မြိတ်-တနင်္သာရီ ပြည်ထောင်စုလမ်းမကြီးပေါ်မှာ ဖြတ်သန်းသွားလာနေကြတဲ့ ခရီးသွားပြည်သူတွေအနေနဲ့ အခု မေလ ၁၂ ရက်ကစပြီး ည ၈ နာရီကနေ မနက် ၅ နာရီအထိ ဖြတ်သန်းသွားလာခြင်းမပြုကြဖို့ မြိတ်ပြည်သူ့ကာကွယ်ရေးအဖွဲ့ (ပ.က.ဖ) ကနေ သတိပေး ထုတ်ပြန်ထားပါတယ်။
အဆိုပါ ပြည်ထောင်စုကားလမ်းမကြီးပေါ်မှာ စစ်ကောင်စီတပ်က အရပ်သား ပြည်သူ့ကားတွေကို အသုံးပြုပြီး ရိက္ခာတင်ပို့လာတာရှိသလို ခရီးသည်တင်ကား၊ ကုန်ကားတွေကို အကာအကွယ်ယူပြီး ယာဉ်တန်းသွားလာနေတာတွေ ရှိနေတဲ့အတွက် အခုလို သတိပေး ထုတ်ပြန်ရတာဖြစ်တယ်လို့ ပြောပါတယ်။
မြိတ်ပြည်သူ့ကာကွယ်ရေးအဖွဲ့ (ပ.က.ဖ) ရဲ့ သတင်းနဲ့ ပြန်ကြားရေး တာဝန်ရှိသူကတော့ “ပြည်သူကိုပြောချင်တာက ကျနော်တို့အနေနဲ့က မစ်ရှင်တခု လုပ်တဲ့အခါမှာ အရပ်သားပြည်သူ ထိခိုက်မှုမရှိအောင် လုပ်ဆောင်နေပါတယ်။ ဒါကြောင့် စကစယာဉ်တန်းနဲ့ ခပ်ကွာကွာ လိုက်ပေးပါလို့လည်း အသိပေးလိုပါတယ်” လို့ ပြောပါတယ်။
လက်ရှိ တနင်္သာရီမြို့နယ်အတွင်းမှာ စစ်ကောင်စီဘက်ကနေပြီး စစ်ကြောင်းထိုး တက်လာတာတွေ ရှိနေပေမဲ့လည်း နှစ်ဖက် ထိပ်တိုက်ထိတွေ့မှုတွေကတော့ မရှိသေးဘူးလို့ ပြောပါတယ်။
ပြီးခဲ့တဲ့ရက်ပိုင်းက ပြည်ထောင်စုလမ်းမပေါ်က ဘန်းလမွတ်ကျေးရွာဘက်မှာ စစ်ကောင်စီယာဉ်တန်း မိုင်းဆွဲတိုက်ခိုက်ခံရပြီးနောက် အဲဒီယာဉ်တန်းနဲ့ ကပ်ပါလာတဲ့ ခရီးသည်ကား ၁ စီး မိုင်းစထိမှန်ခဲ့တယ်လို့ သိရပါတယ်။
ဒါ့အပြင် ပြည်ထောင်စုကားလမ်းမကြီးပေါ်မှာ ဆက်လက်ဖြတ်သန်းသွားလာနေကြတဲ့ ခရီးသည်ကားတွေ အနေနဲ့လည်း အမိုးတာလပတ် အုပ်ပြီးတော့ ဖြတ်သန်းသွားလာတာတွေ မလုပ်ကြဖို့နဲ့ ကားမှန်ချပြီး မောင်းနှင်ပေးကြဖို့ကိုလည်း ပြည်သူ့ကာကွယ်ရေးဘက်ကနေ သတိပေးထားပါသေးတယ်။
အဆိုပါ သတိပေးတားမြစ်ထားတဲ့ကြားကနေ ဖြတ်သန်းသွားလာနေပါက ဖြစ်လာမယ့် ထိခိုက်ပျက်စီးမှုတွေကို မြိတ်ပြည်သူ့ကာကွယ်ရေးအဖွဲ့ (ပ.က.ဖ) ကနေ တာဝန်ယူမှာ မဟုတ်ကြောင်းနဲ့ နောက်ထပ် ကြေညာချက် မထုတ်ပြန်ခင်အထိ ပြောင်းလဲသတ်မှတ်သွားမှာ မဟုတ်ကြောင်းကိုလည်း သတိပေး ထုတ်ပြန်ထားပါတယ်။
မြန်မာနိုင်ငံ အရှေ့မြောက် စီးပွားရေးတံခါးပေါက်ရဲ့ အဓိကကုန်သွယ်ရာလမ်းကြောမှာ ဒီဇင်ဘာ ၂၁ ရက်ကစပြီး လမ်းကြောတလျှောက် စစ်ဆေးရေး တင်းကျပ်နေလို့ ကားတွေ ရာချီ ပိတ်ဆို့နေတယ်လို့ ကုန်သည်နဲ့ ကားသမားတွေဆီက သိရပါတယ်။
