ပြည်သူ့ကာကွယ်ရေးတပ်ဖွဲ့ (PDF) တွေ လက်နက်ယူပြီးလာရင် ဆုကြေးငွေပေးမယ်ဆိုပြီး စစ်ကောင်စီက အပြင်ပေါက်ဈေးထက် အဆမတန်လျော့နည်းတဲ့ ဈေးနှုန်းတွေနဲ့ စည်းရုံးနေပါတယ်။

စစ်ကောင်စီ သတင်းထုတ်ပြန်ရေးအဖွဲ့ရဲ့ မေ ၉ ရက်စွဲနဲ့ ကြေညာချက်မှာ PDF အပါအဝင် အဖွဲ့အစည်းအမျိုးမျိုး အမည်ခံပြီး လက်နက်ကိုင်ဆန့်ကျင်နေတဲ့ အဖွဲ့အစည်းတွေထဲ ရောက်နေသူတွေကို ဥပဒေဘောင်ထဲ ပြန်ဝင်ရောက်ဖို့ ဖိတ်ခေါ်တယ်လို့ ဆိုပါတယ်။

အဲလို ဝင်ရောက်လာရင် လိုအပ်တဲ့ ကူညီပံ့ပိုးတာတွေ ပေးမှာဖြစ်ပြီး လက်နက်ခဲယမ်း ပါရှိလာသူတွေကို ဆုကြေးငွေ ထောက်ပံ့ပေးသွားမယ်လို့ ဆိုပါတယ်။

နှုန်းထားတွေအနေနဲ့ ရိုင်ဖယ်အုပ်စုဝင်သေနတ် ၁ လက်ပါရင်ကျပ် သိန်း ၅၀၊ ပစ္စတိုအုပ်စုဝင်သေနတ် ၁ လက်ပါရင် ကျပ်သိန်း ၂၀၊ ပြောင်းချောသေနတ် ၁ လက်ပါရင် ကျပ် သိန်း ၃၀၊ စိန်ပြောင်း၊ လောင်ချာ၊ အာပီဂျီလို လက်နက်တွေ ၁ လက်ပါရင် ၇၅ သိန်း၊ လက်လုပ်ပြောင်းချောသေနတ်၊ လက်လုပ်စိန်ပြောင်း၊ လက်လုပ်သေနတ် ၁ လက်ပါရင် ၅ သိန်း၊ လက်လုပ်မိုင်းတွေ လက်ပစ်ဗုံးတွေပါရင် ၃ သိန်း၊ စကားပြောစက်လို တခြား အသုံးအဆောင်ပစ္စည်းတွေဆိုရင် ၂ သိန်း၊ ဗုံးဖောက်ခွဲရေးအတွက် သုံးနိုင်တဲ့ ဒရုန်း ၁ စင်းပါရင် ကျပ် သိန်း ၅၀ ပေးမယ်လို့ ဆိုပါတယ်။

ဒါပေမဲ့ ဒီနှုန်းတွေဟာ လက်ရှိပြင်ပပေါက်ဈေးထက် အဆမတန်လျော့တဲ့နှုန်းတွေ ဖြစ်တယ်လို့ တော်လှန်ရေးမှာပါဝင်နေသူ တချို့က ပြောပါတယ်။

ယောဒေသ ဒရုန်းနဲ့လက်နက်နည်းပညာတပ်ခွဲ တာဝန်ရှိသူတယောက်က “တိုက်ခိုက်ရေးသုံး ဒရုန်းက သိန်း ၇၀ ကျော်မှ စပြီး ပွဲကလို့ရမယ်။ ကျနော့်ဆီက ဒရုန်းတွေဆို ၁၀၀ ကျော်တွေချည်းပဲ။ လက်လုပ်မိုင်းကတော့ အနိမ့်ဆုံး သုံးသောင်းက စတာပဲ။ ကြီးရင် ကြီးသလို ပိုကုန်တာပေါ့။ လက်ပစ်မိုင်း အစစ်က တလုံး ၃ သိန်းခွဲ" လို့ ပြောပါတယ်။

လက်ရှိမှာ တော်လှန်ရေးတပ်ဖွဲ့တော်တော်များများဟာ ကိုယ်တိုင်လုပ်တဲ့ လက်နက်တွေနဲ့ မှောင်ခိုဈေးကွက်ကနေ လက်နက်တွေ ဝယ်ယူသုံးစွဲနေရကြရတာပါ။ လက်နက်တွေဟာ နဂိုကလည်း ဈေးမြင့်လေ့ရှိပြီးမှောင်ခိုဈေးကွက်မှာတော့ ပိုပြီးပေးရတတ်ပါတယ်။

