စစ်ကောင်စီလက်အောက်ခံ ဗဟိုဘဏ်က အမေရိကန်တဒေါ်လာ ရည်ညွှန်းဈေးနှုန်းအဖြစ် ၂,၁၀၀ ကျပ်အထိ တိုးမြှင့်သတ်မှတ်လိုက်ပြီးနောက် ပြင်ပစျေးကွက်အတွင်း ရွှေစျေးအနည်းငယ် ကျရိပ်ပြခဲ့ပေမဲ့ ဒီကနေ့မှာ ပြန်လည်မြင့်တက်လာခဲ့ပါတယ်။

ပြင်ပစျေးကွက်မှာ ဩဂုတ် ၄ ရက်က အကယ်ဒမီ မီးလင်းအခေါက်ရွှေ တကျပ်သားကို ကျပ် ၂၄ သိန်းအထက်ရှိခဲ့ပြီး ဗဟိုဘဏ်ရဲ့ ဒေါ်လာငွေလဲနှုန်း အပြောင်းအလဲကြောင့် သြဂုတ် ၆ ရက်မှာ ကျပ် ၂၄ သိန်းအောက်ကို ပြန်လည်ကျဆင်းခဲ့ပါတယ်။

ဒေါ်လာစျေးဂယက်ကြောင့် အနည်းငယ်ကျဆင်းသွားတဲ့ ရွှေစျေးဟာ ကျပ်ငွေတန်ဖိုး ဆက်တိုက်ကျဆင်းနေတာကြောင့် ဒီနေ့မှာ တကျပ်သားကို ကျပ် ၂၄ သိန်းအထက်ကို ပြန်လည် မြင့်တက်လာပါတယ်။

ရန်ကုန်တိုင်းဒေသကြီး ရွှေလုပ်ငန်းရှင်များအသင်းရဲ့ အကယ်ဒမီ မီးလင်းအခေါက်ရွှေစျေး သတ်မှတ်နှုန်းထားကလည်း ရက်ပိုင်းအတွင်း တကျပ်သားကို ကျပ် ၃၀,၀၀၀ ကျော် မြင့်တက်လာပါတယ်။

ဩဂုတ် ၄ ရက်မှာ အကယ်ဒမီ မီးလင်းအခေါက်ရွှေ တကျပ်သားကို ကျပ် ၂,၀၆၁,၀၀၀ နဲ့ အသင်းက ဈေးကွက်ဖွင့်ခဲ့ပြီး ဒီနေ့ သြဂုတ် ၉ ရက်မှာ ကျပ် ၂,၀၉၂,၀၀၀ နဲ့ စျေးကွက်ဖွင့်လှစ်ခဲ့ပါတယ်။

စစ်တပ်အာဏာသိမ်းပြီးနောက် ကျပ်ငွေတန်ဖိုး ဆက်တိုက်ကျဆင်းနေတာကြောင့် ငွေကို လက်ဝယ်ကိုင်ဆောင်မထားချင်သူတွေက ရွှေနဲ့ အိမ်ခြံမြေဘက်ကို ပြောင်းလဲ ရင်းနှီးမြှုပ်နှံလာကြတာကြောင့် ရွှေနဲ့ အိမ်ခြံမြေဈေးတွေက အမြင့်ပိုင်းကို ရောက်ရှိနေတာလို့ စီးပွားရေးအကဲခတ်တွေက သုံးသပ်ကြပါတယ်။

လက်ရှိ ရန်ကုန်ရွှေဈေးကွက်ထဲမှာတော့ ရွှေကို ရင်းနှီးမြှုပ်နှံထားသူတွေက ပြန်လည်ရောင်းချမှုမရှိဘဲ လက်ဝယ်ထားရှိပြီး စျေးကွက်အခြေအနေကို စောင့်ကြည့်နေကြတာကြောင့် အရောင်းအဝယ် အေးနေတယ်လို့ သိရပါတယ်။

