မန္တလေး၊ ပြည်ကြီး​တံခွန်မြို့နယ် အထွေထွေအုပ်ချုပ်ရေးဦးစီးရုံးရှိ စစ်ကောင်စီ တပ်သားတွေကို ပြောက်ကျားတပ်ဖွဲ့တွေက မတ် ၂ ရက် ည ၇ နာရီလောက်မှာ သေနတ်နဲ့ ပစ်ခတ်ခဲ့ပြီး ဗုံးပစ်တိုက်ခိုက်ခဲ့ပါတယ်။

၆၂ လမ်း၊ ၁၁၅ လမ်း အဆင့်မြင့်ရဲစခန်းနားက ပြည်ကြီးတံခွန် မြို့နယ်အထွေထွေအုပ်ချုပ်ရေးဦးစီးရုံးက စစ်သားတွေကို သေနတ်အတိုနဲ့ ပစ်ခတ်တိုက်ခိုက်ပြီးနောက် ဗုံးနှစ်လုံးနဲ့ ထပ်မံပစ်ခတ်တိုက်ခိုက်ခဲ့တယ်လို့ မြနန္ဒာစစ်ဆင်ရေး မန္တလေးမှ တာဝန်ရှိသူက ပြောပါတယ်။

“သူတို့က ၁၀ ယောက်ကျော်တယ်၊ အပြင်ကနေ အတိုနဲ့အရင်ပစ်ပြီး ဗုံးထပ်ပစ်ခဲ့တာပါ၊ သူတို့ဘက်က ပြန်ပစ်လို့ ကျနော့်ရဲဘော်တယောက် ထိမှန်ခဲ့ပေမဲ့ အခြေအနေ မစိုးရိမ်ရဘူး။”

စစ်ကောင်စီသားတွေဘက်က ပြန်ပစ်ခတ်မှုရှိခဲ့ပြီး မြနန္ဒာစစ်ဆင်ရေး မန္တလေးမှ ရဲဘော်တွေရဲ့ ပစ်ခတ်မှုကြောင့် စစ်သား ၅ ဦး လဲကျသွားတာကို မျက်မြင်တွေ့ခဲ့ရပြီး သေဆုံးမှုရှိမရှိ အတည်မပြုနိုင်သေးဘူးလို့ ပြောပါတယ်။

ပစ်ခတ်မှုဖြစ်ပြီးနောက် လူနာတင်ကား ၃ စီးနဲ့ စစ်ကောင်စီတပ်က ဒဏ်ရာရစစ်သားတွေကို တင်ဆောင်သွားတယ်လို့ သိရပါတယ်။

မကွေးတိုင်း၊ ပေါက်မြို့နယ်မှာ မေ ၂ ရက် မနက်က စစ်ကောင်စီကင်းပုန်း ဖမ်းဆီးတာကို ခံခဲ့ရတဲ့ PDF ရဲဘော် ၂ ယောက် သေနတ်လုပြီး ထွက်ပြေးရာမှ အပြန်လှန်ပစ်ခတ်မှု ဖြစ်ပွားပြီး စစ်ကောင်စီတပ်သား ၁ ယောက် သေဆုံးကာ PDF ရဲဘော်တယောက် ကျဆုံးခဲ့ရတယ်လို့ မြိုင်ပကဖကနေ သိရပါတယ်။

