၂၀၂၂ ခုနှစ် ၈ လတာကာလအတွင်း မြန်မာနိုင်ငံတဝန်း မီးလောင်မှု ၁,၀၀၀ ကျော် ဖြစ်ပွားခဲ့ပြီး ၇၂ ယောက်သေဆုံးကာ ဆုံးရှုံးမှုတန်ဖိုး ကျပ်သန်း ၄၀၀ ကျော်ရှိတယ်လို့ မီးသတ်ဦးစီးဌာနက သိရပါတယ်။

၂၀၂၂ ခုနှစ် ဇန်နဝါရီလမှ သြဂုတ်လအထိ မြန်မာနိုင်ငံတဝန်း မီးလောင်မှု ၁,၁၂၉ ကြိမ်ဖြစ်ခဲ့ပြီး မီးလောင်မှုကြောင့် လူ ၇၂ ယောက်သေဆုံးကာ ၁၀၁ ‌ေ‌ယာက် ဒဏ်ရာရရှိခဲ့ပြီး ငွေကျပ် ၄ဝ၄ ဒသမ ၅၆၅ သန်းခန့် ဆုံးရှုံးခဲ့ရတယ်လို့ မီးသတ်ဦးစီးဌာန တာဝန်ရှိသူတယောက်က ပြောပါတယ်။

“၁ လပိုင်းကနေ ၈ လပိုင်းထိဆိုရင် အများဆုံး မီးလောင်မှုဖြစ်တာ ပေါ့ဆမီး၊ လျှပ်စစ်မီးနဲ့ များတယ် လူ ၈,၀၀၀ ကျော် အိုးမဲ့အိမ်မဲ့ဖြစ်တယ်။”

၈ လတာကာလအတွင်း မီးလောင်မှု ၁,၁၂၉ ကြိမ်ဖြစ်ခဲ့ရာ လူ ၇၂ ယောက် သေဆုံး၊ ၁၀၁ ယောက် ဒဏ်ရာရရှိခဲ့ပြီး ငွေကျပ် ၄ဝ၄ ဒသမ ၅၆၅ သန်းခန့် ဆုံးရှုံးကာ ပြည်သူ ၈,၀၁၁ ယောက် အိုးမဲ့အိမ်မဲ့ ဖြစ်ခဲ့ရတယ်လို့ မီးသတ်ဦးစီးဌာနရဲ့ ထုတ်ပြန်ချက်အရ သိရပါတယ်။

၂၀၂၁ ခုနှစ်က နိုင်ငံတဝန်း မီးလောင်မှု ၂,၁၀၇ ကြိမ်ဖြစ်ခဲ့ပြီး ကျပ် ၃၃ ဘီလီယံကျော် ဆုံးရှုံးကာ လူ ၁၀၅ ယောက်သေဆုံး၊ ၁၅၁ ယောက် ဒဏ်ရာရရှိခဲ့တယ်လို့ ပြီးခဲ့တဲ့နှစ်က မီးသတ်ဦးစီးဌာနရဲ့ ထုတ်ပြန်ချက်အရ သိရပါတယ်။

အလားတူ ပြီးခဲ့တဲ့ ၂၀၂၀ ကလည်း နိုင်ငံတဝန်း မီးလောင်မှု ၂,၁၃၉ ကြိမ် ဖြစ်ပွားခဲ့ပြီး လူ ၇၅ ယောက် သေဆုံး၊ အယောက် ၂၂၀ ဒဏ်ရာရရှိကာ ကျပ် ၆ ဘီလီယံကျော် ဆုံးရှုံးခဲ့ပါတယ်။

ပြည်သူလူထုတွေရဲ့နေအိမ်မီးလောင်ပါက ပေါ့ဆမီးအမှုနဲ့ အရေးယူလေ့ရှိပေမဲ့ ဧရာဝတီတိုင်း၊ ဖျာပုံမြို့နယ်မှာ ဇန်နဝါရီလ ၁၃ ရက် ညနေပိုင်းက ခရိုင်တရားသူကြီးနေအိမ် မီးလောင်ခဲ့ရာမှာ အချိန် သီတင်း ၁ ပတ်ကြာလာချိန်ထိ အရေးယူမှုမရှိသေးဘူးလို့ သိရပါတယ်။ 

တရားသူကြီး ဒေါ်သူဇာအေးနဲ့အတူ ၃ ဦးနေတဲ့ အိမ်မှာ ညနေ ၅ နာရီလောက်မီးလောင်ခဲ့ပြီး ဝန်ထမ်းတွေ ဝိုင်းဝန်းမီးငြိမ်းသတ်ခဲ့ရတာဖြစ်ပြီး  မီးလောင်မှုကို အမှုဖွင့်အရေးမယူတဲ့အပေါ် ရှေ့နေ အသိုင်းဝိုင်းကြားမှာလည်း ဝေဖန်မှုတွေရှိ နေတယ်လို့ ဒေသခံတွေက ပြောပါတယ်။ 

“ ခရိုင်တရားသူကြီးနဲ့ပေါင်းနေတာ အဲ့အိမ်မှာ ၃ ယောက်နေတယ်။ မီးလောင်တဲ့နေ့က မီးခိုးလုံးတွေ ထွက်လာချိန်မှာ တရားသူကြီးမက အော်ပြီးထွက်လာတာ ဝန်ထမ်းတွေ ရုံးမဆင်းသေးတော့ ဝိုင်းသတ်လို့ မီးငြိမ်းသွားတာ”လို့ တရားရုံးနဲ့ နီးစပ်သူတွေက ပြောပါတယ်။ 

သာမန်ပြည်သူတွေဆိုရင် မီးလောင်မှုဖြစ်တဲ့အခါ  အနည်းဆုံးပုဒ်မ ၂၈၅ ပေါ့ဆမီးဆိုတဲ့ အကြောင်းပြချက်နဲ့ အမှုဖွင့် အရေးယူလေ့ရှိတာ ဖြစ်ပါတယ်။

အခုလို တရားသူကြီးနေအိမ်မီးလောင်မှု အမှုဖွင့် အရေးယူထားတာ မရှိတဲ့အပေါ် စစ်တပ်အာဏာသိမ်းပြီးနောက်ပိုင်း တရားရေးကို လုပ်ချင်တိုင်း လုပ်နေကြတာလို့ ရှေ့နေအသိုင်းဝိုင်းကြား ဝေဖန်ပြောဆိုတာတွေလည်း ရှိနေပါတယ်။

အလားတူဖြစ်စဉ်မျိုး ပြီးခဲ့တဲ့ နှစ် ဒီဇင်ဘာလက တောင်ကြီးမြို့မှာဖြစ်ပွားခဲ့ပြီး ပြည်နယ်တရားသူကြီးနေအိမ် မီးလောင်မှု ခုထိ အရေးယူထားတာ မရှိသေးဘူးလို့ သိရပါတယ်။