စစ်ကိုင်းတိုင်း၊ ဗန်းမောက်မြို့တောင်ပိုင်း စီးမော်ရွာနဲ့ သောင်ကြီးရွာတို့ကို အောက်တိုဘာ ၆ ရက် မွန်းလွဲ ၂ နာရီဝန်းကျင်မှာ စစ်ကောင်စီတပ်က လေယာဉ်နဲ့ ၆ ကြိမ် ဗုံးကြဲတိုက်ခိုက်ခဲ့ပါတယ်။

စစ်ကောင်စီလေတပ်က လေကြောင်းတိုက်ခိုက်တာကြောင့် စီးမော်ကျေးရွာအုပ်စု တောင်ကြီးကျေးရွာက နေအိမ်တလုံးပေါ် လေယာဉ်ဗုံးကျရောက်ပေါက်ကွဲပြီး နေအိမ်မီးလောင်ကာ အသက် ၈၀ အရွယ် အဘိုးအိုတဦး အသက်ဆုံးရှုံးခဲ့တယ်လို့ ဗန်းမောက်မြို့နယ်က ဒေသခံတဦးက ​​ပြောတယ်။

“တိုက်ပွဲက ပြင်းထန်နေတာသုံးရက်ရှိပြီ၊ လေးရက်နေ့ကနေ ဖြစ်နေတာ နေ့တိုင်းပဲ။ တနေကုန်းနီးပါး လက်နက်ကြီးသံတွေ၊ သေနတ်သံတွေကြားနေရတယ်။ ဒီနေ့လည်း တိုက်လေယာဥ်နဲ့ နှစ်ကြိမ်ဗုံးလာကြဲတယ်၊ တောင်ကြီးရွာက နေအိမ်တလုံးပေါ်မှာကျတာတဲ့။ နေအိမ်မီးလောင်တော့ အိမ်ထဲမှာရှိနေတဲ့ မျက်မမြင်အဘိုးကြီး အိမ်မီးလောင်တဲ့အထဲ ပါသွားတယ်” လို့ ဗန်းမောက်မြို့နယ်က ဒေသခံတဦးက ပြောပါတယ်။

ဗုံးကြဲတိုက်ခိုက်မှုကြောင့် ကျေးရွာဒေသခံနေအိမ်တွေ မီးလောင်ကျွမ်းနေသလို အပြစ်မဲ့ပြည်သူ အထိအခိုက်တွေလည်း ရှိနိုင်တယ်လို့ ဒေသခံတချို့က ပြောပါတယ်။

ဗန်းမောက်ဒေသခံတယောက်က “သောင်ကြီးက လှမ်းမြင်ရတာ တအိမ်ထိသွားတယ်။ စီးမော်ကတော့ မသိသေးဘူး။ စီးမော်မှာ ဗုံးကြဲတာများတယ်။ အပျက်အစီးလည်း များလောက်တယ်” လို့ ပြောပါတယ်။

ဗန်းမောက်မြို့နယ်တောင်ပိုင်း လုံးခင်းကျေးရွာအုပ်စုနဲ့ စီးမော်ကျေးရွာအုပ်စု အနီးအနားမှာ စစ်ကြောင်းထိုးလာတဲ့ စစ်ကောင်စီတပ်ဖွဲ့တွေနဲ့ ပြည်သူ့ကာကွယ်ရေး တပ်ဖွဲ့တွေကြား အောက်တိုဘာ ၄ ရက်ကနေ့ ၆ ရက်အထိ နေ့တိုင်း တနေကုန်းနီးပါ တိုက်ပွဲတွေပြင်းထန်နေတာလို့ ဆိုပါတယ်။ 

ပြည်သူအများစု တခြားဘေးလွတ်ရာကို ရှောင်တိမ်းနေရပြီး ရှောင်တိမ်းဖို့ခက်ခဲတဲ့ သက်ကြီးရွယ်အိုတချို့သာ ရွာမှာ ကျန်နေခဲ့တယ်လို့ သိရပါတယ်။

ဒါ့အပြင် စစ်ကောင်စီတပ် အင်အား ၂၀၀ လောက်ကလည်း သောင်ကြီးရွာမှာ တပ်ချထားတာကြောင့် ပြည်သူတွေ စိုးရိမ်ထိတ်လန့်နေရတယ်လို့ ဒေသခံတယောက်က ဆက်လက်ပြောပါတယ်။

မနေ့ကလည်း ကျောက်အိုင်ရွာက နေအိမ် ၆ လုံးလောက်ကို စစ်ကောင်စီတပ်က မီးရှို့ဖျက်ဆီးခဲ့တယ်လို့ သိရပါတယ်။

ဗန်းမောက်မြို့နယ်တောင်းပိုင်းမှာ အောက်တိုဘာ ၄ ရက်နေ့ကတည်းက အင်းတော်မြို့နယ်ဘက်ကနေ အင်အား ၁၈၀ ဝန်းကျင်ပါ စစ်ကောင်စီတပ် စစ်ကြောင်းထိုးလှုပ်ရှားလာတာကြောင့် ပြည်သူ့ကာကွယ်ရေးတပ်ဖွဲ့ဝင်တွေနဲ့ နေ့စဥ်လိုလို  တိုက်ပွဲဖြစ်ပွားနေတာလို့ ဒေသခံတွေက ပြောပါတယ်။

