ပြည်ထောင်စုရွေးကောက်ပွဲကော်မရှင် ဒုတိယညွှန်ကြားရေးမှူးချုပ် ဒုတိယဗိုလ်မှူးကြီး (ငြိမ်း) စိုင်းကျော်သူကို PDF အဖွဲ့က ဧပြီ ၂၂ ရက် နေ့လယ်ပိုင်းမှာ လုပ်ကြံသတ်ဖြတ်ခဲ့တယ်လို့ ဒေသခံတွေဆီက သိရပါတယ်။

ဒီနေ့ မွန်းလွဲ ၂ နာရီကျော်လောက်မှာ ဦးစိုင်းကျော်သူဟာ သေနတ်ပစ်ခံရပြီး သေဆုံးသွားတယ်လို့ စစ်ကောင်စီက အတည်ပြုထားသလို  ဦးစိုင်းကျော်သူကို For The Yangon မြို့ပြပြောက်ကျား တပ်ဖွဲ့က သုတ်သင်ရှင်းလင်းလိုက်တာလို့ သူတို့ရဲ့ လူမှုကွန်ရက်စာမျက်နှာမှာ ကြေညာထား တာပါ။

ဒုညွန့်ကြားရေးမှူးချုပ်ဒုဗိုလ်မှူးကြီး(ငြိမ်း) စိုင်းကျော်သူဟာ သင်္ကန်းကျွန်းမြို့နယ်၊ ဝေဇယန္တာလမ်း မပေါ်က အောင်ရတနာအထူးကု ဆေးရုံးအနီးမှာ ဇနီးဖြစ်သူ ဆရာဝန်ကို ပို့ပြီး အပြန်မှာ သေနတ်နဲ့ ပစ်ခတ်ခံရတာလို့ စစ်ကောင်စီရဲ့ အသိုက်အဝန်းက သိရပါတယ်။

ဒုဗိုလ်မှူးကြီး(ငြိမ်း) စိုင်းကျော်သူကို ရွေးကောက်ပွဲကော်မရှင်က အသုံးပြုဖို့ ပေးထားတဲ့ ကားကို မောင်းနှင်လာချိန် ကားအတွင်းကို သေနတ် အတိုတွေနဲ့ ပစ်ခတ်ရှင်းလင်းခဲ့တာဖြစ်ပြီး နေရာမှာ သေဆုံးခဲ့တာလို့ For the Yangon မြို့ပြပျောက်ကျားတပ်ဖွဲ့က ပြောပါတယ်။

မြေပြင်အခြေနေကိုသိသူတဦးက "သူရဲ့ဇနီးကို ဆေးရုံပို့ပြီး ကားနဲ့အပြန် ဝေဇယန္တာလမ်းမပေါ် အောင်ရတနာအထူးကုဆေးရုံးအနားမှာ သေနတ်နဲ့ပစ်ခတ်ခံရတာဖြစ်တယ်။ ပစ်ခတ်ခံရချိန် သူက ကားနဲ့ ထွက်ပြေးဖို့ ကြိုးစားရာမှာ လမ်းဘေးဓာတ်တိုင်ကို တိုက်မိချိန်မှာ သေနတ်သမားတွေက ပစ်သွားတာ" လို့ပြောပါတယ်။

ရပ်ကွက်နေသူတဦးက "သူမိန်းမက အောင်ရတနာဆေးရုံမှာ ဓာတ်မှန်ဆရာဝန် သူ့ကို ပို့ပြီး အပြန် ၁၆ လမ်းဆုံမှာ အပစ်ခံရတာ သေနတ်နဲ့ ၇ ချက်ပစ်သွားတာ ဓာတ်တိုင်ကို ကားနဲ့တိုက်ပြီး သေသွား တယ်" လို့ ပြောပါတယ်။

ဒုဗိုလ်မှူးကြီး(ငြိမ်း)စိုင်းကျော်သူမှာ လည်ပင်း၊ ယာနားနောက်၊ လက်နဲ့ ချိုင်းအောက်တွေမှာ ၅ ချက် ထိမှန်ခဲ့ပြီး အဲဒီဒဏ်ရာကြောင့် သင်္ကန်းကျွန်းစံပြဆေးရုံသို့ ပို့ဆောင်စဉ် လမ်းမှာ သေဆုံးသွား တာလို့ သိရပါတယ်။

