ပြည်သူလူထုရဲ့ ထောက်ပံ့မှုနဲ့ M4-Carbine လက်နက်အမျိုးအစား တချို့ကို ဝယ်ယူနိုင်ခဲ့တယ်လို့ ကလေး PDF တပ်ရင်း-၆ တာဝန်ခံ ကိုဂျပန်ကြီးက ဧပြီ ၂၈ ရက်မှာ ပြောပါတယ်။
"လက်နက်ဝယ်ယူရတာ အင်မတန်ခက်ခဲပါတယ်။ ကျည်ဈေးရော၊ လက်နက်ဈေးရော အဆမတန်ပေးရတဲ့ ပြဿနာက အကြီးဆုံးပေါ့။ လက်နက်သယ်ယူရတဲ့ လမ်းကြောင်းကတော့ ကျပ်နေတာပါပဲ။ သယ်ယူပေးကြတဲ့သူတွေကို ကျေးဇူးတင်ပါတယ်။"
နောက်ထပ်လည်း ပြည်တွင်း၊ ပြည်ပက လှူတဲ့ငွေတွေကို ကိုယ်ကျိုးအတွက် သုံးမှာမဟုတ်ဘဲ စစ်အာဏာရှင် တာ်လှန်ရေးအတွက် အသုံးပြုသွားမှာဖြစ်ကြောင်းနဲ့ ကလေး PDF ရဲဘော်တွေ အားလုံးကိုလည်း ကျေးဇူးတင်ကြောင်း ကိုဂျပန်ကြီးက ဆက်ပြောပါတယ်။
လက်နက်ဖိုး ကြွေးကျန်နဲ့ ထပ်ပြီးမှာထားတဲ့ လက်နက်တွေလည်း ရဖို့ရှိတာကြောင့် ပြည်သူတွေ ဆက်ပြီး ကူညီပေးစေချင်တယ်လို့လည်း ကိုဂျပန်ကြီးက အကူအညီတောင်းပါတယ်။
“တိုက်ပွဲဖော်ဆောင်တာတွေ ပိုမိုတိုးပြီး လုပ်ဆောင်နိုင်အောင် လေ့ကျင့်မှုတွေရော ကွန်မန်ဒိုသင်တန်းတွေ ဆက်တိုက်လုပ်ဆောင်နေပါတယ်။ အဓိကကတော့ လက်နက် မပြည့်စုံသေးတဲ့ အနေအထား ကြားထဲကနေ ရတဲ့နည်းလမ်းပေါင်းစုံနဲ့ အာဏာရှင်ကို ခုခံတော်လှန်နေဆဲပါ” လို့ သူက ဆိုပါတယ်။
လတ်တလော ကလေးမြို့နယ်အတွင်း စစ်ကောင်စီတပ်နဲ့ ကလေး PDF တို့ကြား တိုက်ပွဲပြင်းထန်နေတာကြောင့် ကလေး-ဂန့်ဂေါလမ်းကို မသုံးဖို့ ဒေသခံတွေကို ကလေး PDF က သတိပေးထားပါတယ်။
မိဘပြည်သူတွေရဲ့ ထောက်ပံ့မှုနဲ့ လက်နက်တွေ ရရှိခဲ့ကြောင်းနဲ့ ၄၀ မမနဲ့ ၈၀ မမ လက်နက်တွေ စမ်းသပ်အောင်မြင်ကြောင်း ပုလဲပြည်သူ့ကာကွယ်ရေးတပ် PDF က ထုတ်ပြန်ပါတယ်။
ပုလဲမြို့နယ်ကတော့ စစ်ကိုင်းတိုင်းဒေသကြီး၊ ယင်းမာပင်ခရိုင်ထဲမှာ တည်ရှိကာ လတ်တ လော တိုက်ပွဲတွေ အများဆုံး ဖြစ်ပွားနေတဲ့ ဒေသတခု ဖြစ်ကာ အကြမ်းဖက်စစ်တပ်ကို ခုခံချေမှုန်းဖို့ လက်နက်တွေ ထပ်ပြီးတော့ လိုအပ်နေဆဲဖြစ်တယ်လို့ ဆိုပါတယ်။
လက်ရှိမှာတော့ မြန်မာနိုင်ငံမှာ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်း ဖက်ဖိနှိပ်ဖမ်းဆီး တိုက်ခိုက်သတ် ဖြတ်နေမှုတွေကို ပြည်သူလူထုတရပ်လုံးက အသက်ရှင် သန်ရေးအတွက် ခုခံကာကွယ်ပိုင်ခွင့်အရ၊ ပြည်သူ့ခုခံစစ်ကို ဆင်နွှဲနေကြတာပါ။
နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီး တိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီတည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။
လူထုသပိတ်တိုက်ပွဲတွေအနေနဲ့ မနေ့က တရက်တည်းမှာ တနင်္သာရီတိုင်း၊ မန္တလေးတိုင်းနဲ့ မကွေးတိုင်းတွေမှာ ၁ ကြိမ်စီ၊ ကချင်ပြည်နယ်နဲ့ ရန်ကုန်တိုင်းတို့မှာ ၂ ကြိမ်စီ၊ စစ်ကိုင်း တိုင်းမှာ ၁၃ ကြိမ်နဲ့ အများဆုံးဖြစ်ပွားခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ထားပါတယ်။
ဒါ့အပြင် မြန်မာပြည်တွင်း ပြည်သူ့ခုခံတော်လှန်စစ် အရှိန်မြှင့်ဖြစ်ပွားနေပြီး ပြီးခဲ့တဲ့ ဖေဖော်ဝါရီ ၇ ရက်ကနေ မတ် ၆ ရက်အထိ တလအတွင်း စစ်ကောင်စီတပ်ဖွဲ့ဝင် ၂၀၉၅ ယောက် သေဆုံးခဲ့တယ်လို့လည်း NUG က ထုတ် ပြန်ထားပါတယ်။
