်ကို အပ်နှံခဲ့တာလို့ ဒေသခံတွေက ပြောပါတယ်။
ဒေသခံတဦးက “ခြံက မနေတာ ၃ လလောက်ကြာပြီ။ အဲ့ခြံကို ရှင်းတဲ့အချိန်မှာတွေ့တာ၊ အားလုံး ၃၈ လုံး၊ တချို့က အသက်သွင်းထားတာတွေလည်း ပါတယ်။ ညပိုင်း စစ်ကောင်စီတပ်က လာသိမ်းသွားတယ်” လို့ ပြောပါတယ်။
ခြံရှင်းရင်းတွေ့ရှိတဲ့ လက်လုပ်မိုင်းတွေကို စစ်ကောင်စီတပ်သားတွေက ဖောက်ခွဲဖျက်ဆီးဖို့အတွက် တောင်ပေါ်တပ်ထဲကို ယူဆောင်သွားတယ်လို့ ဆိုပါတယ်။
လက်လုပ်မိုင်းတွေ တွေ့ရှိတာနဲ့ပတ်သက်ပြီး တော်လှန်ရေးအင်အားစုတွေဘက်က တစုံတရာ သတင်းထုတ်ပြန်ထားတာမျိုး မရှိသေးပါဘူး။
ဧရာဝတီတိုင်း၊ ပုသိမ်မြို့၊ အမှတ် ၅ ရပ်ကွက်ရှိ စစ်ကောင်စီတပ်ရဲ့ စစ်သားစုဆောင်းရေးတပ် ဂိတ်ရှေ့မှာ ဧပြီ ၁၅ ရက်နေ့ ညက ဗုံးပေါက်ကွဲခဲ့တယ်လို့ သိရပါတယ်။
စစ်သားစုဆောင်းရေးတပ်ရှေ့က စစ်ဆေးရေးဂိတ် ဘန်ကာကို ဒီည ၇ နာရီ ၄၀ လောက်မှာ ဗုံးခွဲတိုက်ခိုက်ခဲ့တာလို့ ပုသိမ်မြို့ပြပြောက်ကျားတပ်ဖွဲ့ရဲ့ တာဝန်ရှိသူက ဒီဗွီဘီကိုပြောပါတယ်။
“အဲ့လမ်းက ခရိုင်ရဲမင်းကြီးအိမ်ရှိတဲ့လမ်း၊ တိုက်ခိုက်တာတော့ စစ်သားစုဆောင်းရေးလုပ်တဲ့ တပ်ရှေ့က ဘန်ကာကိုတိုက်တာပါ။ ပေါက်ကွဲမှုတော့ ဖြစ်သွားတယ်၊ ထိခိုက်မှုတော့ အတည်ပြုမရသေးဘူး။''
ဗုံးပေါက်ကွဲမှုဟာ မြို့ပေါ်ရပ်ကွက်တွေက အကုန်ကြားရပြီး အိမ်တုန်ခါတဲ့အထိ ပြင်းထန်တယ်လို့ ပုသိမ်မြို့ခံတဦးက ပြောပါတယ်။
“ပေါက်တဲ့အသံကတော်တော်ကျယ်တယ်၊ အိမ်ပါတုန်သွားတာ၊ ခဏနေမှာ သူငယ်ချင်းပြောလို့ ဗုံးကွဲတယ်ဆိုတာ သိရတာ။”
ဗုံးပေါက်ကွဲပြီးနောက်ပိုင်းမှာ စစ်ကောင်စီတပ်သားတွေက လမ်းပိတ်ဆို့ပြီး စစ်ဆေးနေတာကြောင့် ထိခိုက်မှုအခြေအနေတွေကိုတော့ မသိရသေးဘူးလို့ ဆိုပါတယ်။