ရွေးကောက်ပွဲကော်မရှင် ဒုညွန်ကြားရေးမှူးချုပ် ဒုဗိုလ်မှူးကြီး(ငြိမ်း)စိုင်းကျော်သူဟာ နိုင်ငံတော် သမ္မတဦးဝင်းမြင့်နဲ့ အတိုင်ပင်ခံပုဂ္ဂိုလ် ဒေါ်အောင်ဆန်းဆုကြည်တို့အား တရာစွဲဆိုထားတဲ့ ပြည်ထောင်စုရွေးကောက်ပွဲကော်မရှင်ကို မလျော်သြဇာသုံး၍ လွှမ်းမိုးမှုနဲ့ ရာဇသတ်ကြီးပုဒ်မ ၁၃၀(က)နဲ့ တရာစွဲဆိုထားတဲ့အမှုမှာ လိုပြသက်သေ ပါဝင်ထွက်ဆိုခဲ့သူလို့လည်း သတင်းတွေ ထွက်ပေါ်နေပါတယ်။

ဦးစိုင်းကျော်သူဟာ စစ်တပ်ကနေ ရွေးကောက်ပွဲကော်မရှင်ရုံးကို ၂၀၂၀ ရွေးကောက်ပွဲ ကာလမှာ ညွန့်ကြားရေးမှူးအဖြစ် ပြောင်းလာသူဖြစ်ပြီး စစ်ကောင်စီက အာဏာသိမ်းပြီးနောက် ဒုတိယ ညွန့်ကြားရေးမှူးချုပ်အဖြစ် တိုးမြှင့်ခံလိုက်ရတာ ဖြစ်ပါတယ်။

ဖြစ်စဉ်ဖြစ်ပွားပြီးနောက် စစ်ကောင်စီတပ်က  ဝေဇယန္တရာလမ်းတလျှောက် အိမ်စီးကားနဲ့ လမ်းသွား လမ်းလာတွေကို စစ်ဆေးခဲ့တယ်လို့ သိရပါတယ်။

For the Yangon မြို့ပြပြောက်ကျားတပ်ဖွဲ့ဟာ စစ်ကောင်စီရဲ့ ရာထူးရှိ အကြမ်းဖက် ဗိုလ်ချုပ်၊ ဗိုလ်မှူးတွေသာမက သူတို့နဲ့အတူ ပူးပေါင်းပြီး ပြည်သူလူထုကို ဖိနှိပ်၊ အနိုင်ကျင့်၊ အကြမ်းဖက် နေသူတွေ စစ်ကောင်စီသက်ဆိုးရှည်အောင် ထောက်ပံ့ကူညီသူတွေကို ဆက်လက် သုတ်သင်ရှင်း လင်းသွားမယ်လို့လည်း ပြောကြားခဲ့ပါတယ်။

ဧပြီ ၁၈ ရက် မနက်ကလည်း သန်လျင်မြို့နယ်မှာ အငြိမ်းစာဒုဗိုလ်မှုးကြီးတစ်ဦး သေနတ်နဲ့ ပစ်ခတ် ခံရပြီး သေဆုံးခဲ့ပါတယ်။

စစ်ကောင်စီက ဖွဲ့စည်းထားတဲ့ ပြည်ထောင်စုရွေးကောက်ပွဲကော်မရှင်ကို အမျိုးသားညီညွတ်ရေးအစိုးရ (NUG) အကြမ်းဖက်မှုတိုက်ဖျက်ရေးဗဟိုအဖွဲ့က အကြမ်းဖက်အဖွဲ့အစည်းအဖြစ် သတ်မှတ်လိုက်တယ်လို့ ထုတ်ပြန်ကြေညာပါတယ်။

ဧပြီ ၄ ရက် ရက်စွဲနဲ့ ထုတ်ပြန်ချက်ထဲမှာတော့ အကြမ်းဖက်မှုတိုက်ဖျက်ရေးဗဟိုအဖွဲ့က အကြမ်းဖက်မှုတိုက်ဖျက်ရေးဥပဒေ ပုဒ်မ ၆၊ ပုဒ်မခွဲ (င) နဲ့ ပုဒ်မ ၇၂ ပုဒ်မခွဲ(ခ)ပါ လုပ်ပိုင်ခွင့်ကို ကျင့်သုံးပြီးတော့ ပြည်ထောင်စုအစိုးရအဖွဲ့ သဘောတူညီချက်နဲ့ ဒီအမိန့်ကြော်ငြာစာကို ထုတ်ပြန်လိုက်တယ်လို့ ဆိုပါတယ်။

