နေပြည်တော်၊ တပ်ကုန်းမြို့နယ်မှာ မတ်လ ၁ ရက် မနေ့ညနေ ၄ နာရီခွဲလောက်က တရားရုံးကနေ ရုံးထုတ်ပြီးပြန်လာတဲ့ အချုပ်ကားတစ်စီးနဲ့လိုက်ပါလာတဲ့ အချုပ်သားတွေက ရဲတွေကို ရိုက်နှက်သေနတ်နဲ့ပစ်ခတ်ပြီး ၁၀ ယောက်လောက် ထွက်ပြေးသွားတယ်လို့ ဒေသခံ အုပ်ချုပ်ရေးနဲ့ နီးစပ်သူတွေဆီ သိရပါတယ်။
ပျဥ်းမနားမြို့နယ်တရားရုံးကနေ ရုံးထုတ်ပြီး ရမည်းသင်းအကျဥ်းထောင်ကို အချုပ်သား ၂၁ ဦးပြန့်ပို့ရာ တပ်ကုန်းမြို့နယ် သူဌေးကုန်းကျေးရွာအနီးမှာ ဒုရဲအုပ်နဲ့ရဲတပ်သားတစ်ဦးကို အချုပ်သားတွေက ရိုက်နှက်ကာ သေနတ်နဲ့ပစ်ခတ်ပြီး ထွက်ပြေး လွတ်မြောက်သွားတာပါ။
အုပ်ချုပ်ရေးနဲ့ နီးစပ်သူတစ်ဦးက "၂၄၆ မိုင်နားမှာဖြစ်တာ အချုပ်ကားနှစ်စီးလာတာ နောက်ကားကို စောင့်တဲ့အချိန် အချုပ်ကားအနောက်မှာ အချုပ်သားအချင်းချင်း ရုန်းရင်းဆန်ခတ်ဖြစ်လို့ ဒုရဲအုပ်နဲ့ ရဲတပ်သားဆင်းလာတာ။ တံခါးဖွင့်ကြည့်တော့ ဒုရဲအုပ်ကို အရင်ထိုးကြိတ် ရဲတပ်သားက သေနတ်နဲ့ ပစ်မယ်လုပ်တော့ သေနတ်ကိုလုပြီးသူ့ကိုပစ်သွားတာ။ သေနတ်ဒင်နဲ့ ဒုရဲအုပ်ကိုရိုက်သွားတယ်။ သေနတ်တော့မယူသွားဘူး"လို့ ပြောပါတယ်။
အချုပ်ကားပေါ်မှာ အချုပ်သား အမျိုးသား ၁၉ ဦးနဲ့ အမျိုးသမီး ၂ ဦးလိုက်ပါပြီး အဲ့ဒီထဲက ၁၀ ဦးလွတ်သွားတာဖြစ်ပြီး ပစ်ခတ်မှုကြောင့် ရဲတပ်သားဖြိုးဝေအောင်ရဲ့ ရင်ဘတ်နဲ့ခါးမှာ သေနတ်ဒဏ်ရာရရှိပြီး ဆေးရုံတင်ထားရတယ်လို့ ရဲအရာရှိတစ်ဦးက ပြောပါတယ်။
"ရဲတပ်သားလေးက စိုးရိမ်ရတယ်။ တပ်ကုန်းခုတင် ၁၀၀ ဆေးရုံမှာ။ ဒုရဲအုပ်က ခေါင်းပဲကွဲသွားတာ ထွက်ပြေးသွားတဲ့ အချုပ်သားတွေကို လိုက်ရှာနေပါတယ်။”
ထွက်ပြေးလွတ်မြောက်သွားတဲ့ အချုပ်သားတွေကို စစ်ကောင်စီတပ်နဲ့ ရဲတွေဟာ တပ်ကုန်းမြို့နယ်အတွင်း ပိတ်ဆို့ရှာဖွေနေပေမဲ့ ပြန်လည်ဖမ်းဆီးရမိခြင်းမရှိသေးဘူးလို့ ရဲအသိုင်းအဝိုင်းက သိရပါတယ်။
နေပြည်တော်ကောင်စီနယ်မြေ၊ ပျဥ်းမနားမြို့၊ အာဟာရသုခစျေးလမ်း၊ သီတာအောင် သစ်ခွနဲ့ ပန်းအလှပင်ဆိုင်ကို အောက်တိုဘာ ၂၇ ရက် ဒီနေ့ ညနေ ၃ နာရီက အမည်မသိ အမျိုးသား ၂ ယောက် ရောက်လာပြီး ပန်းဝယ်သူဟန်ဆောင်ကာ ဆိုင်ရှင်အမျိုးသမီးကို ဓားနဲ့ထောက်ပြီး ဖုန်း ၂ လုံးနဲ့ ဆွဲကြိုးလုယက်ခဲ့တယ်လို့ ဒေသခံတွေလို့ ပြောပါတယ်။
သီတာအောင် သစ်ခွနဲ့ ပန်းအလှပင် အရောင်းဆိုင်ကို ဒီနေ့ ညနေသုံးနာရီက အမည်မသိ အမျိုးသားနှစ်ယောက် ရောက်လာပြီး စျေးဝယ်သူဟန်ဆောင်ကာ လုယက်ခဲ့တာလို့ မြို့ခံတယောက်က ပြောပါတယ်။
“ဗွီဒီယိုကြည့်ရတာ ကိုယ်တောင်လန့်တယ်။ မင်းမဲ့တိုင်းပြည်လို ဖြစ်နေတာ။ မသတ်သွားတာဘဲ ကံကောင်းတာ။”
အဆိုပါလုယက်မှုနဲ့ပတ်သက်ပြီး ဆိုင်ပိုင်ရှင်ကိုယ်တိုင် လူမှုကွန်ရက်စာမျက်နှာမှာ တင်ခဲ့တာလို့ ပျဥ်းမနားစျေးအတွင်း ပန်းရောင်းသူယောက်က ဒီဗွီဘီကို ပြောပါတယ်။
“သူတို့ Page မှာတင်ထားတယ်၊ ငွေတွေမလွှဲဖို့၊ ဖုန်းနှစ်လုံး၊ ဆွဲကြိုးပါသွားတယ်ဆိုပြီး ကျမတို့တောင် ဖုန်းဆက်သတင်းမေးတာ၊ မရဘူး စက်ပိတ်ထားတယ်။”
သီတာအောင် သစ်ခွနဲ့ ပန်းအလှပင်ဆိုင် Page မှာတော့ “ဆိုင်မှာ ဓားနဲ့ထေက်၍ ဖုန်း ၂ လုံးနဲ့ ဆွဲကြိုးလုသွား၍ ငွေလွှဲမယ့်သူတွေ ဆိုင်းငံ့ထားပေးပါ” လို့ ရေးသားထားပါတယ်။
အဆိုပါလုယက်မှုနဲ့ပတ်သက်ပြီး ဒီဗွီဘီသတင်းဌာနက သီတာအောင် သစ်ခွနဲ့ ပန်းအလှပင်ဆိုင် ဖုန်းနံပါတ်ကို ဆက်သွယ်ပေမဲ့ ဆက်သွယ်လို့ မရသေးပါဘူး။
စစ်တပ်က အာဏာသိမ်းပြီးနောက် ရန်ကုန်၊ နေပြည်တော် အပါအဝင် ပြည်နယ်နဲ့ တိုင်းဒေသကြီးတချို့မှာ လုယက်၊ ဓားပြတိုက်မှုတွေ နေ့စဥ်နဲ့အမျှ ဖြစ်နေပါတယ်။
