မစ်ရှီဂန်ပြည်နယ်အုပ်ချုပ်ရေးမှူး ဂရက်ချန်ဝှစ်တ်မာကို ပြန်ပေးဆွဲပြီး ဒုတိယမြောက် အမေရိကန်တော်လှန်ရေးကို စတင်ဖို့ ပူးပေါင်းကြံစည်ကြောင်း စွပ်စွဲခံထားရတဲ့ အမျိုးသားနှစ်ယောက်ကို ခုံသမာဓိအဖွဲ့က သြဂုတ် ၂၃ ရက်မှာ ပြစ်ဒဏ်ချမှတ်ခဲ့ပါတယ်။

ဒါဟာ ဒီအမှုကို တရားစွဲဖို့ ဒုတိယအကြိမ် ကြိုးပမ်းမှုမှာ အမေရိကန်အစိုးရက အောင်ပွဲခံခဲ့တာ ဖြစ်ပါတယ်။

အသက် ၃၉ နှစ်အရွယ် Adam Fox နဲ့ အသက် ၄၆ နှစ်အရွယ် Barry Croft Jr တို့ကို စီရင်ချက်ဟာ လွန်ခဲ့တဲ့ မီရှီဂန်ပြည်နယ် Grand Rapids မှာ ဖက်ဒရယ်တရားသူကြီး တယောက်ကနေ အလားတူအမှုကို တရားစွဲဆိုမှု မှားယွင်းကြောင်း ကြေညာပြီး ၄ လလောက် အကြာမှာ ထွက်ပေါ်လာတာ ဖြစ်ပါတယ်။

ပထမရုံးချိန်းမှာ တခြားတရားခံနှစ်ယောက်မှာ အပြစ်မရှိကြောင်း တွေ့ရှိခဲ့ပါတယ်။

Croft ဟာ ဖောက်ခွဲရေးပစ္စည်းတွေ လက်ဝယ်ထားရှိမှု နောက်ထပ်စွဲချက်မှာလည်း အပြစ်ရှိကြောင်း တွေ့ရှိခဲ့ပါတယ်။

ဒီလုပ်ကြံမှုဟာ ကပ်ရောဂါရဲ့ အစောပိုင်းကာလတွေမှာ ကိုရိုနာဗိုင်းရပ်ပျံ့နှံ့မှုကို ရပ်တန့်ဖို့ ဒီမိုကရက်တစ် အုပ်ချုပ်ရေးမှူးရဲ့ လုပ်ပိုင်ခွင့်တွေကို အဆုံးသတ်စေဖို့ ရည်ရွယ်တာ ဖြစ်ကြောင်း အစိုးရရှေ့နေတွေက အခိုင်အမာ ပြောဆိုထားပါတယ်။

Three Percenters ပြည်သူ့စစ်အဖွဲ့မှ အဖွဲ့ဝင်တွေဖြစ်ကြတဲ့ သူတို့နှစ်ယောက်ဟာ သူတို့စီစဉ်ထားတဲ့ ပြန်ပေးဆွဲမှုကို တရားဥပဒေစိုးမိုးရေးဘက်က တုံ့ပြန်လာရင် ဟန့်တားဖို့ ရည်ရွယ်ထားတဲ့ လူအစုလိုက်အပြုံလိုက် သေစေနိုင်တဲ့ ဖောက်ခွဲရေးပစ္စည်းတွေကို အသုံးပြုဖို့အတွက် ပူးပေါင်းကြံစည်မှုမှာ အပြစ်ရှိကြောင်း တွေ့ရှိခဲ့ရတာပါ။

သူတို့တွေဟာ အုပ်ချုပ်ရေးမှူးကို ပြန်ပေးဆွဲပြီး သူ့ကို ‘ရုံးတင်စစ်ဆေး’ ခြင်းအားဖြင့် ၂၀၂၀ ခုနှစ် နိုဝင်ဘာလမှာ အငြင်းပွားဖွယ်ရာ သမ္မတရွေးကောက်ပွဲ နီးကပ်လာတာနဲ့အမျှ နိုင်ငံကိုလည်း နက်ရှိုင်းမြင်သာနေတဲ့ ပဋိပက္ခထဲကို တွန်းပို့ဖို့ မျှော်လင့်ခဲ့ကြောင်း သူတို့က ပြောပါတယ်။ အခုတော့ ဒီလူတွေဟာ ထောင်တသက်တကျွန်း ကျခံရနိုင်ခြေနဲ့ ရင်ဆိုင်နေရပါတယ်။

နယ်သာလန်နိုင်ငံ၊ အမ်စတာဒမ်မြို့တော်ရဲ့ မြို့လယ်တောင်ပိုင်းက ရင်ပြင်နားမှာရှိတဲ့ Apple ကုန်အမှတ်တံဆိပ် အီလက်ထရောနစ်ပစ္စည်းတွေရောင်းတဲ့ဆိုင်မှာ သေနတ်သမားတယောက်က လူတွေကို ပြန်ပေးဆွဲထားရာက ဖေဖော်ဝါရီ ၂၂ ရက်မှာ လူအတော်များများ ပြန်ထွက်လာနိုင်ခဲ့တယ်လို့ နယ်သာလန်ရဲတွေက ပြောပါတယ်။

အခင်းဖြစ်ရာနေရာကို ရဲတွေက အရံအတားတွေနဲ့ ကာထားပြီး ရင်ပြင်ကိုလည်း ရှင်းလင်းထားပါတယ်။ အိမ်နီးချင်းတွေကိုလည်း အခန်းထဲမှာပဲ နေကြဖို့နဲ့ ကြည့်ဖို့ အပြင်ကို ထွက်မလာဖို့ သတိပေး ထားပါတယ်။

စတိုးဆိုင်အထဲနဲ့ အပြင်ပတ်လည်က အခြေအနေကို လောလောဆယ် အကျယ်တဝင့် ရှင်းမပြချင်သေးဘူးလို့ အမ်စတာဒမ်ရဲတပ်ဖွဲ့က တွစ်တာလူမှုကွန်ရက်ပေါ်မှာ ပြောပါတယ်။

စတိုးဆိုင်ထဲမှာ သေနတ်နဲ့တူတဲ့အရာကို ကိုင်ထားပြီး အနက်ရောင် ခေါင်းစွပ်စွပ်ထားတဲ့ ယောက်ျားတယောက်က နောက်ယောက်ျားတယောက်ကို ဓားစာခံ ဖမ်းထားပုံ ရုပ်ပုံတွေလည်း လူမှုကွန်ရက်မီဒီယာတွေပေါ်မှာ ပျံ့နေပါတယ်။