စစ်ကောင်စီက ဖွဲ့စည်းထားတဲ့ ပြည်ထောင်စုရွေးကောက်ပွဲကော်မရှင်က ဒီမိုကရေစီနည်းလမ်းတကျ ဆောင်ရွက်နေတဲ့ နိုင်ငံရေးပါတီတွေကို ဆက်လက် မရပ်တည်နိုင်စေဖို့ ရည်ရွယ်ကာ မတရားတဲ့ အမိန့်နဲ့ ဥပဒေတွေ ထုတ်ပြန်ဆောင်ရွက်တာ၊ တိုင်းရင်းသားပြည်သူအများစုက လုံးဝလက်ခံ သဘောတူခြင်းမရှိတဲ့ ၂၀၀၈ ခုနှစ် ဖွဲ့စည်းပုံအခြေခံဥပဒေကို တည်မြဲစေဖို့ ဆောင်ရွက်တာ၊ အကြမ်းဖက်စစ်အာဏာရှင်နဲ့ သူတို့ကို ထောက်ခံတဲ့ လက်တဆုပ်စာ နိုင်ငံရေးပါတီတချို့ကို တရားမဝင် ဖြတ်လမ်းနည်းနဲ့ အာဏာရရှိစေဖို့အတွက် နည်းလမ်းမျိုးစုံ အသုံးပြု ဆောင်ရွက်နေတာ၊ အကြမ်းဖက်စစ်ကောင်စီရဲ့ အကြမ်းဖက်မှု လုပ်ငန်းစဉ်တွေမှာ ပူးပေါင်းဆောင်ရွက်တာတွေကို လုပ်ဆောင်ခဲ့ကြောင်း တွေ့ရတယ်လို့ ဆိုပါတယ်။

ပြည်ထောင်စုရွေးကောက်ပွဲကော်မရှင်ရဲ့ လုပ်ဆောင်ချက်တွေဟာ အများပြည်သူအတွင်း ထိတ်လန့်မှုတွေကို ဖြစ်ပေါ်စေဖို့၊ ပြည်တွင်း တရားဝင် နိုင်ငံရေး အဖွဲ့အစည်းတွေကို ဥပဒေနဲ့ မညီတဲ့ လုပ်ရပ်တွေကို အတင်းအကြပ်ပြုလုပ်စေဖို့နဲ့ ဥပဒေနဲ့အညီ ပြုလုပ်ရမှာကို မပြုလုပ်ဘဲ ရှောင်ရှားစေဖို့ ရည်ရွယ်ပြီး လုပ်ဆောင်ခဲ့တာဖြစ်လို့ အကြမ်းဖက်မှုတိုက်ဖျက်ရေးဥပဒေ ပုဒ်မ ၃၊ ပုဒ်မခွဲ(ခ)၊ ပုဒ်မခွဲငယ် (၁၃) နဲ့ ပုဒ်မ ခွဲငယ်(၁၆) တို့မှာ ဖော်ပြထားတဲ့ အကြမ်းဖက်မှုတွကို ကျူးလွန်ကြောင်း စိစစ်တွေ့ ရှိရတယ်လို့ ဆိုပါတယ်။

ပြီးခဲ့တဲ့ ၂၀၂၀ ပြည့်နှစ် ရွေးကောက်ပွဲမှာ ဒေါ်အောင်ဆန်းစုကြည် ဦးဆောင်တဲ့ NLD ပါတီက အပြတ်အသတ် အနိုင်ရရှိခဲ့ပေမဲ့ စစ်တပ်ထောက်ခံတဲ့ ကြံ့ခိုင်ရေးပါတီ အကြီးအကျယ် ရှုံးနိမ့်ခဲ့ပြီးနောက် မဲစာရင်းမှားတယ်လို့ အကြောင်းပြပြီး စစ်တပ်က တရားမဝင် အာဏာသိမ်းလိုက်တာဖြစ်ပါတယ်။

