စစ်အာဏာသိမ်းပြီးနောက်ပိုင်း ပြန်လည်ဖွင့်လှစ်လာတဲ့ အဝေးသင်တက္ကသိုလ်တွေကို တက်ရောက်မယ့် ကျောင်းသားကျောင်းသူတွေဟာ ကျောင်းအပ်ရာမှာ ကိုယ်တိုင်ကိုယ်ကျ အပ်နှံတာထက် ပွဲစားနဲ့ အပ်နှံတာတွေပိုမိုပြုလုပ်လာပြီး  ကျောင်းအပ်ပေးနေတဲ့ ပွဲစားတွေထံက သိရပါတယ်။

စစ်အာဏာမသိမ်းခင်က ဖွင့်လှစ်တဲ့ အဝေးသင်တက္ကသိုလ်သင်တန်းတွေကို တက်ရောက်တဲ့ ကျောင်းသားကျောင်းသူတွေက ကျောင်းအပ်ချိန်မှာ ကိုယ်တိုင်ကိုယ်ကျ အပ်နှံတာများခဲ့ပေမဲ့ အာဏာသိမ်းပြီးနောက်ပိုင်း ဖွင့်လှစ်တဲ့ အဝေးသင်တက္ကသိုလ်သင်တန်းတွေကိုတော့ ပွဲစားတွေကနေတဆင့် ကျောင်းအပ်တာတွေ ပိုမိုပြုလုပ်လာပြီး ကျောင်းအပ်တဲ့ ဈေးကွက်ကလည်း ပိုမိုကျယ်ပြန့်လာတယ်လို့ ပွဲစားတွေကပြောပါတယ်။

အာဏာမသိမ်းခင်က အဝေးသင်တက္ကသိုလ် ကျောင်းအပ်ခတွေဟာ ကျပ် ၂၀၀၀၀ ဝန်းကျင်သာရှိခဲ့ပေမဲ့ အာဏာသိမ်းပြီးနောက်ပိုင်းပြန်လည်ဖွင့်လှစ်တဲ့ အဝေးသင်တက္ကသိုလ်ကျောင်းအပ်ခတွေကတော့ ကျပ် ၅၀၀၀၀ လောက်အထိမြင့်တက်ခဲ့ပြီး ကျောင်းအပ်ပေးတဲ့ ပွဲစားတွေကိုလည်း ကျပ် ၅၀၀၀၀ လောက်ထပ်မံပေးနေရတဲ့အတွက် အဝေးသင်တက္ကသိုလ် ကျောင်းအပ်ခဟာ ကျပ် ၁ သိန်းလောက်အထိ ကုန်ကျနေတယ်လို့လည်း သိရပါတယ်။

ဒါ့အပြင် စာစဉ်ဖြေဆိုတာတွေကိုလည်း ကိုယ်တိုင်မဖြေဆိုပဲ ကိုယ်စားဖြေဆိုခိုင်းစေတာတွေ လုပ်မယ်ဆိုပါက စာစဉ်ဖြေဆိုခအဖြစ် ကျပ် ၄၀၀၀၀ လောက် ပေါက်ဈေးရှိနေတယ်လို့လည်း သိရပါတယ်။

အခုနှစ်မှာ အဝေးသင်တက္ကသိုလ်တက်မယ်ဆိုရင် ဝိဇ္ဇာဘာသာတွဲအတွက် ကျောင်းအပ်ခ ကျပ် ၄၆၅၀၀ ကုန်ပြီး၊ သိပ္ပံဘာသာတွဲအတွက် ကျပ် ၄၇၀၀၀ လောက်ကုန်ကျမှာဖြစ်ပြီး ဇန်နဝါရီလ ၃၁ ရက်နေ့ နောက်ဆုံးထားကျောင်းအပ်ရမယ်လို့ အဝေးသင်တက္ကသိုလ်တွေက ကြေညာထား ပါတယ်။ 

