ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်ရှိ ရိုဟင်ဂျာ ဒုက္ခသည်စခန်းတွေကို မတ် ၁၅ ရက်မှာ  ပြင်သစ်သံအမတ်ကြီး မာရီမတ်စ်ဒူပေးနဲ့အဖွဲ့ သွားရောက်ပြီး ရိုဟင်ဂျာဒုက္ခသည်တွေနဲ့ တွေ့ဆုံဆွေးနွေးခဲ့ကြောင်း ဒုက္ခသည်စခန်း တာဝန်ရှိသူတွေဆီက သိရပါတယ်။

ဒုက္ခသည်စခန်းတာဝန်ရှိသူတဦးက “သူ အဓိကထား ဆွေးနွေးတာက ဒုက္ခသည်တွေ လုံခြုံရေးပါ။ ဒုက္ခသည်စခန်းတွေက ကျယ်ပြန့်တော့ ဒုက္ခသည်တွေကို ပစ်မှတ်ထား သတ်ဖြတ်နေတဲ့ အကြမ်းဖက်အဖွဲ့တွေက ခိုလှုံနေကြတာ။ ဘင်္ဂလားအစိုးရလည်း လက်တွေ့မှာ ဘယ်လိုမှ ကာကွယ်မပေးနိုင်ဘူး။ အဲဒါကို ကျနော်တို့ဘက်က အဓိက တင်ပြခဲ့ကြတယ်” လို့ ပြောပါတယ်။

ဘင်္ဂလားဒေ့ရှ်နိုင်ငံဆိုင်ရာ ပြင်သစ်သံအမတ်ကြီးဟာ ဒုက္ခသည်စခန်းရဲ့ အဓိကစိန်ခေါ်မှု ဖြစ်တဲ့ လုံခြုံရေး၊ ကာကွယ်ရေးနဲ့ လူသားချင်းစာနာထောက်ထားမှုဆိုင်ရာ အကူအညီပေးရေး ဝန်ဆောင်မှုတွေအပြင် သဘာဝပတ်ဝန်းကျင် ကာကွယ်ထိန်းသိမ်းရေး၊ ရာသီဥတုဆိုင်ရာ လုပ်ဆောင်ချက်တွေကိုပါ တွေ့ဆုံဆွေးနွေးခဲ့ကြောင်း ဘင်္ဂလားဒေ့ရှ် UNHCR ရုံး ထုတ်ပြန်ချက်မှာ ဖော်ပြထားပါတယ်။

ဒုက္ခသည်စခန်းမှာ ရိုဟင်ဂျာတွေဟာ ဆင်းရဲဒုက္ခတွေ၊ ဘက်စုံအခက်အခဲတွေ၊ မီးရှို့ မီးလောင်ခံရမှုတွေနဲ့ နှိပ်စက်ညှဉ်းပန်းမှုပေါင်း များစွာနဲ့ ကြုံတွေ့နေရတာတွေကို တင်ပြခဲ့ကြတယ်လို့ ဒုက္ခသည်တွေဆီက သိရပါတယ်။

စစ်ကောင်စီကစေလွှတ်တဲ့ ကိုယ်စားလှယ်အဖွဲ့ဟာလည်း မတ် ၁၅ ရက်က ဘင်္ဂလားဒေ့ရှ်နိုင်ငံမှာ ရောက်ရှိနေပြီး ရိုဟင်ဂျာဒုက္ခသည်တွေနဲ့ တွေ့ဆုံခဲ့ပါတယ်။

မြန်မာနိုင်ငံဆိုင်ရာပြင်သစ်သံအမတ်ကြီး Mr. Christian Lechervy ဟာ မတ်လ ၁၀ ရက် ဒီကနေ့ မနက်ပိုင်းက မတရားဖမ်းဆီးခံထားရတဲ့ ရာပေါင်းများစွာသော ကျောင်းသားတွေနဲ့ ငြိမ်း ချမ်းစွာ ဆန္ဒပြသူတွေရဲ့ မိဘတွေနဲ့ တွေ့ဆုံဖို့ အင်းစိန်ထောင်ကို သွားရောက်ခဲ့ပါတယ်။

ဒါ့အပြင် စစ်တပ်အာဏာသိမ်းမှုအပြီး အကျဉ်းကျခံနေရတဲ့ နိုင်ငံရေးအကျဉ်းသားတွေ အားလုံးကို ချက်ချင်းခြွင်းချက်မရှိ ပြန်လွှတ်ပေးဖို့လည်း ပြင်သစ်သံအမတ်က တောင်းဆိုထားပါတယ်။

ပြီးခဲ့တဲ့ ဖေဖော်ဝါရီ ၁ ရက်နေ့မှာ စစ်တပ်က နိုင်ငံတော်အတိုင်ပင်ခံပုဂ္ဂိုလ် ဒေါ် အောင်ဆန်းစုကြည်၊ သမ္မတ ဦးဝင်းမြင့်တို့အပါအဝင် နိုင်ငံထိပ်ပိုင်းခေါင်းဆောင်တွေကို ဖမ်းဆီး အာဏာသိမ်းလိုက်ပြီးတဲ့နောက် စစ်အာဏာသိမ်းမှု ဆန့်ကျင်ရေး လူထုဆန္ဒပြပွဲတွေ နိုင်ငံအနှံ့ ပြုလုပ်နေကြတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ် ပြန်ချက်အရ ဖေဖော်ဝါရီ ၁ ရက်ကနေ မတ် ၈ ရက်နေ့အထိ အာဏာသိမ်းစစ်ကောင်စီက ဖမ်းဆီးတရားစွဲပြစ်ဒဏ်ချမှတ်ခဲ့သူပေါင်း ၁၇၀၀ ကျော် ရှိနေတယ်လို့ ဆိုပါတယ်။

Photo- French Embassy