close

ပြည်ထဲရေးဝန်ကြီး

close

January 18, 2023

ပြည်ထဲရေးဝန်ကြီး ဒု-ဗိုလ်ချုပ်ကြီး စိုးထွဋ်နှင့် ရဲချုပ်တို့ စစ်တွေမြို့သို့ ရောက်ရှိနေ

ရခိုင်ပြည်နယ်၊ စစ်တွေမြို့ကို အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် မလာရောက်မီ တရက်အလို ဇန်နဝါရီ ၁၇ ရက် နေ့လယ်က ပြည်ထဲရေးဝန်ကြီး ဒု-ဗိုလ်ချုပ်ကြီး စိုးထွဋ် နဲ့ ပြည်ထဲရေးဒုဝန်ကြီးလည်းဖြစ် ရဲတပ်ဖွဲ့ချုပ် ရဲချုပ် ဒု-ဗိုလ်ချုပ်ကြီး သန်းလှိုင်တို့ ကြိုရောက်နေတယ်လို့ ပြည်နယ်ကောင်စီ တာဝန်ရှိသူတဦးက အတည်ပြု ပြောပါတယ်။

“မင်းအောင်လှိုင်က ၁၉ ရက်နေ့ စစ်တွေကိုလာမယ်လို့ သိရတယ်။ သူမရောက်မီ ပြည်ထဲရေးဝန်ကြီးနဲ့ ရဲချုပ်တို့က ဒီနေ့ နေ့လယ်ပိုင်းမှာ ကြိုရောက်နေကြတာ” လို့ ပြောပါတယ်။

ဗိုလ်ချုပ်မှူးကြီး မင်းအောင်လှိုင်ဟာ ၂၀၂၀ ရွေးကောက်ပွဲ မတိုင်ခင်မှာပဲ ဒုတိယဗိုလ်ချုပ်ကြီးကျော်ဆွေကို ပြည်ထဲရေးဝန်ကြီးနေရာကနေ ဖယ်ရှားလိုက်ပြီး ဒုတိယဗိုလ်ချုပ်ကြီးစိုးထွဋ်နဲ့ အစားထိုးခဲ့တာပါ။

ဖေဖော်ဝါရီ ၁ ရက်မှာ အာဏာသိမ်းပြီး ဖေဖော်ဝါရီ ၂ ရက်နေ့မှာ ဒုတိယဗိုလ်ချုပ်ကြီး သန်းလှိုင်ကို ပြည်ထဲရေးဒုဝန်ကြီးနဲ့ ရဲချုပ်တာဝန်ကိုပါ ပူးတွဲထမ်းဆောင်စေခိုင်းထားခဲ့တဲ့ လူယုံတွေလည်း ဖြစ်ပါတယ်။

စစ်တွေမြို့ကို စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့ ထိုင်းစစ်ဦးစီးချုပ် ကိုယ်စားလှယ်အဖွဲ့တို့ ဇန်နဝါရီ ၁၉ ရက်နေ့ လာရောက်ကြမှာဖြစ်တဲ့အတွက် စစ်တွေမြို့ရှိ လမ်းဘေးစျေးဆိုင်တွေကို ဖြိုဖျက်ပြီး စစ်တွေလမ်းမကြီးကို အပူတပြင်း နိုင်လွန်ကတ္တရာ ခင်းနေကာ မြို့ပေါ်မှာ လုံခြုံရေးအပြည့် ချထားကြောင်း ဒေသခံတွေက ပြောပါတယ်။

“လောကနန္ဒာပုထိုးတော်ကြီးကို လာရောက်ဖူးမြော်မယ် ထင်တယ်ဗျ။ ဆေးရောင်တွေ အသစ်သုတ်ထားတယ်။ ဘုရားထဲက အဆောင်တွေမှာလည်း စစ်သားရာချီ ချထားတယ်။ လမ်းတွေကိုတော့ ကတ္တရာခင်းလိုခင်း၊ မျဥ်းကြားတွေ ဆွဲလိုဆွဲ အပူတပြင်း လုပ်ဆောင်နေကြတာ တွေ့နေရတယ်။”

စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့အဖွဲ့ဟာ စစ်တွေကတဆင့် သံတွဲ၊ ကျောက်ဖြူနဲ့ ထိုင်းနိုင်ငံရဲ့ နည်းပညာနဲ့ တည်ဆောက်မယ့် ဂွမြို့နယ်ရှိ လေအားလျှပ်စစ် ထုတ်လုပ်ရရှိနိုင်မှုကို သွားရောက်ကြမယ်လို့ အစိုးရအဖွဲ့နဲ့ နီးစပ်သူတွေဆီက သိရပါတယ်။

ဒါ့အပြင် ရက္ခိုင့်တပ်တော် (အေအေ) ခေါင်းဆောင်တွေနဲ့ စစ်ခေါင်းဆောင်တို့ ဆွေးနွေးဖို့ လာရောက်တာ ဖြစ်နိုင်ကြောင်း ဒေသတွင်း သတင်းတွေ ထွက်ပေါ်နေပါတယ်။

2 mins Ago

July 5, 2020

ဖားကန့် မြေပြိုမှု ထပ်မဖြစ်ရန် ရဲတပ်ဖွဲ့အင်အားဖြည့်ဆောင်ရွက်မည်ဟု ပြည်ထဲရေးဝန်ကြီး ပြော

