တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့နယ်ထဲမှာ ဧပြီ ၁၆ ရက် ညနေပိုင်းက PDF ပြည်သူ့ကာကွယ်ရေးတပ်ဖွဲ့ဝင်တွေနဲ့ စစ်ကောင်စီလက်အောက်ခံ ပြည်သူ့စစ်အဖွဲ့ ပစ်ခတ်မှုဖြစ်ပွါးပြီး ရွာသား ၃၀၀ ကျော်လောက် ထိုင်းနိုင်ငံဘက်ကို စက်လှေတွေနဲ့ ထွက်ပြေးတိမ်းရှောင်လာကြပါတယ်။
မနေ့ ညနေပိုင်းက PDF တပ်ဖွဲ့ဝင် ၁၀ ဦးလောက်ဟာ ခမောက်ကြီးမြို့နယ် ဆိတ်ဖူးကျေးရွာထဲကို မော်တော်ဆိုင်ကယ် ၅ စီးနဲ့ ဝင်ရောက်လာပြီး ကျေးရွာပြည်သူ့စစ်ခေါင်းဆောင်နဲ့ လက်ထောက်တို့ကို ဝင်ရောက်ပစ်ခတ်ရာမှာ နှစ်ဘက်အပြန်အလှန်ပစ်ခတ်မှုရှိခဲ့တယ်လို့ Siamrath ထိုင်းသတင်းမှာ ဖော်ပြပါတယ်။
အဆိုပါပစ်ခတ်မှုကြောင့် ပြည်သူ့စစ်ခေါင်းဆောင် ကျော်ဝင်းနဲ့ ဒုခေါင်းဆောင် မြင့်အောင် တို့ သေဆုံးပြီး ရွာသား ၃၀၀ ကျော်ဟာ ကရပူရီမြစ်ကို လှေနဲ့ကူးဖြတ်ကာ ထိုင်းဘက်ခြမ်း ရနောင်းခရိုင်၊ ကရပူရီမြို့နယ်၊ နမ့်ကျစ်အုပ်စု၊ ဘန့်ဟိုထနွန်ရွာဘက်ကို ထွက်ပြေးလာကြတယ်လို့ ဆိုပါတယ်။
ထွက်ပြေးတိမ်းရှောင်လာတဲ့ ရွာသားတွေကို ကရပူရီမြို့နယ်အုပ်ချုပ်ရေးမှူးရဲ့ ညွှန်ကြားချက်အရ သက်ဆိုင်ရာ တာဝန်ရှိသူတွေက ယာယီတဲထိုးကာ နေရာချထားပေးပြီး ကရပူရီမြို့နေပြည်သူများက အစာရေစာ ချက်ပြုတ်ကျွေးမွေးကြတယ်လို့ ထိုင်းသတင်းမှာ ဖော်ပြထားပါတယ်။
ဧပြီ ၁၆ ရက် သင်္ကြန်အတက်နေ့ ညနေ ၄ နာရီမှာ ခမောက်ကြီးမြို့ ဆိတ်ဖူးရွာနေ ပြည်သူ့စစ်ခေါင်းဆောင် ကျော်ဝင်းနဲ့ ဒုခေါင်းဆောင် မြင့်အောင်ကို ကော့သောင်း ပကဖက ရှင်းလင်းခဲ့တယ်လို့ တနင်္သာရီ ကာကွယ်ရေးအဖွဲ့က ထုတ်ပြန်ထားပါတယ်။
အဆိုပါပြည်သူ့စစ်အဖွဲ့ကနေ အေကေ ၄၇ အမျိုးအစား သေနတ် ၂ လက်၊ ကျည် ၁၁၉ တောင့်၊ ၉မမ ပစ္စတို ၁ လက်၊ ကျည်ကာ ၄ ထည်၊ ဆုံလည် ဂက်စ်သေနတ် ၁ လက် ၊ ကျည်ဘောက် ၅ ခုနဲ့ ဓားတွေ သိမ်းဆည်းရရှိခဲ့ပါတယ်။
ကော့သောင်းမြို့နယ်ရှိ စစ်ကောင်စီတပ်ဖွဲ့ဝင်တွေ၊ ပျူစောထီးတွေအနေနဲ့ လူထုနဲ့အတူ အမြန်ဆုံးပူးပေါင်းဖို့နဲ့ မပေါင်းရင် ဆက်လက်ချေမှုန်းသွားမယ်လို့ တနင်္သာရီ PDF က သတိပေးထုတ်ပြန်ထားပါတယ်။
