ရန်ကုန်တိုင်း၊ တွံတေးမြို့နယ်မှာ ပြည်သူ ၂ ယောက်ကို စစ်တပ်က ဖမ်းဆီး ပစ်ခတ်သတ်ဖြတ်လိုက်တယ်လို့ ဒေသခံတွေက ပြောပါတယ်။
ဘီခိုရွာက ကိုသက်လွင်ဦးနဲ့ ကိုလူအေးတို့ကို စက်တင်ဘာ ၁၄ ရက် ညနေပိုင်းက စစ်တပ်နဲ့ ရဲတွေက လာရောက်ဖမ်းဆီးတာမှာ တယောက်ကို သေနတ်နဲ့ ပစ်သတ်ခဲ့တာပါ။
“ရွာက စစ်ကောင်စီခန့် အုပ်ကြီးက လူမှုရေးပြဿနာ အရင်က တက်ဖူးတာကို အခု အုပ်ကြီးဖြစ်တော့ PDF ဆိုပြီး စစ်တပ်ကို ခေါ်ဖမ်းခိုင်းတာ။ ကိုသက်လွင်ဦးက ပရဟိတလုပ်တယ်။ သူ့အိမ်ရှေ့ကနေ ဆဲဆိုပြီး အဖမ်းခံဖို့ပြောတော့ အိမ်ရဲ့နောက် ဝါးခြံထဲကို ထွက်ပြေးတာကို လိုက်ပစ်တာ။ ၃ ချက်ထက်မနည်းထိပြီး နေရာမှာပဲ သေဆုံးသွားပါတယ်” လို့ ဒေသခံတယောက်က ပြောပါတယ်။
နောက်ထပ် ပရဟိတလုပ်တဲ့ လူငယ် ကိုလူအေးကိုလည်း ဖမ်းသွားရင်း စက်လှေပေါ်မှာ သတ်လိုက်တယ်လို့ ဆိုပါတယ်။
“ဆေးရုံရင်ခွဲရုံမှာ အလောင်း နှစ်လောင်းရောက်နေတယ်။ ကိုလူအေးကိုတော့ အိမ်ကနေ ဖမ်းသွားတာ။ လမ်းမှာ သတ်ပစ်တာ” လို့ ဒေသခံတယောက်က ပြောပါတယ်။
တွံတေးမြို့ပေါ်ကနေ စက်လှေ ၅ စီးနဲ့ စစ်သား ၁၇ ယောက်၊ ရဲ ၅ ယောက်လာကြတာလို့လည်း ဒေသခံတယောက်က ပြောပါတယ်။
တွံတေးမြို့နယ်က သေဆုံးသွားသူတွေရဲ့ အလောင်းကိုလည်း ဒီနေ့အထိ ပြန်မရသေးဘူးလို့ ပြောပါတယ်။
ဧရာဝတီတိုင်း၊ ရေကြည်မြို့နယ်၊ အသုတ်မြို့မှာ ဇွန် ၁ ရက်ကဖြစ်ပွားခဲ့တဲ့ ဗုံး ၃ လုံး ပေါက်ကွဲမှုနဲ့ ပတ်သက်လို့ စစ်ကောင်စီက အမှတ် ၂ ရပ်ကွက်၊ ကျွန်းတောလမ်းနေ ကိုဇေကြီးဆိုသူ ကွန်ပျူတာ ဆိုင်ပိုင်ရှင်နဲ့ ဆိုင်ဝန်ထမ်း ကိုအောင်ပိုင်တို့ ၂ ဦးကို ဖမ်းဆီးသွားပါတယ်။
ကွန်ပျူတာဆိုင်ပိုင်ရှင် ကိုဇေကြီးကို ဇွန် ၃ ရက် ညပိုင်းက နေအိမ်မှာ ဖမ်းဆီးပြီး ဆိုင်ဝန်ထမ်း ကိုအောင်ပိုင်ကို မနက်ပိုင်းမှာ လာရောက်ဖမ်းဆီးသွားတာလို့ ဒေသခံတွေက ပြောပါတယ်။
"အရပ်ဝတ်တွေ သေနတ်တွေနဲ့လာတာ။ လက်ထိပ်ခတ်ပြီး ခေါ်သွားတယ်။ မနက်ကျတော့ သူ့ဆိုင်ကဝန်ထမ်းကိုအောင်ပိုင်ဆိုတဲ့ ကောင်လေးကိုထပ်လာ ဖမ်းတယ်"လို့ ဒေသခံ တစ်ဦးကပြောပါတယ်။
ကွန်ပျူတာဆိုင်ရှင်နဲ့ ဝန်ထမ်းကို ဖမ်းဆီးတဲ့အပြင် ဆိုင်ထဲမှ ကွန်ပျူတာပစ္စည်းတွေကိုလည်း ဖျက်ဆီးပြီး တချို့ကိုယူဆောင်သွားတယ်လို့ ဆိုပါတယ်။
အသုတ်မြို့မှာ ဇွန် ၁ ရက်က ဗုံးပေါက်ကွဲမှု ၃ ကြိမ်ဖြစ်ပွားခဲ့ပြီးနောက်ပိုင်း စစ်ကောင်စီက တိုက်စွန်းအောက်အင်းကျေးရွာက လူငယ် ၁ ဦး၊ အသုတ်မြို့က ရှေ့နေ ၁ ဦးအပါအဝင်လူ ၄ ဦး ဖမ်းဆီးထားခဲ့ပြီး အခု နောက်ထပ် ၂ ဦး ထပ်မံဖမ်းဆီးတာဖြစ်ပါတယ်။
