ဩစတြေးလျ ရှေးဟောင်းသုတေသီ တဦးနဲ့ ကျောင်းသားတဦး၊ ပါပူဝါနယူးဂီနီ သုတေသီ တဦးတို့ဟာ ပစိဖိတ်ကျွန်းနိုင်ငံ ပါပူအာ နယူးဂီနီရဲ့ ဝေးလံခေါင်သီတဲ့နေရာမှာ လက်နက်ကိုင်လူတစုရဲ့ တစ်ပတ်ကြာ ပြန်ပေးဆွဲ ထိန်းသိမ်းခံထားရအပြီး ဖေဖော်ဝါရီ ၂၆ ရက်က လွတ်မြောက်လာခဲ့ပါတယ်။

Southern Queensland တက္ကသိုလ်ပါမောက္ခ  ဘရိုက်စ် ဘာကာ၊ ပါရဂူတန်း ကျောင်းသား တက်ပ်စီဘေနီနဲ့ ပါပူအာနယူးဂီနီ အမျိုးသားပြတိုက် သုတေသီ ဂျေမီနာ ဟာရိုတို့ကို ပြန်ပေးငွေပေးချေပြီးတဲ့နောက် ပြန်လွှတ်ပေးခဲ့တယ်လို့ သူတို့ ၃ ဦးကို ထိန်းသိမ်းထားတဲ့ မောင့်ထ် ဘိုဆာဗီဒေသက အစိုးရအရာရှိ အယ်လ်ဖွန်ဆေ ဆေးယာခါက ပြောပါတယ်။

အဖွဲ့ဝင် အယောက် ၂၀ လောက်ရှိတဲ့ ပြန်ပေးသမားတွေလက်ထဲမှာ  ဖမ်းဆီးခံထားရသူ အများအပြား ကျန်နေ သေးတယ်လို့လည်း သူက ဆက်ပြောပါတယ်။

စစ်သားတွေဟာ သြစတြေးလျနဲ့  ပါပူဝါနယူးဂီနီ အမျိုးသမီး နှစ်ဦးအတွက် ငွေနဲ့လဲလှယ်ပြီးတာနဲ့ တပြိုင်နက် ဖမ်းထားတဲ့သူတွေက ထွက်ပြေးသွားခဲ့ကြတယ်လို့ ဆေးယာခါက ပြောပါတယ်။

ပါမောက္ခဘာကာရဲ့ အဖွဲ့ဟာ လွန်ခဲ့တဲ့ နှစ်ထောင်ပေါင်းများစွာက သြစတြေးလျနိုင်ငံဆီကို ပထမဆုံးလူသား ရွှေ့ပြောင်း နေထိုင်မှုအတွက် ပါပူဝါနယူးဂီနီနဲ့ ဆက်နွှယ်မှုကို လေ့လာစူးစမ်းနေခဲ့ကြတာပါ။

ဟေလာပြည်နယ်မှာရှိတဲ့ ဘိုဆာဗီဒေသထဲက ဖှိုဂိုမိုင်ယုလို့ ခေါ်တဲ့ ဝေးလံခေါင်သီတဲ့ ရွာဟာ  မီးငြိမ်းတောင် ဖြစ်လုဆဲဆဲ မီးတောင်ရဲ့ အစိတ်အပိုင်းတစ်ခုဖြစ်ပါတယ်။ 

ဖိုဂိုမိုင်ယူကျေးရွာမှာ  ဖေဖော်ဝါရီ ၁၉ ရက်က ဖမ်းဆီးရမိတဲ့ သူတို့လူစုကို တောထဲ (ခြောက်မိုင်) လောက် အဝေးကို ပြန်ပေးသမားတွေက ခေါ်ဆောင်သွားခဲ့တာ ဖြစ်ပါတယ်။

ရခိုင်ပြည်နယ်၊ မောင်တောမြို့ မြို့မတောင်ရပ်ကွက်နေ အသက် ၁၆ နှစ်အရွယ် လူငယ်တယောက်  ဇူလိုင် ၆ ရက်က ပြန်ပေးဆွဲခံခဲ့ရတယ်လို့  ရပ်ကွက် အုပ်ချုပ်ရေးမှူးက ပြောပါတယ်။