PHOTO -Siamrath/kHAODOD
တရုတ်-မြန်မာနယ်စပ်၊ မူဆယ်မြို့ သိန်းသန်းချီကားကြီးကွင်း အဝင်ဂိတ်နားမှာ မတ်လ ၃၁ ရက် ဒီနေ့ နေ့လယ် ၁၁ နာရီခွဲလောက်က ပစ်ခတ်မှုဖြစ်ပွားလို့ အရပ်သား ၂ ဦး ထိခိုက်ဒဏ်ရာရရှိပြီး ပြည်သူ့စစ် ၂ ဦး သေဆုံးသွားကြောင်း ဒေသခံပြည်သူတွေဆီက သိရပါတယ်။
“အဝင်ဝနားမှာ ဖြစ်သွားတာ ဟုတ်တယ်။ ပြည်သူ ၂ ယောက် ဒဏ်ရာရတယ်” လို့ ဒေသခံတဦးက ပြောပါတယ်။
ဒဏ်ရာရသူ ၂ ဦးထဲက အမျိုးသား ၁ ယောက် လည်ပင်းထိ ဒဏ်ရာရပြီး လားရှိုးဆေးရုံ ပို့ဆောင်ရကြောင်း ဒေသခံ လူမှုကူညီရေးအသင်း တာဝန်ရှိသူဆီက သိရပါတယ်။
“လားရှိုးပို့ရတဲ့တယောက်က စိုးရိမ်ရတာပေါ့။ လည်ပင်းထဲမှာ ကျည်ဆန်ရှိနေတာပေါ့။”
အမည်မသိအဖွဲ့က ကားဝင်းထဲကနေ ကားသေးအဖြူနဲ့ထွက်လာကာ ပစ်ခတ်သွားတာဖြစ်ပြီး ဂိတ်စောင့်နေတဲ့ လုံထန်ပြည်သူ့စစ် ၂ ယောက်တော့ ပွဲချင်းပြီး သေဆုံးသွားတယ်လို့ မျက်မြင် ဒေသခံ ၁ ဦးကလည်း ပြောပါတယ်။
“ခုနကပဲ အဲ့မှာစောင့်တဲ့ ပြည်သူ့စစ် ၂ ယောက်ကို ပစ်သတ်သွားပြီး သေနတ်လည်း ယူသွားတယ်။ ဘယ်သူတွေ လာပစ်သွားတယ်ဆိုတာတော့ အတိအကျ မသိရဘူး” လို့ သူက ပြောပါတယ်။
အဲဒီ မူဆယ် သိန်းသန်းချီကားကွင်းမှာရှိတဲ့ ကမ္ဘောဇဘဏ်ခွဲ ၃ မှာလည်း မနှစ် စက်တင်ဘာ ၁၃ ရက်နေ့မှာ အမည်မသိအဖွဲ့က လာရောက်ပစ်ခတ်ခဲ့လို့ ပြည်သူ့စစ် ၂ ဦးနဲ့ အရပ်သား အမျိုးသား ၁ ဦး သေဆုံးကာ ၁ ဦး ထိခိုက်ဒဏ်ရာ ရရှိခဲ့ပါတယ်။
အာဏာသိမ်းပြီးနောက်ပိုင်း မူဆယ်မြို့မှာ လောင်းကစားဝိုင်းတွေလည်း ပိုမိုများပြားလာကာ မကြာခဏ ပစ်ခတ်မှုဖြစ်ပွားသလို ခိုးမှု၊ လုယက်မှု၊ ဓားပြတိုက်မှု၊ ပြန်ပေးဆွဲမှုတွေလည်း ပိုမိုဖြစ်ပွားလာနေပါတယ်။
ပိုင်ရှင်မဲ့အလောင်းတွေလည်း မကြာခဏ တွေ့နေရပြီး စစ်ကောင်စီတပ်၊ စစ်ကောင်စီတပ်လက်အောက်ခံ ပြည်သူ့စစ်အဖွဲ့ ၂၀ ခန့်နဲ့ တိုင်းရင်းသား လက်နက်ကိုင်တွေဖြစ်တဲ့ TNLA, SSPP/SSA, KIA, PDF တွေ သွားလာလှုပ်ရှားတဲ့မြို့ ဖြစ်ပြီး တခြား အုပ်စုဖွဲ့ လက်နက်ကိုင်တဲ့ လူတွေလည်းရှိကြောင်း သိရပါတယ်။
