ရခိုင်ရှေးဟောင်းမြို့တော် မြောက်ဦးအကြောင်းကို မှတ်တမ်းရုပ်ရှင်အဖြစ် ရိုက်ကူးထားတဲ့ My Hidden City မှတ်တမ်းရုပ်ရုင်ကားဟာ မေလ ၁ ရက်က ပြင်သစ်နိုင်ငံမှာ ကျင်းပတဲ့ ရုပ်ရှင်ပွဲတော်မှာ အကောင်းဆုံးမှတ်တမ်းရုပ်ရှင်ဇာတ်ကားဆုကို ဆွတ်ခူးရရှိခဲ့တယ်လို့ ဒေါက်တာစောမြအောင် ဖောင်ဒေးရှင်း တာဝန်ရှိသူတွေက ပြောပါတယ်။

အဲဒီ မှတ်တမ်းရုပ်ရုင်ဟာ မေလ ၁ ရက်နေ့က ပြင်သစ်နိုင်ငံ နိုက်စ်မြို့မှာ ပြုလုပ်တဲ့ Giraffe Film Festival မှာ အကောင်းဆုံးမှတ်တမ်းရုပ်ရှင်ဇာတ်ကားဆုကို ဆွတ်ခူးရရှိခဲ့တာလို့ ဒေါက်တာစောမြအောင် ဖောင်ဒေးရှင်းမှ စီမံကိန်းအရာရှိ ဒေါ်ခင်သန်းက ​ပြောပါတယ်။

“ဆုရတာကတော့ ဟုတ်ပါတယ်။ ကျမတို့ဆီကို ဒါရိုက်တာ Kimball ဆီက My Hidden City ရုပ်ရုင်က အကောင်းဆုံးရုပ်ရှင်ဆုရတယ်ဆိုပြီး အီးမေးလ်ကနေတဆင့် အသိပေး ပြောကြားလာတာဖြစ်တယ်။ ဒီမှတ်တမ်းရုပ်ရှင်ဇာတ်ကားက အရင်ကလည်း နိုင်ငံတကာ ပြိုင်ပွဲတွေမှာ ဆီမီးဖိုင်နယ်အဆင့်အထိ ရောက်ခဲ့ဖူးတယ်။ အခုတော့ အကောင်းဆုံးဇာတ်ကားဆုကို ရရှိခဲ့တာဖြစ်တယ်။”

အခု ဆုရရှိခဲ့တဲ့ My Hidden City မှတ်တမ်းရုပ်ရုင်ကားကို ၂၀၁၈ ခုနှစ် ဖေဖော်ဝါရီလမှာ အမေရိကန်နိုင်ငံသား ဒါရိုက်တာ Barry Pousman နဲ့ မြန်မာနိုင်ငံသား ဒါရိုက်တာ ကိုဝဏ္ဏကျော်တို့က ရခိုင်ရှေးဟောင်းမြောက်ဦးမြို့အကြောင်းကို မှတ်တမ်းရုပ်ရှင်အဖြစ် ရိုက်ကူးခဲ့တာ ဖြစ်ပါတယ်။

ဒီမှတ်တမ်းရုပ်ရှင်ကားကို တချိန်က ရခိုင်ကို ကမ္ဘာက သိရှိစေဖို့နဲ့ ယူနက်စကိုအတွက် အထောက်အကူပြုစေဖို့အတွက် ရိုက်ကူးခဲ့တာဖြစ်တယ်လို့ ဒေါ်ခင်သန်းက ထပ်ပြောပါတယ်။