ယာဉ်မောင်းတဦးက “သီပေါ ကတ္တားမှာလည်း ကားတွေ တော်တော်ပိတ်ထားတယ်။ ရေပူမှာလည်း ပိတ်ထားတယ်။ ကျနော်ဆင်းခဲ့တုန်းက နမ့်ဖတ်ကာစစ်တပ်ရှေ့မှာလည်း ပိတ်တယ်။ ပိတ်ထားတယ်။ ပြီးတော့ ကွတ်ခိုင်မှာလည်း ပိတ်တယ်။ ရေပူလည်း ပိတ်တယ်။ သူတို့ ဘာတွေ ဇာတ်လမ်းရှုပ်နေလဲ မသိဘူး” လို့ ပြောပါတယ်။
၆ ဘီးကနေ တွဲကားအထိ ကုန်တင်ကားတွေအားလုံး ခါလီတွေပါ စစ်ဆေးနေပြီး ဒီဇင်ဘာ ၂၃ ရက် ဒီမနက်မှာတော့ လားရှိုးကတ္တားမှာ အဆင်းကုန်ကားတချို့ကို ဖမ်းဆီးထားပြီး အဆင်းကားတွေကို ပိတ်ထားသလို အတက်ကားတွေကိုလည်း သွားခွင့်မပြုဘူးလို့ ဆိုပါတယ်။
မန္တလေးအနီး ၁၆ မိုင်ဂိတ်မှာ ကားတန်းစီနေတဲ့ ယဉ်မောင်းတဦးက “ညကတည်းက တန်းနေရတာဗျ။ အဆင်းကားတွေစစ်တာ။ ပြောင်းကားတွေဆို အိတ်တွေလှန်ပြီး စစ်နေတာ။ သတင်းရလို့လို့ ပြောတာပဲ” လို့ ပြောပါတယ်။
သတင်းရလို့ဆိုပြီး စစ်ဆေးနေတဲ့အတွက် ကားတွေရာချီ ပိတ်မိစောင့်ဆိုင်းနေကြရကာ အရင်တုန်းကတော့ အခုလိုစစ်ဆေးတာ မရှိဘူးလို့ ဆိုပါတယ်။
ကုန်သည်တဦးကတော့ “ကားဖမ်းခံရတာက တချို့ ဂျူတီမဆောင်သွားတဲ့ကားတွေ ဖြစ်မှာပါ။ တချို့ လောပန်းတွေက ဂျူတီတဝက်၊ ကယ်ရီတဝက် သယ်တာတွေလည်း ရှိတယ်” လို့ ပြောပါတယ်။
ပြည်ထောင်စုလမ်းမတကြောလုံး စစ်ဆေးရေး တင်းကျပ်နေတာတွေက လက်နက်တွေ ပါလာမှာစိုးလို့နဲ့ PDF တွေကို စစ်ချင်တာကြောင့် ဖြစ်တယ်လို့ ဆိုပါတယ်။
“အခုက ပြင်ဦးလွင်နဲ့ မန္တလေးကြားထဲမှာကို ဂိတ်က နှစ်ခု၊ သုံးခု တိုးလာပြီ။ မြန်မာနိုင်ငံ အရမ်းရှုပ်ထွေးသွားပြီ။ ဘယ်လိုမှန်း မသိတော့ဘူး။”
စစ်ဆေးမှုတွေကြောင့် ကြန့်ကြာကာ ကားတွေရာချီ ပိတ်မိ စောင့်ဆိုင်းကြရတာကြောင့် ယာဉ်မောင်းတွေလည်း အဆင်မပြေဘဲ အခက်အခဲတွေ ဖြစ်ကြရတယ်လို့ ဆိုပါတယ်။
ဒါ့အပြင် ဆက်ကြေးဆောင်တဲ့သူတွေကိုလည်း ဖမ်းဆီးမယ်ဆိုတဲ့ သတင်းတွေလည်း ပျံ့နေတာကြောင့် နယ်စပ်ကုန်သည်၊ အုံနာ၊ ကားသမားတွေအနေနဲ့ နှစ်ဖက် ခြိမ်းခြောက် ဖိအားပေးမှုတွေ ရှိနေတာကြောင့် အခက်အခဲဖြစ်ကြရတဲ့အပြင် လုံခြုံရေးကိုလည်း စိုးရိမ်နေကြရတယ်လို့ နယ်စပ်ကုန်သွယ်ရေး အသိုက်အဝန်းကနေ သိရပါတယ်။