တပ်ဖွဲ့တခုရဲ့ တာဝန်ရှိသူတယောက်က “ရိုင်ဖယ်တလက်ကို အနိမ့်ဆုံး သိန်း ၁၂၀ ရှိတယ်။ ပစ္စတိုတွေက အနိမ့်ဆုံး ၃၅ သိန်းဈေး။ ပြောင်းချောက စက်ရုံထုတ် ဂျောက်ဂျက်က ၆၅ သိန်း အနည်းဆုံးပဲ” လို့ ပြောပါတယ်။

စစ်ကောင်စီလက်အောက် ပြန်လည်ဝင်ရောက်လာသူတွေအနေနဲ့ လူသတ်မှု၊ မုဒိမ်းမှု၊ သူတပါးအပေါ် ထိခိုက်နစ်နာစေမှု စတဲ့ ပြစ်မှုတခုခု ကျူးလွန်ထားရင် တရားရုံးမှာ အမှုရင်ဆိုင် ဖြေရှင်းရမှာဖြစ်ပြီး ပြစ်မှုအတိုင်းအတာအပေါ် မူတည်ပြီး ဥပဒေကြောင်းအရ လိုအပ်တဲ့ ဖြေလျှော့တာတွေကို ပြုလုပ်ပေးသွားမယ်လို့လည်း စစ်ကောင်စီ ကြေညာချက်မှာ ဖော်ပြထားပါတယ်။

စစ်ကိုင်းတိုင်းအထက်ပိုင်း ကသာမြို့နယ်ကို ပြည်သူ့ကာကွယ်ရေးတပ်ဖွဲ့ဝင်တွေက ၈၀ ရာခိုင်နှုန်း ထိန်းချုပ်ထားနိုင်ပြီး အုပ်ချုပ်ရေးယန္တရားတွေကို ဖော်ဆောင်နေတယ်လို့ ကသာမြို့နယ် ပ.က.ဖ တာဝန်ခံတဦးက ပြောပါတယ်။

ကသာမြို့နယ်မှာ စစ်ကောင်စီတပ်ဖွဲ့တွေက မြို့ပေါ်နဲ့ မြို့နဲ့နီးတဲ့ ကျေးရွာတချို့တွေသာ ထိန်းချုပ်ထားနိုင်တဲ့ အခြေအနေ ဖြစ်တယ်လို့ ပြောပါတယ်။

“ကျနော်တို့ ကသာမြို့နယ်ရဲ့ ထိန်းချုပ်မှု အနေအထားအရဆိုရင် မြို့ပေါ်နဲ့ မြို့နဲ့နည်းနည်းလေး နီးကပ်တဲ့နေရာ၊ ပြီးရင် အခုလိုမျိုး စကစရဲ့ သင်္ဘောတက်တဲ့အချိန်မှာ ခဏတဖြုတ် စစ်ကြောင်းထိုးတဲ့ နေရာလေးတွေကလွဲရင် ကျန်တာတွေက ကျနော်တို့နေရာတွေပဲ၊ အဲဒီလိုမျိုးရှိတာဆိုတော့ ရာခိုင်နှုန်းနဲ့ပြောရင် ၈၀ ရာခိုင်နှုန်းလောက် ထိန်းချုပ်နိုင်လောက်ပြီ” လို့ ကသာမြို့နယ် ပ.က.ဖ တာဝန်ရှိသူက ပြောပါတယ်။

ကသာမြို့ပေါ်ကို ရပ်ကွက် (၁၀) ရပ်ကွက်နဲ့ ဖွဲ့စည်းထားပြီး မြို့အနီးတဝိုက်မှာ ကျေးရွာ ၁၀ ရွာလောက်ရှိပြီးတော့ မြို့ပေါ်ရပ်ကွက်တွေနဲ့ ကျေးရွာပေါင်း ၁၀ ရွာကျော်ကိုတော့ ထိန်းချုပ်လို့ မရသေးဘူးလို့ ဆိုပါတယ်။

