ကချင်ပြည်နယ်၊ ဗန်းမော်မြို့ ရောဘတ် ကချင်နှစ်ခြင်းဘုရားကျောင်းဝင်း စစ်ရှောင်စခန်းနားမှာ မတ်လ ၂၈ ရက်နေ့ မနက်ပိုင်းက ဗုံးပေါက်ကွဲခဲ့ပြီးနောက် ဖမ်းဆီးခံရတဲ့ စစ်ရှောင်လူငယ်တဦး ပြန်လည်လွတ်မြောက်လာတယ်လို့ သိရပါတယ်။
ဖမ်းဆီးခံရတဲ့လူငယ်ဟာ စခန်းအပြင်သွားဖို့ ထွက်လာစဥ် စစ်ကောင်စီယာဥ်တန်း မိုင်းဆွဲဖောက်ခွဲခံရပြီးနောက် စစ်ကောင်စီတပ်သားတွေနဲ့ ရဲတပ်သားတွေက ရိုက်နှက် ဖမ်းဆီးခေါ်ဆောင်သွားတာ ဖြစ်ပါတယ်။
“သူက ဓာတ်ဆီသွားဝယ်မယ်ဆိုပြီး စစ်ရှောင်စခန်းထဲကနေ ထွက်လာတဲ့အချိန်ဖြစ်တာ။ အဲဒီအချိန်မှာ ဗုံးပေါက်ကွဲတော့၊ သူကအနားမှာရှိနေတော့ ဖမ်းခံရတာပေါ့။ လွတ်တာတော့ လွတ်လာပြီ၊ ညနေ ၅ နာရီလောက်က လွတ်တာ” လို့ ဒေသခံတဦးက ပြောပါတယ်။
စစ်ရှောင်စခန်းက လူငယ်ဟာ စစ်ကောင်စီတပ်သားတွေနဲ့ ရဲတပ်သားတွေရဲ့ ရိုက်နှက်ဖမ်းဆီးမှုကြောင့် ထိခိုက်ဒဏ်ရာအများအပြား ရရှိခဲ့တယ်လို့သိရပါတယ်။
ဗုံးပေါက်ကွဲတဲ့အချိန် အမျိုးသမီး မီးဖွားလို့ ဆေးရုံကို ထမင်းပို့ဖို့လာတဲ့ အမျိုးသားတဦးလည်း စစ်ရှောင်စခန်းက လူငယ်နဲ့အတူဖမ်းဆီးခံခဲ့ရပြီး လွတ်မြောက်ခြင်းမရှိသေးဘူးလို့ သိရပါတယ်။
ဗန်းမော်မြို့မှာ မတ် ၂၈ ရက်နေ့က တရက်တည်း ဗုံးသုံးလုံးပေါက်ကွဲခဲ့ပြီး စစ်ကောင်စီတပ်ဖွဲ့ဝင်တွေ ထိခိုက်သေဆုံးမှုရှိခဲ့သလို လမ်းသွားလမ်းလာ အမျိုးသမီး ၁ ဦး အသက်ဆုံးရှုံးခဲ့ပြီး ပြည်သူ ၄ ဦး ထိခိုက်ဒဏ်ရာရရှိခဲ့ပါတယ်။
ထားဝယ်ခရိုင်၊ လောင်းလုံးမြို့အနီး သဗျာကျေးရွာက စားသောက်ဆိုင်တစ်ခုမှာ ဖေဖော်ဝါရီလ ၂၂ ရက်နေ့က အဖမ်းခံခဲ့ရတဲ့ လူငယ် ၃၄ ဦးအနက် ၂၉ ဦးကို ဒီကနေ့ နေ့လယ်ပိုင်းမှာ လောင်းလုံးမြို့မရဲစခန်းကနေ အာမခံနဲ့ ခံဝန်လက်မှတ်ထိုးခိုင်းပြီး ပြန်လွှတ်လိုက်တယ်လို့ နီးစပ်သူတွေက ပြောပါတယ်။
မလွတ်ဘဲ ကျန်ခဲ့တဲ့ လူငယ် ၅ ဦးကတော့ အသက် ၁၇ နှစ်အရွယ် ဆယ်တန်းကျောင်းသားတွေဖြစ်ကြပြီး အဖမ်းခံရစဥ် အင်္ကျီအနက်ဝတ်ဆင်ထားတာ၊ သနပ်ခါးလိမ်းထားတာတွေ ရှိတဲ့အတွက် အမှုဖွင့်တရားစွဲခံရနိုင်တယ်လို့ နီးစပ်သူတဦးက ပြောပါတယ်။
စစ်အာဏာရှင်စနစ်ဆန့်ကျင်ရေး “ပြန်လည်စုရုံး နှစ်ခြောက်လုံး” လူထုလှုပ်ရှားမှုတွေ ရှိခဲ့တဲ့ လောင်းလုံးမှာ ဖေဖော်ဝါရီ ၂၂ရက်နေ့က စားသောက်ဆိုင်တစ်ခုမှာ မွေးနေ့ပွဲလုပ်နေတဲ့ အသက် ၁၈ နှစ်ဝန်းကျင်အရွယ်ရှိ လူငယ် ၃၄ ဦးကို စစ်ကောင်စီတပ်သားတွေက လာရောက်ဖမ်းဆီးခဲ့တာ ဖြစ်ပါတယ်။
ပြန်လွတ်လာတဲ့သူ ၂၉ ဦးကတော့ အာမခံနဲ့ ခံဝန်ထိုးတာအပြင် ပိုက်ဆံ သုံးသောင်းခွဲစီ ပေးခဲ့ရတယ်လို့ သိရပါတယ်။
ဖေဖော်ဝါရီ ၂၂ ရက်နေ့က တနိုင်ငံလုံးအတိုင်းအတာနဲ့ ပြုလုပ်ခဲ့တဲ့ "ပြန်လည်စုရုံး နှစ်ခြောက်လုံး" လူထုလှုပ်ရှားမှာ လောင်းလုံးမြို့နယ်အတွင်းက လူငယ်တွေကလည်း သပိတ်စစ်ကြောင်းထွက်တာ၊ လမ်းပေါ် ပန်းပွင့် ပန်းစည်းတွေချတာ၊ သနပ်ခါးလိမ်းတာတွေ ပြုလုပ်ပြီး လှုပ်ရှားမှုမှာ ပါဝင်ခဲ့ကြပါတယ်။
ပုံစာ- လောင်းလုံးလူငယ်တွေ “ပြန်လည်စုရုံး နှစ်ခြောက်လုံး” လှုပ်ရှားမှုပြုလုပ်ခဲ့ကြစဉ်