မြိုင် ပကဖ တပ်ရင်း-၁ တပ်ရင်းမှူး ဗိုလ်လက်ယာက “ပေါက်နယ်ဘက်ကနေ ကျနော်တို့ ဒရုန်းသမားတွေကို လှမ်းခေါ်တော့ အဲဒီရဲဘော်လေး ၂ ယောက်က မနေ့က မေလ ၂ ရက်နေ့ မနက် ၆ နာရီကျော်ကတည်းက ထသွားပြီး ဆူးလေကုန်းရွာအဝင်ကျတော့ စစ်ကောင်စီတပ်သား ၂ ယောက်က စစ်နေတာ။ အဲဒီ စစ်ဆေးနေတဲ့နေရာနဲ့ ဝါးတပြန်အကွာလောက်က တိုက်အိမ် ၁ လုံးမှာလည်း စစ်ကောင်စီတပ်သားတွေ အများကြီး ထမင်းချက်စားနေကြတယ်။ အဲဒါကို ကျနော့်ကလေးတွေက ကိုယ့် PDF အဖွဲ့တွေလို့ပဲထင်လို့ ရပ်ပေးလိုက်တာ။ သေနတ်တွေမြင်တော့မှ MA1၊ MA4 တွေဆိုတော့ ကျနော်တို့သေနတ် မဟုတ်တော့ဘူး၊ (....)သေနတ်ဆိုတာကို သိလိုက်တယ်။ မင်းတို့ဘယ်အဖွဲ့ကတုန်းလို့ မေးပြီး ကလေးတွေရဲ့ နားထင်တွေကို ခြေထောက်တွေနဲ့ ဆောင့်ကန်ပြီး ဒူးထောက်ခိုင်းခဲ့တယ်။ အဲဒီမှာ ကျဆုံးသွားတဲ့ရဲဘော်က မထူးတော့ဘူးဆိုပြီး သေနတ်ကိုဝင်လုလိုက်တော့ သေနတ်ရသွားတဲ့အချိန်မှာ ဒူးထောက်နေတဲ့ ရဲဘော်တယောက်ကလည်း ဝင်လုံးပြီး သေနတ်ကိုလုယူကာ စစ်ကောင်စီတပ်သားတယောက်ကို ပစ်သတ်လိုက်တယ်” လို့ ဒီဗွီဘီကို ပြောပါတယ်။

သေနတ်သံကြားတော့ အိမ်ထဲမှာ ချက်ပြုတ်စားနေတဲ့ စစ်ကောင်စီတပ်သားတွေက လက်နက်ကြီး လက်နက်ငယ်တွေနဲ့ လိုက်လံပစ်ခတ်လို့ အသက် ၂၄ နှစ်အရွယ် ရဲဘော် သန်းဇော် (ခ) ပျံလွှား ကျဆုံးခဲ့ရပြီး နောက်ရဲဘော်တယောက်ကတော့ သေနတ်ကို ပစ်ချခဲ့ပြီး ထွက်ပြေးလွတ်မြောက်ခဲ့တယ်လို့ ဆိုပါတယ်။

“ကျဆုံးခဲ့တဲ့ရဲဘော်က ပြီးခဲ့တဲ့နှစ်က ကျနော်နဲ့အတူ တွင်းမတိုက်ပွဲမှာ ပေါင်ကို သေနတ်ရှပ်မှန်ပြီး အရိုးကိုထိခိုက်ထားတဲ့ဒဏ်ကြောင့် ကောင်းကောင်းမပြေးနိုင်ဘူး။ ပုံစံကြည့်ရတာ သေနတ် ၂ လက်လုံးကို ကောက်ပြေးတဲ့အချိန်မှာ မိသွားတဲ့သဘောရှိတယ်” လို့ ဗိုလ်လက်ယာက ပြောပါတယ်။

အဲဒီရဲဘော် ၂ ယောက်ဆီမှာ ပါသွားတဲ့ ဒရုန်းအလွတ်တစင်းလည်း သိမ်းဆည်းခံခဲ့ရပြီး ကျဆုံးသွားတဲ့ ရဲဘော်လေးကိုတော့ မနေ့ မေ ၂ ရက် မွန်းလွဲ ၁ နာရီလောက်မှာ သင်္ဂြိုဟ်ပြီး အုတ်ဂူလုပ်ပေးခဲ့တယ်လို့ ဆိုပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်း၊ မြိုင်မြို့နယ်မှာ ဧပြီ ၂၄ ရက် မနက်ပိုင်းက စစ်ကောင်စီစစ်ကြောင်း ညောင်တွင်းကျေးရွာကို မီးရှို့ဖျက်ဆီးခဲ့တယ်လို့ ဒေသခံတွေဆီကနေ သိရပါတယ်။

စစ်ကောင်စီစစ်ကြောင်းက ဧပြီ ၂၂ ရက် မနက် ၆ နာရီခွဲလောက်မှာ မင်းကန်ရွာကို သေနတ်တွေနဲ့ပစ်ခတ်ပြီး ရွာထဲကိုဝင်လာသို အဲဒီနောက် မင်းကန်ရွာမှာ တညအိပ်ပြီး ပန်းတိုင်တောရွာဘက်ကိုမနေ့ မနက် ၆ နာရီလောက်မှာ လက်နက်ကြီး လက်နက်ငယ်တွေနဲ့ ပစ်ခတ်ဝင်ရောက်လာတာလို့  ပန်းတိုင်းတောကျေးရွာ ဒေသခံက ပြောပါတယ်။

