မြေပြင်တိုက်ပွဲတွေ ပြင်းထန်နေရာ စစ်ကိုင်းတိုင်းဒေသကြီးမြို့နယ် ၃ ခုဖြစ်တဲ့ ကလေး၊ တမူးနဲ့ ဝက်လက်မြို့နယ်တွေမှာ မြို့နယ် ပြည်သူ့ရဲတပ်ဖွဲ့တွေ ဖွဲ့စည်းလိုက်ပြီဖြစ်တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။
စက်တင်ဘာ ၁ ရက် ဒီကနေ့ရက်စွဲနဲ့ ထုတ်ပြန်ချက်မှာတော့ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန ပြည်ထောင်စုဝန်ကြီး ဦးလွင်ကိုလတ် လက်မှတ်ရေးထိုး ထုတ်ပြန်ထားတာဖြစ်ပြီး ခုလိုဖွဲ့စည်းလိုက်တာဟာ ၂၀၂၂ ခုနှစ် ပြည်သူ့ရဲတပ်ဖွဲ့ဥပဒေပုဒ်မ ၁၄ (ခ) အရ ဖွဲ့စည်းလိုက်တာဖြစ်တယ်လို့ ဆိုပါတယ်။
ဒါ့အပြင် NUG အစိုးရရဲ့ အထူးစစ်ဆင်ရေးတပ်ဖွဲ့ ဖွဲ့စည်းခဲ့တာ ပြီးခဲ့တဲ့ ဇူလိုင် ၁၉ ရက်က ၁ နှစ်ပြည့်လာခဲ့ပြီဖြစ်ပြီး အထူးကွန်မန်ဒို၊ စနိုက်ပါသမားတွေနဲ့ ဖွဲ့စည်းထားတယ်လို့ ထုတ်ပြန်ခဲ့ပါသေးတယ်။
အဆိုပါ အထူးစစ်ဆင်ရေးတပ်ဖွဲ့ SPECIAL OPERATION FORCE (S.O.F) ဟာ NUG အစိုးရ၊ ပြည်ထဲရေးနှင့် လူဝင်မှုကြီးကြပ်ရေး ဝန်ကြီးဌာနရဲ့ အထူးတိုက်ခိုက်ရေးနဲ့ ချေမှုန်းရေး လက်ရင်းတပ်ဖွဲ့ဖြစ်ကာ တပ်ဖွဲ့ကို တပ်မဟာ ၆၊ တပ်ရင်း ၁၈ နယ်မြေထဲမှာ စတင်လေ့ကျင့်သင်ကြားထားတဲ့ အထူးကွန်မန်ဒိုနဲ့ အထူးစနိုက်ပါသမား ၄၄ ယောက်ကို အခြေတည်ပြီး စတင်ဖွဲ့စည်းခဲ့တာလို့ ဆိုပါတယ်။
ပထမဆုံး အထူးသင်တန်းဆင်းချိန်မှာတော့ တပ်ဖွဲ့ဝင်အင်အား အေယာက် ၁၇၀ ရှိခဲ့ပြီး ဆက်လက်ပြီးတော့ အထူးသင်တန်းတွေကို သင်တန်းတဖြတ် လူအယောက် ၅၀ ထက်မပိုဘဲ စုဆောင်းလေ့ကျင့် သင်ကြားနေတာလို့ သိရပါတယ်။
လေ့ကျင့်သင်ကြားပြီးတဲ့ တပ်ဖွဲ့ဝင်တွေကိုတော့ တောင်ပိုင်းစစ်ဒေသအတွင်းရှိ ရန်ကုန်၊ ဧရာဝတီ၊ မွန် မြို့ပြစစ်ဆင်ရေးလုပ်ငန်းတွေမှာ တာဝန်ပေး ဆောင်ရွက်စေခဲ့ပြီး ကျေးလက်စစ်ဆင်ရေးအနေနဲ့ တနင်္သာရီနဲ့ ကရင်ပြည်နယ် တပ်မဟာအသီးသီးက ရှိရင်းစွဲ စစ်ကြောင်းတွေမှာလည်း ပူးပေါင်းတပ်ဖွဲ့ဝင်တွေအနေနဲ့ တာဝန်ပေး ဆောင်ရွက်နေတယ်လို့ NUG အစိုးရ ထုတ်ပြန်ချက်မှာ ဖော်ပြပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။
ဒါ့အပြင် ပြည်သူ့ခုခံတွန်းလှန်စစ် ၁ နှစ်တာ ကာလအတွင်း အကြမ်းဖက်စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော်ထိ ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ထုတ်ပြန်ပါတယ်။
