မန္တလေးမြို့၊ ၇၈ လမ်း ၃၈ လမ်းပေါ်က ရတနာပုံခန်းမမှာ ဇန်နဝါရီ ၂၅ ရက်  မနေ့ည ၈ နာရီဝန်းကျင်က ဗုံးပေါက်ကွဲခဲ့ပြီး စစ်ကောင်စီ လုံခြုံရေး အစောင့်စစ်သား တချို့ ပစ်ခတ်တိုက်ခိုက်ခံခဲ့ရတယ်လို့ ပြောက်ကျားတပ်ဖွဲ့တွေနဲ့ ဒေသခံတွေဆီက သိရပါတယ်။

အနီးနားရပ်ကွက်နေဒေသခံတစ်ဦးက “ပထမက ဗုံးပေါက်ကွဲသံအကျယ်ကြီးကြားတာ။ ကြားတာနဲ့ ထင်လိုက်တယ်၊ ပေါက်ကွဲသံကြားတဲ့နားမှာ ရတနာပုံခန်းမပဲရှိတာ၊ နောက်ပစ်ခတ်သံတွေ ကြားရတာ၊ ကျည်လာမှန်မှာစိုးလို့တောင် ပုန်းခဲ့ရသေးတယ်”လို့ ပြောပါတယ်။

ပေါက်ကွဲသံကြားပြီးနောက် သေနတ်ပစ်သံ ၁၀ ချက်လောက်ကြားရပြီး ထိခိုက်မှုအခြေနေကိုတော့ မသိရသေးဘူးလို့ ပြောပါတယ်။

မန္တလေးရတနာပုံခန်းမကို အထူးပြုလုပ်ထားတဲ့ဗုံးနဲ့ တိုက်ခိုက်ခဲ့ပြီး ကင်းစောင့်နေတဲ့စစ်သားတွေ ကိုလည်းသေနတ်နဲ့ ပစ်ခတ်တိုက်ခိုက်ခဲ့တယ်လို့ မြနန္ဒာစစ်ဆင်ရေးက သတင်းထုတ်ပြန်ပါတယ်။

တိုက်ခိုက်မှုမှာ ကင်းစောင့်စစ်သားနှစ်ယောက် ထိခိုက်နိုင်ကြောင်း Acid Army PDF MDY ကလည်း ထုတ်ပြန်ထားပေမယ့် အတည်ပြုနိုင်ခြင်းမရှိသေးပါဘူး။

ဗုံးပေါက်ကွဲခဲ့ပြီး စစ်သားတွေ ပစ်ခတ်ခံရပြီးနောက် အနီးနားရပ်ကွက်တွေမှာ စစ်ကောင်စီတပ်သားတွေ လိုက်လံစစ်ဆေးနေခဲ့ပါတယ်။

မန္တလေး၊ ၆၂လမ်း တွတ်ပီကွေ့မှာလည်း ဇန်နဝါရီ ၂၄ ရက် ညပိုင်းက ဗုံးတစ်လုံးပေါက်ကွဲ ခဲ့သေးတယ်လို့ သိရပါတယ်။

မကွေးတိုင်း၊ ချောက်မြို့က မြန်မာ့စီးပွားရေးဘဏ်ရှေ့မှာ ဇန်နဝါရီ ၁၈ ရက် နေ့လယ်ပိုင်းက မိုင်းပေါက်ကွဲခဲ့တယ်လို့ ချောက်မြို့နယ် ပြောက်ကျားတပ်ဖွဲ့-CGF ကနေ သိရပါတယ်။

ချောက်မြို့ စီးပွားရေးဘဏ်နားမှာ မနေ့ ဇန်နဝါရီ ၁၈ ရက် နေ့လယ် ၁၂ နာရီလောက်မှာ စစ်ကောင်စီတပ်နဲ့ ရဲတပ်ဖွဲ့ဝင်တွေ လာတဲ့လမ်းကို ဒေသကာကွယ်ရေး ပူးပေါင်းတပ်ဖွဲ့တွေက ကြိုတင်စောင့်ဆိုင်းပြီး ပဒေသာမိုင်း ၅ လုံးတွဲနဲ့ ဖောက်ခွဲဖို့ စီစဥ်ခဲ့ပေမဲ့ မိုင်းက Error ဖြစ်သွားလို့ ပြည်သူတွေ ထိခိုက်မှုမရှိအောင် ကြိုပြီးဖောက်ခွဲလိုက်ရတယ်လို့ CGF တာဝန်ခံ ဗိုလ်ဘကွန်းက ပြောပါတယ်။

“ကျနော်တို့တပ်ဖွဲ့တွေက စစ်ဆင်ရေးပြုလုပ်မယ်ဆိုရင် လမ်းပိုင်းဆိုင်ရာ သတိပေးချက်တွေ ထုတ်ပြန်ပြီးမှ လုပ်တာဗျ။ မိဘပြည်သူတွေအနေနဲ့လည်း ကျနော်တို့ရဲ့ ထုတ်ပြန်ချက်တွေကို လိုက်နာပြီး ပူးပေါင်းကူညီဖို့ လိုအပ်တယ်။ နောက်နောင်မှာ လိုက်နာမှုမရှိခဲ့လို့ ထိခိုက်မှုရှိလာခဲ့ရင် ကျနော်တို့ မဟာမိတ်တပ်ဖွဲ့တွေအနေနဲ့ လုံးဝတာဝန်ယူမှာမဟုတ်ဘူး။”

