စစ်ကောင်စီတပ်များ လုံခြုံရေးယူထားတဲ့ ဒဂုံမြို့နယ် ပြည်သူ့ရင်ပြင်ရှိ ရေကစားမဏ္ဍပ်အနီးမှာ ဒီနေ့ မနက်ကိုးနာရီက ဗုံးပေါက်ကွဲခဲ့တယ်လို့ မြို့ခံတွေက ပြောပါတယ်။

ပြည်သူရင်ပြင်ရှိ ရေကစားမဏ္ဏပ်ရဲ့အနီးမှာ ဒီနေ့မနက် ၉ နာရီက ဗုံးပေါက်ခဲ့တာလို့ အဌားယာဥ်မောင်းတဦးက ဒီဗွီဘီကို ပြောပါတယ်။

"ပေါက်တာက ပြည်သူ့ရင်ပြင်က မဏ္ဍပ်နားမှာပေါက်တာ၊ အဲ့နားမှာ စစ်သားတွေရော ရဲတွေရော အများကြီးပဲ၊ ဗုံးပေါက်ပြီးတော့ ထပ်ရှာကြသေးတယ်။" 

ဒဂုံမြို့နယ်ပြည်သူ့ရင်ပြင်ရှိ ရေကစားမဏ္ဍပ်အနီး ဗုံးပေါက်ကွဲပြီး စစ်ကောင်စီတပ်သားအချို့ ထိခိုက်ဒဏ်ရာရခဲ့ပေမဲ့ ထပ်မံသတင်းမကြားရဘူးလို့ အုပ်ချုပ်ရေးနဲ့နီးစပ်သူတဦးက ဒီဗွီဘီ ကိုပြောပါတယ်။

"အရင်ဆုံးကြားတာ ဗုံးပေါက်တယ် ထိခိုက်မှုရှိတယ်၊ နောက်တော့ စစ်တပ်ကပြောတယ် ဒဏ်ရာရတဲ့မရှိဘူး လက်လုပ်ဗုံးတွေ့လို့ ဖောက်တာတဲ့။" 

မနေ့ကလည်း စမ်းချောင်းမြို့မရဲစခန်း နဲ့ ပြည်သူ့ရင်ပြင်မှာ ဗုံးပေါက်ခဲ့တဲ့အတွက် စစ်ကောင်စီတပ်နဲ့ ရဲတွေကို သေချာစစ်ဆေးဖို့ တိုင်းစစ်ဌာနချုပ်က ဖိအားပေးထားတယ်လို့ သူက ပြောပါတယ်။

လတ်တလောမှာ စစ်ကောင်စီတပ်နဲ့ရဲတွေက ပြည်သူ့ရင်ပြင်အတွင်း လာရောက်သူတွေကို စစ်ဆေးမှုတွေ ပြုလုပ်ခဲ့တယ်လို့ သွားရောက်ခဲ့သူတွေဆီက သိရပါတယ်။ 

ရန်ကုန်သင်္ကြန်ကို စည်ကားအောင်ကျင်းပဖို့ ပြင်ဆင်နေတဲ့ စစ်ကောင်စီဟာ ရန်ကုန်တိုင်းအစိုးရ မဏ္ဍပ်ကို အရင်လို ပြည်လမ်းမဘေးမှာ မဆောက်တော့ဘဲ လုံခြုံရေးအရ ပြည်သူ့ရင်ပြင်ထဲမှာ ပြောင်းရွှေ့ဆောက်လုပ်နေတယ်လို့ မြို့ခံတွေထံက သိရပါတယ်။

