မကွေးတိုင်း၊ မြိုင်မြို့နယ်မှာ ဧပြီ ၃ ရက် မနက်ပိုင်းက စစ်ကောင်စီတပ်သား ၃ ယောက်နဲ့ ရဲ ၄ ယောက် လက်နက်ခဲယမ်းအပြည့်အစုံနဲ့ ပြည်သူ့ရင်ခွင် ခိုလှုံခဲ့ကြတယ်လို့ မြိုင်ပကဖကနေ သိရပါတယ်။

ပခုက္ကူအခြေစိုက် တပ်မ ၁၀၁ က စစ်ကောင်စီတပ်သား ၃ ယောက်နဲ့ မကွေးတိုင်းရဲတပ်ဖွဲ့က ရဲ ၄ ယောက် စစ်အာဏာရှင်လက်အောက်မှာ တာဝန်ထမ်းဆောင်လိုစိတ် မရှိတော့လို့ ဧပြီ ၃ ရက် မနက် ၉ နာရီ ၄၀ မိနစ်မှာ လက်နက်ခဲယမ်း အပြည့်အစုံနဲ့ ပြည်သူ့ရင်ခွင် ခိုလှုံခဲ့ကြတယ်လို့ မြိုင်ပကဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

အဲဒီစစ်ကောင်စီတပ်သားတွေနဲ့ ရဲတွေမှာ MA3 သေနတ် ၃ လက်၊ G3 သေနတ် ၂ လက်၊ G4 သေနတ် ၂ လက်၊ ကျည်ဘောက်တွေ၊ ကျည်ဆန် ၄၁၁ တောင့်နဲ့အတူ မြိုင်ပကဖကို ဆက်သွယ်ပြီး ပြည်သူ့ရင်ခွင် ခိုဝင်လာကြတာလို့ ဆိုပါတယ်။

အဲဒီပြည်သူ့စစ်သားတွေနဲ့ ရဲတွေကို လက်နက်ခဲယမ်း အပြည့်အစုံ ယူဆောင်လာတာကြောင့် တယောက်ကို ငွေကျပ် ၁၀၆ သိန်း၊ စုစုပေါင်း ၇၄၂ သိန်းကျပ် ချီးမြှင့်ခဲ့တယ်လို့ ပြောပါတယ်။

နောက်နောင်မှာလည်း စစ်အာဏာရှင်လက်အောက်ကနေ ရုန်းထွက်ပြီး လက်နက်ခဲယမ်း အပြည့်အစုံနဲ့ အလင်းဝင်လာမယ့် စစ်ကောင်စီတပ်သားတွေနဲ့ ရဲတပ်ဖွဲ့ဝင်တွေကို ထိုက်သင့်တဲ့ ဂုဏ်ပြုဆုငွေ ချီးမြှင့်ပြီး လွတ်မြောက်နယ်မြေကို ပို့ဆောင်ပေးမယ်လို့ ပြောပါတယ်။

စစ်အာဏာသိမ်းပြီးနောက် စစ်ကောင်စီတပ်ကို အာဏာဖီဆန်ပြီး ပြည်သူ့ရင်ခွင် ခိုလှုံလာတဲ့ စစ်သားနဲ့ ရဲတပ်ဖွဲ့ဝင် အရေအတွက် သောင်းနဲ့ချီရှိနေပြီ ဖြစ်ပါတယ်။

လက်ရှိမှာတော့ ပြည်သူလူထုကို အကြမ်းဖက်သတ်ဖြတ်နေတဲ့ စစ်ကောင်စီရဲ့ လုပ်ရပ်တွေကို မလိုလား မနှစ်မြို့ကြတဲ့ အရာရှိ၊ စစ်သည်တွေ၊ ရဲတပ်သားတွေဟာ သူတို့ရဲ့ ဂုဏ်သိက္ခာ၊ မျိုးဆက်တွေရဲ့ ဂုဏ်သိက္ခာကို ပြန်လည်ရယူဖို့ စစ်အာဏာရှင်ရဲ့ လက်ကိုင်တုတ်အဖြစ်က ရုန်းထွက်ပြီး ပြည်သူ့ဘက် ကူးပြောင်းရပ်တည်လာတာ တဖြည်းဖြည်း များပြားလာနေတာပါ။

တပ်မတော်ကို အလွဲသုံးစားပြုလုပ်နေတဲ့ လက်တဆုပ်စာ စစ်ဗိုလ်ချုပ်တစုရဲ့ လက်ကိုင်တုတ် ခါးပိုက်ဆောင်တပ်အဖြစ်မှ ရုန်းထွက်ပြီး ပြည်သူ့ရင်ခွင် အမြန်ဆုံးခိုဝင်ကြဖို့ တပ်မတော်သားတွေ၊ ရဲတပ်သားတွေကို အမျိုးသားညီညွတ်ရေးအစိုးရ (NUG) က တိုက်တွန်း နှိုးဆော်ထားပါတယ်။