ပြန်ပေးဆွဲခံရသူဟာ  မုခ်တော်ခင်ရဲ့သားဖြစ်သူ အသက် ၁၆ နှစ်အရွယ်   အာဖာဖြစ်​ပြီး   အခုလို ပြန်ပေးဆွဲခံရတာနဲ့ ပတ်သက်ပြီးသူ့ရဲ့ မိဘက မောင်တောမြို့မရဲစခန်းမှာ တိုက်ကြားထားပြီး  ရာဇတ်သတ်ကြီးပုဒ်မ ၃၆၅/၃၄၂ နဲ့ အမူဖွင့်လှစ်ထားပါတယ်။

မြို့မတောင်ရပ်ကွက် အုပ်ချုပ်ရေးမှူးက"မနေ့က ညအချိန်မှာ ဖမ်းခေါ်သွားတာပါ။ ငွေရစရာတွေရှိလို့ ဖမ်းသွားတာလား ဘာကြောင်းလဲတော့မသိဘူး။ မြို့မရဲစခန်းမှာတော့ မိဘတွေက အမူဖွင့်ထားတယ်။"လို့ ပြောပါတယ်။

ပြန်ပေးဆွဲအဖွဲ့ကို ရွှေဇားကျေးရွာအုပ်စုမှာ သက်ဆိုင်ရာ နယ်ခြားစောင့်တပ်ဖွဲ့တွေနဲ့ နယ်ထိန်းရဲတပ်ဖွဲ့တွေက လိုက်လံစုံစမ်းနေတယ်လို့  နယ်ခြားစောင့်တပ်ဖွဲဝင်တွေက ပြောပါတယ်။

မောင်တောမြို့နယ်အတွင်း အခုလို ပြန်ပေးဆွဲမှုတွေဟာ မူးယစ်ဆေးဝါးကိစ္စတွေနဲ့ ဆက်နွှယ်နေတယ်လို့  မောင်တောဒေသခံမြို့လူကြီးတယောက်က သုံးသပ်ပြောပါတယ်။

"အဓိကက မူးယစ်ဆေးနဲ့ပတ်သတ်ပြီး ငွေရေးပြဿနာတွေရှိကြမယ်။ မပြေလည်တဲ့အခါ အခုလိုပြန်ပေးဆွဲဖမ်းဆီးပြီး ငွေတောင်းတာတွေရှိလာမယ်။ နောက်အနာဂတ်မှာ ဒီထက် ဆိုးဆိုးရွားရွားဖြစ်လာနိုင်တယ်။”

ဇွန် ၁၆ ရက်ကလည်း  မောင်တောမြို့နယ်တောင်ပိုင်း သင်္ဘေလှ​ကျေးရွာမူလွန်ကျောင်းမှ ပညာရေးဝန်ထမ်း နှစ်ယောက် ပြန်ပွဲဆွဲခံခဲ့ရပြီး ပြန်ပေးသမားတွေတောင်းတဲ့ မြန်မာငွေ သိန်း ၁၀၄၀ သိန်း ပေးပြီးမှ ပြန်လည်လွတ်မြောက်လာခဲ့ပါတယ်။ 

၂၀၂၁ ခုနှစ် သြဂုတ်လကလည်း  မောင်တောမြို့နယ် ပဒင်း(မွတ်ဆလင်)ကျေးရွာမှ ကျေးရွာအုပ်ချုပ်ရေးမှူး မာမွတ်ရှော်ဖီကို အဒူလာကိန်းဓားပြအဖွဲ့က ပြန်ပေးဆွဲသွားပြီး ရက်ပေါင်း၂၀ လောက် ဖမ်းဆီးခံရပြီးနောက် ဘင်္ဂလားငွေ ၃ သိန်းအာမခံနဲ့ စက်တင်ဘာ ၃ ရက်မှာ လွှတ်ပေးခဲ့ပါတယ်။

ထိုအတူ ၂၀၂၁ ခုနှစ် ဇွန်လကလည်း မောင်တောမြို့မှ ပရိဘောဂရောင်းဝယ်ရေးဆိုင်ရှင် သားအဖနှစ်ယောက် ပြန်ပေးဆွဲခံရလို့ ငွေကြေး အမြောက်အမြားပေးပြီးမှ ပြန်လွတ်လာပါတယ်။ 

မောင်တောမြို့နယ်အတွင်း အခုလို ဓားပြမှုနဲ့ ပြန်ပေးမှုတွေ ဆက်တိုက်ဖြစ်နေပေမဲ့ တရားခံတွေကိုတော့ ဒီကနေ့အချိန်အထိ တယောက်မှ ဖမ်းဆီးခံရတာ မရှိသေးပါဘူး။