လီဗာပူးအသင်းဟာ ပွဲကျပ်ကစားရမယ့်အခြေအနေကြောင့် ဧပြီ ၃၀ ရက် ကစားမယ့် နယူးကာ ဆယ်အသင်း နဲ့ ပွဲစဉ်ကို ပွဲချိန်ပြောင်းလဲကျင်းပဖို့ တောင်းဆိုထားပါတယ်။
လီဗာပူးအသင်းဟာ ဧပြီ ၂၈ ရက်မှာ ဗီလာရီးရဲလ်နဲ့ ချန်ပီယံလိဂ်ဆီမီးဖိုင်နယ် ပထမအကျော့ကစားရမှာပါ။ အဲဒီနောက်ဧပြီ ၃၀ ရက် မွန်းတည့် ၁၂ နာရီခွဲအချိန်မှာ နယူးကာဆယ်နဲ့ အဝေးကွင်းမှာ သွားရောက်ရင်ဆိုင်ရမှာပါ။
ချန်ပီယံလိဂ် ကစားအပြီးမှာ ပွဲပန်းမှုတွေရှိနိုင်တဲ့အတွက် မွန်းတည့် ၁၂ နာရီခွဲမှာ ကစားမယ့်ပွဲစဉ်ကို ညနေပိုင်းမှာ ပြောင်းလဲကစားခွင့်ရဖို့ လီဗာပူးအသင်းက ပရီးမီးယားလိဂ်ကို တောင်းဆိုထားပါတယ်။
အဲဒီပွဲစဉ်ကို BT Sport က တိုက်ရိုက်ထုတ်လွှင့်ပြသဖို့ စီစဉ်ထားပြီးဖြစ်တာကြောင့် ဆွေးနွေးမှုတွေ ဆက်လုပ်သွားရမှာပါ။
“နာရီတိုင်းက ကစားသမားတွေကို ပြန်လည်သန်စွမ်းလာမှုအတွက် လုပ်ငန်းစဉ်တွေပါပဲ။ ကျနော့်တို့ အသင်းကို ပြဿနာတွေဖြစ်စေချင်တယ်ဆိုရင်တော့ နယူးကာဆယ်ကို နေ့လယ် ၁၂ နာရီခွဲ အရောက်ပို့လိုက်ပေါ့ဗျာ။ လိဂ်နဲ့ရုပ်သံထုတ်လွှင့်သူတွေဘက်က ကျနော်တို့ကို ကူညီဖို့ ကြိုးစားသင့်ပါတယ်။ ခုထိတော့ ဘယ်သူကမှ ကူညီတာ မကြားရသေးပါဘူး။ ကျနော်တို့ ဆက်ပြီးစောင့် ကြည့်သွားရပါမယ်” လို့ နည်းပြ ယာဂန်ကလော့ပ်က ပြောပါတယ်။
လီဗာပူးအသင်းဟာ နယူးကာဆယ်နဲ့ပွဲအပြီး မေ ၄ ရက်နေ့ ဗီလာရီးရဲလ်နဲ့ အဝေးကွင်းမှာ ဒုတိယအကျော့ ဆက်ပြီးကစားရမှာ ဖြစ်ပါတယ်။
