တောင်ကိုရီးယားဟာ ပြည်တွင်းမှာတင် တီထွင်ထုတ်လုပ်ထားတဲ့ တိုက်လေယာဉ်ကို ဇူလိုင် ၁၉ ရက်က ပထမဆုံး စမ်းသပ်ပျံသန်းတာ အောင်မြင်ခဲ့တယ်လို့ ကာကွယ်ရေးအေဂျင်စီက ပြောလိုက်ပါတယ်။
အိမ်နီးချင်း မြောက်ကိုရီးယားရဲ့ နျူကလီးယားနဲ့ ဒုံးကျည်ခြိမ်းခြောက်မှုတွေကို ရင်ဆိုင်ရလို့ သက်တမ်းရင့် စစ်ဂျက်တိုက်လေယာဉ်တွေကို အစားထိုးဖို့ တွန်းအားပေးနေချိန်မှာ ခုလို စမ်းသပ်ခဲ့တာပါ။
အင်ဒိုနီးရှားနိုင်ငံက တစိတ်တပိုင်း ကျောထောက်နောက်ခံပြုထားတဲ့ စီမံကိန်းတခုအတွင်း ကိုရီးယား လေယာဉ်တည်ဆောက်မှု နည်းပညာလုပ်ငန်း (KAI) ကထုတ်လုပ်တဲ့ မျိုးဆက်သစ် လေယာဉ်ဟာ တောင်ကိုရီးယားက အားကိုးတဲ့ အမေရိကန်က တည်ဆောက်တဲ့ F-35 တိုက်လေယာဉ်ထက် စျေးသက်သာတဲ့ အမျိုးအစားပါ။
KF-21 လို့ နာမည်ပေးထားတဲ့ ဒီဂျက်လေယာဉ်ဟာ မွန်းလွဲ ၃ နာရီ ၄၀ မိနစ်မှာ ပျံတက်ခဲ့ပြီး ဆာချွန်မြို့ အရှေ့တောင်ပိုင်းက လေတပ်အခြေစိုက်စခန်းကနေ မိနစ် ၃၀ လောက် စမ်းသပ် ပျံသန်းခဲ့တယ်လို့ ကာကွယ်ရေးဌာန DAPA က ကြေညာချက် ထုတ်ပြန်ပါတယ်။
၂၀၂၆ ခုနှစ်မှာ အများအပြား စထုတ်နိုင်ဖို့ စီစဉ်ထားတဲ့ ဂျက်လေယာဉ်သစ်ဟာ အဲဒီနှစ်အထိ ပိုများတဲ့ စမ်းသပ်မှုတွေကို ထပ်လုပ်ရဦးမှာပါ။ တောင်ကိုရီးယားဟာ မနှစ်က ဧပြီလမှာ KF-21 ရဲ့ ပထမဆုံးနမူနာကို ထုတ်ဖော်ပြသခဲ့ပြီး ဒီလေယာဉ်ကို သူ့လေတပ်ရဲ့ အနာဂတ်ကျောရိုးအဖြစ် အသိအမှတ်ပြုထားပါတယ်။
အခုစမ်းသပ်မှုဟာ အာရှမြောက်ပိုင်းက အမေရိကန်ရဲ့ မဟာမိတ် တောင်ကိုရီးယားနိုင်ငံအတွက် စစ်ရေးအမှီအခို ပိုကင်းဖို့ ခြေလှမ်းတရပ်လည်း ဖြစ်လာပါတယ်။