အမျိုးသားညီညွတ်ရေးအစိုးရ (NUG) ကတော့ စစ်ကောင်စီရဲ့ အဆိုးဆုံး အကြမ်းဖက်တာ ခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည် အထက်ပိုင်းလမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။
စစ်ကောင်စီကျူးလွန်ခဲ့တဲ့ အကြမ်းဖက်ရာဇဝတ်မှုတွေ၊ စစ်ရာဇဝတ်မှုတွေကို အရေးယူ အပြစ်ပေးနိုင်ဖို့ ပြည်သူ့ရဲတပ်ဖွဲ့ကို ဖွဲ့စည်းလိုက်ကြောင်း အမျိုးသားညီညွတ်ရေးအစိုးရ (NUG) က ဇွန်လ ၇ ရက် ဒီမနက်က ထုတ်ပြန်ကြေညာလိုက်ပါတယ်။
ပြည်သူတရပ်လုံး ယုံကြည်လက်ခံတဲ့ ရဲတပ်ဖွဲ့အဖြစ် စတင်အခြေပြုပုံဖော်ပြီး ပြည်သူလူထုအတွက် တရားဥပဒေနဲ့အညီ ဝန်ဆောင်မှုပေးတဲ့ ရဲတပ်ဖွဲ့ဖြစ်စေဖို့ “ပြည်သူ့ရဲတပ်ဖွဲ့ဥပဒေ”နဲ့ အညီ ပြည်သူ့ရဲတပ်ဖွဲ့ကို ဖွဲ့စည်းလိုက်တာလို့ နိုင်ငံတော်ယာယီသမ္မတ ဒူဝါလရှီးလ လက်မှတ်ရေးထိုးထုတ်ပြန်တဲ့ ကြေညာချက်မှာဖော်ပြပါတယ်။
အမျိုးသားညီညွတ်ရေးအစိုးရဟာ အကြမ်းဖက်စစ်ကောင်စီရဲ့ ပြည်သူလူထုအပေါ် ကျူးလွန်တဲ့ အကြမ်းဖက်ရာဇဝတ်မှုတွေ၊ စစ်ရာဇဝတ်မှုတွေ၊ လူ့အခွင့်အရေးချိုးဖောက်မှုတွေနဲ့ ပတ်သက်လို့ တာဝန်ရှိသူတွေကို တရားဥပဒေနဲ့အညီ အရေးယူအပြစ်ပေးနိုင်ဖို့၊ ကြားကာလ တရားဥပဒေစိုးမိုးရေးကို ဖော်ဆောင်နိုင်ဖို့၊ ဒုစရိုက်မှုတွေနဲ့ တရားဥပဒေမဲ့ ပြုကျင့်သူတွေကို ပြည်သူလူထုနဲ့ ပူးပေါင်း တားဆီးဖို့ ရည်ရွယ်ဖွဲ့စည်းတာလို့လည်းဆိုပါတယ်။
ပြည်သူ့ရဲတပ်ဖွဲ့ကို ဘယ်သူ ဦးဆောင်ပြီး အင်အားဘယ်လောက်နဲ့ ဖွဲ့စည်းတယ်၊ အသစ်ဖွဲ့စည်းလိုက်တဲ့ ပြည်သူ့ရဲတပ်ဖွဲ့ဝင်တွေဟာ ဘယ်မှာတာဝန်စပြီး ထမ်းဆောင်မယ် ဆိုတာကိုတော့ အသေးစိတ် မသိရသေးပါဘူး။
ကရင်နဲ့ ကရင်နီ(ကယား) ပြည်နယ်အပါအဝင် တိုင်းရင်းသားဒေသတချို့မှာ ဒေသအလိုက် ရဲတပ်ဖွဲ့တွေ ဖွဲ့စည်းဆောင်ရွက်နေတာရှိသလို အာဏာဖီဆန်ထွက်ပြေးလာကြတဲ့ CDM ရဲတပ်ဖွဲ့ဝင်တွေ အများအပြားလည်း လွတ်မြောက်နယ်မြေတွေမှာ ရောက်ရှိနေကြတာရှိပါတယ်။