အောက်တိုဘာ ၄ ရက်နေ့ညကလည်း ဗန်းမောက်မြို့ ရဲစခန်းကို KIA၊ PDF ပူးပေါင်းတပ်ဖွဲ့တွေ သွားရောက်ပစ်ခတ်ခဲ့ပြီး စစ်ကောင်စီလက်အောက်ခံ ရဲတွေ ထိခိုက်ကျဆုံးမှုရှိသလို ရဲစခန်းထဲကနေ လက်နက်ကြီးတွေ ရမ်းသန်းပစ်ခတ်တာကြောင့် လူနေရပ်ကွက်တွေထဲ လက်နက်ကြီးကျည်ဆန် ကျရောက်ခဲ့ပြီး ပေါက်ကွဲမှုတော့ မရှိဘူးလို့ သိရပါတယ်။

လွန်ခဲ့တဲ့ အောက်တိုက်ဘာ ၄ ရက်နေ့ကလည်း ဗန်းမောက်မြို့နယ်တောင်ပိုင်း ကျောက်မဲတောင်ခြေနားမှာ ပြည်သူ့ကာကွယ်ရေးတပ်ဖွဲ့တွေနဲ့ အင်းတော်ဘက်ကနေ စစ်ကြောင်းထိုးလာတဲ့ စစ်ကောင်စီတပ်ဖွဲ့တွေကြား တိုက်ပွဲဖြစ်ပွားခဲ့သလို စစ်ကောင်စီလေတပ်က တိုက်လေယာဥ်နဲ့ ဗုံးကြဲတိုက်ခိုက်ခဲ့ပါသေးတယ်။

စစ်ကိုင်းတိုင်း မော်လိုက်ခရိုင် ဖောင်းပြင်မြို့နယ်မှာ စစ်ကောင်စီတပ်ရဲ့ လက်နက်ကြီး ပစ်ခတ်မှု ကြောင့် ပြည်သူတွေရဲ့ နေအိမ်တွေနဲ့ ဘုန်းကြီးကျောင်းတချို့ ထိမှန်ပျက်စီးခဲ့တယ်လို့ ဒေသခံတွေ က ပြောပါတယ်။

အခုလို ပစ်ခတ်မှုတွေ လုပ်ဆောင်ခဲ့တဲ့အဖွဲ့ဟာ မုံရွာဘက်ကနေ ချင်းတွင်းမြစ်အတိုင်း အထက်ကို ဆန်တက်လာတဲ့ စစ်ကောင်စီတပ်ဖွဲ့ ရေယာဥ်အုပ်စုက ပစ်ခတ်ခဲ့တာလို့ ဆိုပါတယ်။

သြဂုတ် ၃ ရက်ကတည်းက ချင်းတွင်းမြစ်ကမ်းဘေးတလျှောက်မှာရှိတဲ့ ဖောင်းပြင်မြို့နယ်က ကျေးရွာတွေကို လက်နက်ကြီးတွေနဲ့ ပစ်ခတ်ခဲ့တာကြောင့် ဒေသခံပြည်သူတွေလည်း နေအိမ်တွေမှာ မနေရဲကြဘဲ ထွက်ပြေးခဲ့ကြရတယ်လို့ ဒေသခံတဦးက ပြောပါတယ်။

စစ်ကောင်စီတပ်ရဲ့ ပစ်ခတ်မှုကြောင့် ကယားကျေးရွာက နေအိမ် ၁၇ လုံး၊ သာစည်ကျေးရွာက နေအိမ် ၁ လုံးနဲ့ မြို့မကျေးရွာမှာတော့ စစ်ကောင်စီတပ်ရဲ့လက်နက်ကြီးကျည်တွေ မြို့မဘုန်းကြီးကျောင်းဝင်းအတွင်း ကျရောက်ခဲ့တာကြောင့် အုတ်တံတိုင်းများ ပျက်စီးခဲ့တယ်လို့ ဆိုပါတယ်။

ဒါ့အပြင် မောက်စဖာကျေးရွာဘက်မှာလည်း စစ်ကောင်စီတပ်ဖွဲ့က လက်နက်ကြီးနဲ့ ပစ်ခဲ့တာကြောင့် လယ်ကွက်တခုအတွင်း ကျရောက်ပေါက်ကွဲခဲ့ပြီး ၆ ပေလောက်ကျယ်တဲ့ တွင်းကြီးတခု ဖြစ်သွားခဲ့တယ်လို့လည်း ဆိုပါတယ်။

လက်ရှိအချိန်မှာ စစ်ကောင်စီတပ်ဖွဲ့ ရေယာဥ်အုပ်စုဟာ ဖောင်းပြင်မြို့နယ်အတွင်းကနေ ချင်းတွင်းမြစ်အထက်ပိုင်းကို ခရီးဆက်လက်ထွက်ခွာသွားခဲ့ပြီး မြစ်ကြောင်းဘေးဝဲယာရှိ ဒေသခံပြည်သူတွေလည်း ထွက်ပြေးနေကြရတယ်လို့ သိရပါတယ်။