စစ်ကောင်စီနဲ့ ကချင်လွတ်မြောက်ရေးတပ်မတော် (KIA) ပြည်သူ့ကာကွယ်ရေးတပ် PDF ပူးပေါင်းတပ်တွေကြား စစ်ရေးတင်းမာမှုတွေရှိနေတဲ့အတွက် ခေတ္တခဏပိတ်ထားတဲ့ မြစ်ကြီးနား-ဆွမ်ပရာဘွမ်-ပူတာအိုကားလမ်း မတ် ၂ ရက်နေ့ကနေစပြီး ကုန်တင်ကားတွေသွားလာနိုင်ပြီလို့ ပူတာအို PDF က ထုတ်ပြန်ထားပါတယ်။
စစ်ပွဲအချိန်မရွေးဖြစ်ပေါ်လာနိုင်တဲ့အတွက် ခရီးသည်တင်ဆောင်ခွင့် မပြုသေးသလို စစ်တပ်ထုတ်ကုန် အေဘီစီ၊ မြန်မာဘီယာ၊ ဒဂုန်ဘီယာအပါအဝင် စစ်ကောင်စီနဲ့ပတ်သက်တဲ့ ကုန်ပစ္စည်း၊ စစ်သားနဲ့ စစ်လက်နက်ပစ္စည်းတွေ သယ်ယူခွင့်မရှိကြောင်း ဖော်ပြထားပါတယ်။
ဒါ့အပြင် သတ်မှတ်ထားတဲ့အတိုင်း မနက် ၆ နာရီကနေ ညနေ ၅ နာရီအတွင်းသာ ဖြတ်သန်းသွားလာကြဖို့ တိုက်တွန်းနှိုးဆော်ထားပါတယ်။
မြစ်ကြီးနား-ဆွမ်ပရာဘွမ်-ပူတာအိုကားလမ်းကို ဖေဖော်ဝါရီ ၂၂ ရက်မှာ စစ်ကောင်စီနဲ့ KIA-PDF ပူးပေါင်းတပ်ဖွဲ့တွေကြား စစ်ပွဲပြင်းထန်လာနိုင်တဲ့အတွက် ဖေဖော်ဝါရီ ၂၈ ရက် အထိ ခေတ္တပိတ်ခဲ့တာလို့ သိရပါတယ်။
ပြည်သူလူထုဟာ ရန်သူမဟုတ်ပါ။ အလိုမတူရင်ရန်သူဟု သတ်မှတ်ပြီး ကိုဗစ်-၁၉ ပြန့်ပွားနေချိန် အကြမ်းဖက်တာကို ချက်ချင်းရပ်ပေးဖို့ ပူတာအို PDFဘက်က ဩဂုတ် ၄ ရက်က သဘောထား ထုတ်ပြန်ပါတယ်။
ကချင်ပြည်နယ်အတွင်းက ပူတာအိုခရိုင်မှာ အာဏာသိမ်းစစ်ကောင်စီဘက်က ဒေသခံ ပြည်သူတွေအပေါ် အကြမ်းဖက်မှုနဲ့ပတ်သက်ပြီး ပူတာအို PDFဘက်ကိ အခုလို ထုတ်ပြန်တာဖြစ်ပါတယ်။
ပူတာအိုခရိုင်မှာ ကိုဗစ်လူနာ တစ်ရက်တစ်ခြားတိုးလာလို့ ပူတာအိုလူငယ်တွေ၊ ပရဟိတ အသင်းတွေနဲ့ ဒေသခံပြည်သူတွေအနေနဲ့ ကိုဗစ်ထိန်းချူပ်ရေး ကြိုးပမ်းနေချိန် စစ်ကောင်စီဘက်က မြို့ပတ်ကာ လူငယ်တွေကို ဖမ်းဆီးတာ၊ လိုက်လံရှာဖွေတာစသဖြင့် အမျိုးမျိုး နောက်ယှက်နေတဲ့ လုပ်ရပ်ကို ချက်ချင်းရပ်ဖို့ နဲ့ ပြည်သူလူထုအပေါ် အကြမ်းဖက်တဲ့ လုပ်ရပ်အပေါ် ပြင်းထန်စွာ တုံ့ပြန်မယ်လို့ ထုတ်ပြန်ထားပါတယ်။
ပူတာအိုမှာ ကိုဗစ်အတည်ပြုလူနာ ၂၀၀ ၀န်းကျင်ခန့်ရှိပြီး သေဆုံးသူ ၂ ဦး ရှိနေပါတယ်။
ဖေနောင်းအောင်(ပူတာအို)