စစ်ကောင်စီလက်အောက်ခံ ဗဟိုဘဏ်ရဲ့ ဒေါ်လာငွေလဲနှုန်း ဆွဲတင်မှုဟာ ပြင်ပပေါက်ဈေးနဲ့ ဗဟိုဘဏ်ရည်ညွှန်းစျေးတို့အကြား ကွာဟချက် မြင့်မားနေတာကို ထိန်းညှိလိုက်တဲ့သဘော ဖြစ်တယ်လို့ လေ့လာသူတွေက သုံးသပ်ကြပါတယ်။

စစ်ကောင်စီက ဒေါ်လာစျေးကို ထိန်းညှိပေမဲ့ လတ်တလော ပြင်ပစျေးကွက်မှာ တဒေါ်လာကို ကျပ် ၂,၆၀၀ အထက်မှာပဲ ဆက်ရှိနေပြီး ကြိုက်ရောင်း၊ ကြိုက်ဝယ်နဲ့သာ အရောင်းအဝယ် ဖြစ်နေပါတယ်။ ငွေလဲကောင်တာတချို့ကလည်း အမေရိကန်ဒေါ်လာ အရောင်းအဝယ်ကို ခေတ္တရပ်နားထားကြပြီး ဖုန်းနဲ့ပဲ ညှိနှိုင်း အရောင်းအဝယ် ပြုလုပ်နေကြတယ်လို့ သိရပါတယ်။

ရွှေအထွက်နည်းလာနဲ့ ထုတ်လုပ်မှုစရိတ်တက်လာတဲ့ အကြောင်းရင်းတွေကြောင့် မြန်မာပြည်တွင်းရွှေဈေးတက်နေတယ်လို့ ရွှေဝယ်ရောင်းလုပ်ငန်းရှင်တွေက ပြောပါတယ်။

ရန်ကုန်တိုင်း ရွှေလုပ်ငန်းရှင်များအသင်းက ဒီကနေ့ ဇူလိုင် ၁၄ ရက် နေ့လယ် ၁၂ နာရီ ထုတ်ပြန်ချက်အရ ကမ္ဘာ့ရွှေဈေးက တအောင်စကို အမေရိကန်ဒေါ်လာ ၁,၇၃၃ ရှိပြီး ပြည်တွင်းရွှေဈေး (အကယ်ဒမီ) က တကျပ်သားကို ၂,၀၅၀,၀၀၀ ကျပ် ရှိပါတယ်။

လက်ရှိ ကမ္ဘာ့ရွှေဈေးနှုန်းအပေါ် ပြည်တွင်းမှာ အရောင်းအဝယ်ဖြစ်နေတဲ့ အမေရိကန် ၁ ဒေါ်လာကို ၂,၁၉၀ ကျပ်နှုန်းနဲ့ အခြေခံပြီး ပြည်တွင်းရွှေဈေး (အကယ်ဒမီ) ကို တွက်ချက်ပါက တကျပ်သားကို ၂,၀၂၄,၀၀၀ စွန်းစွန်းသာ ရှိပါတယ်။ ဒါကြောင့် ပြည်တွင်းရွှေဈေး (အကယ်ဒမီ)က ကမ္ဘာ့ရွှေဈေးထက် ဈေးမြင့်နေတာ တွေ့ရပါတယ်။