“ကျမတို့ ဒီမှတ်တမ်းရုပ်ရှင်ကားကို ရိုက်ကူးတာက တချိန်က ရခိုင်ရဲ့မြို့တော် မြောက်ဦး ဆိုတာကို ကမ္ဘာက သိရှိစေဖို့အတွက် ပြသချင်တာဖြစ်တယ်။ အခုက ရခိုင် ဆိုတာကို ဘယ်လိုမျိုးဆိုတာ ကမ္ဘာက မသိသေးဘူး။ နောက် ရခိုင်မှာရှိတဲ့ မြောက်ဦးအမွေအနှစ်တွေကို ထိန်းသိမ်းချင်တဲ့ဆန္ဒနဲ့ ရိုက်ကူးခဲ့တာဖြစ်တယ်။ ပြီးတော့ ကမ္ဘာ့အမွေအနှစ်စာရင်းထဲမှာ ဝင်ဖို့အတွက် ကြိုးစားနေဆဲကာလထဲဆိုတော့ အခုလို ရိုက်ကူးပြီး ကမ္ဘာကို ချပြလိုက်တာကတော့ ကမ္ဘာ့အမွေအနှစ်စာရင်းဝင်ဖို့အတွက် အထောက်အကူတခုဖြစ်ဖို့အတွက် ကျမတို့က ရိုက်ကူးခဲ့ကြတာ ဖြစ်တယ်။”

အခုမှတ်တမ်းရုပ်ရှင်ကို ဒေါက်တာစောမြအောင် ဖောင်ဒေးရှင်းနဲ့ Mr Kimball Gallagher တို့က အဓိက ဦးဆောင်ပံ့ပိုးခဲ့ကြတာဖြစ်ပြီး ကိုစောမင်းဖြူနဲ့ မစောနန်းဣသျှင်တို့က အဓိက သရုပ်ဆောင်ထားကြတာ ဖြစ်ပါတယ်။

ဒီဇာတ်ကားမှာ ရခိုင်လူမျိုးတွေရဲ့ ခေတ်အဆက်ဆက် ထုံးတမ်းစဉ်လာတွေ၊ ဓလေ့စရိုက်တွေနဲ့ ရှေးဟောင်းဘုရားစေတီပုထိုးတွေကို ရိုက်ကူးထားတာ ဖြစ်ပါတယ်။

အဆိုပါ My Hidden City မှတ်တမ်းရုပ်ရှင်ကို ပြင်သစ်၊ အမေရိကန်၊ အိုင်ယာလန်၊ အာဂျင်တီနား၊ ဂျပန် စတဲ့နိုင်ငံတွေ အပါအဝင် နိုင်ငံပေါင်း ၃၀ ကျော်မှာ ဘာသာစကား ၈ မျိုးခန့် ဘာသာပြန်ဆိုကာ ပြသထားပြီး ဖြစ်ပါတယ်။

ရခိုင်ရှေးဟောင်းဒေသ မြောက်ဦးကို ကမ္ဘာ့ရှေးဟောင်းယဉ်ကျေးမှု အမွေအနှစ် (ယူနက်စကို) စာရင်းဝင်နိုင်ဖို့အတွက် အဆိုပြုလွှာမူကြမ်းကို ၂၀၁၉ ခုနှစ် စက်တင်ဘာလက ပြင်သစ်နိုင်ငံ ပါရီမြို့မှာ တင်သွင်းခဲ့ပြီး အဆိုပြုလွှာမူချောကို ၂၀၂၁ ခုနှစ် ဒီဇင်ဘာလမှာ ထပ်မံတင်သွင်းခဲ့တာ ဖြစ်ပါတယ်။

ဒါပေမဲ့ မြန်မာနိုင်ငံမှာ စစ်တပ်က အာဏာသိမ်းပြီးနောက် ယူနက်စကို စစ်ဆေးရေးအဖွဲ့ လာရောက်စစ်ဆေးဖို့အတွက် ကြန့်ကြာမှုတွေ ရှိနေတယ်လို့ ဝင်ခွင့်ကြိုးပမ်းနေသူတွေက သုံးသပ်ကြပါတယ်။

အဆိုတော်လင်းလင်း ရိုက်ကူးတဲ့ တော်လှန်ရေးရုပ်ရှင်ကား ၂ ကားဟာ နာမည်ကြီး ပြင်သစ် ရုပ်ရှင်ပွဲတော်တခုဖြစ်တဲ့ Cannes World Film Festival မှာ ဆုတွေ ရရှိခဲ့တယ်လို့ သိရပါတယ်။