စစ်ကောင်စီရဲ့ ရန်ကုန်တိုင်းအစိုးရ သင်္ကြန်ရေကစားမဏ္ဍပ်ကို ပြီးခဲ့တဲ့နှစ်က ပြည်သူ့ရင်ပြင်နဲ့ တိုင်းအစိုးရအဖွဲ့ရုံးရှေ့ ပြည်လမ်းမမှာ ဆောက်လုပ်ခဲ့ပြီး စည်ကားတယ်ဆိုတဲ့ ပုံဖော်ဖို့အတွက် ဖြတ်သွားဖြတ်လာ ကားတွေကို မဏ္ဍပ်ရှေ့ကနေ အတင်းတန်းစီ ဖြတ်မောင်းခိုင်းတာမျိုးတွေ ရှိခဲ့ပါတယ်။

ဒီနှစ်မှာတော့ ပြည်သူ့ရင်ပြင်ဝင်းထဲမှာဘဲ ဌာနအလိုက် ရေကစားမဏ္ဍပ်တွေနဲ့ ဖျော်ဖြေရေးမဏ္ဍပ်ကို ဆောက်လုပ်နေတာဖြစ်ပြီး လုံခြုံရေးအရ အပြင်လူဝင်ရောက်တာကိုပါ ကန့်သတ်နိုင်ခြေရှိတယ်လို့ မျက်မြင်တွေ့ရှိသူတွေက ဆိုပါတယ်။

ရန်ကုန်တိုင်းအစိုးရရုံးက သတင်းအရင်းအမြစ်တစ်ဦးက “သူ့လူနဲ့သူပဲ လုပ်မယ့်သဘောပဲ။ လုံခြုံရေးအရ အဝင်အထွက် အတော်တင်းကျပ်မယ့်သဘော ရှိတယ်။ ဌာနဆိုင်ရာ ဝန်ထမ်းတွေကို မလာမဖြစ်လာဖို့လည်း ဌာနအလိုက် ညွှန်ကြားတာရှိတယ်။ အခု မဏ္ဍပ်ဆောက်နေတာတောင် လုံခြုံရေးတွေက စောင့်ပေးနေရတယ်”လို့ ပြောပါတယ်။

ဒါ့အပြင် မြို့တော်ခန်းမရှေ့က မြို့တော်ဝန်မဏ္ဍပ်နဲ့ ဘားလမ်းက လမ်းလျှောက်သင်္ကြန် ပြုလုပ်မယ့် နေရာတဝိုက်ကိုလည်း အတားအဆီးတွေ ပြုလုပ်ထားကာ လုံခြုံရေး တင်းတင်းကျပ်ကျပ်နဲ့ လုပ်မယ့်သဘောရှိတယ်လို့လည်း မြို့ခံတွေကဆိုပါတယ်။

ရန်ကုန်မြို့ခံတစ်ဦးက “မနှစ်ကလည်း သူတို့ငါးထောင်းစားအုပ်စုနဲ့ ဌာနဆိုင်ရာဝန်ထမ်းတွေပဲ သွားကြတာ။ ပြည်သူတွေက စိတ်ကိုမဝင်စားဘူး။ ဒီနှစ်လည်း မနှစ်ကလိုပဲ ပုံဖော်ဦးမှာပဲ”လို့ ပြောပါတယ်။

စစ်ကောင်စီလက်အောက်ခံ ရန်ကုန်မြို့တော်စည်ပင်သာယာရေးကော်မတီက ပုဂ္ဂလိက ရေကစားမဏ္ဍပ် ဆောက်လုပ်ခွင့်လျှောက်ထားတာကို မတ်လ ၃၁ ရက်အထိ လက်ခံမယ်လို့ ကြေညာထားပါတယ်။

အခုအချိန်အထိတော့ ပုဂ္ဂလိကရေကစားမဏ္ဍပ် ဆောက်လုပ်ခွင့်လျှောက်ထားသူ ရှိ၊ မရှိကို သတင်းထုတ်ပြန်တာမရှိသလို လက်ရှိအချိန်အထိ  ပုဂ္ဂလိကရေကစားမဏ္ဍပ် ဆောက်လုပ်တာ မတွေ့ရသေးပါဘူး။