အမျိုးသားညီညွတ်ရေးအစိုးရ (NUG)၊ ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာနအနေနဲ့ လက်နက်ကိုင်ရဲတပ်ဖွဲ့ဝင်တွေကို ပြည်သူ့ရင်ခွင်ခိုလှုံလာစေဖို့ ဆွဲဆောင်စည်းရုံး လုပ်ကိုင်နေပြီး၊ ပြည်သူဘက် ရပ်တည်လာတဲ့ သူရဲကောင်း CDM ပြည်သူ့ရဲတပ်ဖွဲ့ဝင်တွေကို သက်ဆိုင်ရာ ဝန်ကြီးဌာနတွေ၊ ပြည်သူ့ရင်ခွင်နဲ့ တခြားလူမှုအဖွဲ့အစည်းတွေနဲ့ ချိတ်ဆက်ကာ လူမှုရေးအထောက်အပံ့တွေကို အတတ်နိုင်ဆုံး ကူညီထောက်ပံ့ပေးနေတယ်လို့ ဆိုပါတယ်။
တကယ်လို့ ပြည်သူ့ရင်ခွင်ကို မခိုလှုံဘဲ အကြမ်းဖက်စစ်ကောင်စီနဲ့ ပူးပေါင်းလုပ်ကိုင်နေသေးရင်တော့ ပြည်သူအပေါ် အကြမ်းဖက်ရာ သက်ရောက်နေတယ်လို့ မှတ်ယူထားပြီး အကြမ်းဖက်သမားမှန်သမျှကို ဘယ်ချိန်ဘယ်ကာလ ဖြစ်ဖြစ် တစ်ဦး တစ်ယောက်မျှ လွတ်မြောက်မှုမရှိစေဘဲ၊ တရားဥပဒေနဲ့အညီ အပြစ်ပေး အရေးယူခံရမှာ ဖြစ်ကြောင်းလည်း NUG အစိုးရ၊ ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာနက သတိပေးထားပါတယ်။
လက်ရှိမှာတော့ ပြည်သူလူထုကို အကြမ်းဖက်သတ်ဖြတ်နေတဲ့ စစ်ကောင်စီရဲ့ လုပ်ရပ်တွေကို မလိုလား မနှစ်မြို့ကြတဲ့ အရာရှိ၊ စစ်သည်တွေ၊ ရဲတပ်သားတွေဟာ သူတို့ရဲ့ ဂုဏ်သိက္ခာ၊ မျိုးဆက်တွေရဲ့ ဂုဏ်သိက္ခာကို ပြန်လည်ရယူဖို့ စစ်အာဏာရှင်ရဲ့ လက်ကိုင်တုတ်အဖြစ်က ရုန်းထွက်ပြီး ပြည်သူ့ဘက် ကူးပြောင်းရပ်တည်လာတာ တဖြည်းဖြည်း များပြားလာနေပါတယ်။
ဒါ့အပြင် NUG အစိုးရ တည်ထောင်ပြီး ၁ နှစ်တာကာလအတွင်းမှာ ပြည်သူ့ကာကွယ်ရေးတပ်မတော် တပ်ရင်း၊ တပ်ဖွဲ့ပေါင်း ၂၅၇ ရင်းကို ဖွဲ့စည်းတည်ထောင်နိုင်ခဲ့ပြီး ဖြစ်ကာ မြို့နယ်အခြေပြု ပြည်သူ့ကာကွယ်ရေးအဖွဲ့ (ပကဖ) တွေကို လည်း မြို့နယ်ပေါင်း ၂၅၀ မှာ စနစ်တကျ ဖွဲ့စည်းနိုင်ခဲ့ပြီးဖြစ်တယ်လို့ ဆိုပါတယ်။
ဒါ့အပြင် ဒေသအခြေစိုက် ကာကွယ်ရေးအဖွဲ့တွေ၊ မြို့ပြပြောက်ကျားအဖွဲ့တွေ ၄၀၀ ကျော်နဲ့လည်း ဟန်ချက်ညီစွာ တိုက်ပွဲဖော်ဆောင်ဖို့ ချိတ်ဆက်နိုင်ခဲ့ပြီးဖြစ်တယ်လို့ NUG က ထုတ်ပြန်ထားပါတယ်။
မြန်မာနိုင်ငံတဝန်းမှာ အကြမ်းဖက်စစ်အုပ်စုက မတရားအာဏာသိမ်းယူထားတဲ့ကာလဟာ တနှစ်ကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ ပညာရေး၊ ကျန်းမာရေး၊ လူမှုရေး ကဏ္ဍတွေအသီးသီးမှာ အဘက်ဘက်က ကျဆင်းနေခဲ့ပြီး တရားဥပဒေစိုးမိုးရေး ယိုယွင်းပျက်စီးကာ ဒုစရိုက်မှုတွေ၊ မူးယစ်ဆေးမှုနဲ့ လောင်းကစားမှုတွေလည်း နိုင်ငံတဝန်း တိုးပွားလာနေပါတယ်။