ပြည်တွင်းရွှေဈေးက ကမ္ဘာ့ရွှေဈေးထက် ဈေးမြင့်နေရတဲ့ လက်ရှိအခြေအနေနဲ့ ပတ်သက်ပြီး ရွှေလုပ်ငန်းရှင်တယောက်က “ထုတ်လုပ်မှုစရိတ်ဆိုတာက တူးဖော်ရေးမှာ အသုံးပြုတဲ့ စက်ပစ္စည်းတွေအတွက် စက်သုံးဆီက အရင်တုန်းကတော့ ၅ ဂါလန် တပုံးမှ ၁၀,၀၀၀ ကျော်ပဲ ရှိတာလေ။ အခုက ၅၀,၀၀၀ ကျော် ဖြစ်သွားပြီ။ သယ်ယူစရိတ်တွေကလည်း ရှိသေးတယ်။ ပြီးတော့ ဒီရာသီမှာ ပြည်တွင်းရွှေက အထွက်နည်းသွားပြီ။ ရွှေမိုင်းတွေက အရင်လို တူးလို့ မရဘူး။ ဘာလို့လဲဆို တွင်းတွေဘာတွေ ပြိုတာရှိလို့လေ။ နောက်တခုက အဖမ်းအဆီးတွေ များလာတော့ လိုင်းသမားတွေက ဘယ်သူမှ မသွင်းကြတော့ဘူး။ အဲဒီအချက်တွေကြောင့် ပြည်တွင်းရွှေဈေးက မကျဘူးဖြစ်နေတာ” လို့ ဒီဗွီဘီကို ပြောပါတယ်။

လက်ရှိမှာဆိုရင်လည်း ပြည်တွင်းရွှေရောင်းဝယ်ရေးဈေးကွက်ထဲမှာ ရွှေအဝင် နည်းပေမဲ့ ဝယ်လိုအားက ရှိနေတာကြောင့် ရွှေဈေးက ကျလာဖို့မရှိပါဘူး။

လုပ်သက်ရင့် ရွှေဝယ်ရောင်းသမားတယောက်ကလည်း “ဒီမှာက ဘာဖြစ်လာလဲဆိုရင် ဝယ်လိုအားက များနေပြီး ရောင်းလိုအားက နည်းနေတယ်။ အဲ့ဒီ့အတွက်ကြောင့် ရွှေဈေးက မကျနိုင်ဘူး။ အဓိကကတော့ အဲ့ဒါပဲ။ ရောင်းလိုအားများရတဲ့ အကြောင်းရင်းက ဘာလဲဆို ပြည်တွင်းမှာ ရွှေအဝင်က နည်းသွားလို့။ အရင်ကတော့ တရုတ်နဲ့ ယိုးဒယားဘက်က ရွှေတွေကို ကုန်သည်တွေက မသိမသာ သွင်းကြတာမျိုးရှိတယ်။ အခုက အဖမ်းအဆီးတွေရှိတော့ မသွင်းကြဘူး။ အန်ကယ့်အတွေ့အကြုံအရပေါ့၊ နှစ်စဉ် ၈ လပိုင်း၊ ၉ လပိုင်းတွေမှာဆိုရင် ပြည်တွင်းရွှေဈေးက အကျမရှိဘူး၊ အတက်ပဲရှိတယ်။ အကြောင်းတခုမဟုတ် တခုနဲ့ တက်နေတာနော်” လို့ ဒီဗွီဘီကို ပြောပါတယ်။

ပြီးခဲ့တဲ့ ရက်သတ္တပတ်က ဖြစ်ပေါ်ခဲ့တဲ့ ဈေးနှုန်းနဲ့ နှိုင်းယှဉ်ရင် ကမ္ဘာ့ရွှေဈေးက အကျရှိလာပေမဲ့ ပြည်တွင်းရွှေဈေး (အကယ်ဒမီ) က အကျမရှိတာ တွေ့ရပါတယ်။

ရန်ကုန်တိုင်း ရွှေလုပ်ငန်းရှင်များအသင်းက ပြီးခဲ့တဲ့ရက်သတ္တပတ် ဇူလိုင် ၇ ရက် နေ့လယ် ၁၂ နာရီ ထုတ်ပြန်ချက်အရ ကမ္ဘာ့ရွှေဈေးက တအောင်စကို အမေရိကန်ဒေါ်လာ ၁,၇၄၅ ရှိခဲ့ပြီး ပြည်တွင်းရွှေဈေး (အကယ်ဒမီ) က ၂,၀၄၇,၀၀၀ ကျပ် ရှိခဲ့ပါတယ်။