ထိုင်းနိုင်ငံအနောက်မြောက်ပိုင်း ကန်ကျနပူရီခရိုင်ထဲမှာ ဇန်နဝါရီ ၂၉ ရက်က တရားမဝင် ဝင်ရောက်လာတဲ့  ကလေး၊ လူကြီးနဲ့ လမ်းပြ တဦးအပါအဝင် မြန်မာနိုင်ငံသား စုစုပေါင်း ၉၄ ဦး အဖမ်းခံခဲ့ရတယ်လို့ Naewna ထိုင်းသတင်းမှာ ဖော်ပြပါတယ်။

နယ်မြေထဲမှာ တဘက်နိုင်ငံကနေ တရားမဝင် ဝင်ရောက်လာသူတွေရှိနေကြောင်း ကြိုတင်သတင်း ရထားချက်အရ နယ်မြေခံစစ်တပ်၊ ရဲ၊ ကျေးရွာလုံခြုံရေးတပ်၊ အုပ်ချုပ်ရေးနဲ့ ကျန်းမာရေးဆိုင်ရာ တာဝန်ရှိသူတွေပါတဲ့ ပူးပေါင်းအဖွဲ့ဟာ စစ်ဆေးရှာဖွေခဲ့တယ်လို့ ဆိုပါတယ်။

မနက် ၇ နာရီလောက်မှာတော့ ထောင်းဖာဖူးမြို့နယ်၊ ထာ့ခနွန်အုပ်စု၊ ဘန့်အူလောင်းကျေးရွာအနီး တောထဲမှာ ပုန်းအောင်းနေသူတွေ တွေ့ရှိကြောင်း၊ သူတို့ထဲမှာ အမျိုးသား ၆၃ ဦး၊ အမျိုးသမီး ၂၄ ဦး၊ ကလေး ၆ ဦး စုစုပေါင်း ၉၃ ဦးနဲ့ လမ်းပြအမျိုးသား ၁ ဦးတို့ ပါဝင်တယ်လို့ ဆိုပါတယ်။ 

စစ်ဆေးမေးမြန်းချက်အရ သူတို့ဟာ မြန်မာပြည် မော်လမြိုင်၊ ရန်ကုန်၊ ပဲခူး၊ ရခိုင်စတဲ့ ဒေသကဖြစ်ပြီး ထိုင်းနိုင်ငံ စမွတ်စခွန်း၊ ရနောင်း၊ ကန်ကျနပူရီနဲ့ ဘန်ကောက်မှာ အလုပ်သွားလုပ်ဖို့ဖြစ်ကာ ပွဲစားခ ၁ ဦးလျှင် ဘတ် ၂၀၀၀၀ မှ ၃၀၀၀၀ ထိ ပေးရမယ်လို့ ဆိုပါတယ်။ 

တာဝန်ရှိသူတွေက သူတို့ကို ကိုဗစ်-၁၉ ရောဂါ ကိုယ်အပူချိန်စစ်ဆေးပြီး လဝကဥပဒေနဲ့အရေးယူဖို့ ထောင်းဖာဖူးမြို့နယ် ရဲစန်းမှာခေါ်ယူထိန်းသိမ်းထားတယ်လို့ သတင်းမှာဖော်ပြပါတယ်။ 

Source- https://www.naewna.com/local/707530

တနင်္သာရီတိုင်း၊ ထားဝယ်မြို့မှာ စစ်အာဏာရှင်ဆန့်ကျင်တော်လှန်တဲ့ လူငယ် နှစ်ယောက်ကို စက်တင်ဘာ ၉ ရက်နဲ့ ၁၀ ရက်တွေမှာ စစ်ကောင်စီက ဖမ်းဆီးလိုက်တယ်လို့ သပိတ်ကော်မတီထံက သိရပါတယ်။ 

ထားဝယ်လူငယ်တွေရဲ့ တော်လှန်ရေးလှုပ်ရှားမှုသပိတ်ကော်မတီဝင် အသက် ၁၈ နှစ်အရွယ် ကိုအောင်ကိုလွင်နဲ့  အသက် ၂၁ နှစ်အရွယ် ကိုဟိန်းဇေအောင်တို့ကို စစ်ကောင်စီတပ်က ဖမ်းဆီးလိုက်တာပါ။

သပိတ်ကော်မတီဝင်တယောက်က “ကိုအောင်ကိုလွင်က လမ်းမှာ အစစ်ဆေးခံရပြီး အဖမ်းခံလိုက်ရတာပါ။ ဒီနေ့မနက်မှ ကိုဟိန်းဇေအောင်ကို ပုံကျွန်းရပ်ကွက်ကအိမ်မှာပဲ ဒီအတိုင်းပဲ လာခေါ်သွားတယ်။ ဖုန်း ၃ လုံးနဲ့ သပိတ်ပစ္စည်းတချို့ပါသွားတယ်။ ဘယ်ကို ခေါ်သွားတယ်ဆိုတာကိုတော့ မသိရသေးဘူး” လို့ ပြောပါတယ်။

အဖမ်းဆီးတွေကြောင့် သပိတ်မှောက် ရဲဘော်တွေအနေနဲ့ နေထိုင်ဖို့နဲ့ လုံခြုံရေးကိစ္စတွေမှာ အခက်ခဲတွေရှိနေတယ်လို့လည်း  သပိတ်ကော်မတီဝင်ကပြောပါတယ်။

ထားဝယ်လူငယ်တော်လှန်ရေးလှုပ်ရှားမှုသပိတ်ကော်မတီဟာ မဟာမိတ်ဖြစ်တဲ့ တပ်ပေါင်းစု သပိတ်ကော်မတီ (ထားဝယ်)နဲ့ ပူးပေါင်းပြီး ထားဝယ်မြို့ပေါ်မှာ စစ်အာဏာရှင်ဆန့်ကျင်ရေး လမ်းပေါ်ထွက် ဆန္ဒပြလှုပ်ရှားနေတဲ့ တော်လှန်ရေး အင်အားစုတခု ဖြစ်ပါတယ်။

ထားဝယ်မြို့ပေါ် ရပ်ကွက်တချို့မှာ အခုရက်ညပိုင်းတွေမှာ ရှောင်တခင်ဝင်စစ်တာနဲ့ အမည်အတိအကျနဲ့ လာရောက်ဖမ်းဆီးတာတွေအပြင် လမ်းမှာတားဆီးစစ်ဆေးရင်း လူမသိ သူမသိ အဖမ်းခံလိုက်ရတဲ့ ဖြစ်စဉ်တွေလည်း ရှိပါတယ်။