ချောက်မြို့ မြန်မာ့စီးပွားရေးဘဏ်ရှေ့ လမ်းမတလျှောက်ကို ဖြတ်သန်းသွားလာတာတွေ မပြုလုပ်ကြဖို့ ဇန်နဝါရီ ၁၆ ရက်နေ့မှာ ထုတ်ပြန်ခဲ့ပြီး ဇန်နဝါရီ ၁၈ ရက် ညနေပိုင်းမှာ ပြန်လည်သွားလာနိုင်ပြီလို့ ကြေညာချက် ထုတ်ပြန်ထားတယ်လို့ ဗိုလ်ဘကွန်းက ပြောပါတယ်။

ချောက်မြို့ ဒေသခံတယောက်က “ချောက်မြို့ မြန်မာ့စီးပွားရေးဘဏ်နားမှာ မနေ့က မိုင်းပေါက်ကွဲခဲ့တာ ဟုတ်ပါတယ်ဗျ။ ပေါက်ကွဲသံကတော့ အကျယ်ကြီး ကြားလိုက်ရတယ်။ လူတွေကိုတော့ ထိခိုက်မှုမရှိဘူးလို့ သိရတယ်။ အဲဒီပေါက်ကွဲမှုဖြစ်ပြီးတော့ စစ်သားတွေ၊ ရဲတွေ ခြေရှုပ်နေပြီး လမ်းသွားလမ်းလာတွေကို ပိတ်ဆို့စစ်ဆေးတာတွေ ပြုလုပ်ခဲ့ကြတယ်” လို့ ပြောပါတယ်။

ချောက်မြို့ မြို့မစျေးအရှေ့ဘက် တိုက်တန်းမှာလည်း မြတ်ရွှေအိုးအမည်နဲ့ စျေးဆိုင်ဖွင့်ထားတဲ့ ဘိုဘိုကို ဇန်နဝါရီ ၁၇ ရက် မနက် ၁၁ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက သေနတ်နဲ့ ၇ ချက်ပစ်ခတ်ပြီး သုတ်သင်ရှင်းလင်းခဲ့ကြတယ်လို့ သိရပါတယ်။

အဲဒီဖောက်ခွဲစစ်ဆင်ရေးကို ချောက် ပ.က.ဖ၊ King Fighter၊ Hunter Dragon Group၊ ရေနံချောင်း ဖေကံကောင်း အဖွဲ့တို့နဲ့အတူ ပူးပေါင်းလုပ်ဆောင်ခဲ့တာဖြစ်ပြီး ပူးပေါင်းတပ်ဖွဲ့က ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ သိရပါတယ်။

မကွေးတိုင်း၊ ပေါက်မြို့နယ်မှာလည်း ဇန်နဝါရီ ၁၈ ရက် မွန်းလွဲပိုင်းက ရဲစခန်းတခုနဲ့ ပျူစောထီးရွာတရွာ တိုက်ခိုက်ခံရပြီး ရဲတယောက်သေဆုံးကာ ထိခိုက်ဒဏ်ရာရသူ ရှိနိုင်တယ်လို့ မြိုင်ပ.က.ဖနဲ့ ဒေဝယက္ခတပ်ဖွဲ့ကနေ သိရပါတယ်။

ပေါက်မြို့နယ် ဇီးပြားရဲစခန်းကို ဇန်နဝါရီ ၁၈ ရက် မွန်းလွဲ ၁ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက သွားရောက်တိုက်ခိုက်ရာ ရဲတယောက် သေနတ်ထိမှန် သေဆုံးသွားတာကို မြင်တွေခဲ့ရတယ်လို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

ရဲစခန်းကို ဝင်ရောက်စီးနင်းဖို့ ချဉ်းကပ်ခဲ့ပေမဲ့ စစ်ကောင်စီတပ်ဖွဲ့ဝင်တွေနဲ့ ရဲတွေဘက်က လက်ဦးမှုရရှိသွားလို့ ရဲဘော်တွေ ထိခိုက်မှုမရှိအောင် ပြန်လည်ဆုတ်ခွာခဲ့ကြတယ်လို့ ဆိုပါတယ်။

ပေါက်မြို့နယ်၊ တပ်ကုန်းရွာသစ် ပျူစောထီးရွာကို ဇန်နဝါရီ ၁၈ ရက် မွန်းလွဲ ၁ နာရီခွဲလောက်မှာ ဒေသကာကွယ်ရေး တပ်ဖွဲ့တွေက ၆၀ မမနဲ့ ၁၈ လုံး ပစ်ခတ်တိုက်ခိုက်ခဲ့လို့ စစ်ကောင်စီတပ်နဲ့ ပျူစောထီးတွေဘက်က ထိခိုက်မှုရှိနိုင်တယ်လို့ ဒေဝယက္ခတပ်ဖွဲ့ရဲ့ လက်နက်ထုတ်လုပ်ရေး တာဝန်ခံ ဗိုလ်လပြည့်က ပြောပါတယ်။

ဒါ့အပြင် ရွာအစပ်မှာရှိတဲ့ စစ်ကောင်စီတပ်နဲ့ ပျူစောထီးတွေရဲ့ ကင်းတဲတလုံးကိုလည်း မီးရှို့ဖျက်ဆီးခဲ့ပြီး ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ဆိုပါတယ်။

အဲဒီတိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။