မကွေးတိုင်း ပွင့်ဖြူမြို့တောင်ဘက် စစ်ဆေးရေးဂိတ်နားမှာ မေ ၁၈ ရက် မနက် ၈ နာရီခွဲလောက်က မိုင်းခွဲတိုက်ခိုက်ခဲ့တာကြောင့် ရဲ ၂ ယောက် ဒဏ်ရာရရှိခဲ့တယ်လို့ ပွင့်ဖြူ PDF က ပြောပါတယ်။
ပွင့်ဖြူမြို့ တောင်ဘက်ဂိတ်မှာ ရဲတပ်ဖွဲ့က ပြည်သူလူထုကို နည်းမျိုးစုံနဲ့ ပိတ်ဆို့စစ်ဆေး ဒုက္ခပေးနေတာကြောင့် ဖောက်ခွဲတိုက်ခိုက်ခဲ့တာလို့ ပွင့်ဖြူ PDF တာဝန်ခံ ဗိုလ်ကျားကြီးက ဒီဗွီဘီကို ပြောပါတယ်။
“အပြစ်မဲ့ပြည်သူတွေ သွားရေးလာရေး အဆင်မပြေလို့ ဆိုင်ကယ်မှာ အဝေးထိန်းမိုင်းဆင်ပြီး ဖောက်ခွဲတိုက်ခိုက်လိုက်တာပါ။ ရ(--) ၂ ကောင်အနက် တကောင်ကတော့ ကျနော်တို့ရှေ့တင် ပစ်လဲသွားတယ်။ နောက်တကောင်ကတော့ သာမန်ဒဏ်ရာပဲရပြီး ရဲစခန်းထဲကို သယ်သွားကြတယ်။ ပြီးတော့ ဆေးရုံက ဆရာမတယောက်ကို ခေါ်ပြီး ဆေးကုသမှု ခံယူတယ်တော့ ကြားတယ်။ အပြင်းအထန် ဒဏ်ရာရသွားတဲ့ ရဲ(…) တကောင်ကတော့ သေမလားရှင်မလား မသိရသေးဘူး။ ပြည်သူနဲ့မလွတ်လို့ Mission တချို့ ဖျက်သိမ်းလိုက်ရတယ်။ အဲဒီနေ့ကလည်း ရွှေပန်းအုပ်ကြီးအိမ်မှာ ဖောက်ခွဲဖို့ စီစဉ်ပြီးသားကို ပြည်သူနဲ့မလွတ်လို့ ဖျက်သိမ်းလိုက်ရတယ်။ အဲဒီမိုင်းတွေကို စစ်ကောင်စီတပ်သားတွေ တွေ့သွားပြီး ကားတာယာကွင်းနဲ့ ကာပြီး ဖောက်ခွဲ ဖျက်ဆီးလိုက်ကြတယ်။”
ပွင့်ဖြူ PDF အနေနဲ့ ငွေကြေးမပြည့်စုံလို့ အရည်သွေးရှိတဲ့ လက်နက်ပစ္စည်းတွေကို မသုံးနိုင်တာကြောင့် သတ်မှတ်ထားတဲ့ ပစ်မှတ်ကို ထိထိရောက်ရောက် မတိုက်ခိုက်နိုင် ဖြစ်နေတာကြောင့် ပြည်သူ ပူးပေါင်းပါဝင် ကူညီပေးကြဖို့ တိုက်တွန်းထားပါတယ်။
ရဲတပ်ဖွဲ့ဝင် ၂ ယောက် မိုင်းဆွဲတိုက်ခိုက်ခံရပြီး ထိခိုက်ဒဏ်ရာ ရရှိတာနဲ့ ပတ်သက်လို့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။
