မွန်ပြည်နယ်၊ ပေါင်မြို့နယ်၊ ကော့ကံကျေးရွာရှိ အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) ပါတီ မြို့နယ်အလုပ်အမှုဆောင်အဖွဲ့ဝင် ဦးစောဆန်းဝင်းရဲ့ နေအိမ်ကို စစ်ကောင်စီတပ်ဖွဲ့တွေက လာရောက် ချိပ်ပိတ်သွားတယ်လို့ NLD ပါတီနဲ့ နီးစပ်သူတွေက ပြောပါတယ်။

ပြီးခဲ့တဲ့ သြဂုတ် ၇ ရက်က ဦးစောဆန်းဝင်း နေအိမ်မှာ မီးလန့်ပြီးနောက် စစ်ကောင်စီတပ်ဖွဲ့တွေက နေအိမ်ကို ဝင်ရောက်စစ်ဆေးစဉ် လက်နက်ခဲယမ်းတချို့ တွေ့ရှိခဲ့တယ်ဆိုတဲ့ အကြောင်းပြချက်နဲ့ သြဂုတ် ၉ ရက်မှာ နေအိမ်ကို လာရောက် ချိပ်ပိတ်သွားတာ ဖြစ်ပါတယ်။

စစ်ကောင်စီကတော့  ဦးစောဆန်းဝင်း နေအိမ်ကို ဝင်ရောက် စစ်ဆေးစဉ် လက်ပစ်ဗုံး ၁ လုံး၊ ၉ မမ ကျည် အတောင့် ၅၀ နဲ့ စနိုက်ပါ မှန်ပြောင်းတလက် တွေ့ရှိခဲ့တယ်လို့ ထုတ်ပြန်ထားပါတယ်။

စစ်တပ်အာဏာသိမ်းပြီးနောက် ဦးစောဆန်းဝင်းကို စစ်ကောင်စီက ရာဇသတ်ကြီး ဥပဒေ ပုဒ်မ ၅၀၅(က) ၊ အကြမ်းဖက်မှု တိုက်ဖျက်ရေး ဥပဒေ ပုဒ်မ ၅၂(က)နဲ့ အမှုဖွင့်ထားတာဖြစ်ပြီး ဦးစောဆန်းဝင်းကတော့ စစ်ကောင်စီရဲ့ လိုက်လံ ရှာဖွေ ဖမ်းဆီးမှုတွေကြောင့် တိမ်းရှောင် နေရတာပါ။

မွန်ပြည်နယ်မှာတော့ စစ်တပ်အာဏာသိမ်းပြီးနောက် အန်အယ်လ်ဒီပါတီ လွှတ်တော်ကိုယ်စားလှယ်တွေ၊ ပါတီဝင်တွေနဲ့ ပါတီထောက်ခံသူတွေ အပါအဝင် အရပ်သားပြည်သူ နေအိမ် ၂၀ ထက်မနည်း ချိပ်ပိတ်ခံထားရပါတယ်။

မွန်ပြည်နယ်၊ မော်လမြိုင်မြို့နယ်နဲ့ ပေါင်မြို့နယ်တို့မှာ မေလ ၂၀ ရက် နေ့လယ်ပိုင်းက မုန်တိုင်း ဝင်ရောက်လာတဲ့အတွက် နေအိမ်တွေ အဆောက်အအုံတွေ  ပြိုကျပျက်စီးခဲ့တယ်လို့ လူမှုကယ်ဆယ်ရေးအဖွဲ့တွေက ပြောပါတယ်။

လေပြင်းမုန်တိုင်းကြောင့် မော်လမြိုင်ရဲ့ သာယာအေးနဲ့ ဇေယျာသီရီရပ်ကွက်တို့မှာ လူနေအိမ် ၁၀ လုံးထက်မနည်း ပြိုကျပျက်စီးခဲ့သလို ပေါင်မြို့နယ်မှာ လူနေအိမ်တွေ၊ ဈေးဆိုင်ခန်းတွေနဲ့ ကျေးလက်ဆေးပေးခန်း အုတ်နံရံ ပြိုကျ ပျက်စီးခဲ့ပါတယ်။

ဒါ့အပြင် မော်လမြိုင်မြို့ တောင်ဝိုင်းရပ်မှာလည်း လျှပ်စစ်ဓာတ်မီးတိုင် ၁၀ တိုင်ထက်မနည်း လဲကျပျက်စီးခဲ့သလို ဈေးဆိုင်ခန်းတချို့နဲ့  အဆောက်အအုံ အမိုးလန်တာတွေလည်း ရှိပါတယ်။

မုန်တိုင်းကြောင့် လူနေအိမ်ပျက်စီးသွားတဲ့ မော်လမြိုင်မြို့က ဒေသခံပြည်သူ ၆၀ ကျော်ကို လတ်တလောမှာ သယာအေးဝဲကြီးကွေ့ ဓမ္မာရုံကို အရေးပေါ် ရွှေ့ပြောင်းထားတယ်လို့ လူမှုကယ်ဆယ်ရေးအဖွဲ့ တာဝန်ရှိသူက ပြောပါတယ်။

မိုးဇလဌာကတော့ မော်လမြိုင်မြို့ကို ဦးတည်ပြီး ဝင်ရောက်နေတဲ့ မုန်တိုင်းငယ်ကို မေလ ၂၀ ရက်နေ့ ညနေ ၄ နာရီခွဲအချိန်မှ အနီရောင်အဆင့်ကနေ အညိုအဆင့် သတ်မှတ်ထားပါတယ်။

မုန်တိုင်းငယ် အရှိန်ကြောင့် မွန်ပြည်နယ်ရဲ့ မော်လမြိုင်၊ချောင်းဆုံ၊ ကျိုက်မရော၊ ပေါင်၊ မုဒုံ၊ သံဖြူဇရပ်နဲ့ ရေးမြို့နယ်တို့မှာ သစ်ပင်ကြီးတွေနဲ့ ဓာတ်မီးတိုင်တွေ လဲကျပျက်စီးတာတွေ ရှိနေသလို လမ်းပိတ်ဆို့မှုတွေလည်း ဖြစ်ပေါ်နေတာပါ။