ပြည်သူ့အချစ်တော် သရုပ်ဆောင် ဒေါင်းနဲ့ ချစ်သုဝေတို့ ပါဝင်သရုပ်ဆောင်ထားကြတဲ့ နွေဦးတော်လှန်ရေးရန်ပုံငွေ ဇာတ်လမ်းတို “စမှတ်” ရုပ်ရှင်ကတော့ “Best Educational Film Award” ဆု ရရှိခဲ့တာဖြစ်ပြီး တော်လှန်ရေး မျက်နှာစာ​ပေါ် ဘာမှ မလှုပ်ရှားရ​သေးတဲ့ Musical Film အနေနဲ့ ရိုက်ကူးထားတဲ့ “The Way” ရုပ်ရှင်ကတော့ “Best Mobile Feature Film Award” ရရှိခဲ့တာ ဖြစ်ပါတယ်။

ဒီအကြောင်းနဲ့ ပတ်သက်ပြီးတော့ သရုပ်ဆောင် ချစ်သုဝေက တော်လှန်ရေး အနုပညာ မောင်နှမတွေ စုစုစည်းစည်း လုပ်ဆောင်ခဲ့ကြလို့ ရရှိခဲ့တဲ့ ဒီဆုဟာ ထိုက်တန်တယ်လို့ ပြောပါတယ်။

“စိတ်ဓာတ်နဲ့ အနုပညာကို အကျဥ်းချမရ… ဖိနှိပ်မရ… ဒီ​နွေဦးမှာ ၈ နှစ်အကြာမှ ရုပ်ရှင် ပြန်ရိုက်ဖြစ်တယ်​ပြောရမှာ​ပေါ့… နိုင်ရာဝန်နဲ့ ငါတို့အသံ​တွေ တိတ်မ​နေဖို့ ကြိုးစားခဲ့ကြတာ… Cannes World Film Festival မှာ official selected ဖြစ်ပြီး semifinal… final… nominess ထိ ဖြတ်​ကျော်ပြီး ခု လို ၂ ကားလုံး award winning ဖြစ်​တော့ စိတ်ထဲ ဘယ် လို​ပျော်မှန်းမသိဘူး… ( *Festival de Cannes မဟုတ်ပါ )… မပြည့်စုံမှု​တွေမှာ တို့​တွေမှာ စိတ်ဓာတ်ရယ် အနုပညာရယ်ပဲ ရှိခဲ့တာ... 'စမှတ်' က ကိုလင်း ရဲ့ပထမဆုံးကား... ဒီကားမှာ ကိုယ်က ​နေရာ ၁ ခုမှာ ဝင်စီး​မျောခဲ့ရတာ… "The Way" က​တော့ ခုထိ တလရ မျက်နှာစာ​ပေါ် ဘာမှ မလှုပ်ရှားရ​သေးတဲ့ကားတစ်ခုပဲ… "The Way" musical ရိုက်မယ်​ပြော​တော့ တကယ့်ကို မဖြစ်နိုင်တာကို ငါ့​ယောကျာ်း​တော့ လုပ်ပြီလို့ ​တွေးမိတယ် (မဖြစ် နိုင်တယ်ဆိုတာ အချိန်ရယ်, security ရယ်, resource ​တွေရယ် ဘာဆို ဘာမှမပြည့်စုံ မလုံ​လောက်ဘူး)… ဒါ​ပေမယ့် တလရ ​မောင်နှမ အားလုံး အ​တော်ပင်ပမ်း ဝိုင်းဝန်း ကြိုးစားခဲ့ကြတယ်။ Treza ဆို the way မှာ actor ​တွေ အဝတ်အတွက်​ရော ဖိနပ်​တွေ​ရော စီစဥ်တာအစ catering ပါဝင်ပါခဲ့ရတာ… ဒီလိုပဲ "The Way" မှာ ပါဝင်သူအားလုံးဟာ စုဖွဲ့မှုအား​ကောင်း​ကောင်းနဲ့ ချိတ်ဆက်လုပ်ကိုင်ခဲ့ကြတာမို့… အဲ့အတွက် ဒီဆုဟာ ငါတို့နဲ့ ထိုက်တန်တယ်လို့ တကယ်​တွေးမိတယ်။ ​ပျော်တယ်ကွာ... ​ပျော်ချင်ရင် website ​တွေသာ ဝင်ကြည့်​တော့ ကိုယ့်နိုင်ငံ နာမည်နဲ့ ကိုယ်အနုပညာကို အသိအမှတ်ပြုခံရတာ ဒီကာလမှာ ရင်ထဲတကယ်ကြည်နူးရလို့❤”