မကွေးတိုင်းအတွင်း မြို့ဝင်မြို့ထွက်ဂိတ်တွေမှာ အခုလအတွင်း စစ်ကောင်စီတပ်သားတွေ တင်းတင်းကျပ်ကျပ် ပိတ်ဆို့စစ်ဆေးနေသလို အပြစ်မဲ့ပြည်သူ ၅၀ ကျော်လောက်ကိုလည်း နည်းအမျိုးမျိုးနဲ့ စွပ်စွဲပြီး ဖမ်းဆီးထားတယ်လို့ သိရပါတယ်။
မကွေးတိုင်း ပွင့်ဖြူမြို့မှာ ဖေဖော်ဝါရီ ၁ ရက်နေ့မနက်ပိုင်းက အာဏာသိမ်းစစ်တပ်ရဲ့ မိသားစုဝင်တွေစုပေါင်းပြီး တပ်ထောက်ခံပွဲ ပြုလုပ်ခဲ့ကြတယ်လို့ ဒေသခံတွေဆီကနေ သိရပါတယ်။
အဲဒီထောက်ခံပွဲကို စစ်ကောင်စီတပ်သားတွေနဲ့ ရဲတွေ လုံခြုံရေးအပြည့်ယူပြီး ပွင့်ဖြူမြို့နယ် အားကစားကွင်းမှာ အာဏာသိမ်းစစ်တပ်ရဲ့မိသားစုဝင်တွေနဲ့ တပ်ထောက်ခံသူ အင်အား ၁၀၀ လောက်နဲ့ ပြုလုပ်ခဲ့ကြတာလို့ ပွင့်ဖြူမြို့ခံတစ်ယောက်က ဒီဗွီဘီကိုပြောပါတယ်။
ဒီကနေ ဖေဖော်ဝါရီ ၁ ရက်နေ့ဟာ စစ်တပ်က နိုင်ငံတော်အာဏာကို မတရားသိမ်းပိုက်ပြီး နိုင်ငံ့ခေါင်းဆောင်တွေကို ဖမ်းဆီးထောင်ချကာ အပြစ်မဲ့ပြည်သူတွေကို ပစ်ခတ်သတ်ဖြတ်ခဲ့တာ တစ်နှစ်ပြည့်တဲ့နေ့ဖြစ်တာကြောင့် တစ်နိုင်ငံလုံးအတိုင်းတာနဲ့ အသံတိတ် သပိတ်ပြုလုပ်နေကြပါတယ်။
စစ်ကောင်စီဘက်က ပြည်သူတွေ အင်တိုက်အားတိုက်ပါဝင်နေတဲ့ အသံတိတ်သပိတ်ကို ကြောက်လန့်ပြီးတော့ ဖျက်လို ဖျက်ဆီးအနေနဲ့ တပ်ထောက်ခံပွဲ လုပ်ပြနေတာလို့ ပွင့်ဖြူမြို့ခံက ပြောပါတယ်။
“သူတို့တွေ ဘယ်လို နည်းနဲ့ပဲံဖျက်ဖျက်၊ ကျနော်တို့တွေရဲ့ အသံတိတ်သပိတ်က တိုင်းသိ၊ ပြည်သိ ကမ္ဘာသိ အောင်မြင်သွားပြီဗျ။ ဒါကျနော်တို့ ပြည်သူတွေ ဘယ်လောက်ထိညီညွတ်တယ်ဆိုတာ နိုင်ငံတစ်ကာကို ပြသတဲ့ပွဲ ဖြစ်တယ်၊”
အဲဒီတပ်ထောက်ခံပွဲကို ဖလံကျင်း၊ ဆည်တော်၊ ရှောက်တော၊ ကျောင်းကုန်းကြီး၊ မဲဇလီနဲ့ ကုန်းဇောင်ဘက်က စစ်တပ်ထောက်ခံသူတွေလည်း နေ့စားခ ရယူပြီး လာရောက်ပူးပေါင်းခဲ့ကြတယ်လို့ ဒေသခံတွေဆီကနေ သိရပါတယ်။
