တရုတ်နဲ့ ဖိလစ်ပိုင်နှစ်နိုင်ငံအကြား ချစ်ကြည်ရင်းနှီးမှုနဲ့ ပူးပေါင်းဆောင်ရွက်မှု မြှင့်တင်ဖို့ သဘောတူ ခဲ့ကြတယ်လို့ မီဒီယာတွေက ဧပြီ ၂၃ ရက်နေ့က ဖော်ပြပါတယ်။

ဖိလစ်ပိုင်မြို့တော် မနီလာကို အလည်အပတ် ရောက်နေတဲ့ တရုတ်နိုင်ငံတော်ကောင်စီဝင်၊ နိုင်ငံခြားရေးဝန်ကြီး ချင်ဂန်းနဲ့ တွေ့ဆုံချိန်မှာ ဖိလစ်ပိုင်သမ္မတ ဖာဒီနန်ရိုမွာဒက်ဇ်မားကို့စ်က သူ့နိုင်ငံနဲ့ တရုတ်နိုင်ငံတို့ဟာ နီးကပ်တဲ့ ဖလှယ်မှုတွေကို ထိန်းသိမ်းထားပြီး ပူးပေါင်းဆောင်ရွက်ရာမှာ အသီးအပွင့်တွေ ဖြစ်ထွန်းခဲ့တယ်လို့ ပြောပါတယ်။

ထိုင်ဝမ်ကိစ္စကတော့ တရုတ်နိုင်ငံရဲ့ ပြည်တွင်းရေးကိစ္စဖြစ်ပြီး ဖိလစ်ပိုင်ဟာ အမြဲတမ်းလုပ်ဆောင်ခဲ့တဲ့အတိုင်း တရုတ်တပြည်တည်းမူဝါဒကို ဆက်လက်လိုက်နာမယ်၊ ဖိလစ်ပိုင်ဟာ ဘက်မလိုက်ဘဲ ဗျူဟာမြောက် အမှီအခို ကင်းရေးကို ဆက်လက်လုပ်ဆောင်သွားမယ်လို့ သမ္မတမားကို့စ်က ဆက်ပြောပါတယ်။

ဒေသတွင်း ငြိမ်းချမ်းရေးနဲ့ သာယာဝပြောရေးကို အကာအကွယ်ပေးဖို့ ဖိလစ်ပိုင်နိုင်ငံဟာ ရေကြောင်းဆိုင်ရာ ပြဿနာတွေကို စနစ်တကျ ကိုင်တွယ် ဖြေရှင်းဖို့ ဆန္ဒရှိတယ်လို့ ဖိလစ်ပိုင်သမ္မတက ပြောပါတယ်။

အပြန်အလှန်လေးစားမှု၊ ချစ်ကြည်ရင်းနှီးမှု၊ ကတိကဝတ် ထားရှိမှု၊ ယုံကြည်စိတ်ချရမှုနဲ့ နှစ်နိုင်ငံအကြားအပြန်အလှန် အကျိုးရှိစေမယ့် ပူးပေါင်း ဆောင်ရွက်မှု တွေဟာ နှစ်ဖက်စလုံးရဲ့ အခြေခံအကျဆုံး အကျိုးစီးပွားအတွက် ဖြစ်တယ်၊ အတွေ့အကြုံတွေနဲ့ သင်ခန်းစာတွေကို သင်ယူသင့်တယ်လို့ သူက ဆက်ပြောပါတယ်။

တရုတ်နိုင်ငံခြားရေး ဝန်ကြီး ချင်ဂန်းကတော့ နှစ်နိုင်ငံဆက်ဆံရေး ပိုမိုတိုးမြှင့်ရေး၊ အပြန်အလှန်ယုံကြည်မှုကို တိုးမြှင့်ပြီး အခက်အခဲတွေနဲ့ အနှောက်အယှက်တွေကို ကျော်လွှားနိုင်ဖို့၊ ပူးပေါင်းဆောင်ရွက်မှုအတွက် အခွင့်သာတဲ့ အခြေအနေတွေကို ဖန်တီးရင်း နှစ်နိုင်ငံဆက်ဆံရေး ခိုင်မာတည်ငြိမ်ပြီး ဖွံ့ဖြိုးတိုးတက်လာစေဖို့ နှစ်ဖက်စလုံးက ပူးပေါင်း ဆောင်ရွက်သင့်တယ်လို့ ပြောပါတယ်။