ကသာမြို့နယ်မှာ ကျေးရွာပေါင်း ၁၄၀ ကျော်ရှိတဲ့ အထဲက ကျေးရွာပေါင်း ၁၃၀ ဝန်းကျင်ကို ပြည်သူ့ကာကွယ်ရေးတပ်ဖွဲ့တွေနဲ့ အုပ်ချုပ်ရေးအဖွဲ့တွေက ထိန်းချုပ်ထားနိင်တဲ့ အခြေအနေဖြစ်သလို စကစ လက်အောက်မှာတော့ မြို့ပေါ်ရပ်ကွက်တွေနဲ့ မြို့အနီးက‌ ကျေးရွာတွေကိုသာ ထိန်းချုပ်ထားနိုင်တဲ့ အခြေအနေ ဖြစ်တယ်လို့ သိရပါတယ်။

ကသာမြို့နယ်ထဲမှာ NUG ရဲ့ လမ်းညွန်မှုနဲ့အညီ အုပ်ချုပ်ရေး၊ ပညာရေး၊ ကျန်းမာရေး၊ သယံဇာတ အပါအဝင် တရားရေးကိုပါ ဖော်ဆောင်နေတယ်လို့ သိရပါတယ်။

ကသာမြို့နယ်ထဲမှာ EAO တွေ၊ PDFတွေနဲ့ မြို့နယ်၊ကျေးရွာ ပ.က.ဖ တွေ အတူပူးပေါင်းပြီး စစ်ကောင်စီတပ်ဖွဲ့တွေရဲ့ အင်းအားကို ဖြည်းဖြည်းချင်း ဖဲ့ချနေသလို မြို့နယ်၊ ကျေးရွာ ပ.က.ဖတွေ အတွက်တော့ မောင်းပြန်ရိုင်ဖယ်တွေနဲ့ လက်နက်ငယ်တွေ လိုအပ်နေတယ်လို့ ပ.က.ဖ တာဝန်ခံက ပြောပါတယ်။

“စစ်ကောင်စီက သင်္ဘောလုံခြုံရေးပဲတက်တက်၊ နယ်မြေရှင်းလင်းရေးပဲ ထွက်ထွက် ထွက်လာသမျှကို ကျနော်တို့ရဲ့ ကာကွယ်ရေးအဖွဲ့တွေ ကျနော်တို့ PDFတွေ၊ EAO အဖွဲ့တွေတော့ တနည်းမဟုတ် တနည်းတော့ နှောင့်ယှက်တိုက်ခိုက်ပြီးတော့ အမှည့်ချွေတော့ ချွေနေတာပဲ၊ ပြီးတော့ ပ.က.ဖ တွေအတွက် မောင်းပြန်လက်နက်တွေ အများကြီးလိုအပ်နေတယ်၊ လက်နက်ခဲယမ်းတွေ အခက်အခဲအများကြီးရှိတယ်၊ တိုက်ပွဲဝင်မယ့်သူတွေ အများကြီးရှိတယ်၊ RPG တို့လို့ ပဒိန်တို့လို အဲလောက်ပေါ့နော်။ လက်နက်ငယ်တွေ၊ လက်နက်အလတ်တွေ များများထောက်ပံ့ပေးနိုင်ရင်တော့ ကျနော်တို့ တော်လှန်ရေးက မြန်မြန်ပြီးသွားမယ်ပေါ့” လို့ ပြောပါတယ်။

လက်ရှိအချိန် ကသာမြို့နယ် ဧရာဝတီအရှေ့ဘက်ခြမ်းမှာ သင်္ဘောလုံခြုံရေးအတွက် ရွှေဂူမြို့နယ်ဘက်က စစ်ကောင်စီတပ်အင်းအားအ များအပြား ဆင်းလာသလို့ အနောက်ဘက်ခြမ်းကိုလည်း စစ်ကောင်စီတပ်အင်အား အများအပြားရောက်ရှိနေတယ်လို့ သိရပါတယ်။

ကသာမြို့နယ်ထဲမှာ တရားစီးရင်ရေးယန္တရား လွန်ခဲ့တဲ့ ၄ လလောက်ကတည်းက စတင်လည်ပတ်နေခဲ့ပြီး အောက်တိုဘာ ၁၅ ရက်နေ့က အမျိုးသားညီညွတ်ရေးအစိုးရရဲ့ ကသာမြို့နယ် မြို့နယ်တရားရုံးကို စတင်ဖွင့်လှစ်ခဲ့ပါသေးတယ်။