စစ်တပ်အာဏာသိမ်းပြီးနောက် မြန်မာနိုင်ငံရဲ့ ဒီမိုကရေစီစနစ် အဆုံးသတ်သွားခဲ့ပြီး မြန်မာနိုင်ငံအနှံ့အပြားမှာ သန်းနဲ့ချီတဲ့ ပြည်သူတွေက စစ်အာဏာရှင်ဆန့်ကျင်တဲ့အနေနဲ့ ငြိမ်းချမ်းစွာ ဆန္ဒပြခဲ့ကြတာမှာ စစ်တပ်က အကြမ်းဖက် ပစ်ခတ်သတ်ဖြတ် နှိမ်နင်းခဲ့တာဖြစ်ပါတယ်။

အာဏာသိမ်းမှုကို ဆန့်ကျင်တဲ့ တော်လှန်ရေးအင်အားစုတွေက ခုတခါ အကြမ်းဖက် စစ်အုပ်စုက တဖက်သတ်ပြုလုပ်မယ့် အတုအယောင်ရွေးကောက်ပွဲကိုလည်း ပြည်သူတရပ်လုံး ဆန့်ကျင်တိုက်ဖျက်ဖို့ တိုက်တွန်းထားပြီး ပြည်သူတွေအနေနဲ့ စစ်ကောင်စီရဲ့ လူဦရေးစာရင်း ကောက်ယူမှုနဲ့ ရွေးကောက်ပွဲလုပ်ငန်းစဉ်တွေမှာ ပူးပေါင်းဆောင်ရွက်ခြင်းမပြုဖို့နဲ့ ခြိမ်းခြောက်မှုတွေရှိပါက သတင်းပေးပို့ တိုင်ကြားဖို့ တောင်းဆိုထားပါတယ်။

စစ်ကောင်စီကတော့ နိုင်ငံတဝန်းက လူဦးရေစာရင်းတွေကို eID ကွန်ပျူတာဒေတာစနစ်နဲ့ ကောက်ယူနေသလို တဖက်မှာလည်း မမှန်ဝါဒဖြန့် ရုပ်သံသတင်းမီဒီယာတွေဖြစ်တဲ့ မြန်မာ့အသံနဲ့ မြဝတီ ရုပ်မြင်သံကြားတို့ကတဆင့် (E-voting) အီလက်ထရွန်းနစ်နည်းနဲ့ မဲပေးတဲ့စနစ်ကို ပြည်သူလူထုသိအောင် ထုတ်လွှင့်ရှင်းလင်းနေတာကို တွေ့ရပါတယ်။

နိုင်ငံတကာပဋိပက္ခလေ့လာစောင့်ကြည့်အဖွဲ့ (ICG) ကတော့ စစ်ကောင်စီကျင်းပဖို့ စီစဉ်နေတဲ့ ရွေးကောက်ပွဲဟာ မြန်မာနိုင်ငံရဲ့သမိုင်းမှာ သွေးထွက်သံယိုမှု အများဆုံးရွေးကောက်ပွဲဖြစ်လာနိုင်ပြီး ကုလသမဂ္ဂ အပါအဝင် နိုင်ငံတကာက  ဒီရွေးကောက်ပွဲကို လက်မခံ တရားမဝင်ကြောင်း လူသိရှင်ကြားကြေညာဖို့နဲ့ ရွေးကောက်ပွဲ မကျင်းပရေး တားမြစ်ဖို့ တိုက်တွန်းထားပါတယ်။

၂၀၂၀ ရွေးကောက်ပွဲမှာ  အနိုင်ရတဲ့ အမျိုးသားဒီမိုကရေစီအဖွဲ့ချုပ် (NLD) ပါတီနဲ့ အင်အားအကြီးဆုံး တိုင်းရင်းသားပါတီဖြစ်တဲ့ ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီတို့ကတော့ စစ်ကောင်စီ ကျင်းပမယ့် ရွေးကောက်ပွဲကိုရော၊ ရွေးကောက်ပွဲကော်မရှင်ကိုပါ အသိအမှတ်မပြုသလို ပါတီကို ပြန်ပြီး မှတ်ပုံတင်ခြင်းလည်း မရှိပါဘူး။