အီတလီနိုင်ငံ၊ မီလန်မြိုရဲ့လမ်းတလမ်းမှာ အောက်ဆီဂျင်ဓာတ်ငွေ့ ဆလင်ဒါအိုးတွေကို သယ်ဆောင်လာတဲ့ ဗင်ကားတစီးဟာ မေ ၁၁ ရက်မှာ ပေါက်ကွဲခဲ့ရာမှာ လူ ၁ ဦး ဒဏ်ရာရခဲ့ပြီး အနီးနားရှိ ကားတွေ ဆိုင်ကယ်တွေ မီးလောင်ကျွမ်းသွားခဲ့တယ်လို့ ဒေသဆိုင်ရာ တာဝန်ရှိသူတွေက ပြောကြားပါတယ်။
မြို့တော်ဝန် ဂူဆက်ပယ်ဆာလာက ဒီဖြစ်ရပ်မှ ဘယ်သူမှ သေဆုံးခြင်းမရှိကြောင်း အတည်ပြုခဲ့ပါတယ်။
ဗန်ကားမောင်းသူဟာ သူ့ရဲ့အင်ဂျင်မှာ မီးစလောင်ကျွမ်းခဲ့ကြောင်း မီးသတ်တပ်ဖွဲ့ကို ပြောကြားခဲ့တယ်လို့ ဆာလာက ပြောပါတယ်။
“သူက သူ သယ်လာတဲ့ အောက်ဆီဂျင်ဆလင်ဒါတွေကို အမြန်ဆွဲယူလိုက်ပြီး အပျက်အစီးတွေ နည်းအောင်လုပ်ဖို့ ကြိုးစားပေမယ့် ပေါက်ကွဲမှု ဖြစ်သွားတယ်” လို့ မြို့တော်ဝန်က ပြောပါတယ်။
ယာဉ်မောင်းမှာ ဒဏ်ရာအနည်းငယ်သာ ရရှိခဲ့ပြီး မီးသတ်သမားတွေဟာ မီးခိုးတွေကို မြန်မြန်ဆန်ဆန် ငြှိမ်းလိုက်နိုင်ခဲ့ပါတယ်။
အနီးနားရှိ အဆောက်အအုံတစ်ခုကိုလည်း မီးကူးစက်ခဲ့ပြီး ဘေးလွတ်ရာကို ပြောင်းရွှေ့ သွားခဲ့ကြောင်း မျက်မြင်သက်သေတွေက ပြောပါတယ်။ ဒေသခံကျောင်း တကျောင်းကိုလည်း ဘေးလွတ်ရာပြောင်းရွှေ့ခဲ့ပါတယ်။
ပန်ဆလ်ဗေးနီးယားပြည်နယ် ဘာ့ခ်စ် ကောင်တီရှိ West Reading ရပ်ကွက်မှာ မတ် ၂၄ ရက် က R.M.Palmer ချောကလက် စက်ရုံပေါက်ကွဲပြီးနောက် လူ ၂ ဦး သေဆုံးပြီး ၉ ဦး ပျောက်ဆုံးနေတယ်လို့ အရာရှိတွေက ပြောပါတယ်။
အခင်းဖြစ်ပွားရာနေရာမှာ ကယ်ဆယ်ရေးလုပ်ငန်းတွေ လုပ်ဆောင်နေတယ်လို့ West Reading ရဲချုပ် ဝိန်းန်ဟိုလ်ဒင်န်က သတင်းထောက်တွေကို အတိုချုံး ထုတ်ပြန်ချက် ဖတ်ပြခဲ့ပါတယ်။
ပေါက်ကွဲမှုကြောင့် Palmer ရဲ့ နံပါတ် ၂ အဆောက်အအုံနဲ့ အနီးနားက အဆောက်အအုံတို့ ပျက်စီးခဲ့ပြီး လူအများအပြား ဒဏ်ရာရရှိခဲ့တယ်လို့ ဟိုလ်ဒင်န်က ပြောပါတယ်။
တာဝန်ရှိသူတွေကတော့ အဲဒီဒေသမှာ အန္တရာယ် မရှိတော့ကြောင်း ပြောထားပေမယ့် ပေါက်ကွဲမှု ဖြစ်ပွားတဲ့ အကြောင်းရင်းကို စုံစမ်းနေဆဲပဲလို့ ဟိုလ်ဒင်န် က ပြောပါတယ်။
ဒီဖြစ်ရပ်ဟာ ဝန်ထမ်း ၈၅၀ ရှိတဲ့ R.M. ပါလ်မာ သကြားလုံးကုမ္ပဏီမှာ ဖြစ်ပွားခဲ့တာပါ။
သူ့ဝက်ဆိုက်အရ R.M. ပါလ်မာ ကုမ္ပဏီ ဟာ ၁၉၄၈ ခုနှစ်ကတည်းက သကြားလုံး ပြုလုပ်ခဲ့တာဖြစ်ပြီး အီစတာ၊ ဟောလိုးဝင်း နဲ့ ဗာလင်တိုင်းနေ့လို ထူးခြားတဲ့ ရာသီအလိုက် ထုတ်ကုန်ပစ္စည်းတွေကို အထူးပြုလုပ်တဲ့ စက်ရုံဖြစ်ပါတယ်။