ပန်းတိုင်းတောရွာနားက တောထဲက ကာကွယ်ရေးစခန်းတခုနဲ့ ကားတစီးကို စစ်ကောင်စီစစ်ကြောင်းက မီးရှို့ဖျက်ဆီးပြီး ပန်းတိုင်းတောအရှေ့ ဘုန်းကြီးကျောင်းကို ဝင်ရောက်စခန်းချခဲ့ကြတယ်လို့ ဆိုပါတယ်။

အဲဒီနောက် ပြည်သူတွေမွေးမြူထားတဲ့ ကြက်တွေကို သတ်ဖြတ်စားသောက်တဲ့အပြင် ဘုန်းကြီးကျောင်းရဲ့ တောင်ဘက် တအိမ်ကျော်က နာရေးအိမ် ရက်လည်မှာ ကျွေးမွေးဖို့ ချက်ပြုတ်ထားတဲ့ အမဲသားဟင်းတွေနဲ့ ထမင်းတွေ အားလုံးကိုလည်း စားသောက်သွားကြပြီး ဘုန်းကြီးကျောင်းသုံးပစ္စည်း၊ စာကြည့်တိုက်မှာထားတဲ့ ပစ္စည်းတွေအားလုံးကို ဖျက်ဆီးသွားတယ်လို့ ပြောပါတယ်။

ဒီနေ့ ဧပြီ ၂၄ ရက် မနက်ပိုင်းမှာ ရွာရဲ့ အနောက်မြောက်ဘက်ကို အထွက်ပြပြီး အရှေ့တောင်ဘက်ကို ထွက်သွားကာ ညောင်တွင်း(အနောက်)ရွာက နေအိမ် ၃၂ လုံးကို မီးရှို့ဖျက်ဆီးခဲ့ပါတယ်။

စစ်ကောင်စီဘက်က စစ်ကြောင်းထိုးနေလို့ မင်းကန်၊ ပန်းတိုင်းတော၊ ညောင်တွင်း၊ အိုင်းမ၊ မြို့တင်၊ စိုင်ခေါင်း၊ ဒဟတ်ချောက် ကျေးရွာတွေက ဒေသခံပြည်သူတွေ ဘေးလွတ်ရာ နေရာတွေကို ထွက်ပြေးတိမ်းရှောင်နေရပြီး လူသားချင်းစာနာထောက်ထားမှုဆိုင်ရာ အရေးပေါ်အကူအညီတွေ လိုအပ်နေပါတယ်။

အလားတူ မကွေးတိုင်း၊ ပေါက်မြို့နယ် တောင်ပိုင်းက ကျေးရွာ ၂ ရွာကို ဧပြီ ၂၄ ရက် မနက်ပိုင်းနဲ့ မွန်းလွဲပိုင်းတွေမှာ စစ်ကောင်စီလက်အောက်ခံ ပျူစောထီးတွေက မီးရှို့ဖျက်ဆီးခဲ့ကြတယ်လို့ ဒေသခံတွေဆီကနေ သိရပါတယ်။

ပေါက်မြို့နယ်တောင်ပိုင်း ဇီးတောကျေးရွာကို ဒီနေ့ ဧပြီ ၂၄ ရက် မနက် ၁၁ နာရီကျော်လောက်မှာ သစ်ချိုကုန်း၊ ပင်ထောင်၊ ဝန်ခြုံး ပျူရွာက စစ်ကောင်စီတပ်သားတွေနဲ့ ပျူစောထီးတွေ ဝင်ရောက်မီးရှို့ခဲ့ကြတာလို့ ဇီးတောကျေးရွာ ဒေသခံတယောက်က ဒီဗွီဘီကို ပြောပါတယ်။

“ကျနော်တို့ ဇီးတောရွာကို စစ်ကောင်စီက ၄ ကြိမ်လောက် မီးရှို့ဖျက်ဆီးခဲ့လို့ ရွာလုံးကျွတ်နီးပါး မီးလောင်ဆုံးရှုံးခဲ့ရပြီး အခု လက်ကျန်အိမ်တွေကို ထပ်ရှို့နေကြတာ။”