ဖားကန့် မြေပြိုမှုဖြစ်စဉ်မျိုး နောက်ထပ်မဖြစ်ပွားအောင် အုပ်ချုပ်ရေးအာဏာပိုင်တွေဘက်က အမိန့်ထုတ်ပြန်ဖို့ လိုအပ်ပြီး လုံခြုံရေးပိုင်းကို ရဲတပ်ဖွဲ့က အားဖြည့်ဆောင်ရွက်သွားမယ်လို့ ပြည်ထဲရေးဝန်ကြီးက ပြောကြားလိုက်ပါတယ်။  သမ္မတအမိန့်နဲ့ ဖွဲ့ထားတဲ့ စုံစမ်းစစ်ဆေးရေးအဖွဲ့က ကချင်ပြည်နယ်၊ ဖားကန့်မြို့နယ်၊ ဝှေခါကျေးရွာမှာ မြေပြိုကျလို့ ရေမဆေးကျောက်သမား ၁၇၀ ကျော် သေဆုံးခဲ့မှုနဲ့ ပတ်သက်လို့ ဇူလိုင် ၅ ရက်နေ့မှာ ကွင်းဆင်းစစ်ဆေးခဲ့ပါတယ်။  ဝှေခါကျေးရွာက မြေပြိုကျမှုအတွင်း လူအများအပြား သေဆုံးရတာဟာ မိုးတွင်းကာလ အန္တရာယ်ရှိလို့ တားမြစ်ထားတဲ့ကြားကနေ ရေမဆေးကျောက်သမားတွေက ဝင်ရောက်တူးဖော်ချိန်မှာ အခုလို သေဆုံးမှုတွေ ဖြစ်ခဲ့တာလို့ စုံစမ်းစစ်ဆေးရေးအဖွဲ့ ဥက္ကဋ္ဌက ပြောပါတယ်။ ဖားကန့်ဒေသ ကျောက်မျက်လုပ်ကွက်တွေအတွင်း မြေပြိုကျလို့ လူသေဆုံးမှုတွေ ခဏခဏ ဖြစ်လေ့ရှိတဲ့အပြင် မူးယစ်ဆေးဝါးကိစ္စ၊ တရားမဝင် ကျောက်တူးဖော်မှုတွေ တရားဥပဒေစိုးမိုးမှု မရှိတာတွေကို အရက်ဖက် အဖွဲ့အစည်းတွေကလည်း ထောက်ပြဝေဖန်မှုတွေ ရှိနေပါတယ်။  အခုဝှေခါကျေးရွာ မြေပြိုကျမှုမှာလည်း အစိုးရမှာ တာဝန်အရှိဆုံးလို့ ပြောဆိုမှုတွေ ရှိခဲ့ပြီးနောက် အစိုးရအဖွဲ့ဝင်တွေ ပါဝင်တဲ့ ကော်မတီကို ဖွဲ့စည်း စုံစမ်းစေခဲ့ပြီး ကွင်းဆင်းစစ်ဆေးစေခဲ့ပါတယ်။  ဖားကန့်မြို့နယ် အုပ်ချုပ်ရေးမှူးကတော့ အဲ့ဒီကော်မတီရဲ့ ခရီးစဉ်မှာ ဖားကန့်ဒေသအတွက် လုံခြုံရေးကို ရဲနဲ့ တပ်ဘက်က ပူးပေါင်းဆောင်ရွက်ပေးဖို့ တင်ပြခဲ့ပါတယ်။  ပြည်ထဲရေးဝန်ကြီးကတော့ ဒီဖားကန့်ဒေသမှာ အခုလို မြေပြိုမှုကြောင့် လူသေဆုံးမှုတွေ နောက်ထပ် မဖြစ်ပွားဖို့ အမိန့်ညွှန်ကြားချက်တွေဟာ အုပ်ချုပ်ရေးအာဏာပိုင်တွေက ဦးဆောင် ဆောင်ရွက်ရမှာဖြစ်ပြီး ရဲနဲ့တပ်ဘက်က လုံခြုံရေးပိုင်းကိုတော့ အားဖြည့်ဆောင်ရွက်သွားမယ်လို့ ပြောပါတယ်။ ဒီခရီးစဉ်အတွင်းမှာ လူကယ်ပြန်ဝန်ကြီးက ဖားကန့် မြေပြိုမှုဖြစ်စဉ်မှာ သေဆုံး၊ ဒဏ်ရာရသူတွေအတွက် ကျပ်သိန်း ၉၇၀ ကျော် ထောက်ပံ့ပေးအပ်ခဲ့ပြီး ကယ်ဆယ်ရေး ဆောင်ရွက်ပေးခဲ့တဲ့ လူမှုအဖွဲ့တွေကိုလည်း ကျပ်သိန်း ၁၁၀ ထောက်ပံ့ခဲ့ပါတယ်။  မြေပြိုမှုကြောင့် လူပေါင်း ၁၇၄ ယောက် သေဆုံးပြီး ၅၄ ယောက် ဒဏ်ရာရခဲ့ပါတယ်။ ဇော်မိုးထက်
3 years Ago
Up