ထိုင်းတောင်ပိုင်း၊ စူရတ်ဌာနီခရိုင်၊ ထာ့ချနမြို့နယ်ထဲမှာ ပြီးခဲ့တဲ့ ဒီဇင်ဘာ ၃ ရက်က တရားမဝင် မြန်မာနိုင်ငံသား ၂၆ ဦးနဲ့ ပွဲစား ၄ ဦးတို့ကို ဖမ်းဆီးရမိတယ်လို့ စူရတ်ဌာနီ လူဝင်မှုကြီးကြပ်ရေးရဲတပ်ဖွဲ့ လူမှုကွန်ရက်မှာ ဖော်ပြပါတယ်။
နယ်မြေခံ လဝကရဲတပ်ဖွဲ့၊ စစ်တပ်နဲ့ ရပ်ရွာလုံခြုံရေးတွေပါတဲ့ ပူးပေါင်းအဖွဲ့ဝင်တွေဟာ နယ်မြေထဲမှာတရားမဝင်သူတွေ ဝင်လာဖို့ရှိကြောင်း ကြိုတင်သတင်းရလို့ ဒီဇင်ဘာ ၃ ရက် မနက် ၉ နာရီလောက်က ထာ့ချနမြို့နယ် ဆမော်ထောင်းအုပ်စု ဖစ်ချ်ကဆဲမ်လမ်းအနီးမှာ နိုင်ငံကူးလက်မှတ်အထောက်အထားမရှိသူ မြန်မာနိုင်ငံသား ဇီအာရာမန် အပါအဝင် ၂၆ ဦးကို ဖမ်းဆီးရမိခဲ့တယ်လို့ ဆိုပါတယ်။
ဒါ့အပြင် အသက် ၃၃ နှစ်နဲ့ ၃၉ နှစ်ကြားရှိ ထိုင်းအမျိုးသား ၄ ဦးကိုလည်း တရားမဝင် ဝင်ရောက်လာသူတွေကို ခိုလှုံခွင့်ပေးမှု ၊ အပြစ်မှလွတ်ကင်းအောင် ဝှက်ထားမှုတွေနဲ့ အမှုဖွင့်ထားတယ်လို့ ဆိုပါတယ်။
သူတို့တွေဟာ ဘယ်ကလာလို့ ဘယ်ကိုသွားမလဲဆိုတာတော့ သတင်းမှာ အသေးစိပ် ဖော်ပြ ထားခြင်းမရှိပါဘူး။
မြန်မာပြည်ထဲမှာ စစ်အာဏာသိမ်းပြီးနောက် နိုင်ငံရေးမတည်ငြိမ်မှု ၊ စီးပွားရေးကျပ်တည်းမှု၊ လုံခြုံရေးပြဿနာတွေကြောင့် မြန်မာပြည်သူအမြောက်အမြား ထိုင်းနိုင်ငံထဲ ဝင်ရောက်လုပ်ကိုင်နေတာမှာ အဖမ်းခံရတာလည်း နေ့တိုင်းလိုရှိနေပါတယ်။
ဒီမတိုင်ခင် နိုဝင်ဘာ ၂ ရက် ည ၈ နာရီခွဲလောက်ကလည်း ချင်းရိုင်းခရိုင် မယ်ဆိုင်မြို့နယ် ကော်ချန့်အုပ်စုထဲမှာ မြန်မာဘက်ခြမ်း တာချီလိတ်မြို့နယ်ကနေ မယ်ဟုတ်ချောင်းကို ကူးဖြတ်ပြီး ထိုင်းဘက်ခြမ်းဝင်ရောက်ဖို့ ကြိုးစားသူ ၁၇ ဦး ဖမ်းဆီးခံခဲ့ရပါသေးတယ်။
သူတို့တွေဟာ ရှမ်းပြည်မြောက်ပိုင်း ကျောက်မဲကဖြစ်ပြီး ချင်းမိုင်မှာအလုပ်လာလုပ်ဖို့ ပွဲစားကို ၁ ဦးလျှင် ၁၈၀၀၀ ဘတ်ပေးရကာ အဲဒီထဲမှာ အသက် ၁၈ နှစ်အောက် လူငယ် ၂ ဦး ပါလာလို့ အဆိုပါလူငယ် ၂ ယောက်ကို မြန်မာပြည်သို့ချက်ချင်းပြန်ပို့ပြီး ကျန် ၁၅ ဦးကိုတော့ လဝက ဥပဒေနဲ့အရေးယူသွားမယ်လို့ သတင်းမှာ ဖော်ပြပါတယ်။