ဒါ့အပြင် အဲဒီစစ်ကောင်စီတပ်သားတွေနဲ့ ပျူစောထီးတွေဟာ သရဖီကျေးရွာကိုလည်း ဒီနေ့ မွန်းလွဲ ၁ နာရီလောက်မှာ မီးရှို့ဖျက်ဆီးခဲ့ကြတယ်လို့ ဆိုပါတယ်။

မီးခိုးလုံးတွေ မီးတောက်တွေ အဝေးကနေ လှမ်းမြင်နေရပြီး သူတို့ရှိနေသေးတာကြောင့် အိမ်ခြေဘယ်နှစ်အိမ် မီးလောင်ကျွမ်းခဲ့တယ် ဆိုတာကိုတော့ အတိအကျ မသိရသေးဘူးလို့ ပြောပါတယ်။

စစ်ကောင်စီတပ်သားတွေနဲ့ ပျူစောထီးတွေ ဝင်ရောက်မီးရှို့နေလို့ ဇီးတော၊ တောင်ရွာ၊ သရဖီကျေးရွာတွေနဲ့ အနီးပတ်ဝန်းကျင်ကျေးရွာတွေက ဒေသခံပြည်သူတွေ ဘေးလွတ်ရာ နေရာတွေကို ထွက်ပြေးတိမ်းရှောင်နေရပြီး လူသားချင်းစာနာထောက်ထားမှုဆိုင်ရာ အရေးပေါ်အကူအညီတွေ လိုအပ်နေတယ်လို့ဆိုပါတယ်။

စစ်ကောင်စီက နိုင်ငံတော်အာဏာကို သိမ်းပိုက်ပြီးနောက် ၂၀၂၃ ခုနှစ် ဖေဖော်ဝါရီ ၂၈ ရက်နေ့အထိ မကွေးတိုင်အတွင်းကကျေးရွာတွေကို စစ်ကြောင်ထိုးပြီး မီးရှို့ဖျက်ဆီးခဲ့လို အိမ်ခြေပေါင်း ၉၀၁၉ လုံးမီးလောင်ဆုံးရှုံးခဲ့ကာ တနိုင်ငံလုံးအတိုင်းတာနဲ့ အိမ်ခြေပေါင်း ၆၀၄၅၉ အိမ်ကို မီးရှို့ဖျက်ဆီးခဲ့ကြတယ်လို့ Data For Myanmar က မတ်လ ၁၉ ရက်နေ့မှာ ထုတ်ပြန်ထားပါတယ်။

မကွေးတိုင်း၊ ရေစကြိုမြို့မရဲစခန်းကို ဧပြီ ၂၃ ရက် မွန်းလွဲပိုင်းက တာဝေးပစ်လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ ရေစကြိုမြို့နယ် ပကဖ မိုးကြိုးတပ်ခွဲကနေ သိရပါတယ်။

ရေစကြို ပကဖ မိုးကြိုးတပ်ခွဲ တာဝန်ခံ ကိုမိုးကြိုးက “ရေစကြိုမြို့မရဲစခန်းကို ဧပြီလ ၂၃ ရက်နေ့ မွန်းလွဲ ၂ နာရီလောက်မှာ လက်လုပ်ပြောင်းနဲ့ ၂ ချက် သွားပစ်တာ။ ရဲစခန်းဝင်းထဲမှာ တလုံး ကျရောက်ပေါက်ကွဲပြီး နောက်တချက်ကတော့ သူတို့ရဲတွေနေတဲ့ အဆောင်ကိုကျတယ်” လို့ ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးသူ ရှိနိုင်ပေမဲ့ အတိအကျ မသိရသေးဘဲ ပြည်သူ့ကာကွယ်ရေးတပ်က ရဲဘော်တွေတော့ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ဆိုပါတယ်။

ရေစကြိုမြို့မှာ ဧပြီ ၂၀ ရက် မနက်ကလည်း စစ်ကောင်စီကားတစီး မိုင်းဆွဲတိုက်ခိုက်ခံရပြီး ၃ ယောက်ထက်မနည်း ဒဏ်ရာရရှိခဲ့တယ်လို့ ရေစကြိုမြို့နယ် ပကဖ ကနေ သိရပါတယ်။