ဒါ့အပြင် အင်အားကြီး တိုင်းရင်းသား လက်နက်ကိုင်အဖွဲ့တွေဖြစ်ကြတဲ့ ကချင်လွတ်မြောက်ရေးတပ်မတော် (ကေအိုင်အေ) နဲ့ ကရင်အမျိုးသားအစည်းအရုံး (ကေအန်ယူ) တို့လို အဖွဲ့အစည်းတွေကလည်း စစ်အာဏာရှင်ဆန့်ကျင်ကာ ပူးပေါင်းလိုတဲ့ ရှေ့တန်းရောက် မြန်မာ့တပ်မတော်သားတွေ၊ ရဲတပ်သားတွေကို လက်ကမ်းကြိုဆိုနေကြပါတယ်။

စစ်ကိုင်းတိုင်း ယင်းမာပင်ခရိုင် ယင်းမာပင်မြို့နယ်မှာ စစ်ကောင်စီကိုကျောခိုင်းစွန့်ခွာပြီး ပြည်သူ့ရင်ခွင်ခိုလှုံလာတဲ့ CDM စစ်သားကို ဆုကြေးငွေထောက်ပံ့ပေးအပ်ခဲ့တယ်လို့ အမိမြေ တော်လှန်ရေးတပ်ဖွဲ့ဝင်ရဲဘော်တွေက ပြောပါတယ်။

အမိမြေ တော်လှန်ရေးတပ်ဖွဲ့ထံ CDM ဝင်ရောက်လာတဲ့ စစ်ကောင်စီတပ်သားဟာ ဘန့်ဘွေးရွာမ(ဒေသခေါ် ပျူစောထီးရွာ)မှာ တပ်စွဲနေထိုင် တာဝန်ထမ်းဆောင်နေတဲ့ အနောက်မြောက်တိုင်းစစ်ဌာနချုပ်မှ တပ်ကြပ်ကြီးစာရေး မင်းသူ(ကိုယ်ပိုင်နံပါတ် ၃၄၅၁၇၁) ဖြစ်တယ်လို့ ဆိုပါတယ်။

တပ်ကြပ်ကြီး မင်းသူဟာ စက်တင်ဘာ ၁၀ ရက်နေ့က MA2 လက်နက် ၁ လက်၊ ကျည်ဘောက် ၄ ခုနဲ့ ကျည်ဆန် ၁၁၇ တောင့်နဲ့အတူ ပြည်သူ့ရင်ခွင်ခိုလှုံလာတာဖြစ်ပြီး ထောက်ပံ့ဆုကြေးငွေ သိန်း ၈၀ ပေးအပ်ချီးမြှင့်ခဲ့တယ်လို့ အမိမြေတပ်ဖွဲ့မှ ရဲဘော်မင်းကိုက ပြောပါတယ်။ 

‘"ကျနော်တို့မှာ သူ့ကိုထောက်ပံ့ပေးနိုင်ဖို့ ရန်ပုံငွေတပြားမှမရှိသေးဘူး။ အဲဒီကာလမျိုးမှာ ကျနော်တို့ ဘာလုပ်ရလဲဆိုရင် ပြည်သူ့ရင်ခွင်ကိုခိုလှုံလာတဲ့ စစ်သားကောင်းတယောက်ဖြစ်လို့ ထောက်ပံ့ကြေးပေးနိုင်အောင် ကျနော်တို့ရဲဘော်တွေရဲ့ ပစ္စည်းတချို့ကိုပေါင်နှံပြီးတော့ ထောက်ပံ့ကြေးပေးနိုင်အောင် သိန်း ၈၀ ကို စီစဥ်ခဲ့ရတာ။”

တပ်ကြပ်ကြီး မင်းသူဟာ စစ်ကောင်စီတပ်က အပြစ်မဲ့ပြည်သူတွေကို ဖမ်းဆီးနှိပ်စက်တာ၊ သတ်ဖြတ်တာ၊ မုဒိမ်းကျင့်တာတွေ ပြုလုပ်နေတာတွေကို လက်မခံနိုင်တာကြောင့် အခုလို လက်နက်နဲ့အတူ CDM ပြလုပ်လာတာလို့ ဆိုပါတယ်။ 

အခုတိုက်ပွဲဟာ နောက်ဆုံးပိတ်တိုက်ပွဲဖြစ်တာကြောင့် အသက်ပေးပြီး တော်လှန်သွားမှာဖြစ်ပြီး ပြည်သူ့ရင်ကို ခိုလှုံလာမယ့် စစ်သားကောင်းတွေကို နွေးနွေးထွေထွး ကြိုဆိုမယ်လို့လည်း အမိမြေ ရဲဘော်မင်းကိုက ပြောပါတယ်။