ဒေသတွင်း ငြိမ်းချမ်းရေးနဲ့ တည်ငြိမ်ရေးအပြင် နှစ်နိုင်ငံပြည်သူတွေရဲ့ အခြေခံ အကျိုးစီးပွားတွေကို အခြေခံပြီး ထိုင်ဝမ်နဲ့ ဆက်နွှယ်တဲ့ ပင်လယ်ရေကြောင်းဆိုင်ရာ ပြဿနာတွေကို မှန်မှန်ကန်ကန် ကိုင်တွယ်ဖြေရှင်းနိုင်စေဖို့ တရုတ်အရာရှိက တောင်းဆိုခဲ့ပါတယ်။

တရုတ်ရဲ့ တရားဝင်စိုးရိမ်မှုတွေကို  ခိုင်ခိုင်မာမာ တုံ့ပြန်ဖို့နဲ့ တရုတ်ရဲ့ အချုပ်အခြာအာဏာ၊ လုံခြုံရေးနဲ့ နယ်မြေပိုင်ဆိုင်မှုကို လေးစားလိုက်နာဖို့၊ ဘက်မလိုက်ဘဲ ဗျူဟာမြောက် အမှီအခို ကင်းရေးကို လက်ကိုင်ထားဖို့ သူ့ရဲ့ကတိကဝတ်ကို ဂုဏ်ပြုဖို့ကိုလည်း ချင်ဂန်းက တောင်းဆိုခဲ့ပါတယ်။

တရုတ်နိုင်ငံဟာ အခြေအနေကို ကောင်းကောင်း စီမံခန့်ခွဲဖို့ ရေကြောင်းဆိုင်ရာ ဆက်ဆံရေးယန္တရားကို ပိုမိုတိုးတက်ကောင်းမွန်စေရေး အဆိုပြုခဲ့ပါတယ်။

တရုတ်နဲ့ ပစိဖိတ်ကျွန်းနိုင်ငံတွေကြား ပူးပေါင်းဆောင်ရွက်မှု အားကောင်းလာတယ်လို့ ပါပူဝါနယူးဂီနီကို ရောက်ရှိနေတဲ့ တရုတ်နိုင်ငံတော်ကောင်စီဝင်နဲ့ နိုင်ငံခြားရေးဝန်ကြီး  ဝမ်ယိက ပြောကြားလိုက်ပါတယ်။

ပါပူဝါနယူးဂီနီရဲ့ နိုင်ငံခြားရေးနဲ့ အပြည်ပြည်ဆိုင်ရာ ကုန်သွယ်မှုဝန်ကြီးနဲ့ ဇွန် ၃ ရက်နေ့ ပူးတွဲ သတင်းစာရှင်းလင်းပွဲမှာ  တရုတ်နိုင်ငံခြားရေးဝန်ကြီး ဝမ်ယိက ပစိဖိတ်ကျွန်းနိုင်ငံတွေဟာ တရုတ်နိုင်ငံနဲ့ ဆက်ဆံရေး ဖွံ့ဖြိုးတိုးတက်ဖို့ စိတ်အားထက်သန်တယ်ဆိုတာကို ခံစားရတယ်လို့ ပြောပါတယ်။

သူ့ရဲ့ခရီးစဉ်အတွင်း တရုတ်နဲ့ ပစိဖိတ်ကျွန်းနိုင်ငံတွေဟာ ခေတ်သစ်ပိုးလမ်းနှစ်သွယ်စီမံကိန်း၊ ရာသီဥတုပြောင်းလဲမှု၊ ကိုဗစ်-၁၉ ကူးစက်ရောဂါကို တိုက်ဖျက်ရေး၊ သဘာဝဘေးအန္တရာယ် ကာကွယ်ရေးနဲ့ လျော့ပါးသက်သာစေရေး၊ ကျန်းမာရေး၊ စိုက်ပျိုးရေး၊ ကုန်သွယ်မှုနဲ့ ခရီးသွားလာရေးဆိုင်ရာ နှစ်နိုင်ငံ ပူးပေါင်း ဆောင်ရွက်ရေး သဘောတူ လက်မှတ်ရေးထိုးခဲ့ကြပါတယ်။ 

ဝမ်ယိဟာ သူ့ရဲ့တောင်ပစိဖိတ်ကျွန်းနိုင်ငံတွေဆီသွားရောက်တဲ့ ခရီးစဉ်ထဲက ၇ နိုင်ငံမြောက်အဖြစ်  ပါပူဝါ နယူးဂီနီကို ရောက်ရှိနေတာဖြစ်ပါတယ်။

အဲဒီကနေ အရှေ့တီမောနိုင်ငံကို ဆက်သွားမှာဖြစ်ပြီး ဒီမတိုင်ခင်က ဝမ်ဟာ ဆော်လမွန်ကျွန်းတွေ၊ ကီရီဘာတီ၊ ဆာမိုအာ၊ ဖီဂျီ၊ တွန်ဂါနဲ့ ဗနွာတူ တို့ကို ရောက်ရှိခဲ့ပြီးဖြစ်ပါတယ်။