ထိုင်းတောင်ပိုင်း ဖန်ငခရိုင် ထိုက်မိန်မြို့နယ်ထဲမှာ တရားမဝင် လက်နက်ပြုလုပ်ပြီး အွန်လိုင်းကနေ ရောင်းချနေတဲ့ နေရာတခုကို တာဝန်ရှိသူတွေက မနေ့ စက်တင်ဘာ ၇ ရက်မှာ သွားရောက်စစ်ဆေး ဖမ်းဆီးလိုက်ပါတယ်။

ဒီမတိုင်ခင်က ထိုင်းအရှေ့မြောက်ပိုင်း အီဆန်ဒေသမှာ အုပ်စုဖွဲ့ရန်ဖြစ်နေတဲ့ လူငယ်တွေကို  သေနတ်နဲ့အတူ ဖမ်းဆီးရမိခဲ့ကြောင်း၊ လက်နက်တွေရရှိလာတဲ့ နေရာကို စစ်ဆေးရာမှာ အွန်လိုင်းပေါ်ကနေ မှာယူတာလို့ သိရှိရပြီး ကွင်းဆက်တွေ ဆက်လက်ဖော်ထုတ်ကာ လက်နက်ပြုလုပ်တဲ့နေရာကို သွားရောက်ဖမ်းဆီးရတာလို့ ဖန်ငခရိုင် ရဲမှူးကြီး ထမနွန်း ပယင်းယုန်းက သတင်းထောက်တွေကို ပြောပါတယ်။

အဆိုပါနေရာမှာ ထိုက်မိန်မြို့နယ် နားဒွေအုပ်စု ဘန့်နားဖဲက်ရပ်ကွက် ရာဘာတောထဲက နေအိမ်တလုံးမှာ တည်ရှိပြီး လက်နက်တိုက်အသေးစားသဖွယ် သေနတ်ပြုလုပ်တဲ့ အပိုပစ္စည်း မျိုးစုံ၊ ကျည်ဆန်မျိုးစုံနဲ့ ပြုလုပ်ပြီးသား သေနတ်အလက် ၁၀၀ ကျော်၊ သေနတ်အမှတ်တံဆိပ် စတစ်ကာတွေကို တွေ့ရှိတာလို့ ဆိုပါတယ်။

ပိုင်ရှင်ဖြစ်သူမှာ အသက် ၂၇ နှစ်ရွယ်ရှိ နိုင်းကစ်သီဖွန်း ထတ်န ဖြစ်ပြီး သူဟာ သေနတ်အဟောင်းတွေကို ဖြုတ်ထုတ်ကာ အပိုပစ္စည်းတွေနဲ့ ပေါင်းစပ်ပြီး သေနတ်ပြုလုပ် ရောင်းချကြောင်း၊ သေနတ်အစစ် မဟုတ်ပေမဲ့ ကျည်အစစ်သုံးတာကြောင့် လူကို သေစေနိုင်ကြောင်း၊ နိုင်းကစ် သီဖွန်းဟာ ဖော့ဘွန်းထမ်း ဆိုတဲ့အမည်နဲ့ လူမှုကွန်ရက်သုံးစွဲပြီး သူ့ရဲ့ ဖော့ဘွန်းထမ်းတံဆိပ် သေနတ်တွေဟာ ဘယ်လောက်ကောင်းမွန်ကြောင်း လိုက်ဖ်လွှင့်ကာ ပစ်ခတ်ကြေညာပြခဲ့တယ်လို့ ရဲမှူးကြီးက ဆက်ပြောပါတယ်။

တာဝန်ရှိသူတွေ ရောက်သွားချိန်မှာတော့ နိုင်းကစ်သီဖွန်းဟာ အဲဒီမှာမရှိဘဲ ပြီးခဲ့တဲ့အပတ်ကတည်းက တခြားကို ထွက်သွားပြီလို့ ဆိုပါတယ်။

အိမ်ငှားသူကတော့ သူ့ဖခင်ဖြစ်ပြီး ရဲတွေက ခေါ်မေးရာမှာ ဖခင်ဖြစ်သူက သူက တခြားရပ်ကွက်မှာ နေထိုင်ပြီး အဲဒီနေရာကိုတော့ ပစ္စည်းအဟောင်းတွေ သိုလှောင်သိမ်းဆည်းဖို့ ငှားထားတာဖြစ်ကြောင်း၊ သားဖြစ်သူ ကျောင်းပြီးတော့ အဲဒီမှာနေဖို့ ခွင့်တောင်းခဲ့လို့ ပေးနေခဲ့ပေမဲ့ ဒီနေရာကို မလာရတာကြာပြီဖြစ်ပြီး သားက ဘာတွေလုပ်နေလဲဆိုတာ မသိရဘူးလို့ ထွက်ဆိုထားပါတယ်။

တာဝန်ရှိသူတွေက နိုင်းကစ်သီဖွန်းကို တရားမဝင် လက်နက်ထုတ်လုပ်မှုနဲ့ အရေးယူနိုင်ဖို့ ဆက်လက်စုံစမ်း ဖမ်းဆီးသွားမယ်လို့ ပြောပါတယ်။