မြန်မာနိုင်ငံမှာ စစ်တပ်က မတရားအာဏာသိမ်းပြီးနောက်ပိုင်း စစ်အာဏာသိမ်းမှုကို ဆန့်ကျင်တဲ့ ဆန္ဒပြပွဲတွေမှာ တက်တက်ကြွကြွပါဝင်ခဲ့ကြတဲ့ နာမည်ကျော်အနုပညာရှင် တွေကို ဖမ်းဝရမ်းထုတ် ဖမ်းဆီးတာတွေ လုပ်ဆောင်ခဲ့ရာမှာ သရုပ်ဆောင် ဒေါင်း၊ အဆိုတော် လင်းလင်းနဲ့ ချစ်သုဝေတို့ ဇနီးမောင်နှံ အပါအဝင် အနုပညာရှင်တွေများစွာ ပါဝင်ခဲ့ကြပြီး ထွက်ပြေးတိမ်းရှောင်နေကြရတာ ဖြစ်ပါတယ်။

အဲဒီထဲမှာ တချို့အနုပညာရှင်တွေကတော့ အကြမ်းဖက်စစ်အုပ်စုရဲ့ ဖမ်းဆီးထိန်းသိမ်းခံခဲ့ရကာ ထောင်ဒဏ် ပြစ်ဒဏ်အသီးသီးချမှတ်ခံရသူတွေလည်း ရှိနေပါတယ်။

“The Way” ရုပ်ရှင်ကားထဲမှာ ပါဝင်ထားတဲ့ တော်လှန်အနုပညာရှင် မြတ်နိုးအေးကလည်း ခုလိုပြောပါတယ်။

“ဒီဘက် ကမ္ဘာအခြမ်းမှာ ပညာအစုံတွေ ရှိကြတဲ့လူတွေက ပစ္စည်းတော့ မစုံမလင် ရှိ တာလေးတွေနဲ့ကိုမှ ဖုန်းလေးနဲ့ပဲ ရိုက်ခဲ့ရတဲ့ ကားလေး… nominations တွေ ဝင်ကတည်းက တစ်ဖွဲ့သားလုံး အရမ်းပျော်နေကြတာ… ခုတော့ “The Way” musical film လေးက “Best Mobile Feature Film” award လေး Cannes World Film Festival မှာ ရသွားတယ်တဲ့..👏 ဘဝမှာ ပထမဦးဆုံး သီချင်းဆိုပြီး ရိုက်ဖူးတဲ့ ကားလေး ပေါ့နော်😅 ဆုပါရသွားတော့ သိပ်ကိုပျော်ရပါတယ်🤎 မြတ်နိုးပါတဲ့ “The Way” လေး အပြင် ကိုလင်းရဲ့ “စမှတ် “လေးပါ “Best Educational Film award တစ်ဆု ထပ်ရပါသေးတယ်… နှစ်ကားလုံးအတွက် congratulations✨👏☺️”

လတ်တလောမှာတော့ နွေဦးတော်လှန်ရေး ခရီးကြမ်း ၂ နှစ်ကျော် ကာလတွေအတွင်းမှာ တော်လှန်အနုပညာရှင်၊ အတတ်ပညာရှင်တွေဟာ ပြည်သူ့ဘက်ကနေ မားမားမတ်မတ် ရပ်တည်ပြီးတော့ စစ်အာဏာရှင်ကို တိုက်ထုတ်ရာမှာ တတ်စွမ်းသမျှ တော်လှန်အနုပညာ စွမ်းအားနဲ့ တတပ်တအား ပါဝင်နေကြတာ ဖြစ်ပါတယ်။